AKTUALITATEA

| 2025-08-29

EH Bilduk ikasturte politiko berri honetako Mahai Politikoaren lehen bilera egin du. Ondorengo agerraldian, Arnaldo Otegik uda honetako gertakarien balantzea egin du eta EH Bilduren datozen hilabeteetarako bide orria azaldu du.

“Mundua aldatzen ari da, eta ez hobera”, esan du Otegik, diplomazia alboratu eta indarkeriari bide eman diola gogoratuz, “Palestinako herriaren aurkako genozidio baten aurrean gaude”, Europa “Estatu Batuen asmoei makurtuta dago” eta larrialdi klimatikoa eta herri langilearen bizi-baldintzen okertzea gertakari eztabaidaezinak dira dagoeneko. Bere ustez, “aurtengo uda berrespenez betetako uda izan da, aspalditik adierazten ari garen joerak sendotzen ari direla egiaztatzekoa”.

Hala ere, mundua aldatzen bada ere, “aldatzen ez diren gauzak badirela” azpimarratu du. Otegik salatu duenez, “gertatzen dena gertatzen dela, uda oro agertzen dira sugeak: gertatzen den guztia EH Bilduren ardura dela dirudi”. Horren aurrean argi mintzatu da: “Guk ez dugu gobernatu ez Nafarroako Gobernua ez Gasteizkoa, eta Osakidetzan, etxebizitzan edo prekarietatean arazoak badaude, zerikusirik izango dute gobernatu dutenek hainbat hamarkadatan aplikatu dituzten politikek. Ezin dena egin da erabakitzeko gaitasunik izan ez dugunon gain ardura jarri”.

Dinamika horretatik harago, Otegik azpimarratu nahi izan du EH Bilduren asmoa ez dela kritikara mugatzea. “Ez dugu arazoen ahotsa izan nahi, itxaropenaren eta alternatibaren ahotsa izan nahi dugu. Alternatibak badirelako”, esan du. Zentzu horretan, ezker independentista eta soberanistak irailaren 20an Donostian Konferentzia Politikoa egingo duela iragarri du, eta azaroaren 22an mobilizazio nazionala antolatuko duela Bilbon. “Datozen hilabeteetan itsaso nahasi honetan nabigatuko dugu proiektu sendo batekin, erakundeetan eta kalean proposamen zehatzak planteatuz”.

Akordioak lortzeko jarrerari buruz, Otegik azpimarratu du “EH Bildu beti egon da akordioak egiteko prest, baina edukiarekin. Egingo ez duguna da egungo arazoak sortu dituzten politikak babestu. Akordioak bai, baina jendearen bizitzak eraldatzeko eta hobetzeko”. Era berean, Euskal Herriak “subiranotasun gehiago eta estatus politiko berriak behar ditu, erabakitzeko gaitasunarekin soilik bihurtu ahal izango ditugulako erronkak aukera, ikuspegi aurrerakoi eta demokratiko batetik”.

Eragile politiko, sindikal eta sozial guztiei dei eginez amaitu du EH Bilduko idazkari nagusiak: “Egin dezagun Madrilgo giro kutsakorra euskal politikara ez ekartzeko ahalegina. Guk urteak daramatzagu goi-mailako politika, eztabaida serioak eta benetako irtenbideak eskatzen. Hori da gaur berriz altxatzen dugun bandera: esperantzaren eta alternatibaren bandera”.