Gipuzkoa

Gipuzkoako garraio sektoreari laguntzeko deskontu, hobari fiskal eta lan balintzak hobetzeko neurriak proposatu ditu EH Bilduk

Gipuzkoako garraio sektorea estrategikotzat hartzeko eskatu du EH Bilduk eta sektoreak bizi duen erregularizazio-eza konpontze aldera, neurri zehatzak proposatu dizkio Gipuzkoako Aldundiari.

| 2021-06-30 11:33:00

Garraio sektoreak bizi duen egoera kaskarraren jakitun izan arren, gehiegitan administrazioek beste alde batera begiratzen dutela ikusita, EH Bilduk garraio sektorea babesteko eta laguntzeko proposamena egin du Gipuzkoako Batzar Nagusietan, hurrengo Osoko Bilkuran eztabaida dadin. Estitxu Elduaien eta Oskar Bordes batzarkideek gaur egindako agerraldian adierazi dute “ez dela nahikoa bidesariak karga kontratatzen dutenek ordaindu behar dituztela esatea. Beharrezkoak diren neurriak hartu behar dira, batetik, karga hori kontratatzen dutenek Gipuzkoako garraio-sektorearen aldeko apustua egin dezaten, eta bestetik, gertutasun-ekonomia bultzatzeaz gain, kalitatezko lanaren aldeko apustua egiten ari direla ere jakin dezaten. Izan ere, baldintza duinetan eginez gero, Gipuzkoaren aberastasunaren sorreran eragin zuzena edukiko luke”.

 

Etengabeko lehia eta baldintza erdi esklabistak egunerokotasunaren parte diren horretan, garraiolariek babesa behar dute erregularizaziorik gabeko egoeretan eta euren egoera hobetzeko proposamen sorta egin du EH Bilduk.

 

Proposamak hainbat neurri zehatz jasotzen ditu, besteak beste: Bidegik kudeatzen dituen Gipuzkoako errepideetan %13ko deskontua ezartzea I eta II kategoriako ibilgailu astunentzat, baldin eta hilean hamabost bidaia edo gehiago egiten badira noranzko bakarrean; Aldundiak defenda eta bultza dezala egindako garraioagatik bezeroari kobratzeko fakturan I. eta II. kategorietako ibilgailu astunek ordaintzen duten bidesariaren zenbatekoa sartzea eta, publikoki zein pribatuan, Gipuzkoako eragile ekonomiko zein enpresa eragileen aurrean egin dezala horren defentsa.

 

Bestalde, flotaren berrikuntza bultzatzeko eskatu du EH Bilduk, baita aurrekontu partidak sortzeko ere, egoitza fiskala Gipuzkoan duten garraio-enpresei laguntzeko, eta, hala, gurpil-aldaketarako hobariak sortuz, hain beharrezkoa den trafiko segurtasunean inbertitzeko, baita CO2 emisioak eta kutsadura akustikoa gutxitzeko ere.

 

Azkenik, Eusko Jaurlaritzarekin batera, garraio sektoreak euskal gizartean duen garrantzia publikoki onar dezala eta sektore estrategiko horren aldeko neurriak har ditzala eskatu du EH Bilduk, besteak beste: Garraio astunari Gipuzkoan eta Autonomia Erkidegoan egiten zaizkion ikuskapenak areagotzea, horretarako baskula mugikorrak erabiliz; eta, lan ikuskaritzatik lan baldintza erdi-esklabista, zein kooperatiba faltsuen kontra egiten diren ikuskaritza ekintzak areagotuz.

Aldundiaren politika kontinuisten aurrean, pandemiari erantzun eta etorkizuneko politika publikoetan lanean ari da EH Bildu alkatetzetan

Nekane Zinkunegi arduradun politikoak eta Juan Karlos Izagirre bozeramaileak legealdi erdiko balorazioa egin dute gaur. Aldundiaren aldebakarreko inposizio gobernantzaren aurrean, EH Bildu Gipuzkoako 44 alkatetzatan herritarrak erdigunean jarriz egiten ari den lana nabarmendu dute.

| 2021-06-10 10:02:00

Pandemiak baldintzatutako bi urteok gogorrak izan dira, ondorio ekonomiko eta sozial larriak eragin dituztenak. Eta lehendik genekiena berretsi da: herritarrek egon behar dute politika publikoen erdigunean”, adierazi du Zinkunegik. “Hori da Gipuzkoan, udalez udal, alkatetzetatik zuzenean eta oposiziotik eskua luzatuta, bi urteotan EH Bilduk egin duena”, gaineratu du.

 

Gogorarazi dute EAJ-PSEren aldundiak, udalekin lanketarik egin gabe, haien baliabide ekonomikoak murriztu zituela pandemia lehertu berritan, foru funtsari %20ko murrizketa ezarrita. Hala ere, “EH Bilduko alkatetzek udal baliabideak bideratu zituzten okerren zeuden herritarren eta sektoreen beharrei erantzutera”.

