Gipuzkoa

Adineko egoitzetako erabiltzaileek senideen arreta zuzena jaso ahal izatea eta testak maiztasunez egitea eskatu du Gipuzkoako EH Bilduk

Apirilaren amaieran -data zehazteke- Batzar Nagusietan egingo den ez ohiko Osoko Bilkurarako hiru ebazpen-proposamen aurkeztu ditu EH Bilduk. Gipuzkoako egoitzetan erabiltzaileek arreta zuzena jaso ahal izatea eta langile guztientzat testak maiztasunez egitea eskatu du. Horiez gain, Azkoitiko zabortegiaren gaia eta krisi-mahaiaren eratzea eramango ditu bilkurara.

| 2020-04-16 18:50:00

Gipuzkoako egoitzetan gutxienez 111 pertsona hil dira, azken egunetan batazbeste 10-15 hildako egunero, eta joera hori eteteko neurriak ahalik eta azkarren hartzea beharrezkoa da, egun bakoitzeko biktima kopurua dagoelako jokoan. Egoera horri erabiltzaileek bizi duten bakardade egoera erantsi behar zaio; askok gaitzari senitartekoen bisitarik gabe egin behar izan diote aurre eta euren bizitzako azken unean ere ezin izan dute agurtu.

 

Covid 19ari aurre egiteko neurri eraginkorrak lehenbailehen adostu eta jarri behar dira martxan. Izan ere, egun ez dago arreta zuzeneko langile nahikorik adinekoentzako egoitza-zentroetan. Langile zuzkidura, gainera, desberdina da lurraldearen eta egoitza-zentroaren titulartasunaren arabera.


EH Bilduk eskaera egin du Gipuzkoako Batzar Nagusiek Eusko Jaurlaritzari eska diezaioten EAEko adinekoentzako egoitza-zentroei buruzko 126/2019 dekretua berehala aldatu dezan erabiltzaileek jasotzen duten arreta zuzena nabarmenki igotzeko. Eta gauza bera egin dezala eskatzen dio EH Bilduk Gipuzkoako Aldundiari bere ardurapeko arreta-sareko egoitzetan eta egoitza publiko zein pribatuetan.


Horrez gain, pandemia hasi zenetik errepikatu dugun moduan, zentro guztietan beharrezkoak diren segurtasun-neurriak bermatzeko eta erabiltzaileei eta langile guztiei SARS-CoV-2 detektatzeko probak ahalik eta azkarren egitea eskatu dugu, eta test horiek maiztasun bat izan dezatela. Aldi berean, ikuskaritza plan berezi bat berehala martxan jartzea eta titulartasun pribatuko adinekoentzako zentroetan esku hartzea eskatu dugu, gomendioak, neurriak eta jarduteko arauak betetzen direla bermatzeko.

Orain Azkoitian hondakin planta pribatu bat irekitzeko baimenak frogatzen du Lakuak ez duela ezer ikasi Zaldibarko ezbeharraz

“Zaldibarren argi geratu da instalazio pribatuetan kontrol publikoak ez direla nahiko, Jaurlaritzak berak aitortu duenez, eta hondakinen kudeaketa eredua aldatu behar dela, esku pribatuetatik publikoetara pasa dadin, baina Gobernua akatsa errepikatzen ari da Azkoitian”, dio Mikel Oterok.

| 2020-04-10 12:33:00

 

“Lakuako Ingurumen Sailak ez du ezer ikasi Zaldibarren”. Hala ondorioztatu du Mikel Oterok Jaurlaritzak beste zabortegi pribatu bat, Azkoitian oraingoan, irekitzeko baimena eman duela ikusirik. EH Bilduko legebiltzarkideak salatu duenez, “larria eta onartezina da erabaki hori, Zaldibarko ezbeharrak zerbait irakatsi badu, zera izan da: hondakinen kudeaketa eredua ezinbestean aldatu behar da kontrol publikoa, egiazkoa, bermatu ahal izateko. Zaborren kudeaketa esku pribatuetatik publikoetara pasatu behar da, zabortegiak esku pribatuetan uzteak kontrol falta dakarrelako, eta hori oso garesti ordaindu dugu Zaldibarren. Han argi geratu da azpiegitura pribatu horietan kontrol publikoak ez direla nahiko eta Jaurlaritzak berak hala aitortu behar izan du. Beraz, ulertezina da orain Azkoitian akats berbera errepikatzea eta larria ere bada oharkabean egiten saiatzea, hain justu, alarma egoeran eta Legebiltzarra deseginda, kontrol parlamentarioa saihesteko”.

