Artaza eta Ballonti ibai azpiko tunel batekin lotzeko asmoa du Foru Aldundiak, eta horrek kezka sortu du Artaza inguruan bizi diren auzokideen artean, bai Getxon bai Leioan. Proiektua erredakzio fasean dago orain, eta bertan onartzen dutenez, hainbat eragin kaltegarri izan ditzake: Artaza parkearen eta Artaza-Romo Institutuko patioaren zati baten txikizioa; zarata eta kotxeen joan-etorria handitzea; gaur egungo oinezkoentzako pasabideak desagertzea eta abar.
EH Bildutik ere oso kezkatuta gaude proiektu honek gure udalerrian izan dezakeen ondorioengatik. Tunela Supersurraren bigarren fasearekin lotuta dago (beharrezkoa ez den beste azpiegitura bat), eta auto pribatuaren aldeko apustua egiten du ezbairik gabe. Tunelak 400 milioi euroko aurrekontua izango du (gainkostuak kontuan hartu barik, noski). Gure ustez, mugikortasunean beste lehentasun batzuk ditugu, adibidez, Getxo osoan metroaren ibilbidea lurperatzeko lehenengo urratsak ematea, garraio publikoa indartzea (Parke Teknologikoarekin loturak, aireportua, Leioako kanpusa...). Presioa egiten jarraituko dugu.
Azken hogeita hamar urtetan ikusi dugu zelan joan den pribatizatzen zahar egoitzen esparrua. 90. hamarkadan Hego Euskal Herriko egoitzen %9 inguru zegoen enpresa pribatuen esku, eta gaur egun kontrara, egoitzen %9 inguru baino ez da guztiz publikoa. Izan ere, “publikotasunaren” atzean egoitzetako hainbat zerbitzu azpikontratatu egiten dira: sukaldea, garbiketa… Negozioa bilatu zuten ordurarte administrazioak kudeatzen zuen esparruan, eta ondo aurkitu ere.
Pribatizazioa ez da soilik etiketa bat, berarekin dakar langileen lan baldintzak okertzea, erabiltzaileei ematen zaien zerbitzuaren kalitatea jaistea… Eta horregatik borrokan ikusi ditugu urte luzez zahar egoitzetako langileak; sektore feminizatua izanik, hainbat eta hainbat emakume. Grebak, mobilizazioak… Lan berdina egiteagatik soldata berdina eskatuz, egoitzak publikoak izan behar direla eskatuz.
Getxoko egoera ez da bestelakoa: 75.629 biztanleko gure udalerrian, zeinetan 65 urtetik gorakoen kopurua %26,80-koa den, Udal egoitza publiko bakarra dugu, eta ez guztiz publikoa, lehen adierazi bezala. Jakina da gero eta biztanleria zaharragoa daukagula, eta joera da urte gutxi barru 65 urtetik gorako pertsonen ehunekoa handitzea. Prest egon behar dugu datorkigun erronkari aurre egiteko, pertsonak erdigunean jarriz eta zaintza sistema publikoa oinarri izanik.