Gipuzkoa

Unai Iraolak batzarkide kargua hartu du

Alegiarrak, koordinazio lanak egiteaz gain, sustapen ekonomiko, landa garapen eta trantsizio ekologikoko gaiak jorratuko ditu.

| 2021-01-26 11:20:00

Unai Iraolak gaur hartu du batzarkide kargua. Jon Zulueta andoaindarrak arrazoi pertsonalengatik bere batzarkide akta uztea erabaki ondoren, Iraolak hartuko du bere tokia Gipuzkoako Batzar Nagusietan, Oria-ko barrutiko hurrengo zerrendakide gisa.

 

“Ustekabean baina gogotsu hartuko dut lan berria”, adierazi du Iraolak eta gaineratu du: “Bizitzen ari garen uneak guztion onena ematea eskatzen du eta horretarako prestutasun osoa daukat”.

 

Iraolak (Alegia, 1983) Industria Ekipoen Mantenu Teknikari eta Gizarte Hezitzaile ikasketak ditu. 2011n hartu zuen Alegiako alkate kargua eta 2015ean alkategai aurkeztu eta berriro ere alkate aukeratu zuten alegiarrek. Tolosaldeko alkateen mugimenduan parte hartu izan du.

 

2019az geroztik, zinegotzi lanetan ari da Alegian. Horrez gain, EH Bilduko Gipuzkoako Mahai Politikoko kidea da Instituzio Nagusien arduradun gisa, eta Donostia eta Batzar Nagusien koordinazio lanak egiten ditu.

Zaintza sistema indartzeko neurriak proposatu eta COVID-19aren txertoaren ezarpenaz azalpenak eskatu dizkio EH Bilduk aldundiari

Gipuzkoako gizarte zerbitzuez kezka agertu du Estitxu Elduaien EH Bilduko batzarkideak. Maite Peña diputatua interpelatu du egoitza eta eguneko zentroetan txertoaren protokoloen ezarpena nola bermatuko den azal dezan, eta egungo zaintza sistema agortuta, beste eredu bat beharrezkoa dela nabarmendu du.

| 2021-01-25 10:27:00

COVID-19aren hirugarren olatuaren atarian, Gipuzkoa eremu gorrian sartzear, Estitxu Elduaien batzarkidea “bereziki kezkatuta” agertu da gizarte zerbitzuen egoerarekin. Adineko eta menpeko pertsonen babeserako sistema publikoa prestatu gabe dagoela salatu du: “Horren adibide dira Aretxabaletako egoitzan hamar egunean hamahiru pertsona hil izana, edo Oiartzungo eguneko zentroan txertoarekin gertatutakoa. Gabeziak badaude, eta kontrol publikoaren falta agerikoa da”.

Datorrenari aurre egin eta zaintza sistema indartzeko, EH Bilduk proposamen zehatzak egin ditu. Hasteko, txertoaren protokoloen inguruko azalpenak eskatu dizkio Gizarte Politiketako Foru Diputatu Maite Peñari. Izan ere, Oiartzungo Aiton-Etxe eguneko zentroko zuzendaritzak egoiliarrei jakinarazi zien ez zietela egoitzan ezarriko COVID-19aren aurkako txertorik, egoitzako plazen %84 diputazioarekin itunduta egonda ere. “Peña diputatua interpelatu dugu egoitza eta eguneko zentroetan txertoaren protokoloen ezarpena nola bermatuko den azal dezan. Zaintzaren kontrol eta erantzukizun publiko gabezia agerikoa da, eta gertatutakoaren aurrean azalpenak ematea ezinbestekoa iruditzen zaigu”.

Bestetik, adinekoen egoitzetan COVID-19ari hobeto aurre egiteko neurriak noiz eta nola ezarriko dituen zehaztea ere eskatu du EH Bilduk. Urrian, aldundiak aurkeztu zuen COVID-19aren lehen olatualdian egindako kudeaketaren balorazio txostena. Egondako gabeziak jasotzen ziren, baita etorriko ziren olatualdi berrietarako gomendioak ere. “Txosten hori egin zuen aditu taldeak premiazkotzat jotzen zuen gobernantza eredua aldatu eta instituzio nahiz eragileen arteko lankidetza, langileen plantillak handitzeko aukerak aztertu eta ratioak hobetzea, zein bisiten erregimena malgutzea”.

