Pasaia

EAJk eta PSEk beste behin gure herriaren beharrak albo batera utzi dituzte

Pasaiako EAJk eta PSEk ezezkoa eman zioten EH Bilduk Foru Funtsaren inguruan aurkeztutako emendakinari eta mozioari.

UFFF,FFFM,Ekonomia,Udalbatzarra | 2020-05-27 16:30:00

Gipuzkoako Foru Aldundiak udalen finantzazioa %20an murriztea erabaki du, aldebakarrez. Udalek komunikabideen bidez jakin duten murrizketa horrek Pasaiako kasuan 2.346.393,89€ gutxiago jasoko dugula suposatzen du, Pasaiako aurrekontuaren %10a, hilabete honetatik bertatik hasita.

Inoiz ez da horrelakorik gertatu Gipuzkoan, inoiz ez zuen Aldundiak horrelako erabaki bat hartu udalen aurka, hain zuzen herritarrengandik gertuen dauden erakundeen aurka.

Zentzu honetan, Pasaiako EH Bilduk bere dezepzioa adierazi nahi du atzoko Pasaiako plenoan Pasaiako EAJ eta PSEk Aldundiak udalen aurka hartu duten erabaki honen aurrean izan zuten jarrerarengatik. Bien artean duten gehiengoa baliatu zuten gure proposamena atzera botatzeko eta onartu zuten adierazpenak ez du erabakia salatzen ez eta Aldundiari erabakia birpentsatzeko eskatzen. Hainbestekoa da euren alderdiei obedientzia 2.346.393,89€ gutxiago jasoko ditugula eta ez direla gai ezer ere ez esateko?

Gipuzkoako udalek ezin dute murrizketa hau onartu, eta are gutxiago gurea bezalako egoera zailean dagoen udal batek. Beste behin EAJk eta PSEk gure herriarenak ez diren interes batzuk lehenetsi dituzte, beste behin erabakiak gure herritik kanpo hartzea onartu dute, pasaitar guztion kalterako.

Pasaiako EH Bildutik ez dugu amore emango. Gure herriak behar eta merezi duen finantzazioa borrokatzen jarraituko dugu beharrezkoa den instituzio guztietan eta orain arte egin dugun bezala, beste taldeei proposamenak luzatzen jarraituko dugu, EH Bildu alkatetzan dagoen herrietan (Errenteria, Oiartzun, Zumaia...) jada indarrean dauden laguntzak eta ekimenak Pasaian ere aurrera eraman daitezen, lehenbailehen.

Gipuzkoako Foru Aldundiak Udalen Finantzaketarako Foru Funtsa (UFFF) murriztuko du. Zein ondorio izango ditu erabaki honek Pasaian?

Pasaiako Udalak jasoko duen murrizketa 2.346.393,89€koa da, Pasaiak duen aurrekontu globalaren %10a.

Ekonomia,UFFF,FFFM | 2020-05-24 15:20:00

Maiatzaren 14an Gipuzkoako Aldizkari Ofizialean argitaratu zen Gipuzkoako Foru Aldundiak udalei egiten dien diru-banaketan %20ko murrizketa aplikatzeko Diputatu Kontseiluaren aldebakarreko erabakia.

Bai, aldebakarrekoa, udalei ez baitzitzaien inongo aukerarik eman erabaki horretan parte hartzeko edota iritzia emateko. Horrelako erabakiei buruz hitz egiteko toki beharko zukeen Gipuzkoako Finantzen Kontseilua hurrengo egunean bildu zen eta dagoeneko hartuta zegoen, beraz, bilera erabakiaren berri emateko izan zen soilik.

Bilera horretara, EH Bilduk proposamen bat eraman zuen Gipuzkoako 56 alkatek sinatutako proposamen alternatibo bat. Baina bertan zeuden agintariek muzin egin eta euren erabakiarekin aurrera egitea erabaki zuten. Gure proposamenak beraz, ezezko borobila jaso zuen momentuan bertan.

