Gipuzkoa

Aurrekontuen berrikuspenean zaintzarako eta gizarte zerbitzuetarako inbertsioak indartzeko eskatu dio EH Bilduk Gipuzkoako Aldundiari

| 2020-04-30 13:32:00

 

“Espero dugu, ez egoitzetarako aurreikusitako inbertsioetan, ez zaintzarako aurreikusitako dirulaguntzetan, ez egotea inolako jaitsierarik. Are gehiago, krisi garaian gizarte politikak indartzea ezinbestekoa da, herritarren premiak ere areagotu egiten direlako, beraz, hemen gure eskaera: Gipuzkoako Foru Aldundiak ez dezala atzera utzi adinekoen zaintzarako aurreikusitako inbertsio bakar bat ere, eta indartu ditzala gizarte babeserako partida guztiak”, adierazi du Estitxu Elduaien batzarkideak, gaur Batzar Nagusietan egindako ez-ohiko Osoko Bilkuran.


Izan ere, asteartean Markel Olanok adirazi zuen aurreikusitako diru bilketak behera egin arren, Foru Aldundiak ildo estrategikoei lotutako programa eta deialdiak mantenduko dituela, eta lehiakortasuna, ekintzailetza eta I+G+B aipatu zituen. Ez zuen zaintzarik aipatu. “Covid 19ak baieztatu egiten du egungo egoitzetako eredua berpentsatu egin behar dela, eta zaintza zerbitzu
osoa aldatu, indartu eta hobetu egin behar dela”, gaineratu du Elduaienek.


Horregatik, aurrekontuetan zaintzara bideratutako inbertsioak mantentzeaz gain, EH Bilduk, Elkarrekin Gipuzkoarekin batera, eskatu du egoitzetan eskaintzen den bai arreta zuzena eta bai medikuena handitzea, denboratan eta espaziotan, pandemia honek argi erakutsi baitu egungo parametroetan ezin direla behar bezala artatu adinekoak. Bestetik, Covid 19a detektatzeko testak etengabe egitea ere eskatu du EH Bilduk, ahalik eta azkarren eta sarrien, gaixotasunaren hedatzea kontrolatzeko gaur-gaurkoz dugun neurri eraginkorrena delako. Azkenik, egoitzen kontrol zuzena egitea administrazioek, eta horretarako egoitza publiko zein pribatuetan ikuskaritzak etengabe egitea, kontrol zuzena eta publikoa, behar bezala ari direla baieztatzeko, eta azken asteotan ezagutu ditugun egoera tamalgarriak saihesteko.

Oposizio guztiak bat egin du krisi-mahai bat eskatu eta gobernuari krisitik ateratzeko plan bat eskatzeko baina gobernuko bi alderdiek atzera bota dute

| 2020-04-30 13:28:00

 

Gipuzkoako Batzar Nagusietako oposizioko hiru alderdiek (EH Bildu, Elkarrekin Gipuzkoa eta PP) bat egin dute krisi honi aurre egiteko mahai bateratu bat osatzeko eskaeran. EAJk eta PSEk aurka bozkatu dute. Oposizioak krisitik ateratzeko planak ere eskatu ditu proposamen ezberdinetan baina gobernua osatzen duten alderdiek aurka egin dute berriro.


“Krisi honek sortutako eta sortuko dituen arazo guztiei aurre egiteko, adostasuna, akordioak, elkarlana ezinbestekoak dira. Lortzen badugu alderdi politikoak, eragileak, sindikatuak, herri txiki eta handiak, mankomunitateak, sektore ezberdinak... erabakietan parte izatea, bidea asko erraztuko da, eta erabakiak hobeak izango dira”, adierazi du Juan Karlos Izagirrek.