Epe laburrerako gomendioak ere jasotzen ditu txosten horrek: hala nola, etxez etxeko arreta eskaria eta eskaintza indartzea, emozioak kudeatzeko protokolo bat prestatzea, edo etika kodeak berrikustea, besteak beste, egoiliarraren erabakitze eskubidea aintzat hartzeko. Epe ertainera, berriz, langile eta profesionalentzat prestakuntza integralerako plan bat egitea gomendatu dute, pertsona erdigunean izango duen zaintza eredua garatzea, eta kudaketa publikoaren ebaluazio agentzia bat sortzea.

Gomendio horietako asko, ordea, egikaritzeke daudela adierazi du Elduaienek, eta neurri bakoitza noiz jarriko den martxan eta horretarako zenbat baliabide ekonomiko bideratuko diren zehazteko eskatu du. “Bide-orri zehatzak eginda behar luke jada, neurri horiek lehenbailehen martxan jarri ezean, egoerak nekez egingo baitu hobera, eta Gipuzkoako adinekoen egoitzak COVID-19aren aurrean zaurgarri izaten jarraituko baitute. Bide batez, txosten horrek ere agerian uzten du egungo zaintza sistema agortuta dagoela eta beste eredu bat beharrezkoa dela, eta bat egiten dugu diagnosi horrekin”.

Amaitzeko, egungo zaintza eredua salatu eta beste eredu bat aldarrikatzeko gehiengo sindikalak biharko egindako greba deialdia babestu du Elduaienek: “EH Bilduk ELA, LAB, CCOO eta ESKren deialdia babesten du, zaintza duinaren alde eta zaintzaileak duintzearen alde”.

EAJ-PSEren aurrekontuek ez diote ezohiko egoera bati erantzuten

EH Bilduk adierazi du Aldundia motz gelditu dela beste behin ere, eta pandemiak kaltetu dituen kolektibo zaurgarrienetara beharrezko diren baliabideak bideratu ezean, gipuzkoar asko egoera larrian utziko dituela EAJ-PSEren aurrekontuek.

| 2021-01-21 14:41:00

Inoizko krisi soziekonomiko handiena bizitzen ari garen honetan, Gipuzkoako Foru Aldundiak Gizarte Politiketara bideratu nahi dituen baliabideak ez dira nahiko egoerari aurre egiteko eta ez die pandemiak areagotu dituen ezberdintasunei aurre egiten. 20 milioi gehiago jarri ditu, baina EH Bilduk babes soziala indartu eta zaintza duintzeko 100 milioi gehiagoren premia zenbatua du. Gaur egun Gipuzkoan dugun adinekoen eta mendeko pertsonen zaintza ereduak ez du bermatzen pertsona horiek behar bezala zainduta egotea eta horregatik bideratu behar dira baliabide gehiago Gizarte politiketara.

 

Gizarte Politiketako iazko aurrekontuarekin alderatuta, %4,8 igoera proposatu du Aldundiak, eta kontuan izanda iazko aurrekontuek pandemia eta bere ondorenak aurreikusi gabe zituztela, igoera ez da nahikoa. Alderaketa bat egiten hasita, gainera, nabarmentzekoa da beste departamentu batzuk portzentualki gehiago igo direla: Diputatu Nagusiaren departamenturako, esaterako, %5,06ko igoera proposatu dute, Ingurumen eta Obra Hidraulikoetan %5,85ekoa, Mugikortasuna eta Lurralde Antolaketarako %9,01ekoa...

 

Bestalde, EH Bilduk 50 milioiko errekuperazio funts berri bat proposatu zion Aldundiari, pandemiak gehien kaltetu dituen sektoreei laguntza ekonomikoa bideratzeko eta aurrekontu hauek ez dute halakorik aurreikusten.