Udalak –horien artean Pasaiako Udala–, herritarren beharretatik gertuen dauden erakundeak izateaz gain, lehen mailako erakundeak dira, Udal Legeak aitortzen duen bezala. Zentzu honetan, euskal erakundeen arteko diru-banaketan aldaketarik egon behar bada, erakunde guztien artean eztabaidatua eta adostua izan behar luke, aldeek informazioa modu gardenean partekatu ondoren eta inola ere ez aldebakarrez.

Erabaki hau are larriagoa bihurtzen da kontutan hartzen badugu lehenengo aldia dela Gipuzkoako Foru Aldundiak itzulketa hori urte berean egitea eskatzen duela. Honek, nola ez, hautsak harrotu ditu eta aurretik aipatutako 56 alkateei (44 EH Bilduko eta 12 independente) PSE-EEko 8 alkate batu zaizkie. Beraz, Gipuzkoak dituen 82 alkatetatik 64 kexu azaldu dira Aldundiak hartu duen aldebakarreko erabakiaz.

Zein ondorio izango ditu erabaki honek Pasaian?

Zerbitzu publikoak garatzeko ezinbestekoa den finantzazioaz ari gara hizketan, udalen eguneroko kudeaketan eta herritarren bizitzan eragin zuzena duten erabaki politikoez. Kontutan hartzen badugu Pasaiako Udalak jasoko duen murrizketa 2.346.393,89€koa dela, Pasaiak duen aurrekontu globalaren %10a kenduko digu Aldundiak, urte berean eta negoziaziorako aukerarik gabe.

Murrizketa horrela egiteak ondorio zuzenak izango ditu Udalak aurten eskainiko dituen zerbitzuetan, horietako asko finantzazio txikiagoarekin egingo direlako edo batzuk zuzenean bertan behera utziko direlako. Aldundiaren erabakiak indarrean zegoen aurrekontuan murrizketa nabariak egitea ekarri du eta honek zuzenean udal zerbitzuen kalitatean izango du eragin zuzena. Murrizketa horien artean hain zuzen euskara, gazteria eta kulturari dagozkionak daude.

Honen aurrean ezin dugu isilik geratu, ondorioz, datorren asteartean (hilak 26) ospatuko den udalbatzarrean mozio bat aurkeztuko dugu UFFFri buruzko elkarrizketaren aldeko apustu irmoa egiten duena eta Diputazioari aldebakarrez hartutako erabakia berraztertzeko eskatzen diona, besteak beste.

Aberri Eguna 2020

EH Bilduren adierazpena 2020ko Aberri Eguna dela-eta

Aberri Eguna,2020,Euskal Herria Batera | 2020-04-11 23:30:00

Aurtengo Aberri Eguna egoera oso berezian datorkigu, konfinamendu betean aurkitzen da euskal jendartea eta honezgero Euskal Herriaren luze zabalean bere arrastorik gordinena ezagutzeko parada eduki dugu gaitz hau bitarteko zendu diren mila inguru herritarrengan eta gaitzak jota dauden milaka horiengan. Mundu mailako krisi humanitario honek, sanitarioak diren ondorioez gain alor ezberdinetan izango dituenak aurre ikustezinak zaizkigu, edonolaz ere, aurrerantzean gure bizimodu eta ohituretan eragingo dituen aldaketek, batik bat politika alorrean orain arteko egiteko moduetan ere aldaketak eragitea espero dugu.

Ama lurraren jasangarritasuna eta gizaki ororen bizitza duina eta zoriontasuna ere mundo mailako lehentasun bilakatu behar honen baitan ulertzen dugu gure aberriak hartu behar duen itxura. Euskal Herria munduak zazpi lurralde hauetan hartzen duen izena da eta inoiz baino beharrezkoagoa Euskal Herriaren aitortza defendatzen dugunon aldetik oraindik aitortu gabeko herri txiki honek munduan jokatuko duen papera zein izan behar den hausnartzea; nazioa aitortzea ez da soilik esparru politikoan gauzatu beharreko helburua, nazio izaera gero eta gehiago lotzen da komunitate garapenarekin eta honen jasangarritasunarekin, autoeraketa eta dinamika sozial eraldatzaileen arteko lankidetzarekin, nortasuna eta aniztasuna bateratzearekin. Eskubide oinarrizkoen bermea, pertsonen arteko berdintasuna eta elkarrenganako errespetua sustatzen dituen komunitatea da nazio eraikuntzaren oinarria. Eskubide oinarrizkoen bermea, pertsonen arteko berdintasuna eta elkarrenganako errespetua sustatzen dituen komunitatea aldarrikatu nahi dugu 2020ko Aberri Egun berezi honetan.

