Uztail hasieran Getxon eta Uribe Kostan faxistek egindako margozketek agerian utzi dute faxismoari aurre egiten jarraitu behar diogula. EH Bildutik irmo salatu nahi ditugu eraso hauek: "zorras separatistas os vamos a violar" bezalako margozketa matxistak, gazte antolakundeei mehatxuak edota Algortako AEK-ko Lauaxeta euskaltegiaren pertsianan egindako pintadak. Aurrean izango gaituzue!
Zoritxarrez, beste behin ere, ez zen adostasunik egon Getxoko Udaleko bozeramaile batzordean. PPk hasieratik esan zuen ez zuela bat egingo adierazpenekin (frankismoa nostalgiaz oroitzen dute nonbait) eta gainontzeko alderdiek ez zuten onartu EH Bildutik aurkeztu genuen proposamena. Beste bat adostu zuten, gure ustez epelagoa, euskaltegiari beren-beregi babesik adierazten ez ziona eta faxismoari aurre egiteko inolako konpromisorik zehazten ez zuena.
Guretzat ez du zentzu handirik adierazpen instituzionalak onartzeak konpromisoak hartu barik. Paperak dena eusten baitu. Hori dela eta, uztaileko osoko bilkuran bertan hainbat ekimen aurkeztuko ditugu gai honekin lotuta: Udalak urtero ekitaldi bat antolatzea errepresio frankistaren biktimak oroitzeko (tartean, Getxoko Udalean 1937. urtean kargugabetu ziren 42 langileak), Getxoko memoria historikoa lantzeko ikerketa-bekak abiatzea eta abar.
Oroimenik gabeko herria etorkizunik gabeko herria delako, Getxo antifaxista, euskaldun eta feministaren alde borrokan jarraituko dugu!
Orain dela bi hilabete Getxoko Udalak hainbat karpa jarri zituen gure herrian, teorian txertaketa "masiboetarako". Bi hilabetera hiru karpa horiek kendu ditu Udalak (Areetan, Andra Marin eta Algortan egon dira), eta udal iturrien arabera, horrek 130.000 euroko kostua izan du, Udalak ordainduta getxoztar guztion poltsikoetatik.
EH Bildutik hainbat galdera erregistratuko ditugu, jakiteko benetan Getxon ezarritako karpa horietan zenbat txerto jarri dituzten. Hainbat auzokidek salatu duten bezala, getxoztarren gehiengoa BECera deitu dituzte bertan txertoak jartzera, herrian bertan horretarako hiru espazio prest genituen arren. Zergatik ez dira erabili karpak, horretarako jarri baziren? Beharrezkoak ziren benetan? Argi dago koordinazio falta itzela egon dela Osakidetza eta Getxoko Udalaren artean.
Ez da zilegi horrela xahutzea denon diru publikoa. Hori dela eta, EH Bildutik eskatu dugu txertaketa-kanpaina honen datuak publikoki kaleratzea: karpa bakoitzean zenbat txerto jarri diren, jarri den txerto bakoitzak zer nolako kostua sortu duen eta abar. Datuak lortzen baditugu eta zifrak horren baxuak direla egiaztatzen badugu, ardurak eskatuko ditugu Getxoko Udalean edo Osakidetzako zuzendaritzan.
Krisi ekonomiko larria pairatzen ari gara. Ez da onargarria auzokide guztion dirua horrela xahutzea. Beste behin ere, euren kudeaketa negargarriaren adibide argi bat.