ETSk Neguriko tren geltokiko lanak amaitu berri ditu eta laster bere erabileraren zerbitzua lizitatuko du. Gure ustez, eraikinaren erabilera auzokideek erabaki beharko lukete, eta, beraz, eskatuko dugu kontuan hartzeko auzoan bizi direnen iritzia. Edozelan ere, pozten gara, azkenean denon presioari esker lortu dugulako eraikina eraberritzea.
Tamalez, beste eraikin batzuek ez dute zorte berbera izan gurean: Ollarretxe, Arrigunagako jaitsierako eraikinak, Maidagan... Hurrengo hilabeteetan zerrendara gehituko dira Villa Amparo eta Villa Fernanda (Algortako Haurtegi ohia, Eusko Jaurlaritzaren txostenaren kontra gainera) eta Romoko Lope de Vega kaleko eraikin historikoak.
Azken kasu hau bereziki mingarria da, bertan dagoelako Nagusien Etxea eta erabat eredugarria delako bertan egiten ari diren lana: zahartze aktiboa, konpromisoa, autokudeaketa, komunitatearen saretzea... Agian horrek kezkatzen ditu EAJ eta PSE, euren kontroletik kanpo antolatzen ari direlako euren burua. Gogora dezagun, gainera, PSEk hauteskunde-kanpainan esan zuela eraistearen kontra zegoela, muga gorria izango zela eurentzat. Gezurra esan nuen etxean, ni baino lehenago kalean.
Ekainaren 22an 20:00etan Lope de Vegako eraikinak eraistearen kontrako mobilizazioan parte hartuko dugu, beste behin ere. Neguriko tren-geltokiak bezalaxe, Romoko eraikin historiko hauek ere merezi dutelako babestea eta zaintzea, are gehiago gainera jarduerez josita baldin badaude, Nagusien Etxearen kasuan bezala.
Azken osoko bilkuran argi ikusi dugu beste behin ere zein den Udal Gobernuaren jarrera inposatzailea. EH Bildutik lau proposamen aurkeztu genituen, eta oso anitzak izan ziren arren, lauren kontra bozkatu zuten EAJk eta PSEk:
1.- Uda ate jota daukagu eta beste urte batez kotxe pilaketak izateko arriskua dugu Azkorrin. EH Bildutik proposatu genuen autobus zerbitzua sortzea hutsik dagoen Ibarbengoako geltokiaren eta Azkorriren artean, baina EAJk eta PSEk kontra bozkatu zuten, inolako proposamenik aurkeztu gabe.
2.- Galdara komunitarioak dituzten familien faktura 500 eurotara iristen ari da. Errenta kontuan hartuta, diru-laguntzen lerro berezi bat sortzea proposatu genuen, beharra duten familiak laguntzeko. Udal Gobernua ere, kontra.
3.- Salsidu inguruko auzokideak oso kezkatuta daude HAPOk euren etxebizitzetan izan dezakeen eraginagatik. Udalari eskatu diogu eurekin batzeko, informazioa emateko, sentiberatasun eta enpatia apur bat izateko eurekin. Kasu honetan ere, ezezkoa.
4.- Pentsionisten Mugimenduaren aldarrikapenak osoko bilkurara eraman genituen, Elkarrekin Podemosekin batera. Hainbat eskaera zituzten: banka publikoa sortzea, 65 urtetik gorakoentzat erraztasunak banketxeetan eragiketak egiteko... Bada, EAJk, PSEk eta PPk kontra bozkatu zuten.
Gainera, bilkura honetan bertan ere Lope de Vega kaleko proiektuari aurkeztutako alegazioak atzera bota zituzten, eta horrek Romoko Nagusien Etxearen eraisteari atea ireki diezaioke. Maiatzaren 8an parte hartu herri-galdeketan!