 

“Administrazioak urteetan sustatu duen hondakinen kudeaketa pribatua, ‘low-cost’ eredua, etekin pribatu azkarra helburu duena, ez da bateragarria esparru horretan ezinbestekoa den kontrol publiko zorrotzarekin”, azpimarratu du Oterok, eta gogorarazi du Zaldibarko ezbeharraren ostean Iñaki Arriola Ingurumen sailburuak berak onartu zuela kudeaketa eredu pribatu hori ez ote zegoen agorturik, kontrol publikoak huts egin zuela ikusita, eta horri buruzko gogoeta sakona egin behar zela. “Agerikoa da baietz, hondakinen kudeaketa kontu esentziala dela jendartearentzat eta horrek, beraz, eskatzen duela horren inguruko planifikazioa, exekuzioa, kudeaketa eta kontrola publikoak izatea. Tamalez, Arriolari oso azkar ahaztu zaio Zaldibarkoaren ostean esan zuena, gezurrezko malkoak ziren. Azkoitian beste planta pribatu bat irekitzeko baimena emateak hala frogatzen du”.

 

Gainera, Oterok ohartarazi du Azkoitiko instalazio berrian, “helburua hondakinen balorizazioa dela dioten arren, biltegi bat egongo dela eta bertan lur kutsatuak, amiantoa barne, gordeko direla”.

EH Bilduk lehen sektorerako proposamenak landu ditu

“Lankidetzan aritzeko garaia da eta zentzu horretan uste dugu hartu behar diren neurriak baserritarrekin batera hartu behar direla”, dio Gipuzkoako EH Bilduko batzarkidea den Mirene Begiristainek.

| 2020-04-04 13:51:00

 

Alarma egoera honek, gora-behera handia sortu du sektore ekonomiko guztietan, baita lehen sektorean ere. EH Bildutik egun hauetan proposamenak egiten ari gara lehen sektoreko langileek bizitza eta lan duina izan dezaten.

 

EH Bilduk bat egin du Latxa Esneak, Artzai Gaztak eta Larsabik elkarrizketarako egindako eskaerarekin. “Oso garrantzitsua iruditzen zaigu lehen sektoreko eragileei entzutea eta haiekin batera irtenbide adostu eta duin bat lortzea”, adierazi du Begiristainek. Hausnarketarako garaia dela gaineratu du ere bai, “konfinamendu egoera honetan, gure herri eta eskualdetan dauden baserritarren elikagaiak modurik zuzenenean kontsumitzera gonbidatzen zaituztegu”.

 

Hauek dira EH Bilduk egun hauetan lehen sektorerako proposatutako neurriak:

 

- Baserritarren elikagaientzat zuzeneko salmentak bermatu eta bitarteko zehatzak ipini.

- Tokiko dendetan baserritarren elikagaiek irisgarritasuna izatea.

- Baserrien ekoizpena bermatu.

- Landa eremuko herrientzat fondo berezi bat sortu.

- Gizarte zerbitzuekin kalitatezkoa den elikadura bermatu.

- Europatik datozen diru-laguntzen %50-a aurreratu eta BEZ-a itzuli.

- Lehen sektoreko eragileekin batera erabakiak aztertu eta hartu.

- Udalekin koordinazioak mantendu herrietako azokak irekita mantendu ditzaten.

Herritarrei ordainketa epeak atzeratzeko eskatu dio EH Bilduk Gipuzkoako Ur Kontsorzioari

| 2020-04-03 15:12:00

Gipuzkoako Ur Kontsorzioak Gipuzkoako milaka herritarrei eskaintzen dizkien zerbitzuengatik kobratu beharreko fakturak atzeratzeko eskatu du EH Bilduk.

 

Covid-19 birusak eragindako egoeraren aurrean, bai Gipuzkoako Aldundiak eta baita Udal ezberdinek ere zergak eta tasak atzeratzeko erabakia hartu dute eta Ur Kontsorzioak ere gauza bera egin beharko lukeela uste du EH Bilduk. Eta horregatik, ezingo litzateke ulertu tasa horren ordainketa ez atzeratzea.

Zergaitik baino, zertarako jan baserritarrek ekoizten dutena?

Mirene Begiristainen, Gipuzkoako EH Bilduren batzarkidearen iritzi artikulua

| 2020-04-02 11:53:00

Imajinatzen jarrita zertarako balio dezaken covid-19ak, izan dadila elikadura burujabetzaren teoriatik praktikara pauso eta prozesu sakonak emateko.