 

Gainera, gogorarazi behar da iazko aurrekontuetatik 70 milioi exekutatu gabe utzi zituela Aldundiak.

 

Eta ezin dugu aipatu gabe utzi Kultura dela jaitsi den partida bakarra, sektore hori izanik pandemiak gehien kaltetu duenetako bat.

 

EH Bilduk argi dauka krisi honi aurre egiteko norabide aldaketa bat ezinbestekoa dela. Eta, zentzu horretan, datozen asteetan gipuzkoarrek merezi dituzten aurrekontu batzuk lortzeko proposamenekin zuzenketak landuko ditugu.

Ontzi aldaketen doakotasuna eta 2021erako tarifak izoztea proposatuko du EH Bilduk Gipuzkoako Garraio agintaritzan

EH Bilduren ustez ezinbestekoa da Mugi sistema sakontzen jarraitzea, erabilera aukera eta deskontu tarte berriak landuz.

| 2021-01-20 11:03:00

Ostiralean bilduko den Garraio Agintaritzaren batzordean EH Bilduk ontzi aldaketen doakotasuna eta oraindik erabakitzeke dauden 2021 garraio tarifak izoztea proposatuko du eta hori azaltzeko agerraldia egin dute Eneritz Arbelaitz Oiartzungo zinegotzi eta Garraio Agintaritzako ordezkariak eta Oskar Bordes batzarkideak. “Dagoeneko ikusi dugu prentsan zein den Gipuzkoako Aldundiko Mugikortasun departamentuak egingo duen proposamenetako bat: EH Bilduk aspaldidanik eskatu izan duen moduan, ontzi-aldaketa edo transbordoak doakoak izatea. Eta EH Bildutik adierazi behar dugu pozten garela, behingoagatik proposamen hori aintzat hartu dutelako”, azaldu du Arbelaitzek. “Horretaz gain, oraindik erabaki gabe dauden 2021 urterako tarifetarako, tarifen izoztea eskatuko dugu. Ikusten dugulako garraio publikoko erabiltzaileek bultzada bat behar dutela eta gauden egoeran egonda, tarifak igotzeak ez lukeelako inongo zentzurik”, gaineratu du.

 

Oskar Bordes batzarkideak adierazi du EH Bilduk garbi daukala garraio publikoko erabiltzaileek gora egin dezaten, esfortzu berezia egin behar dutela bai garraio agintaritzak eta baita erakunde ezberdinek ere. Zentzu horretan, Aldundiak Bilduren garaian martxan jarri zuen MUGI sistemaren sakontze lanean jarraitzea garrantzitsutzat jo du.


“Erakunde publikoei dagokie MUGI txartelaren hedapena eta erabilera bultzatzea. Erabili behar duen gizartearentzako erakargarria eta erabilgarria izan behar da. Eta zentzu horretan, besteak beste, modu berrietara hedatu beharko litzateke txartelaren erabilera, San Pedro eta Donibane arteko txalupa motordunean erabilgarri bilakatuz, esaterako, edota, honetaz gain, garraio publikoa gehien erabiltzen dutenentzako deskontu tarte berriak sortuz”.


Azken egunetan MUGIren inguruan zabaldu diren albisteen inguruan, Bordesek adierazi du: “Ez dugu ulertzen EAJ eta PSE MUGI sistemarekin egiten ari diren kudeaketa eskasa, hainbatetan MUGIren erabilera alderdikoia eginez. Horren adibide garbia dugu batzuek hainbeste aldiz iragarri izan duten Bilboko Metroan MUGI erabiltzeko aukera. Bi urte igaro dira hori iragarri zutenetik eta egun, oraindik ere, berdin jarraitzen dugu”.

 

Eta erantsi du: “EAJk zein PSEk MUGI sistemaren inguruan izan duten kudeaketa zalantzan jartzen duen beste adibide bat baino ez da. Gogoan izan behar dugu bi alderdi politiko hauek direla koalizioan bai EAEn, bai Donostian eta baita Gipuzkoan ere gobernuan daudenak. Kontu handiarekin kudeatzeko garrantzi handiko gaia dute esku artean. Garraio publikoaren erabilera sustatzearen garrantzia. Eta, beraz, arduraz eta elkarlanean aritzeko eskatzen diegu, kalitatezko garraio publiko unibertsal baten alde”.

