Bizkaia

Bea Ilardia: «lan duinean oinarritzen den garapen ekonomikoaren alde egiteko unea da»

Izaskun Duquek eta Bea Ilardiak Bizkaiko legegintzaldi erdiko balantzea aurkeztu dute gaur, ekainak 22, Bizkaiko egoitzan, Bilbon.

| 2021-06-22 13:50:00

Izaskun Duque, batzarkide eta Politika Instituzionaleko arduradunaren esanetan, pandemiak agerian utzi ditu benetan Bizkaiko herritarren beharrak, eta agerian geratu dira Bizkaiko Foru Aldundiaren politiken gabezia guztiak. "Zerbitzu publiko duinak eta kalitatezkoak ezinbestekoak dira egoera honi aurre egiteko. Eta, zoritxarrez, Bizkaian ere gabezia larriak ditugu ", dio.

Bea Ilardia EH Bilduk Bizkaiko Batzar Nagusietan duen bozeramailearen ustez, "Bizkaiko Foru Aldundiaren gabeziek agerian utzi dute zaintzaren arloa indartzeko unea dela, lan duinean oinarritutako garapen ekonomikoaren alde egiteko unea dela eta trantsizio ekologikoa bultzatzeko unea dela".

"Adinekoen egoitzak izan dira EAJren Bizkaiko ereduaren erakuslerik argiena. Pribatizazioa eta langile falta, eta arazoak daudenean ezkutatzea eta informaziorik ez ematea", esan du Ilardiak.

Izaskun Duquek dioen bezala, enpresa pribatuek zerbitzuak kudeatzen dituzten adibideetako batzuk egoitzak, autobus-lineak, garbiketa eta ekintzaileentzako zentroak dira.

"Fiskalitateari dagokionez, aldaketa fiskalerako proposamenak egin dituzte nazioarteko hainbat erakundek. Baina EAJk eta PSEk zergak aldatzeko gure proposamenak baztertu dituzte, adibidez, Covid tasa, eta fiskalitateari buruzko edozein eztabaida eragotzi dute. Behar sozial handiagoak daude eta sistema fiskal berri bat behar dugu diru-sarrerak handitzeko", esan du bozeramaileak.

Horregatik, EH Bilduk esan du "EAJren eredutik haratago Bizkaia bidezkoagoa, Bizkaia hobea, egiteko beste modu bat dagoela. EH Bildutik Bizkaia egiteko beste modu bat dagoela erakusten ari gara ".

Asier Vega: «EH Bilduren egiteko moduak gero eta jende gehiago biltzen du, baita Bizkaian ere»

EH Bildu Bizkaiak bere zuzendaritza berria aurkeztu du gaur goizean, Bilbon.

| 2021-06-13 19:29:00

Gaur goizean, Bilbon ospatutako ekitaldian, EH Bilduk Bizkaiko zuzendaritza berria aurkeztu du. Bertan Asier Vega herrialdeko arduradun politikoak adierazi du Bizkaiko EH Bilduren “egiteko moduak gero eta jende gehiago batzen duela agerikoa da. Bizkaia egiteko beste modu horrekin gero eta jende gehiagok konektatzen du. Lortutako emaitzak ez dira, eta, kasualitate hutsa. Emandako urratsen ondorioa baino ez dira”.

 

Vegaren ustez, EH Bilduren proiektuak anitza den Bizkaia bati erantzuten diola eta horren adierazlea dela azken urteetan hirigunean izandako lorpenak.

 

Ildo beretik, Maddalen Iriarte EH Bilduko bozeramaileak azpimarratu du herrialdearen garrantzia. “Nik eta Bizkaiko EH Bilduren komunitatea osatzen dugun guztiok mezu bat helarazi nahi diogu gaur Bizkaiko eta Euskal Herri osoko gizarte osoari: EH Bildu goraka egiten ari den indar politikoa da, hauteskunde bakoitzean boto kopuruan eta ehunekoan gora egiten du; Euskal Herrian eta Madrilen gero eta indar erabakigarriagoa da; politika publikoak birarazteko gai den indar politikoa da, gehiengoaren zerbitzura jartzeko. Eta ziurtatzen dizuet joera horri eutsiko diogula. Hazten eta batzen jarraituko dugu, eta herritarren bizi-baldintzak hobetzen, Bizkaian ere bai”, azpimarratu du.