 

Zentzu horretan, hainbat adibide ekarri ditu gogora Zinkunegik: “dirulaguntza lerroak aktibatu zituzten autonomo, merkatari, ostalari eta pandemiak gehien kaltetutako sektoreentzat; Azpeitiko Udalak, adibidez, konfinamendua ezarri eta bi egunera jarri zuen indarrean neurri hori. Azokak debekatzeko Eusko Jaurlaritzak hartutako erabakiaren aurrean, Oñati, Ordizia edota Azpeitiko udalek mantendu egin zituzten, osasun egoeraren araberako segurtasun neurriak hartuta, eta tokiko ekoizleei lehentasuna emanda. Zaintzaren esparruan, Ordizian eta Zumaian, besteak beste, adinekoen egoitzarako babes materiala bermatu zuten udalek; herri askok jarri zituzten martxan boluntarioen sareak edo zaintza sare komunitarioak, 60 urtetik gorako herritarrei deiak egiteko, erosketak eta botikak eskuratzeko, zein hondakinak ateratzeko. Orereta/Errenteriako Udalak, ikasle guztiei eskolen on line modalitaterako sarbidea bermatzeko, ordenagailuak banatu zituen. EH Bilduko hainbat udalek, kultura eragileekin hitzartutako ekitaldiak bertan behera utzi ordez, aurrekontuen zati bat aurreratu eta ekitaldiekiko konpromisoa mantendu zuten. Eta segurtasun neurriekin bada ere, kultura agendari eutsi zaio”.

 

Kontrara, Aldundiarentzat pandemiaren irakaspenek ez dutela ezertarako balio izan esan du Izagirrek eta Gipuzkoa mailan “makillaje” operazio bat baino ez dela egin itxura egiteko. “Baina ez benetan gauzak aldatzeko, beste politika batzuk aplikatzeko, gure ekonomiaren eta jendartearen norabidea aldatzeko. Aldundiak proiektu berdinekin jarraitzen du, ekonomia-sistema berdinarekin, eta politika egiteko modu berdinekin”. Eta mahaigaineratu du Gipuzkoako datuak izugarriak direla: “Goiz da jakiteko zergatik, baina aztertu beharko da, soseguz eta zintzotasunez, zergatik izan den Gipuzkoa mundu mailako lurralde kastigatuenetakoa. Datuak hor daude”.

Ezkerreko boto aurrerakoi, subiranista eta antifaxista guztia EH Bildun kontzentratzeko deia egin du Otegik

“EH Bildu da datorren igandean ezustekoa eman dezakeen bakarra”, azpimarratu du koordinatzaile nagusiak, eta ohartarazi du EAJ eta PSE, boto bila baino, egingo dituzten murrizketen konplizeen bila ari direla.

| 2020-07-05 21:29:00

Kanpainako lehen astea igarota, Arnaldo Otegik argi dauka oraindik asko dagoela jokoan eta EH Bildu dela datorren igandean “ezustekoa eman dezakeen bakarra”. Hori dela eta, “ezkerreko boto aurrerakoi, subiranista, abertzale, antifaxista eta errepublikazale guztia EH Bildun kontzentratzeko” deia egin du gaur Eibarren. “EH Bildu hazten ari da, pluralagoa eta zabalagoa egiten da. EAJ eta PSEk zure konplizitatea nahi dute betikoa egiten jarraitzeko; guk, aldiz, zure laguntza nahi dugu herri justu eta askea eraikitzeko”.

Horren haritik, EH Bilduko koordinatzaile nagusiak ohartarazi du Urkulluk eta Mendiak ez dutela botoa eskatzen, “egiten ari diren eta egingo dituzten uko eta murrizketen konplize izateko” baizik, eta bermatu du “EH Bildu ez dela izan eta ez dela izango ordena ekonomiko bidegabe eta anker baten konplize, ez eta askatasun nazionalak ukatzen dituen Estatu baten konplize ere. Horregatik eskaintzen da tresna baliagarri gisa: ahotsik gabekoen ahotsa izateko, kausa nazionalerako eta langileen kausarako baliagarri izateko, berdinen euskal errepublika eraikitzeko”.