Erabaki guneak zenbat eta erabakiak gauzatu beharko diren lurraldeetatik hurbilago egon orduan eta eraginkortasun handiagoz erantzuten zaie egoera zailei. Zer izan behar garen erabaki nahi dugun bezala, gure aldameneko herrialdeekin izan beharreko harremanak erabaki nahi dugun bezala, krisi honetatik nola atera eta utziko dituen ondorio lazgarriei erantzuteko ahalmen politikoa ere aldarrikatzen dugu. Bat egiten dugu herri honen sen demokratikoarekin.

Elkarlanean aritzeko garaia da, batera, auzolanean aritzeko garaia. Pasarte ilun hau atzean utzi eta gure herriarentzat eta herritarrentzat etorkizun hobe bat xede lanean hasteko prestutasun osoa gordetzen dugu.

Horregatik, Pasaiako EH Bilduko kideok pasaitarroi dei egiten dizuegu:

  1. Ikurriñak etxeko balkoietan jartzea.
  2. 12:30ean minutu bateko isilunea mantentzea krisi honetan beren hurbilekoak galdu dituzten eta nahi bezala agurtu ezin izan diren ehunka familiengatik.

Junkal Mintegiaren mezua pasaitarrei [COVID-19]

Junkal Mintegia Arregik (Pasaiako EH Bilduren bozeramaileak) mezu bat bidali die pasaitar guztiei bideo baten bitartez.

Koronabirusa,COVID-19 | 2020-04-10 15:00:00

Junkal Mintegia Arregi: "Momentu zailak bizitzen ari gara, zentzu askotan, baina krisi honetatik indarberrituta irtengo gara. Elkarri zaintzeko unea da."

Dagoeneko hilabete bat daramagu etxean konfinatuta. Aste gogorrak izan dira, baina, hala ere ondo ari gara. Horregatik, Junkal Mintegiak pasaitar guztiei mezu bat helarazi nahi izan die. Esker eta animo mezua.

Lehen lerroan dauden langileei eman dizkie eskerrak eta animoak, haurrei, gure helduei eta funtsean, bizilagunei. Krisi honetatik indarberrituta irtengo garela adierazi du, baina bitartean, elkarri zaintzeko unea dela.

BIDEOA:

"Zaldibar, bi hilabete geroago"

Mikel Otero Gabirondoren - EH Bilduren legebiltzarkidea - artikulua.

Zaldibar,Zaldibar Argitu | 2020-04-06 14:39:00

Koronavirusaren hedapenari eusteko ahaleginak “leku txar” edo distopia batean utzi gaitu, non gure egunerokotasuna eta subjektibotasuna desitxuratzen den. Bakoitzak ahal duen moduan darama egoera berezi hau, eta era guztietako trikimailu eta adimen-adierazpenak ikusi ditugu, bai banakakoak, bai familiakoak, auzokoak edo komunitatekoak, bai aurrez aurrekoak, bai birtualak, derrigorrezko mugak ahalik eta duintasun handienarekin jasateko. Harridura kolektiboko egoera honetan, birusaren burbuila bera eta haren dinamika ez den guztia urruneko mundu paralelo batetik datorrela dirudi, eta Zaldibarko zabortegiko gertakariek, nahiz eta garrantzi eta larritasun handia izan eta haren erorketaren inguruan sortutako arazoak hor jarraitu, dena aldatu zuen pandemiaren aurreko denboraren nebulosan galtzeko arriskua dute.

Horregatik da garrantzitsua, orain zabor jauzia gertatu zenetik bi hilabete luze betetzen direla, Zaldibarren zauri ireki dezente ditugula gogoratzea, oraindik ere arreta eta dedikazioa merezi dutenak.