 

Ekitaldian EH Bildu Bizkaiaren zuzendaritza berria osatzen duen taldea aurkeztu da. Talde hori honako pertsonek osatzen dute:

 

- Asier Vega Isasi, Bizkaiko Koordinatzailea

- Izaskun Duque Santacoloma, Bizkaiko Politika Instituzionaleko arduraduna

- Nahia Sanz Gardeazabal, Bizkaiko Udalgintza arduraduna

- Arkaitz Unzueta Leginagoikoa, Bizkaiko Antolakuntza arduraduna

- Andrea Bosch Alfaro, Bizkaiko Komunikazio arduraduna

EH Bilduko Bizkaiko zuzendaritza berriak %90,62ko babesa jaso du

Asier Vega Isasik aurkeztutako lan taldeak zuzenduko du hurrengo lau urteetan EH Bildu Bizkaia

| 2021-06-05 12:29:00

EH Bilduko Bizkaiko zuzendaritza berriak %90,62eko babesa jaso du. Azken bi egunetan egin den bozkaketa telematikoaren emaitzen arabera, Asier Vega Isasik proposatutako lan taldeak %90,62ko babesa jaso du, %2,38 ezeko bozka eta %7 boto zuri.

Hortaz, behin betiko datuen arabera, EH Bilduko Bizkaiko Koordinazio lan talde berria 3 emakumek eta 2 gizonek osatuko dute. Hurrenez hurren, hauek dira hautagaitza hori osatzen duten pertsonak:

- Asier Vega Isasi, Bizkaiko Koordinatzailea

- Izaskun Duque Santacoloma, Bizkaiko Politika Instituzionaleko arduraduna

- Nahia Sanz Gardeazabal, Bizkaiko Udalgintza arduraduna

- Arkaitz Unzueta Leginagoikoa, Bizkaiko Antolakuntza arduraduna

- Andrea Bosch Alfaro, Bizkaiko Komunikazio arduraduna

Lan talde berriaren aurkezpena ekainaren 13an egingo da.

Lurralde politika eta plangintza estrategikoa eskatu ditu EH Bilduk Ezkerraldera inbertsio industriala erakartzeko

EAJk eta PSEk Ezkerraldearekiko ahanztura instituzionala eta tertziarizazioaren aldeko urteetan nahita egindako apustua gaitzetsi ditu. Horren aurrean, lurzoruaren kudeaketa bere katalogazio industrialaren araberakoa izan dadila aldarrikatu du EH Bilduk, inbertsioak erakartzeko eta eskualdeari etorkizun duina bermatzeko.

| 2021-06-05 12:12:00

Plangintza, lurralde-politika eta industriaren aldeko apustua Ezkerraldean. Horixe eskatu du gaur EH Bilduk Sestaon antolatu duen, eta ehunka lagunak Bildu dituen mobilizazioan. Sinbolikoki Labe Garaiak Navalekin bat egin duen manifestazio hau hasi aurretik egindako adierazpenetan, Iker Casanova legebiltzarkideak "Ezkerraldean inbertsio industrialak erakartzeko plangintza estrategikoa" eta "dagokion karakterizazio industrialaren araberako" lurzoruaren kudeaketa eskatu die erakundeei, bereziki Eusko Jaurlaritzari.

Casanovak gaitzetsi egin du erakundeek “Euskal Herriko industriaren motorra izandako" eskualde hau "nahita" ahaztu izana. Izan ere, gaur egun Ezkerraldean daude EAEko merkatalgune handien herena baino gehiago, eta, legebiltzarkide subiranistaren arabera, datu hau ez litzateke posible izango azken hamarkadetan "EAJk eta PSEk tertziarizazioaren aldeko apustu etengabea" ez balitz. Mobilizazioak eduki sinboliko handiko bi leku elkartu ditu, Labe Garaia eta Naval esan bezala. Labe Garaia bezalako iragan industrial handiaren aurrean, industria berritu eta ingurumena eta pertsonak errespetatzen dituen industria erakartzeko beharra aldarrikatu du EH Bilduk. “Gizarteak egin behar dituen trantsizio energetiko, digital eta ekologikoak, eskualderako aukera-elementu gisa aprobetxatzen” jakin behar dela adierazi du bozeramaile subiranistak.

Bestalde, mobilizazioaren amaiera izan den Navaleko lur sailari buruz, Iker Casanovak "Ezkerraldeko industriari bultzada bat emateko aukera handia" dela aldarrikatu du. Ildo horretan, eremu hau gune logistiko handi bat bihurtzea eragozteko beharra aldarrikatu du, eta, horren ordez, lur horietan jarduera industrialak ezartzea eskatzen zuen Legebiltzarraren agindua betetzea eskatu du legebiltzarkide subiranistak. "Eusko Jaurlaritzak lur horietan jarduera industriala mantentzeko presioa egingo zuela esan ziguten, baina badirudi ezta ere. Atzo bertan jaso genuen lursailak VGPri esleitu izana berresten duen ebazpenaren berri, bere jarduera logistikara eta merkantzien banaketara mugatuko duena", bukatu du Casanovak.

