Maria Gardek azaldu duenez, suizidio kopurua %27 igo da azken urtean eta Osasun Mentaleko zerbitzuetan kontsultek gora egin dute, haur eta gazteen kasuan bereziki, baina arlo horrek pisua galdu du aurrekontuetan.

| 2021-06-22 11:16:00

“Agerikoa da COVID-19aren pandemiak inpaktu zuzena izan duela, izaten ari dela eta izango duela herritarren osasun emozional zein mentalean, eta inpaktu hori bortitza izaten ari da kasu askotan, Osasun Sailak berak emandako datuek erakusten dutenez”. Maria Garde EH Bilduko legebiltzarkideak inpaktu hori aztertzea eta diagnostiko bat egitea proposatuko du etzi Osoko Bilkuran. “Diagnostiko zabal eta sakon bat alorreko eragile eta profesionalen eskutik, berariazko egoera eta kolektiboak kontuan hartuta. Jakin behar dugu zehazki zer gertatu den, zer gertatzen ari den, eta zer espero dezakegun. Egoeraren argazki on bat izatea ezinbestekoa izango da gure osasun sistema egokitu ahal izateko, neurriak hartzeko, tamainako erantzuna emateko”.

Garderen aburuz, diagnostiko hori are premiazkoagoa da kontuan hartuta udazkenean Jaurlaritzak Osasun Publikoaren Lege Proiektua aurkeztuko duela, “lege horrek, besteak beste, Osasun Mentala indartzeko balio behar duelako”.

Datuek horren premia erakusten dute, bai eta “egoera oso larria eta kezkagarria” dela ere. “2020an suizidioek %27 egin zuten gora. 187 pertsonek bere buruaz beste egin zuten Araba, Gipuzkoa eta Bizkaian, azken lau urteotako zifrarik altuena. Hau da, gurean bi egunetik behin pertsona bat suizidatzen da. 2019tik 2020ra bitartean Osasun Mentaleko kontsultek ere gora egin zuten nabarmen, ia %13 gehiago, eta azken hilabeteotan profesional askok ohartarazi dute haur eta gazteen kasuan gainezka egon direla larrialdiak, unitateak eta zerbitzuak. Kasu askotan bikoiztu egin dira elikadura-jokabidearen nahasmenduak, bereziki nesken eta emakumeen artean, eta, orokorrean, depresio eta antsietate kasuek gora egin dute haur, nerabe eta gazteen artean”.

Suizidioak eta kontsultak ugaritzeak ez du ekarri, hala ere, Osakidetzak ematen duen erantzuna indartzea. EH Bilduko legebiltzarkideak salatu duenez, “datu ofizialen arabera, azken hamarkadan Osasun Mentalak pisua galdu du osasungintzako aurrekontuetan. Zehazki, %10 egin du behera Osasun Sailak Osasun Mentalari bideratzen dion aurrekontuaren portzentajeak”.

EAJk eta PSEk agerian utzi dute ez dutela ustelkeriaren kontra tinkotasunez jarduteko borondaterik

Gobernukideek Ustelkeriaren Aurkako Bulegoa sortzeko EH Bilduren proposamena tramitatzeari uko egin diote. Duela bi urte horren alde agertu zirela gogorarazi du Josu Estarronak, eta iritzi aldaketa horren oinarrian EAJ zipriztindu duten kasuak daudela esan du.

| 2021-06-17 11:48:00

Ustelkeriaren Aurkako Bulegoa sortzeko EH Bilduk proposatutako legea tramitera onartzeari uko eginik, EAJk eta PSEk agerian utzi dute ez dutela borondaterik jardunbide desegokiak, ustelkeria, jokamolde ez etikoak, faborezko tratuak, sare klientelarrak, kartelak eta entxufismoa desagerrarazteko. Josu Estarronak argi esan die: “Edo ustelkeriaren aurka zaude edo konnibentea zara”. Proposamena eztabaidatzeari ere uko egin diote EAJk eta PSEk, eta, hala, parlamentarismoaren kontrako jarrera hori ohiko bihurtzen ari dira Legebiltzarrean EH Bilduren ekimenak deseroso egiten zaizkienean.

Estarronak Ustelkeriaren Aurkako Bulego baten beharra aldarrikatu du legez kontrako jarduera ustelak eta praktika desegokiak ikertu, jazarri eta zigortzeko egun existitzen diren mekanismoak ez direlako ez nahikoak, ez eraginkorrak. Hori hala dela argi utzi du duela egun gutxi Iparraldeko Kartelak, euskal administrazioak eta kontsultoria enpresa garrantzitsu ugari inplikatu dituenak.