Mikel Otero: “Zaldibarrek EAJren kudeaketa ereduaren porrota erakutsi du”

Mikel Otero Arabako zerrendaburuak Zaldibar izan du hizpide Eibarren, zabortegian gertatutakoak “EAJ eta PSEren ereduaren porrota” eta “kudeaketa gaitasunik eza” erakutsi baititu. “Zaldibarren ez zen behar beste kontrolik egon, ez zen larrialdi egoera ongi kudeatu, ez zen familiekin eta inguruko biztanleriarekiko begirunerik izan eta, agian okerrena, arduradun nagusiek ez zuten aurpegia eman eta ez dira erantzukizun politikoak garbitu. Zaldibarrek erakutsi digu gure bizitzaren funtsezko kontuak ezin ditugula irabazi pribatuen eskuetan utzi eta, finean, Zaldibarren Urkulluk erakutsi zuen ez dagoela prest egoera zailak behar bezala kudeatzeko”.

Maddalen Iriartek autokritika eskatu dio Urkulluri Osakidetzako langileen osasuna arriskuan jartzeagatik

Lehendakarigaiak oso larritzat jo du Justizia Auzitegi Nagusiaren epaia, osasun larrialdian Osakidetzak bertako langileak arrisku larrian ipini zituela egiaztatu duelako. Hori urteetako murrizketen ondorio izan dela esan du Iriartek, eta salatu du Urkulluk are murrizketa gehiago egin nahi dituela hala eta guztiz ere.

| 2020-07-05 21:27:00

Maddalen Iriarte Laudion izan da arratsaldean, eta gaur bertan ezagutu den EAEko Justizia Auzitegi Nagusiaren epaia izan du hizpide nagusiki, bere iritziz, benetan larria delako epaileek ebaztea koronabirusaren osasun larrialdian Osakidetzak bertako langileen osasuna arrisku larri eta berehalakoan jarri zituela, lan arriskuen prebentzioari buruzko araudia ez betetzeagatik. Hori dela eta, Urkulluren autokritikak ere berehalakoa izan beharko luke, Iriarteren ustez, eta hala eskatu dio zuzenean EAJren hautagaiari: “Noiz egin behar duzu autokritika, Urkullu jauna, langileen osasuna arriskuan jartzeagatik? Noiz emango dizkiezu argibideak?”.

EH Bilduren lehendakarigaiak salatu duenez, Osakidetza gainbeheran iritsi da pandemia egoera honetara, osasun langilerik onenek baldintzarik txarrenetan aritu behar izan dute –3.000 langile inguru kutsatu eta bat hil da– eta Jaurlaritzak uko egin dio test masiboak egiteari. “Osakidetza Europa mailan puntan zegoela esan ziguten, baina bertako langileak plastikozko poltsak erabiltzen ikusi ditugu nola edo hala nork bere burua babesteko, eta, hildakoen kopuruari dagokionez, Europako bigarrenak gara, biztanleko, Belgikaren atzetik”.

Iriartek aditzera eman duenez, “Covid-ak biluzik utzi ditu euskal osasun sistema publikoaren josturak”, eta hori –egotzi dio Urkulluri– azken urteotako murrizketen ondorio zuzena da. “Sindikatu guztiek, osasuna jokoan jarri duten langileek, esaten dizute murrizketen erantzulea zarela, Urkullu jauna. Ez du balio zortzietan txalo egitea eta gero osasuneko profesionalak laguntzarik gabe uztea; esku batekin txalo egiten duzu eta bestearekin murrizketak egiten dituzu”.

Maddalen Iriarte: “Gure herria zutik jarri nahi duela dio Urkulluk, zutik Euskadin, belauniko Madrilen”

Gipuzkoako ekitaldi nagusia Donostian izan da gaur, Arkaitz Rodriguez eta Mertxe Aizpuruarekin.

| 2020-06-30 21:36:00

Maddalen Iriartek autogobernuari eta erabakitzeko eskubideari buruz agindutakoa eta euskal gizarteari emandako hitza ez betetzea egotzi dio gaur Bastidan, Arabako Errioxan, EAJren hautagaiari, eta ez dio sinesgarritasunik eman, beraz, Urkulluk orain, hauteskunde kanpainan, horren inguruan agintzen ari denari, “marmotaren eguna” dirudi eta. “Urkulluk dio gure herria zutik jarri nahi duela. Zutik Euskadi, Urkullu jauna? Herrialdea erori zaizu? Zutik Euskadin, belauniko Madrilen”.

Iriartek gogora ekarri du EH Bilduk “eskua luzatuta” izan duela beti erabakitzeko eskubidearen alde akordioak lortzeko. “Legealdi honetan EAJrekin akordio batera iritsi gara erabakitzeko eskubidearen alde, herri honen gehiengo politiko eta soziala ordezkatzen zuen estatus berriaren aldeko akordioa, baina zer gertatu da ordutik? Argi eta garbi esango dugu: Urkullu jaunak euskal estatus berria murriztu du, erabakitzeko eskubidea murriztu du”, “herri honen erabakitzeko eskubidea ukatzen dutenen gonapean sartzea” hobetsi duelako. “Idoia Mendiarekin batera euskal estatusa geldiarazi zuenean egin zuen. Rajoyren aurrekontuak onartu zituenean egin zuen, 155. artikulua aplikatzen zen bitartean. Eta hurrengo egunean zentsura mozioak adosten ari zen PSOErekin. Ortuzarrek esan du Euskadiko kamiseta jantzi behar dela, baina Madrilen egiten dutena txaketa aldatzea da”.