EH Bilduk Bizkaiko Foru Aldundiari eskatu dio hobari-sistema bat ezar dezala AP-68ko ordainlekuan, Bizkaiko zatian

Neurri horri esker, Hego Uribek jasaten duen diskriminazioarekin amaitu eta BI-625 errepidetik kamioien trafikoa murriztuko litzateke

| 2021-06-01 14:32:00

Gaur goizean, EH Bilduko hainbat arduradunek eskatu dute Aldundiak hobari-sistema bat ezar dezala AP-68 autobideko ordainlekuan, Bizkaiko zatian.


Prentsaurreko baten bidez, Itziar Biguri Urduñako alkateak eta Raul Mendez batzarkideak zonaldeko milaka pertsonari eragiten dien diskriminazio egoerarekin amaitzea eskatu dute.
«AP-68 autobidea ordainpeko bide bat denez, eta Urduña eta Bilbo arteko BI-625 errepidearen alternatiba bakarra, ordainketa ekonomiko handia da Hego Uriben bizi diren pertsonentzat», gogorarazi du Bigurik, eta azpimarratu du EH Bilduk 2017tik eskatu duela Aldundiak egoera hori arintzeko neurriak har ditzala, tarifa laua edo beste hobari mota bat aplikatuta.


«2017ko urtarrilaren 1etik Bizkaian gehienez 30 euro ordaintzen dira hilean Supersur, AP-8 eta Artxandako tuneletan zirkulatzeagatik (33,45 euro hilean 2021ean). Ordutik, orain dela 4 urte, Urduña, Arakaldo edo Arrandukiaga bezalako herrietako hautetsiek diskriminazio-egoera horrekin amaitzeko eskatzen dute. Bizkaia osorako antzeko hobari-sistema bat eskatzen dugu, lurraldeko gainerako autobideetako erabiltzaileen eskubide berberak bermatzeko», adierazi du Mendezek.


BI-625 errepidea arintzeko neurria eta erakundeen arteko akordioa


EH Bilduren arabera, hobariek edo tarifa lauak autobidea erabiltzera bultzatuko lituzke pertsona asko. Kamioiek autobidea gehiago erabiltzeak zirkulazioa arinduko luke BI-625 errepidean, Arrigorriaga, Ugao-Miraballes, Arrankudiaga eta Arakaldo udalerrietan.

 

Gainera, Mendezek azpimarratu duenez, «2012ko ekainaren 1etik, Arabako Foru Aldundiaren lurralde horretan bizi diren eta Bizkairantz egunero erabiltzen duten pertsonei hobariak ematen ari zaie, eta irailaren 1etik aurrera, Laudiotik Bilbora doan AP-68 autobidearen tartean, hilean 15 bidaia edo gehiago egiten dituzten pertsonei % 60ko hobaria emango zaie bidesariaren prezioan. Araban egingarria bada, zergatik ez Bizkaian?».


EH Bilduren iritziz, neurri horiek ezin dira atzeratu 2026an emakida amaitu arte, eta beharrezkoa da lehenbailehen neurriak hartzea diskriminazio argiko egoera batekin amaitzeko.

ALBISTEAK

Asier Vega Isasik aurkeztutako lantaldeak EH Bildu Bizkaiko Mahai Politikoaren babesa jaso du lurraldeko zuzendaritza bere gain hartzeko

2021-05-28 12:11:00

Ekainaren lauaren eta bostaren artean bozkatuko den hautagaitza hiru emakumek eta bi gizonek osatzen dute

Edozein proposamen alboratzea eta kontrol lana oztopatzea leporatu dio oposizioak Bizkaiko Foru Aldundiari

2021-05-26 12:43:00

Bea Ilardia EH Bilduren bozeramaileak azpimarratu du gobernuak ez duela kontuan hartzen oposizioak egindako edozein proposamen edo ekarpen.

EH Bilduk azalpenak eskatu ditu Bizkaiko instituzio eta enpresa publikoetan aholkularitza-enpresen kartelarekin egondako kontratazioen inguruan

2021-05-13 13:39:00

Merkatu eta Lehiakortasun batzordeak salaketaren ondorioz EH Bildu Bizkaiak iruzur hau ekiditeko kontrol tresnen inguruan galdetuko dio Unai Rementeria Ahaldun Nagusiari

EH Bilduk azalpenak eskatu ditu Lantik Foru Enpresan egindako kargu aldaketengatik

2021-05-10 13:49:00

Kargu aldaketa Errenta Aitorpenaren kanpainan izandako arazo larriekin loturatik daukan argitu nahi du EH Bilduk