EDITORIALA

Gazteek espazio propioak behar dituzte!

| 2022-02-15 14:56:00

Azken hilabeteotan gure herriko gazteen partetik aldarrikapen zehatz bat ikusi dugu kalean: gazteok gazte espazioak behar ditugu. Eta hau zergatik? Zein da gure gazteen errealitatea?

Bada, egungo gazteria etorkizunarekiko inolako espektatibarik garatu ezin duen kolektiboa da. Lan munduan prekarizatuak eta soldata negargarriekin emantzipatzeko ezintasunean aurkitzen dute euren burua. Eta jakin badakigu, bizi proiektu propioa sortu eta garatzeko kabia uztea garrantzitsua dela. Baina nola emantzipatu herri honetan etxebizitzen alokairu prezioaren bataz bestekoa 840€-koa bada? Aisialdiari dagokionean ere, kontsumora mugatua dagoen eredu bakarra dute aukeran. Parkeak eta terrazak bai, baina zein da orduan gazteentzako espazioa? Gure herriak ez die gazteen beharrei erantzuten.

Autonomia, gizartearekiko jarrera aktiboa, lankidetza… gure ume eta gazteen hezkuntzan funtsezkotzat hartzen diren baloreak dira. Baina gure herriko gazteek euren artean antolatu, helburu komun bat zehaztu eta inoren laguntzarik gabe bide hori urratzeko hautua egin dutenean jazartuak izan dira. Sistema honek, eta zehatzago udal gobernu honek, ez die gure herriko gazteei inolako alternatibarik eskaintzen.

Azken udalbatzan gazte hauek hitza hartu eta oso galdera zehatza egin zioten alkateari: zer nolako konpromiso zehatz hartuko duzue egoera honi erantzuteko? Erantzuna ikusteko irrikan gaude.

Urte berriak zer ekarriko zain

| 2021-12-23 16:54:00

Urte bukaerarekin balantzea egiteko momentua heldu da eta oraingoan egiteko moduetan jarri nahi dugu arreta. Ereduen talka bizi dugu Getxon; izan ere, hartzen diren erabakiek jatorri eta interes ezberdinak dituzte. Urte hau ezaugarritu duten talka egoera batzuk aipatu nahi ditugu:

Udalak etxebizitzarako diren bi lursail ditu eta horiekin zer egin erabakitzeke dago. Bada, lursailak saldu eta salmenta librerako etxebizitzak eraikitzea da udal gobernuaren asmoa. Guk bestelakoa proposatzen dugu: orube horiek udal jabegoan mantentzea eta eraikitzekotan, alokairuzko etxebizitza publikoetarako bideratzea ehuneko ehunean. 900 etxebizitza huts baino gehiago daude herrian, mugiarazi ditzagun horiek gehiago eraiki beharrean.

Beste adibide bat Kultur Etxeko lanpostuekin gertatu dena da: udal gobernuak azpikontratazioaren alde egin du berriro, langileen lan baldintzak kaskartzen direla jakin arren. Azpikontratazioarekin bukatu behar dugu!

Azken gertakaria Eusko Jaurlaritzatik datorren lege berria da, “interes orokorreko proiektuei” dagokiena. Udalei autonomia kendu eta EAJren nagusitasuna aprobetxatuta haiek erabakiko dute zer egingo den eta non. Udalek erabakitzeko eskubidea galduko dute, eta zer esanik ez herritarrek; hutsaren hurrena bihurtuko gara. Hau oso larria da.

Bizi eta lan baldintza duinen alde borrokatzen jarraituko dugu, badagoelako egiteko beste modu bat. Aurrera!