Gipuzkoa

Izaro Elorza, Oñatiko alkatea, Udal Finantzaketan (UFFF) Aldundiak iragarritako murrizketen inguruan

| 2020-05-13 13:17:00

 

Izaro Elorzak, Oñatiko alkateak, Eudeleko Gipuzkoako lurralde batzordeko kidea eta Gipuzkoako Finantzen Kontseiluko kideak hurrengoa adierazi du:

 

“Erabaki honekin Aldundiak Udalon egoera ahultzen du Covid-19ari erantzuteko, Udalak garenean herritarren beharrengandik gertuen gauden instituzioak. Ez dut uste herritarrek erabaki hau ulertuko dutenik herritarrek.

Argitu behar da Aldundiak ez diela udalei ekarpena egiten, instituzio bakoitzak bere finantziaziobanaketa adostua du. Udalak lehen mailako instituzioak gara, Udal Legeak jasotzen duen bezala, eta, diru-sarrerak birbanatu behar badira, instituzio guztien artean hitz egin eta adostu beharko dugu. Ezin digute Udaloi komunikabideen bidez abisatu gaurtik aurrera gurea den dirua ez digutela ingresatuko eta gero kogobernantzaz hitz egin.

Oztopoak oztopo, alkateok herritarrak erdigunean jartzen jarraituko dugu, aktibitate ekonomikoa eta pertsonak zaintzen. Egun hauetan zehar alkate askorekin hitz egiteko aukera izan dut eta ziur nago egoera honen aurrean ere bat egingo dugula”.

Aldundiak Udalen Finantzaketarako Foru Funtsaren (UFFF) murriztearen inguruan hartutako erabakiaren aurrean, EH Bilduren oharra:

| 2020-05-12 20:44:00

 

Atzo Udal Foru Fondoak izango zuen beherakadari adostasunez aurre egiteko, Gipuzkoako Finantzen Kontseilua deitzeko eskatu genuen. 

 

Covid 19ak Udalen aurrekontuetan izandako eragina zela-eta, Udal Foru Fondoaren 2020ko aurreikuspenak mantentzeko iradoki genuen eta hori adosteko, Eudelen Gipuzkoako lurralde batzordea biltzeko eta bertan Udalek adostutakoa Finantzen Kontseilura transmititzeko proposatu genuen.

 

Ordea, gaur arratsaldean Gipuzkoako Aldundiak ofiziala egin du Udalen Finantzaketarako Foru Funtsa %20 murriztuko duela. Horri jarraiki, EH Bilduk ondorengo irakurketa egiten du:

  • -Aldundiak aldebakarrez hartu du erabakia; ez du ez udalekin ez Batzar Nagusiekin kontatu.
  • -Udalek demostratu dute herritarrengandik gertuen dauden erakundeak direla eta krisi garaietan batez ere, lehen lerroan herritarren beharrei erantzunak emanez. Eta Aldundiak penalizatu egin nahi izan ditu. Onartezina da erabaki hori aldebakarrez hartu izana.
  • -Bestalde, erabakia Finantzen Kontseilua bildu aurretik hartu izana errespetu falta izugarria da Gipuzkoako udalekiko eta organo ezberdinekiko.

EH Bildu Gipuzkoako lehen indar munizipalista da, 44 alkate ditu, horregatik, udaletan egindako lan eskerga kontuan hartuz, honako proposamena luzatu genion Gipuzkoako Foru Aldundiari:

  1. Dei zezala Gipuzkoako Finantzen Kontseilua bertan UFFaren beherakadari nola aurre egin udalekin adosteko.
  2. Bertan aurkez zezala Covid19ak zerga bilketan aurreikusten den eraginari buruzko txostena.
  3. 2020ko aurrekontu aurreikuspenak bere horretan manten zitzala udalentzat.
  4. Zerga bilketaren jaitsieraren ondorioz, UFFaren beherakada itzultzeko hiru urteko epealdia ezartzea 2021ean hasita, inongo interesik gabe.
  5. Gipuzkoako Foru Aldundiak 20 milioko dirulaguntza bat bidera zitzala udaletara Covid 19ko krisiak sorturiko gainkostuak arintzeko asmoz.