EH Bilduko legebiltzarkideak koherenteak ez izatea leporatu die Jaurlaritzari, EAJri eta PSEri, duela bi urte bulegoa sortzeko proposamena tramitatzearen alde agertu zirelako eta gaur, aldiz, blokeatu dutelako. Estarronaren aburuz, iritzi aldaketa horren muinean bi urte hauetan ezagutu diren epai batzuk daude. Batetik, De Miguel auziko epaia, Arabako EAJko kupula ustelkeriaren erdigunean kokatu zuena; bestetik, Balenciaga auzia, Getariako alkate ohiak, bera ere EAJkoa, lau urteko espetxe zigorra jaso baitu, eta hori guztia gaurkotasun osoa duen kontsultoria enpresen kartela ahaztu gabe. “Batzuek normaltzat jotzen dute alderdi politiko zehatz batetik gertu egoteagatik abantaila izatea diru-laguntza, kontratu, lizitazio edo lanpostu publikoak lortzerako orduan, baina hori, ohikoa izanda ere, ez da normala eta ezin da normalizatu”.

Espazio irekietan maskara erabiltzeko obligazioa arintzeko eskatu dio EH Bilduk Osasun Sailari

“Txertaketa kanpaina aurrera doan honetan urrats bat eman behar da maskararen erabilerari dagokionez”, esan du Rebeka Uberak. 61 eta 69 urte arteko adin tartean txertoaren bigarren dosia lehenago jartzea proposatu du, Delta aldaeraren balizko inpaktua gutxitzeko.

| 2021-06-16 15:43:00

Txertaketa kanpainak hartu duen erritmoa aintzat hartuta, EH Bildu espazio irekietan maskara erabiltzeko obligazioa berraztertu eta arintzearen alde agertu da, eta Rebeka Uberak hala proposatu dio Gotzone Sagardui Osasun sailburuari azken honek Legebiltzarrean egin duen agerraldian. Fernando Simonek espazio irekietan maskara erabiltzeko obligazioaren bukaera gertu zegoela esan zuen duela bi aste, Pedro Sanchezek horixe bera berretsi du gaur bertan eta EH Bilduko legebiltzarkideak ere neurri hori arintzeko garaian sartu garela uste du. “Orain arteko ebidentzia zientifikoetan oinarrituta, zer zentzu dauka maskara erabiltzea espazio irekietan, jende pilaketarik ez dagoen tokietan? Ez du zentzurik Urkulluk esatea kalean ere maskara luzerako daukagula; hainbat eremutan maskararen erabilera kentzeko garaia izan daiteke eta urrats bat eman beharko luke Jaurlaritzak”.

Horren ildotik, Uberak zentzugabetzat jo du datorren astean EAJk, PSEk eta Elkarrekin Podemos-IUk onartuko duten Pandemiaren aurkako Legean maskararen erabilpena derrigortzea. “Legea guztiz gaindituta dago jada eta desfasaturik geratuko da ezarri beharreko prebentziozko neurriei dagokienean ere”.

Delta aldaera

Halaber, EH Bilduk koronabirusaren Delta aldaerari aurre egiteko proposamen bat egiteko baliatu du Sagarduiren agerraldia. Zehazki, aldaera hori erkidegora iritsi dela eta aldaera britainiarra baino askoz kutsagarriagoa dela kontuan hartuta, Uberak 61 eta 69 urte arteko adin tartean txertoaren bigarren dosia aurreratu dadila eskatu dio Osasun sailburuari, “etor daitekeenari aurrea hartu eta herritarrak ahalik eta hobekien babesteko”. Adin tarte horretan AstraZeneka txertoa erabili dela eta kasu horietan pauta osatzea funtsezkoa dela azaldu ostean, EH Bilduko legebiltzarkideak bigarren dosia aurreratzea beharrezkotzat jo du. Hala, bigarren txertoa jartzeko 12 astez itxaron ordez, epe hori laburtzea eta zortzigarren astean jartzea proposatu du, “hainbat tokitan egiten hasi diren moduan, Delta aldaeraren aurrean babes handiagoa izateko”.

Ikus-entzunezkoen Euskal Kontseilua sortzeari uko eginik, anomalia bati eustea erabaki du Jaurlaritzak

EH Bilduk epe motzera soilik begiratzea egotzi dio Lakuari, Kontseilua sortzearen aurka agertzeagatik. Organo hori behar-beharrezkoa da komunikazioaren askatasuna, informazioaren aniztasuna eta neutraltasuna eta baliabide publikoen independentzia bermatzeko.

| 2021-06-15 15:42:00

Beste behin ere, Jaurlaritzak ez du neurria eman eta epe motzeko begirada duela erakutsi du gaur, herri honen behar eta erronka estrategikoei heldu ezinean. Izan ere, Ikus-entzunezko Hedabideen Euskal Kontseilua eratzearen kontra agertu da, EH Bilduk lege proposamen baten bitartez eskatutako organo hori beharrezkoa ez delakoan.

