AKTUALITATEA

| 2025-04-23

Apirilaren 20an, Euskal Herriko Aberri Egunean, 15.000 lagunetik gora bildu zituen EH Bilduk Iruñean ospatutako egun osoko egitarauan, Askatasunaren nazioa gara lelopean. Goizeko manifestazio nagusiaren ostean, Arnaldo Otegi idazkari nagusiak eskua luzatu zuen «Euskal Herria naziotzat daukaten guztiei» berdinen euskal errepublikaren alde lan egiteko.

Manifestazioa Golem zinema aretoetan hasi eta Antoniutti parkean amaitu zen. Han eman du hitzaldia Otegik. Adierazi duenez, nazioarteko egoera «nahasian» aukera bat dauka Euskal Herriak. «Gauza handiak egin dituen herri txiki bat gara, eta une honetan adimentsuak izan behar dugu gure nazioaren subiranotasuna eskuratzeko».

Nabarmendu duenez, «aukera baten aurrean gaude euskaldunak. Mundu anabasa honetan gure eskalaren kontzientzia eduki behar dugu, baina gure aukeren kontzientzia ere bai. Horregatik, gaur, berriz ere, aukera baten aurrean gaudela esaten dugunean, zera esaten dugu, gailurrera eramaten gaituen bide horretan nazio ikuspuntutik aukera egon daitekeela urratsa egiteko oinarrizko kanpamentua igotzeko, eta urrats hori elkarri egin behar dugula. Gure predisposizio osoa dago bide hori batasunean egiteko Euskal Herria naziotzat duten guztiekin. Ez bakarrik alderdiak, baita alor sindikalean, alor kulturalean, mugimendu feministan edo langileen mugimenduan dauden sektore guztiekin».