 

EAJk bigarren aldiz ukatu du Azkoitiko zabortegi pribatuaren eztabaida Batzar Nagusietan

| 2020-04-28 17:33:00

Alarma egoeran epe administratiboak eta Batzar Nagusien ohiko jarduna etenda egon arren, Jaurlaritzak ohi baino azkarrago eman dio argi berdea Azkoitian egin nahi den zabortegi pribatuari. EH Bilduk Batzar Nagusietan azalpenak eskatzeko eskaera egin zuen baina bigarren aldiz ukatu du EAJk, presazko izaera ez dagoela justifikatuta argudiatuta.


Apirilaren 30eko ez-ohiko Osoko Bilkurarako ez zuten onartu, “Covid19arekin lotutako gaiak” izan behar zutela adieraziz. Maiatzaren 6ko ohiko Osoko Bilkurarako ere kanpoan utzi dute EH Bilduren eskaera, EAJren iritziz, gaia ez delako presazkoa.
Erabaki horrek EAJren gardentasun falta agerian utzi du. Ez da eztabaidatu nahi, baina baimenek aurrera egiten dute.

Bitartean, GHKn oraindik froga aldian dagoen erraustegi bat ordainduko dugu alarma egoera betebetean. Izan ere, enpresak planta martxan ez jartzeagatik isunak ordaindu ordez, kobratu egingo du. Argi gelditzen ari da Zaldibarreko eredu pribatu eta kontrol gabean sakondu nahi duela EAJk.

Pandemiari eta bere ondorioei aurre egiteko krisi-mahaia osatzeko eskatu dio EH Bilduk Foru Aldundiari

Eskera ostegun honetako ez-ohiko Osoko Bilkuran eztabaidatuko da Gipuzkoako Batzar Nagusietan.

| 2020-04-27 12:53:00

Salbuespen egoerak pertsonen osasunean, gure jendartean eta ekonomian izango dituen ondorioei aurre egiteko, ezinbestekoa da adostasunean eta elkarlanean landutako erantzunak ematea. Horretarako, Foru Gobernuak Batzar Nagusietako talde politiko guztiekin krisi-mahaia osatzea eskatzen dio EH Bilduk Diputazioari.

 

Bertan berehalako neurriak eta epe ertainekoak hartu beharko lirateke. Besteak beste, EH Bilduk ondorengoak proposatu ditu: Deskonfinamendua gauzatzeko pausoak adostu eta landu; ekonomian izango dituen ondorioak aurreikusita, sektore guztiei laguntzeko lerro bereziak sortzea, gehien jasango duten sektoreentzako neurri bereziak edota bitartekari lanak egitea bere egoera leuntzeko: turismo sektorea, enpresa txikiak, kultur eragile ezberdinak, lehen sektorea, taberna-jatetxeak, tailerrak, irakaskuntza-akademiak…; irekita egongo diren dendentzako protokoloak lantzea. Bertako ekoizleak eta dendak kaltetuak ez ateratzeko neurriak; kalean bizi diren pertsonentzako, eta bakarrik bizi diren pertsonentzako berehalako erantzun zehatzak; etxean egon behar duten haur eta nerabeen zaintzari begira, gomendioak eta proposamenak zabaltzea; telefonoak aktibatzea, arlo bakoitzeko informazio zehatza emango duena; eragile nagusiekin elkarlana eta informazio trukea bultzatzeko kontaktu jarraitua edukitzea; Gipuzkoako herrientzako telefono zuzen bat, sortzen diren iniziatiba edota arazoei buruzko informazioa, soluzioak, proposamenak… luzatzeko.