Jasone Agirre Garitaonandiaren iritziz, “erabaki horrekin Urkullu Gobernua anomalia batean instalaturik jarraitu nahi du, Europako testuinguruan anomaloa baita ikus-entzunezkoen kontseiluen beharra ukatzea”. EH Bilduko legebiltzarkideak azaldu duenez, “Europako Batzordeak berak gomendatu du organo horiek sortzea, ikus-entzunezkoen alorrean komunikazioaren askatasuna, informazioaren aniztasuna eta neutraltasuna eta baliabide publikoen independentzia bermatzeko; hala, Europar Batasunean ohikoak dira kontseilu horiek eta, Estatu espainoletik atera gabe, Kataluniako Ikus-entzunezkoen Kontseilua erreferente bilakatu da, adibidez”.

Euskal Herria bezalako Estaturik gabeko nazioetan areagotzen da horrelako organoen beharra, azpimarratu du Agirre Garitaonandiak, “kultura, hizkuntza eta ezaugarri komunikatibo propioak edukitzetik eratortzen diren berezko arazo eta beharrei, Estatu mailako eremuetan aintzat hartzen ez dituztenei, alegia, egoki erantzutea ahalbidetzen dutelako”. Horren haritik, ohartarazi du komunikazio mundua paradigma aldaketaren garai batean murgildurik dagoela eta horrek are premiazkoagoa egiten duela Ikus-entzunezkoen Kontseilua eratzea. “Jaurlaritzak, ordea, zaharkiturik dauden parametroetan bilatzen du erosotasuna, komunikazio munduaren errealitate berriek planteatzen dizkiguten erronkei heltzera ausartu gabe”.

EH Bilduk eskatutako babes neurriak baztertuz, EAJk eta PSEk bizkarra eman diete pandemiak kaltetutako sektoreei

EAJk eta PSEk atzera bota dituzte koalizioak Pandemiaren Aurkako Lege Proposamenari eginiko zuzenketa guzti-guztiak eta uko egin diote, beraz, krisiak kaltetutako sektoreei laguntzeari eta osasun sistema indartzeari.

| 2021-06-15 14:00:00

Pandemiaren aurkako Lege Proposamenaren tramitazioaren baitan, ponentzia parlamentarioak eztabaidatu ditu gaur goizean oposizioko taldeek aurkeztu dituzten zuzenketak, baina EAJk eta PSEk atzera bota dituzte EH Bilduk aurkeztu zituen 72 zuzenketak, guzti-guztiak. Koalizioak Gobernuko alderdiengana jo zuen pasa den astean, bere ekarpenak onartzeko prest egon zitezkeen esploratzeko, eta erantzuna argia izan da gaur. Ez EAJk ez PSEk ez dituzte legearen edukiak EH Bildurekin adostu nahi.

Rebeka Uberak azpimarratu du EH Bilduren zuzenketek bi helburu nagusi zituztela; bata, osasun sistema indartzea eta egituratzea etorkizunean balizko pandemiei edota osasun larrialdiei ahalik eta hoberen erantzun ahal izateko; bestea, pandemiak kaltetutako sektoreak babesteko neurriak txertatzea legean.

Koalizioaren iritziz, Pandemiaren aurkako Legeak herritarren eskubideak eta egoera ekonomiko eta soziala hartu behar ditu kontuan segurtasun bitala emateko eta, hortaz, funtsezkoa da legeak zaintza eta babesa bermatzeko neurriak zehaztea, pandemia honetan gertatu dena errepikatu ez dadin. Izan ere, osasun larrialdi bati aurre egiteko hartu beharreko neurri batzuk oso kaltegarriak izan daitezke hainbat sektorerentzat (autonomoentzat, enplegu erregulazioan dauden langileentzat, enpresa txiki eta ertainentzat, etab.) eta legeak guztiak babestu behar ditu, gutxieneko diru-sarrerak bermatuta. Hori izan da EH Bilduren proposamen nagusietariko bat, baina EAJ eta PSE kontra agertu dira eta, hala, bizkarra eman diete pandemiak kalte nabarmena egin dien sektore horiei.

• «
• 1
• 2
• 3
• 4
• 5
• 6
• 7
• 8
• ...
• 37
• 38
• »