AKTUALITATEA

Getxon ondare historikoa eraistea oso merke ateratzen da

| 2025-03-18 12:10:00

Joan den astean jakin genuen zein isun jarriko dion Getxoko Udalak Algortan Irurak Bat jauregitxoa modu irregularrean eraitsi zuen enpresa eraikitzaileari: 50.000 euro, kopuru lotsagarria gertakarien larritasuna kontuan hartuta (ondare historikoaren galera konponezina, eraitsi behar ez zen fatxada osoa eraistea, etab.). Eraistearen ondorio bakarra isun hori bada, argi dago eraikuntza-enpresentzat konpentsatu dezakeela legea urratzea, isuna bere gain hartzea, eta, ondoren, eraiki, eraikuntza berrietarako inolako "oztoporik" errespetatu behar izan gabe. Kontua ez da, beraz, Irurak Bat ekimenarekin gertatu denari bakarrik begiratzea, etorkizuneko hirigintza jardueretarako mezua ere izan baitaiteke: legea urratzeak ez du ondorio handirik izango, merezi du egiteak.

 

EH Bilduk presio egiten jarraituko du egoera hau berriro gerta ez dadin eta erantzukizunak argitu daitezen. Getxoko Udala auzi honetan herri-akusazio gisa pertsonatzen saiatu gara, baina gure proposamena ez da aurrera atera EAJ, PP eta PSEren babes faltagatik. Gobernu Taldeak, gardentasunez jokatu eta dituen datu guztiekin gai honetan zer gertatu den azaldu beharrean, oztopoak jartzen eta informazioa ezkutatzen jarraitu du. Gobernu Taldearen borondaterik eza ikusita, EH Bilduk fiskaltzaren esku utzi zuen dokumentazio guztia, legez kontrakorik egin ote den erabaki zezan. Ikusiko dugu azkenean zertan geratzen den kontu hau.


Baina berriro diogu: Irurak Bat kasuarekin gertatutakoa konponezina da, baina baldintzak sortu behar ditugu etorkizunean berriro gerta ez dadin. EAJk, PPk eta PSEk behin-behinean onartutako HAPO berriak eraikin historiko ugari eraisten jarraitzea planteatzen du: dozenaka baserriri (horietako askotan bizilagunak bizi dira) babesa kendu zaie higiezinen espekulazioari bide emateko. Irurak Bat eraikinaren kalean bertan, eraiste gehiago aurreikusten dira. Eusko Jaurlaritzak berak ere ohartarazi dio Udalari egoera horretaz, baina Udal Gobernuak oraingoz entzungor egiten jarraitzen du. Presioa egiten jarraituko dugu.