EAJk erabakitzeko eskubidea alde batera utzita, EH Bilduren lehendakarigaiak herri honetako subiranista guztiei dei egin die “hautestontziak erabakitzeko eskubidearen aldeko botoz betetzeko”. “Boto bakar bat ere ez 155ekoentzat. Boto bakar bat ere ez 155a indarrean egonda haiekin negoziatzen dutenentzat. Boto bakar bat ere ez Madrilen belaunikatzen direnentzat”.

Arkaitz Rodriguezek Estatuaren biktimak eta Rosa Zarra gogoan izan ditu Donostian

Gipuzkoan, berriz, Donostiako Katalunia plazan Arkaitz Rodriguez eta Mertxe Aizpurua izan dira gaur arratsaldean. Rodriguezek, Rosa Zarra Ertzaintzaren pilotakada baten ondorioz hil zela 25 urte pasa diren egunean, nabarmendu du “gure esku dagoena” egingo duela EH Bilduk “Rosa Zarra eta Estatuak egindako giza eskubideen urraketa larrien gainerako biktimak duintzeko. Egia, justizia eta erreparazioa biktima guztientzat. Denentzat. Hori da gure konpromisoa”.

Eta gaineratu du EH Bildu dela boto antifaxistarik onena. “Vox birrintzeko irrikitan dauden guztiei esaten diegu uztailaren 12an aukera ezin hobea dagoela espainiar ultraeskuinei aurre egiteko”. Hala, Vox eta PPri “min gehien egiten diena” EH Bilduren boza dela gogorarazi eta “hautestontziak EH Bilduren boto antifaxistekin betetzera” dei egin die Rodriguezek gipuzkoar guztiei.

Aizpuruak, bestalde, adierazi du Madrilen EAJk bere interesak baino ez dituela negoziatu. “Hauteskundeak egitea bere interesekiko eta Madrildik bigarren mailako hiru transferentzi ekartzea, eperik eta datarik gabe. Farmazia produktuen publizitatearena, eskola asegurua eta aurrejubilazioen tramiteen kudeaketa. Baina non daude EAJrentzat Espetxeen transferentzia eta Gizarte Segurantzarena, hemen pentsio duinak ezartzeko aukera irekiko lukeen transferentzia? EAJk herri hau bere negozio bat bezala ulertzen du eta horregatik bost axola zaizkio espetxeen transferentzia edo gizarte segurantza eskuratzea. Presoak eta pentsiodunak ez direlako negozioa beraientzat”.

ALBISTEAK

Iriarte: “Urkulluk Ibarretxe Plana alfonbra azpian ezkutatu du, erabakitzeko eskubidearen etsaiek belarriekin txalo egiten duten bitartean”

2020-06-30 13:32:00

Erabakitzeko eskubidea gauzatzeko oztopo izatea eta hitza ez betetzea egotzi dio Iriartek EAJko hautagaiari, eta burujabetzaren aldeko botoa eskatu du. “Norbaitek uste al du Urkullu eta Mendiaren gobernu batek gure etorkizuna erabakitzeko eskubidea defendatuko duela?”.

Nerea Kortajarena: “EH Bilduk 1.080 euroko gutxieneko pentsioak bermatzeko konpromisoa du”

2020-06-29 19:23:00

Gipuzkoako zerrendakideak euskal instituzioek eskura dituzten tresna guztiak erabiltzeko borondatea erakutsi du miseriazko pentsioak amaitzeko.

Iriarte: “Urkulluk zintzoa izan behar du eta jendeari esan behar dio guraizea noraino sartuko duen”

2020-06-29 19:20:00

EAJk irabaziz gero, murrizketak seguruak direla ohartarazi du Iriartek, eta alternatiba egon badagoela azpimarratu du, zerga erreforma baten bidez krisiaren faktura langileriak berriz ordaindu behar izan ez dezan.

Prekarietatea amaitzea, gazte eta emakumeei begira bereziki, lehentasuntzat izango duen gobernu bat osatzeko konpromisoa hartu du Iriartek

2020-06-29 19:13:00

Maddalen Iriarteren ustez, uztailaren 12an hautatu behar da: edo EAJren eredua, prekarietatera kondenatzen gaituena, edo EH Bildurena, segurtasuna ematen duena. 33.000 lanpostu sortu, 1.200 euroko gutxieneko soldata ezarri eta alokairu publikoko 11.000 etxebizitza eskaintzeko plana azaldu du.