 

Lagun on batek dio gauzak zergatik gertatzen diren baino, zertarako gertatzen diren galdetzea hobe dela. Askotan gogoratzen dut Aitziberren ñabardura hori; eta covid-19a gurera etorri denean ere, zein ñabardura aproposa den jabetu naiz.

 

SARS-CoV-2 izen zientifikoa du; baina, covid-19 bezala ezagutzen dugun gehiengoari datu, galdera, kezka… asko ekarri dizkigu, erantzun ziur gutxi oraindik. Harrigarria bada ere, eztabaida nagusienetakoa izan da ea jarduera ekonomikoa pertsonen zaintzaren eta beharren aurretik jarri behar ote dugun. Zaintzaren eremu horretan kokatzen ditut azken egunotan baserritarren eta elikagaien hornikuntzaren inguruan hartzen -edo ez hartzen- ari diren neurrien eztabaida. Izan ere, elikaduraz ari garenean, jarduera ekonomiko batetaz harago, bizitza sostengatzeko oinarrizkoak ditugun beharrez ere ari garelako: bai elikagaien ekoizpena, bai inguruaren zainketa, bai horniketa, bai janariaren prestaketa… bai, behinik behin, nekazaritza iraunkorraz ari bagara.

 

Beraz, elikaduraren eremuan, zertarako etorri da covid-19a? Bada, dauden dinamikak biluztera, bai norbanako kontsumo jokaeratan, baina bereziki kolektiboki ditugunak nabarmentzera. Elikadura kate globalak gailentzen dira egungo elikadura sistemaren ereduan. Milaka kilometro bidaiatzen duten elikagaiak eta supermerkatuetako apaletan ernetzen edo hazten ez diren horien erosketak handitzen diren bitartean, saltzeko arazoak dituzte jatetxe, taberna, eskola, haurtzaindegi, azoka edota beste zuzeneko aukerak erabiltzen dituzten baserritarren ekoizpenek. Azken urteetan zuzeneko salmenta bide eta ekimen asko sortu direla ikusi dugu, eta ordu gutxitan egoera berriak eskatzen duen egokitzapenak beste ekimen asko martxan jarri dituela irakurtzen gabiltza; herriz herri, boluntario sareen bultzadaz, elkarte eta kolektibo desberdinen eskutik. Guztiei esker egoera bideratzen dabil orokorrean. Betiko lez, baina inoiz baino gehiago, lankidetza garaia.

 

Ekimen hauen ezaugarri nagusia da elikadura osasuntsu eta iraunkorraren aldeko ekimen kolektiboak direla. Covid-19a erakusten ari zaigu etxean bizirauteko zenbateraino dugun komunitatearen beharra; gure interdependentzia. Ikusezinak ohi diren zaintza lanak ezinbestekoak direla sentitzen dugu, elkar-zaintzeko osasun neurriak denok hartu behar ditugula, oinarrizko beharrak lehenetsiz. Eta oinarrizko beharren artean elikadura, tokikoa, konfiantzazkoa, saretua, iraunkortasunari eta lurrari loturikoa.

 

Horrekin batera, covid-19ak nabarmentzen digu gure espeziaren zaurgarritasuna, izaki bizidun guztiak bezalaxe ekosistemen menpekoak garela, ekodependenteak. Sare sozialetatik jasotzen ditugu txoriak entzuteko estekak, argazki ederrak eta eredua zalantzan jartzen duten artikulu interesgarriak… Baina, ongizate birtual ikuspegitik harago, non geratu da aurreko aste eta hilabeteetan mundu errealeko aldaketa klimatikoari lotutako eztabaida guztia? Ez dago lehen orrialdeetan, eta aldi berean ekoizpen sistema intentsiboaren eta kate globaletako garraio sistemaren jarduera frenetikoaren geldialdiak CO2 isuriak murriztu ditu 2007/2008a geroztik ez bezala. Honek tokiko elikadura sistemak krisialdi klimatikoaren kontrako norabidean erabateko logika duela pentsatzera eramaten gaitu zuzen-zuzenean, dimentsio ekologikotik harago onura sozioekonomikoak ere ekartzen dizkigularik.