Lehena, bistakoa den bezala, Albertoren eta Joakinen gorpuak berreskuratzea da. Premiazkoa dugu. Pairatzen dugun urruntze sozialaren denboran zerbait agerian geratu bada, hauxe da; murrizketarik txarrena eta mingarriena, hain zuzen ere, hil daitezkeenak edo hildakoak behar bezala agurtzea galarazten diguna dela, heriotza asimilatzen laguntzen diguten errituetan benetako kortozirkuitua eraginez. Tamalez, gure zirkuluetan heriotza eta bakardadearen nahasketa ikaragarri hori ikusten dugun neurrian, hobeto ulertzen dugu Zaldibarko desagertuen senide, lagun eta herritarren egonezina, gorputzak berreskuratzearen eta duintasunez agurtzearen garrantzia azpimarratzen dutenean. Jendarte gisa zor diogu.

Ildo horretan, Euskadi Buru Batzarreko kide Koldo Mediavillak adierazi izana, unean uneko eta alderdikeriazko jaurtiketa-arma gisa, funtsezkoak ez diren jarduerak geldiarazteak bertan behera utz zezakeela Alberto eta Joakin bilatzea, edo Segurtasuneko Sailburuak esan izanak ez zekiela bilaketa funtsezko jarduera zen ala ez, hotzikarak eragiten dizkit.

Askoz gehiago dago. Zaldibar, besteak beste, tamaina erraldoiko ingurumen-hondamendia izan zen eta da oraindik ere. Dioxinekin kutsatutako airea arnasteko lehen eta arrazoizko beldurrak gaindituta, arazo bat izaten jarraitzen dugu zabortegiko lixibiatuekin, eta arazo bat izaten jarraitzen dugu milioika tona hondakinen karakterizazioarekin eta xedearekin. Gogoan izan gaur egun dena dela arriskutsua amiantoa nahastu zelako, eta horretarako ez da irtenbide egokirik aurkitu. Eta, nola ez, inguruko ur, aire eta lurren kalitatearen jarraipena gelditzen zaigu, birusak dena estali zuenetik apenas entzun dugun gaia.

Inguruan dauden arazoez haratago, bi eztabaida ditugu, gutxienez, zintzilik. Zaldibarren, hondakin asko ez ezik, kudeaketa eredu bat erori zen. Egunotan agerian geratu da osasun eta zaintza sistema publiko, indartsu, serio eta zorrotz baten beharra. Hondakinekin eztabaida antzekoa da. Esparru publikotik utzikeria urteak izan dira ekimen pribatuaren gehiegikerien aurrean. Gobernuak, zabortegian zituen kontrol erantzukizunak ezkutatzeko, ekimen pribatua zela behin eta berriz esan izanak, argi erakusten digu jendarte batean funtsezkoa dena irabazi pribatuaren esku ez uzteko beharra. Nago dekretuen, geldialdien eta entzierroen kolpez, denbora izan dugula ezinbestekoa zer den eta zer ez den ulertzeko. Aurrerantzean funtsezko zerbitzuen publikotasuna indar handiagoz lehiatu behar dugula uste dut.

Azken kontu garrantzitsu bat geratzen da. Krisiaren kudeaketa argitzea eta gobernuak erantzukizunak bere gain hartzea. Dagoeneko, gertatu zenaren inguruan hainbat kontu argitu ditugu. Zabortegi batek, zubi bat bezalako ingeniaritza obra bat den neurrian, ez du zertan inoiz erori behar. Exekuzioak huts egin zuen, eta kontrolek huts egin zuten.

Gehiago dakigu; koordinazioak huts egin zuen, gobernuak bazekien amiantoa zegoela, baina ez zen garaiz komunikatu, eta horrek erreskatean esku hartu zutenen kutsadura eragin zuen. Gobernuaren komunikazioak ere huts egin zuen, bi zentzutan. Alde batetik, komunikazio ofiziala normaltasuna eta existitzen ez zen kontrola irudikatzeko erabili zen, mahai gainean datu (txar) guztiak izan aurretik airearen kalitatea ona zela ziurtatzeraino. Bestalde, ahalegin handia egin zen egun luzeetan aurpegia ez emateko, kargu ertaineko arduradunak azalpenak ematen ipiniz, arazoaren tamaina ezkuta ezina zenean.