 

Udal Foru Fondoak izango duen beherakadari adostasunez aurre egiteko, Gipuzkoako Finantzen Kontseilua deitzeko eskatu dio EH Bilduk Foru Aldundiari

Covid 19ak Udalen aurrekontuetan izandako eragina dela-eta, Udal Foru Fondoaren 2020ko aurreikuspenak mantentzeko eskatzen du EH Bilduk eta hori adosteko, lehenengo Eudelen Gipuzkoako lurralde batzordea biltzeko dei egin du, bertan Udalek adostutakoa Finantzen Kontseilura transmititu ahal izateko.

| 2020-05-11 10:52:00

 

Hilabete pasa da Markel Olano Ahaldun Nagusiak Gipuzkoako alkateei Udal Foru Fondoa (UFF) %20-25 tartean jaitsiko zela aurreratu zienetik. Ordutik alkateek ez dute azalpen gehiagorik jaso Gipuzkoako ogasunetik.

 

“Covid 19ak aurrekaririk gabeko krisia utzi du gurean eta osasun zein eragin ekonomikoak izugarriak izaten ari dira. Udalak, herritarrengandik gertuen dauden instituzioak direla berretsi dute beste behin. Eskumena zeinena zen begiratu gabe arazoei aurre hartzeko ez ohiko neurri mordoa hartu dute udalek, pertsonen zaintza, bertako komertzioa sustatzeko edo lanpostu publiko zein esleipenetako lan baldintza egokiak bermatzeko. Garai zail hauetan sekulako ahalegin ekonomikoa egin dute udalek hemendik ahal den azkarren ateratzeko”, adierazi du Juan Karlos Izagirre Gipuzkoako bozeramaileak.

 

Gipuzkoan, EH Bilduko 44 alkate daude eta herrialdeko lehen indar munizipalista izaki, eta udaletan egindako lan eskerga kontuan hartuz, honako proposamena egin nahi dio Gipuzkoako Foru Aldundiari:

 

1- Dei dezala Gipuzkoako Finantzen Kontseilua bertan UFFaren beherakadari nola aurre egin udalekin adostu asmoz.

2- Bertan aurkez dezala COvid19ak zerga bilketan aurreikusten den eraginari buruzko txostena.

3- 2020ko aurrekontu aurreikuspenak bere horretan manten ditzala udalentzat.

4-Zerga bilketaren jaitsieraren ondorioz, UFFaren beherakada itzultzeko hiru urteko epealdia ezartzea 2021ean hasita, inongo interesik gabe.

5- Gipuzkoako Foru Aldundiak 20 milioko dirulaguntza bat bidera dezala udaletara Covid 19ko krisiak sorturiko gainkostuak arintzeko asmoz.

 

Erabaki hauek guztiak Udalekin adostea ezinbestekoa denez, Eudeleko lurralde batzordea biltzeko eskatu du EH Bilduk.

'Zaldibartik Azkoitira, harri berarekin estropezu eginez', Ainhoa Intxaurrandieta eta Mikel Oteroren iritzi artikulua

| 2020-05-07 12:09:00

Eusko Jaurlaritzak Azkoitiako Udalari denbora gutxian eta prozedurak etenda daudela, enpresa pribatu bati hondakin industrialak tratatzeko azpiegitura bat baimentzeak hautsak harrotu ditu Urola Kostako herrian. Hain zuzen, Zaldibarko hondamendi humano eta ekologikoak ikasgai bat utzi badu, hain oinarrizko zerbitzua, hondakinen tratamenduarena, ezin dela enpresa pribatuen esku utzi izan da. Honen harira, Azkoitiko zabortegiaren proiektua zertan datzan ondo ezagutzeko, Ainhoa Intxaurrandietak, EH Bilduren Gipuzkoako batzarkideak, eta Mikel Oterok, EAEko hauteskundeetarako Arabako zerrendaburuak, ondorengo iritzi artikulua idatzi dute ‘Berria’ egunkariarentzat:

 

«Gizakia omen da harri berean birritan estropezu egiten duen animalia bakarra. Duela gutxi, hondamendi humano, sozial eta ekologikoa izan dugu, eta oraindik ezin diogu gertatutakoari tamaina hartu. Aurtengo otsailaren 6an, mende bat igaro dela dirudien arren, Zaldibarko zabortegiak Joaquin Beltran eta Alberto Sololuze irentsi zituen, eta enpresa pribatu batek urteetan bertan isuritakoa biluzi zuen.

Nola bihur daiteke, baimen berririk izapidetu gabe, hondakin ez-arriskutsuen zabortegi bat gai arriskutsuak metatzen dituen zabortegia? Verter Recyclingek (ezin dugu azpimarratu gabe utzi enpresaren izenaren izaera ironikoa, Recycling, birziklatzea adierazi nahian, jarduera oinarrizko eta nagusia, egiaztatu dugun moduan, zetorkiona zetorkiola mendian botatzea izan denean) baimena eskatu zuen milaka langile hil dituen eta hainbat gaixotasun itzulezin sortu dezakeen amiantoa isurtzeko. Ingurumen Sailak enpresari erantzun ez zionez, hilabetearen bueltan eskaera onartu zen administrazioaren isiltasun positiboaren ondorioz, eta amiantoa zuten materialak isurtzen hasi ziren milaka tonatan. Laburbilduz, industria hondakin ez-arriskutsuen zabortegia, administrazio isiltasunez industria hondakin arriskutsuen zabortegi bihurtua.

Otsailaren 6ko gertaera horietatik ziur dakigun gauza bakarra da bi langilek lurperatuta jarraitzen dutela 80 egun igaro ondoren, eta Jaurlaritzak gutxietsi dituen sentipena geratu zaiela; badakigu, era berean, giza osasunerako eta ingurumenerako arriskutsuak diren substantzia ugari isuri direla erorketaren eta ondorengo suteen ondorioz, hala nola dioxinak, furanoak, metal astunak edo amiantoa, eta erreskate lanean aritu ziren langileak amiantoarekin kutsatu zirela. Urte batzuk igaro behar dira izan dugun hondamendi ekologiko eta sozial hau ongi dimentsionatu ahal izateko. Dena den, topa dezakegun lehen ondorioa berehalakoa da: hondakinen kudeaketa bezain funtsezkoa den zerbitzu bat ezin da esku pribatuetan geratu. Esparru publikotik diseinatu, proiektatu, exekutatu, kudeatu eta kontrolatu behar da.

Horregatik diogu ezin dugula jarraitu honaino ekarri gaituen eskema berarekin. Egun hauetan ikusten dugu enegarren aldiz harri berarekin estropezu eginarazi nahi digutela. Hondakin ez-arriskutsuen Azkoitiko zabortegia. Alarma egoeraren ondorioz izapide administratibo guztiak etenda daudela uste zenean, bat-bateko sorpresa izan dugu. 2019ko maiatzean sortutako enpresa batek ingurumen-inpaktuaren baimena lortu berri du industria-hondakinak balorizatzeko planta bat eraikitzeko (beste behin ere terminologiaren garrantzia). Proiektua ingurunearentzat lagunkoi gisa aurkeztu da; bertan sartzen diren hondakinen % 93 balorizatuko dutela, eta % 7 baino ez dutela deuseztatuko; hau da, sartzen diren hondakinen % 93 birziklatuko dela. Baina pixka bat arakatzea nahikoa da aurkezpen hori iraultzeko.