Azkoitian beste “Zaldibar” bat ekidin eta hondakin industrialen kudeaketa publikoa berma dezala eskatu dio EH Bilduk Gipuzkoako Aldundiari

Eusko Jaurlaritzak Azkoitiako Udalari hain denbora gutxian eta prozedurak etenda daudela ingurumen adierazpen estrategikoa eman izanak gure kezka areagotu du. Apirileko ez-ohiko Osoko Bilkurarako ebazpen-proposamena erregistratu du EH Bilduk baina ez dute debatera onartu, presazkoa ez dela argudiatuta. Larritasuna ikusita, maiatzaren 6ko ohiko Osoko Bilkuran eztabaida ez ukatzea eskatzen dugu.

| 2020-04-23 13:24:00

Alarma egoeran eta epe administratiboak etenda egonik, Azkoitian hondakin industrialak tratatzeko azpiegitura bat baimendu berri dio Jaurlaritzak enpresa pribatu bati, Zaldibarreko hondamendia gertatu eta bi hilabetera. Zaldibarko hondamendi humano eta ekologikoak ikasgai bat utzi badu, hain oinarrizko zerbitzua, hondakinen tratamenduarena, ezin dela enpresa pribatuen esku utzi izan da. Gainera, Jaurlaritzako Ingurumen sailak Azkoitiko Udalari arau subsidiarioa aldatzeko baimena eman diola jakin genuen atzo. Ohi baino azkarrago eman dio baimen hori, are gehiago pandemiak prozedurak etenda izanik.

 

Horregatik, Gipuzkoako hiri hondakinen eta hondakin industrialen tratamendua kudeaketa zuzenaren bitartez egitea eskatu du EH Bilduk eta ez enpresa pribatuen bidez. Gipuzkoako hondakinen kudeaketarako planta guztietan kontrol publiko zorrotza bermatzea eskatzen dugu eta, horrenbestez, Aldundiak ez dezala Azkoitian hondakin industrialen zabortegi bat jartzea onartu; hondakinen tratamentua esku pribatuetan utzita eta Jaurlaritzaren kontrol faltarekin Zaldibarko moduko ezbeharren arriskua begibistakoa delako.

 

Izan ere, Gipuzkoako hondakinen tratamenturako planta guztiak pribatizatu egin dira eta horrek esan nahi du, herritarrak eta administrazio publikoak, zerbitzu hau jasotzeko enpresa pribatuen menpe egon behar dugula. Eta Zaldibarrek agerian utzi du horrek kontrol falta dakarrela instalazio horietan.

ALBISTEAK

Iriarte: “Urkulluk Ibarretxe Plana alfonbra azpian ezkutatu du, erabakitzeko eskubidearen etsaiek belarriekin txalo egiten duten bitartean”

2020-06-30 13:32:00

Erabakitzeko eskubidea gauzatzeko oztopo izatea eta hitza ez betetzea egotzi dio Iriartek EAJko hautagaiari, eta burujabetzaren aldeko botoa eskatu du. “Norbaitek uste al du Urkullu eta Mendiaren gobernu batek gure etorkizuna erabakitzeko eskubidea defendatuko duela?”.

Nerea Kortajarena: “EH Bilduk 1.080 euroko gutxieneko pentsioak bermatzeko konpromisoa du”

2020-06-29 19:23:00

Gipuzkoako zerrendakideak euskal instituzioek eskura dituzten tresna guztiak erabiltzeko borondatea erakutsi du miseriazko pentsioak amaitzeko.

Iriarte: “Urkulluk zintzoa izan behar du eta jendeari esan behar dio guraizea noraino sartuko duen”

2020-06-29 19:20:00

EAJk irabaziz gero, murrizketak seguruak direla ohartarazi du Iriartek, eta alternatiba egon badagoela azpimarratu du, zerga erreforma baten bidez krisiaren faktura langileriak berriz ordaindu behar izan ez dezan.

Prekarietatea amaitzea, gazte eta emakumeei begira bereziki, lehentasuntzat izango duen gobernu bat osatzeko konpromisoa hartu du Iriartek

2020-06-29 19:13:00

Maddalen Iriarteren ustez, uztailaren 12an hautatu behar da: edo EAJren eredua, prekarietatera kondenatzen gaituena, edo EH Bildurena, segurtasuna ematen duena. 33.000 lanpostu sortu, 1.200 euroko gutxieneko soldata ezarri eta alokairu publikoko 11.000 etxebizitza eskaintzeko plana azaldu du.