Ostean, lehendakaria kontakizuna aldatzen saiatu zen, enpatia propioaz hitz eginez eta agintea lehen unetik izan zuela azalduz, hauteskunde data frustratuaren inguruan biraka ari zela nabarmena zenean. Gutxi balitz, Zaldibarko krisia hauteskunde gatazkan erabiltzea leporatu zioten oposizioari, Zaldibarko krisiaren erdian hauteskundeak deitu zituena lehendakaria izan zenean. Lehen prepotentzia-bulkadak gaindituta, tonua jaitsi behar izan zuen, eta umiltasuna agertu autokritikaz hitz eginez; autokritika, ordea, ez zen ezertan zehazten, sailburu bakar batek ere ez baitu onartu oraindik inolako jardun okerrik.

Laburbilduz, ikusten dugu gabezia berberak errepikatzen direla bizitzea egokitzen ari zaizkigun ondoz ondoko krisiak kudeatzeko orduan. Erreakzio berantiarrak, arazoak minimizatzea gainezka egiten diguten arte, eskura dauden bozgorailu guztiak erabiltzea begirada xehea jasaten ez duen errealitate apaindu bat marrazteko, kudeaketan akatsak edo disfuntzioak ez aitortzea, gobernuari kudeaketa konfiantza ematea kontrol lanak eragoztearekin edo kritika eraikitzaileak ezin egitearekin nahastuz eta abar. Ez dirudi XXI. menderako gobernantza-eredurik onena denik, non krisi klimatikoa bezalako erronka erraldoiei aurre egin beharko diogun.

Amaitze aldera, alde positiboan, birusaren krisian egiaztatzen ari garen bezala, jendarte antolatuaren bultzada sumatu dudala azpimarratu nahi nuen, eta kasu honetan #ZaldibarArgitu inguruan biltzen dira gaur, atzo bezala, betetzeko dauden eskaera nagusiak. Erreskatea, administraziotik zein enpresatik gertatutako guztia argitzea, hondakinen ekoizpen- eta kudeaketa-eredua birplanteatzea, funtsezko gaietan komunitateak parte hartzeko eskakizuna, horrelakorik ez errepikatzeko konpromisoa, eta egon diren erantzukizun politikoak behingoz garbitzea. Erabateko adostasuna dut protesta babesteko.

Zaldibarko hondamendiaren ondoren, ezer ez zela berdina izango esan genuen. Hainbeste hondakin sortzera eraman gintuen gizarte eredua aldatu egin behar zela. Kontrolik gabeko hondakin horiek ezin zirela ezkutatu dudako zorroztasuna duten enpresak loditzen genituen bitartean. Kudeaketak publikoa izan behar duela. Birusarekin, osasungintza eta zaintza arloetan konklusio berdinak atera ditugu. Ez dezagun ahaztu.

ALBISTEAK

Pasai San Pedroko Ondartxoko ez-pasealekua

2020-10-25 21:00:00

Hirigintza zinegotzi den Nahikari Oterminek hilabeteko epean hasiko zirela iragarri zuen arren, Ondartxoko obrak ez dira gutxienez abendura arte hasiko.

Donibane, noiz arte?

2020-09-19 12:00:00

Pasaiako EH Bilduko zinegotziak Donibanen.

Antxon, elkarbizitza, elkartasuna eta segurtasuna

2020-09-10 14:30:00

Pasaiako EH Bilduren zinegotziak Antxoko Zumardian.

Instituzio nagusiek Pasaiarekiko eta Pasaiako Portuarekiko duten arduragabekeria salatzen du EH Bilduk

2020-08-01 14:00:00

Artxibo irudia. Pasaiako EH Bilduko zinegotziak Pasai Antxo eta Buenavistako moilaren parean.