Ekainetik blokeatuta daukan Ekonomia Sustapeneko batzordea lehenbailehen deitzeko eskatu dio EH Bilduk EAJri

Bizi dugun egoeran hain arlo garrantzitsua geldirik izatea oso larritzat jo du EH Bilduk.

| 2021-01-19 13:25:00

Gipuzkoako Batzar Nagusietako Ekonomia Sustapeneko, Turismoko eta Landa Inguruneko batzordea ez da deitu pasa den urteko ekainaren 22tik. EAJk du batzorde horren lehendakaritza eta, beraz, bere eskumena da batzordea deitzea. Gipuzkoako herritar asko eta asko bizitzen ari diren egoeraren aurrean, EH Bilduren ustez onartezina da sustapen ekonomikoaren arloa geldirik egotea.

 

EAJk gai propioak ez lantzeaz gain, beste taldeen ekimenak blokeatzen ari dela salatu du EH Bilduk. Izan ere, EH Bilduk hiru eskaera erregistratuta ditu eta gai horietako bakoitza nahikoa izan beharko litzateke batzordea deitzeko. Besteak beste, “SOStalaritza”-ren agerraldia eskatuta dauka EH Bilduk, sektoreak bizi duen egoera larrian euren egoeraren berri eman dezaten. Basogintzaren egoera kritikoa lantzeko, berriz, ponentzia bat eskatu genuen eta horrek ere ez du erantzunik izan. Horretaz gain, OlatuKoop-en agerraldia ere eskatuta dauka EH Bilduk, ekonomia eta ekintzailetza eraldatzailearen inguruan egiten duten lanaren berri eman diezaguten.

ALBISTEAK

Arduradun publikoek azalpenak eman ditzaten, erraustegiaren jardunaren inguruko galderak egin ditu EH Bilduk ordezkaritza duen erakundeetan

2021-01-12 11:00:00

Zubietako erraustegiaren jardunaz dagoen gardentasun faltaz kezkatuta, idatzizko informazio eskaerak egin ditu EH Bilduk Gipuzkoako Batzar Nagusietan, Eusko Legebiltzarrean eta Espainiako Kongresuan.

Eskola Kirola berrabiaraztea eta zaintza zerbitzuen publikotasuna eskatuko dizkio EH Bilduk Aldundiari

2021-01-11 11:54:00

Eskoletan, burbuiletan eta aire librean egingo den Eskola Kirola martxan jartzea beharrezko jotzen du EH Bilduk. Era berean, kalitatezko zaintza bat bermatzeko arreta-sare publiko antolatu eta erantzukizun publikokoa eskatuko dio Aldundiari.

Herritarren bizitza hobetzeko EH Bilduren prestutasuna erakusten du Eibarko aurrekontu akordioak

2021-01-07 16:48:00

Neurri sozialak indartzen dituen aurrekontu akordioa lortu du EH Bilduk PSErekin Eibarren. Akordioak, batetik, elkarrizketarako eta akordioetara iritsi ahal izateko EH Bilduk duen gaitasuna berresten du. Eta, bestetik, EH Bilduk akordio bat sinatzen duenean, herritarren bizi kalitatea hobetzen duela.

Juankar Izagirre: “Osasun eta zaintza sistema publiko sendoa da Aiton-Etxekoa bezalako gertaerak saihesteko bermea”

2021-01-02 16:24:00

Oiartzungo Aiton-Etxe eguneko zentroko zuzendaritzak COVID19-aren aurkako txertoa ez jartzeko agertutako asmoaren aurrean, harridura azaldu du Juankar Izagirre EH Bilduren Gipuzkoako bozeramaileak. Eta EAJri eta PSEri eskatu die publifikazioaren aldeko urratsak egin ditzatela.