 

Aipatutakoak gertutik bizi dituzte egunerokotasunean elikagaiak ekoizteko lurrarekin harremanetan dauden baserritarrak. Hala ere, covid-19aren inguruan hartzen diren neurriak, notizietan agertzen diren kale hutsen eta balkoi beteen irudiak, adierazpenak, eraginak eta abarrak, filtro urbanotik begiratzen ditugula ere esan daiteke. Izan ere, zeintzuk dira landa eremu eta herrietan ematen ari diren arazoak? Arazo bakarra ez delako, besteak beste, nola zaintzen eta elikatzen ditugun gure herri eta hiri handiak. Elikagaien ekoizpenerako, zaintzarako eta baserrien biziraupen eta etorkizunerako –dagoeneko nahiko kolokan dagoena– beharrezkoa dugu logika urbanoetatik ateratzea eta elikadura sistemako katebegien arteko harreman orekaturako proposamenak sustraitzea. Aldaketa klimatikoaren gaiarekin bezalaxe, orain aste batzuk baserritarrak kalean ikusi genituen prezio duinen aldeko borrokan; mobilizazio eta aldarrikapen horien oihartzuna ere berreskuratzea komeni.

 

Beraz, koloretako betaurrekoak soinean, covid-19a krisialdi anitzen testuinguruan iritsi da, eta abiapuntuko egoera eta bizi baldintza desberdinetatik egin behar diogu aurre, non eskubideen defentsan kalitatezko elikadura bermatzea ere beharrezkoa den. Horretarako, politika eta zerbitzu publikoek elikadura gaietan esku hartu behar dute, Frantzian edota Balear Irletan ekoizpenenarekin eta elikadura erosketa publikoekin egiten ari diren norabide berean.

 

Egoera konplexua da zalantzarik gabe. Baina bere osotasuna eta konplexutasuna onartuz, orain hartzen ari garen neurriek bizipen kolektibo honen irteerara nola iritsiko garen ere baldintzatuko dute. Zentzu horretan, diziplina zientifiko teknikoenetatik harago, irakaspena ere bada Ekonomia zientzia soziala dela jabetzea; aukera dugu erroetara joateko eta bizitza, berdintasuna eta komunitatea oinarri dituen eredu baten alde egiteko. Horretarako, beharrezkoa dugu pribilegioak kuestionatu eta banaketa justuaren eta ongizate kolektiboaren kulturan sakontzeko.

 

Kostatzen da imajinatzea hau guztia amaitzean nora bueltatuko ote garen; seguraski buelta ez da ez hain bat-batekoa, ezta hain argia ere izango; eta ondorio desberdin asko izango dira. Baina, imajinatzen jarrita zertarako balio dezaken covid-19ak, izan dadila elikadura burujabetzaren teoriatik praktikara pauso eta prozesu sakonak emateko: ondasun publiko eta komunetatik iraunkortasunaren aldeko konpromiso sendoak hartzeko; tokiko elikadura estrategiak jangela kolektibo publiko guztietara eramateko; hartu-eman aberatsak zabaltzeko baserritar eta kaletarron artean; landa-herri-hirien ekoizpen eta kontsumo aliantzek inpultso berri bat hartzeko. Zergatik ez?

ALBISTEAK

Iriarte: “Urkulluk zintzoa izan behar du eta jendeari esan behar dio guraizea noraino sartuko duen”

2020-06-29 19:20:00

EAJk irabaziz gero, murrizketak seguruak direla ohartarazi du Iriartek, eta alternatiba egon badagoela azpimarratu du, zerga erreforma baten bidez krisiaren faktura langileriak berriz ordaindu behar izan ez dezan.

Prekarietatea amaitzea, gazte eta emakumeei begira bereziki, lehentasuntzat izango duen gobernu bat osatzeko konpromisoa hartu du Iriartek

2020-06-29 19:13:00

Maddalen Iriarteren ustez, uztailaren 12an hautatu behar da: edo EAJren eredua, prekarietatera kondenatzen gaituena, edo EH Bildurena, segurtasuna ematen duena. 33.000 lanpostu sortu, 1.200 euroko gutxieneko soldata ezarri eta alokairu publikoko 11.000 etxebizitza eskaintzeko plana azaldu du.

Epaia irmoa izan bitartean AT bidesarietan kobratzeari utzi eta orain arte bildutakoarekin funts bat sortzeko eskatuko dio EH Bilduk Aldundiari

2020-06-16 16:36:00

Horrela ez egitea arduragabekeria izugarria da; kontrako epaia berresten bada, orain arte bildutako diru guztia bueltatu beharko du Aldundiak eta bitartean zuloa handitzen ari da.