Nafarroa

Hezkuntza-itunak bere osotasunean betetzeko eskatu dio EH Bilduk foru Gobernuari

| 2021-06-18 13:47:00

EH Bildu Nafarroa “pozik” agertu da aurreko legegintzaldian sare publikoan zein itunpekoan “hezkuntza-itunen betetzean egindako aurrerapenagatik, orain arte eskatu dugun bezala”.

EH Bilduk ohar batean gogorarazi duenez, “EH Bildurekin erdietsitako 2020ko aurrekontu-akordioan, Nafarroako Gobernuak hitzeman zuen hitzarmenak betetzeko egutegi errealista adostuko zuela sindikatu sinatzaileekin”. “Bistan da 2020an eta 2021ean pandemiak sortu duen testuinguru konplexuak aldatu eta atzeratu egin dituela aurreikusita zeuden hainbat aurrekontu-neurri”, azaldu du, baina, aldi berean, “irmoki” defendatu du pandemia “ezin dela aitzakia izan hitzarmenen betetzea denboran luzatzeko”.

Ildo horretatik, EH Bilduren ustez, “legealdiaren erdia unea zen pauso eraginkorrak emateko eta irakasleen hezkuntza-kalitatearekin eta lan-baldintzekin konpromiso argia hartzeko”. “Pandemiak agerian utzi du hezkuntza-arloko profesional guztiek presentzialitatea eta kalitatezko arreta pedagogiko eta emozionala bermatzeko egiten duten lanak duen garrantzia”, nabarmendu du.

Horregatik guztiagatik, EH Bilduk balioan jarri du sare publikoko 55 urteko irakasleen ordu-murrizketa bai eta “sare itunduko irakasleei 2012an ezarritako murrizketen itzulketan egindako aurrerapena” ere. Nolanahi ere, “bide luzea dago hitzartutakoa betetzeko eta gainerako %2a ordaintzeko”, adierazi du.

Hala, EH Bilduk Hezkuntza Departamentuari eskatu dio “jarraipen-batzordeetan parte hartzen duten sindikatuekin idatzizko konpromisoa hartzeko, legegintzaldi honetan konpromiso hori betetzeko egutegi batekin”.

Esako handitze-lanak geldiarazteko eskatu dio Pozuetak Espainiako gobernuari, “segurtasuna bermatzen ez den bitartean”

| 2021-06-16 09:56:00

Bel Pozueta Nafarroako EH Bilduko diputatuak Espainiako Gobernuari zuzendutako galdera batzuk erregistratu ditu, “Esako urtegiaren eskuineko hegalari segurtasuna emateko eta inguru horretako ezegonkortasunari aurre egiteko zer egiten ari den” jakiteko. Honako hau eskatu du: “handitze obrekin aurrera ez egiteko, urtegiaren eta bere inguruen segurtasun maximoa bermatuta ez dagoen bitartean”.

Ohar batean, Pozuetak gaitzetsi egin ditu diputatuak berak aurtengo apirilaren amaieran egindako galderei erantzunez Estatuko Gobernuak egindako baieztapenak, urtegiaren segurtasunari eta hura handitzeko proiektuari buruz. Pozuetak kolokan jarri ditu Ministerioaren baieztapenak; horren arabera, “orain arte egindako txosten guztiek ondorioztatu dute obrak segurtasun-berme osoarekin egiten ari direla; beraz, ez dago arrazoi objektiborik lanak behar bezala egiten ez jarraitzeko”.

Pozuetak “arduragabetzat” jo du Gobernuaren erantzuna; izan ere, nabarmendu duenez, “orain arte egindako txostenek ohartarazten dute urtegiaren eskuineko hegaleko mugimenduez eta horren ondoriozko arriskuaz”.

Ildo horretatik, EH Bilduko diputatuak Antonio Aretxabala eta Antonio Casas geologoek egindako txosten zientifikoa nabarmendu du, Zangozako Udalak eskatutakoa. Txosten horren arabera, “segurtasun-faktorea bat da, hau da, mendi-hegalari eusten dioten indarrak eroriko liratekeenekin berdinduta daude”.

Era berean, Antonio Casasek eta Carmen Ricok egindako beste azterlan bat ere aipatu du Pozuetak. Azterlan horren arabera, “urtegia handitzeak urtegiaren azpian dauden populazioentzat, bereziki Zangozarentzat, arrisku handia dakar”.

Halaber, Pozuetak gogorarazi du Zangozako Udalak, “hainbat txostenetako ondorioak ikusi ondoren, eskatu egin zuela kota berria ez betetzeko eta oraingoa hormigoizko presa segurtasun-neurri gisa gainditu gabe mantentzeko”.

