Mikel Oterok EH Bildu “boto jasangarri eraginkor bakarra” dela aldarrikatu du gaur goizean Subilla-Gasteizen, EAJk eta PSEk fracking-a erabili nahi izan zuten eta oraindik mehatxu horren pean jarraitzen duen tokian, hain zuzen, Jaurlaritzak bertan gas fosil ez konbentzionala ateratzeko saiakerari eusten baitio oraindik.
“Larrialdi klimatikoa datozen urteetako erronkarik nagusienetarikoa” dela azaldu ostean, Arabako zerrendaburuak euskal 750 akademikok esan dutenarekin bat egin eta ezinbestekotzat jo du “hona ekarri gaituzten politika axolagabeak baztertu eta norabidea aldatzea, aukera bakarra ingurumen, klima, energia, lurralde plangintza, azpiegitura, garraio, etxebizitza, industria eta elikadura politiketan eraldaketa handiak egitea delako, betiere justizia soziala eta guztiontzako oinarrizko baliabideak bermatuz. Ezin dugu hutsik egin, ez dago B planetarik eta”.
Horren haritik, Oterok EH Bilduren konpromisoak ezagutzera eman ditu, larrialdi klimatikoaren erronka horri ahalik eta hobekien aurre egiteko:
Mikel Oterok adierazi duenez, neurri horiek guztiak behar-beharrezkoak dira, premiazkoak, egungo egoera benetan kezkagarria delako: “Kontsumitzen dugun energiaren %80 baino gehiago baliabide fosiletatik dator, kanpo menpekotasuna %93koa da eta berriztagarrien hedapena, %7koa bakarrik. CO2 isuriei dagokienez, munduko eta Europako bataz bestetik gora gaude; hondakin sorkuntza itzela ere badugu (urtean 2.900 kilo pertsona bakoitzeko) eta heren bat baino gehiago zabortegietara doa. Gure elikadura burujabetza oso eskasa da, jaten ditugun jakiek, bataz beste, 3.000 kilometro egiten dituzte. Laburbilduz, gure aztarna ekologikoa ikaragarria da eta gure kontsumo maila mantentzeko 2,65 planeta beharko lirateke, eta bakarra daukagu”.