AKTUALITATEA

| 2025-04-02

Oskar Matute:

Etxebizitzaren arazoari irtenbideak bilatzea erabateko lehentasuna da EH Bildurentzat. Horretarako, etengabe ari gara lanean. Neurriak hartzen edota tresna gehiago eskuratu nahian. Orain arte, lege-egitura guztia boteretsuenen eta espekulatzaileen mesedetan egon bada ere, tresna berriak eskuratu ahal izan ditugu azkenaldian, EH Bilduren lan eta ekimenari esker ere bai. Orain, Nafarroan ere bai, posible da gune tentsionatuak sortu eta alokairuen prezioei mugak jartzea. Horretan ari gara. Esan bezala, etxebizitzaren arazo larriari konponbideak bilatzeko gorputz eta arima ari garelako lanean.

Marta Diez:

Etxebizitza eskubidea bermatzea EH Bilduren lehen mailako lehentasuna da; eta lehentasun hori gure jardun instituzionalera ere eramaten dugu.

Gure udalerriak oraindik eremu tentsionatu izendatu gabe ere ari gara neurriak proposatzen eta martxan jartzen. Horren adibide da, esaterako, Antsoainen etxebizitzak apartamentu turistiko gisa erabiltzeko lizentziak urtebetez eteteko hartu berri dugun erabakia. Modu honetara, Baztanen edo Iruñean egin bezala, pisu turistikoen ugaritzeak izan ditzakeen ondorio negatiboei aurrea hartu nahi izan diogu, herriko pertsonek etxebizitzak eskuratzeko dituzten zailtasunak arintzeko helburuz.

Izan ere, bizi dugun egoera larria da. 10 pertsonatik ia 9k diote zaila dela Iruñean etxebizitza bat arrazoizko prezioan aurkitzea. Horregatik, arduraz eskura ditugun baliabide guztiak erabiltzen ari gara.

Zentzu horretan, ezin dugu ahaztu Nafarroako udalerrien % 92 eremu tentsionatu izendapenetik kanpo geratu direla. Landa-Eremuaz ari gara, despopulatzen ari den Nafarroaz ari gara. Zonalde horietan ere, etxebizitzaren egoera larria da eta merkatuaren esku-hartzea beharrezkoa da. Izan ere, hutsik dauden edo noizean behin erabiltzen diren etxebizitza asko daude, eta herritar gehienek ezin dituzte etxebizitza horiek eskuratu.

Administrazioei bestelako etxebizitza-politikak egitea ahalbidetuko diguten tresnak eman dizkiguten akordioak bilatzen aitzindariak gara; eta horretan jarraituko dugu, Nafarroa osoan benetan eskubidea bermatuko duten bestelako etxebizitza politikak martxan jartzeko.