Horregatik guztiagatik, “txosten horiek urtegiaren segurtasuna zalantzan jartzen dutela kontuan hartuta”, EH Bilduko diputatuak Espainiako Gobernuari galdetu dio “segurtasun-neurriak bermatzen ari diren eta zein arrazoitan oinarrituta”, baita “ikusita lanek aurrera jarraitzen dutela, inork jakin gabe aurreikusita dauden interbentzioak, hegalari segurtasuna emateko eta gainezkabideak konpontzeko zer egiten ari diren” ere ezagutzeko.

Bel Pozuetak berretsi egin du Pirinioetako despopulazioaren aurkako neurriak bultzatzeko konpromisoa, inguruko ordezkariekin izandako bileraren ondoren

| 2021-06-10 09:50:00

Bel Pozueta Nafarroako EH Bilduko diputatua Pirinioetako alkate, beste hautetsi eta zonaldeko hainbat asanbladetako kideekin bildu da, eremu horretako “premia larrienak” aztertzeko.

Pirinioetako ordezkariek Pozuetari adierazi diotenez, despopulazioa da kezka nagusia. “Premiazkoa da politika zehatzak abian jartzea, duela hamarkada batzuetatik Pirinioen inguruan izan den despopulazioari eraginkortasunez aurre egiteko”, salatu dute.

Ildo horretatik, Pozuetak balioa eman dio EH Bilduko talde parlamentarioak Espainiako Gobernuarekin negoziatu zuen 3 milioi euroko zuzenketari. Pozuetak zuzenketa horren “garrantzia” azpimarratu du, “Pirinioetan hainbat instalazio sortu eta hobetzeko balioko baitu”. “Funtsezko urratsa da zonaldea ekonomikoki suspertzeko neurriak abian jartzeko”, esan du Pozuetak. “Pirinioetako herriak despopulatzen ari dira, eta zahartze-tasa handia da. Hori dela eta, premiazkoa da egoera horri aurre egiteko eta herritarren bizitza duintzeko politikak zehaztea”.

Halaber, Pozuetak Pirinioetako ordezkarien “kezka” jaso du, “Nekazaritza Politika Erkidea berriaren baldintzen inguruan, atzerapauso bat suposatzen duen eredu espekulatiboa ekarri baitu”. Horri dagokionez, EH Bilduko diputatuak “sektorearekiko konpromisoa” eta “nekazaritzarako laguntza horiek modu bidezkoagoan eskuratzeko lan egiteko asmoa” adierazi du.

Bestalde, Pozuetarekin izandako bileran, Pirinioetako ordezkariek gaitzetsi egin dute foru Gobernuak berriki jakinarazi duen Batxilergoan sartzeko araudi berria. Kritikatu duten bezala, “inguruko gazteentzat beste oztopo bat da, Batxilergoko ikasketak D ereduan jarraitzeko eskubidea zailtzen dielako”. Hala, berriro ere, Pirinioetako Mahaiak egin bezala, “eskualdean Batxilergoko euskarazko eskaerari erantzungo dion institutua eraikitzeko beharra” aldarrikatu dute. Bien bitartean, balioan jarri dute “hala nahi duten ikasleei Nafarroako Gobernuak bermatzea euren ikasketak euskaraz jarraitu ahal izateko aukera”, gaurkoan Nafarroako Parlamentuan, EH Bilduk proposatuta, eztabaidatuko den mozioarekin bat etorriz.

Bel Pozuetak Pirinioetako hainbat herritako hautetsiekin egindako honako bilera Nafarroako hainbat eskualdetako ordezkariekin legegintzaldiko bigarren urtea dela-eta diputatua egiten ari den kontaktu-txandaren barruan kokatzen da. Hala, Pozuetak berretsi egin du “Nafarroako herritarren bizi-baldintzak hobetuko dituzten politika zehatzak eta eraginkorrak bultzatzen jarraitzeko konpromiso sendoa”.

EH Bilduko militantziak Nafarroako Koordinazio Talderako hautagaitza babestu du botoen %94ko baiezkoarekin

Miren Zabaleta Nafarroako arduradun politikoarekin batera, Unai Lako, Lola Eslava, Haritz Romeo eta Maddi Lasak osatzen dute herrialdeko zuzendaritza berria.

| 2021-06-05 13:17:00

Nafarroako Koordinazio Taldea aukeratzeko barne bozketak amaituta, EH Bilduko militantziak babes zabala eman dio Miren Zabaleta Telleriak, EH Bilduren bigarren kongresuan hautatu berri den Nafarroako arduradun politikoak, zuzendutako hautagaitzari. Hala, bilkideen %94,49ko babesarekin, Unai Lako Goñi, Politika Instituzionaleko arduraduna, Lola Eslava Serrano, Udal Politiken arduraduna, Haritz Romeo Galdeano, Antolakuntza arduraduna eta, Maddi Lasa Garcia, Komunikazio arduraduna, izango dira Zabaletarekin batera lurralde zuzendaritza berrian. Ezezko botoak %1,27 izan dira, eta boto zuriak jasotako botoen %4,24 izan dira. Aukeraketa honekin, EH Bildu Nafarroa aurrera doa Mahai Politikoaren osaketan, datozen lau urteetako jardun politikoak eta estrategikoak zehaztuko dituena. Barne-estatutuen arabera, mahai horretako partaile izango dira lurraldeko arduradun politikoarekin eta Koordinazio Taldearekin batera (Instituzio, Udal Politika, Antolakuntza eta Komunikazio arloetako arduradunek osatua), Nafarroako Parlamentuko eta Iruñeko Udaleko EH Bilduren bozeramaileak eta EH Bildu osatzen duten alderdi politiko bakoitzeko ordezkari bana (Nafarroaren kasuan, Sortu eta Eusko Alkartasuna). Prozesua ekainaren 12an amaituko da, 11:00etan Berriozarko Musika Eskolan egingo den ekitaldi politiko batekin. 

Landa-eremuetako ikasleei D ereduko Batxilergoa ikastea ahalbidetzeko eskatu du EH Bilduk

| 2021-06-04 12:43:00

EH Bildu Nafarroa talde parlamentarioak mozio bat erregistratu du foru Gobernua premiatuz “Nafarroako ikasle guztiek beren eskualdean D ereduko batxilergoa ikasteko duten eskubidearekin konpromisoa har dezan” eta, ildo horretatik, Hezkuntza Departamentuari eskatzen dio “behar diren neurriak hartzeko D ereduko Batxilergoa Tafallan eta Zangoza-Pirinioen inguruan bermatzeko, 2022ko aurrekontuen aurreproiektua egokituz”.

EH Bilduko bozeramaile Bakartxo Ruizek dagoeneko kritikatu duenez, onarpen-araudi berriak “Batxilergoko ikasketak euskaraz egiten jarraitu ahal izateko Tafallatik, Zangozatik edo Pirinioetatik Iruñera joan behar duten D ereduko ikasleekiko konparaziozko bidegabekeria eragingo du”.

Ildo horretatik, Ruizek jada eskatu zion Hezkuntza Departamentuari “bidegabeko egoera” horri irtenbidea emateko, baina deitoratu egin du kontseilariak “erantzun argirik ez ematea eta konponbiderik ez eskaintzea” joan den ostegunean Nafarroako Parlamentuan egindako osoko bilkuran. “Bere erantzuna iraingarria izan zen eta Departamentuaren jarrera, ikastetxeen eta familien kexen aurrean, benetan penagarria izaten ari da”, gaitzetsi du Ruizek.

Era berean, EH Bilduren bozeramaileak kritikatu du onarpen-araudiaren aldaketak “Nafarroako hainbat eskualdetako ikasleei eta haien familiai eragiten dien kaltea eta egoera bidegabea”.

Hori dela eta, EH Bilduk Hezkuntza Departamentuari eskatu dio “eremu horietako ikasleek sare publikoko D ereduko Batxilergoa beren eskualdean egiteko duten eskubidea gauzatzen ez den bitartean, beharrezko ekintza positiboko neurriak hartzeko, euskaraz ikasten jarraitzeko ahalegin berezia egin behar duten ikasle horien salbuespenezko egoerei eta irisgarritasun-beharrei erantzuteko”.

Halaber, EH Bilduren mozioak Hezkuntzari eskatzen dio “Iturramako Institutuan bi ikasgela ixteko erabakia zuzentzeko eta landa-eremuetako ikasleentzat beharrezkoak diren plazak bermatzeko, hala nahi badute eta beste ikastetxeetara iristeko arazoak badituzte”. Azkenik, eskatzen du “Iruñerritik kanpoko ikasleak ez diskriminatzeko, Arte Eszenikoen eta Arte Plastikoen Batxilergoko erreferentzia-zentroei dagokienez hurbiltasun-irizpidearen arabera, Nafarroako ikasle guztientzako aukera-berdintasuna bermatuz”.

EH Bilduk datorren ostegunean, ekainak 10, defendatuko du mozio hau Nafarroako Parlamentuan, eta aurrera egitea espero du, “ikasle horiek diskriminaziorik jasan ez dezaten”.

ALBISTEAK

Nafarroako EH Bilduko Koordinazio Talderako hautagaitza aurkeztu da

2021-05-28 14:20:00

Miren Zabaleta Nafarroako arduradun politikoarekin batera, Kongresuan aukeratu zena, Unai Lako, Lola Eslava, Haritz Romeo eta Maddi Lasak osatuko lukete lan taldea.