Aurkeztu duten proiektuak bi fase ditu. Lehenengoan, 15.000 m2 inguru erabiliko dira industria hondakinak jaso, hautatu eta birrintzeko. 180.000.000 kilo arte. Zertarako? Bada, Eusko Jaurlaritzako Ingurumen Sailak baimena eman die eskuragarri dauden modu guztietan balioztatzeko (erregai gisa edo energia sortzeko beste bitarteko gisa, barne). Bestela esanda, berotzeko ahalmen handia duten hondakinak, hau da, plastikoak, papera, kartoia edo zura (guztira, urtean 35.000 tona inguru), Zubietako errauskailura bideratu ahal izango dira, etxeko hondakinak erretzen laguntzeko, oso zaila baita horiek erretzea. Zer gertatzen da gainerakoekin, hondakinen % 80rekin? Izan ere, gaiak badu bere misterioa.

Bigarren faserako, 20.000 m2 baino gehiago hartzen dituena, oraingoz ez da proiekturik aurkeztu. Diotenez, gune horretan betelan bat egingo dute, eta, hori amaitutakoan, proiektu bat aurkeztuko dute. Eta hor dago, ezkutatzen saiatu arren, benetako proiektua: Azkoitiko zabortegia. Zerekin beteko dute 20.000 m2-ko lursaila, zaborrarekin ez bada? Erraustegian erre ezin daitekeen materialarekin beteko dute, hots, urtean 130.000 tona ingururekin? Are gehiago, zer egingo dute Zubietako erraustegiko zepekin? Azkoitiko zabortegian amaituko dute betegarri gisa? Eta errauts toxikoekin? Aurrerago, Zaldibarren gertatu zen bezala, amiantoa isurtzeko baimenak eskatuko dituzte, han bezala administrazio isiltasunez emango zaizkielakoan? Eta kontrola? Zaldibar kontrolatu zutenek beraiek kontrolatuko dute Azkoitiko zabortegia?

Ez ote dugu Zaldibarren gertatu denaz ezer ikasi? Gaizki kudeatuz gero herritarrei hainbeste arazo ekar diezazkiekeen zerbitzu bat enpresa pribatuen esku utz daiteke? Garrantzitsuagoa da bezero sarea mantentzea herritarren osasuna baino?

Argi dago plan bat behar dugula, diseinu oso bat, kopuru harrigarrietan sortzen jarraitzen ditugun hondakinak gutxitu eta kudeatzeko, eta hondakin horiek hainbeste aipatu baina gutxi aplikatzen den ekonomia zirkularraren mesedetara jartzeko. Arrazoizko edozein planek Hondakinen Lurraldearen Arloko Plan bat eskatzen du, hasteko, daukagun arazoaren tamaina bere gain hartuko duena, instalazio mota bakoitzaren kokaleku egokiena aztertuko duena, dimentsioak eta funtzioak diseinatuko dituena, eta lurralde historikoekin, udalerriekin, ekoizleekin eta inplikatutako gizarte sektoreekin horien diseinuari, gauzatzeari, kudeaketari eta kontrolari buruzko xehetasunak adostuko dituena. Premisa bakar batekin. Kontrol publikoa.»

Gipuzkoako larrialdi zerbitzuak bertan mantendu daitezela eskatu du EH Bilduk

Elkarrekin Gipuzkoak eta PPk babestu dute eskaera eta Bizkaian zentralizatzeko asmoen aurrean, “ondo dagoena mantendu eta hobetzeko” eskatu dute.

| 2020-05-06 12:37:00

Larrialdi zerbitzuak Bizkaian zentralizatzearen inguruan pasa den irailean eztabaidatu zen Gipuzkoako Batzar Nagusietan. Gaur ohiko Osoko Bilkuran berriro ekarri du gaia EH Bilduk. Izan ere, Jaurlaritzak 2019ko abendurako egin behar zuen proposamenaren txostena eta oraindik ez du ezer aurkeztu.


Baina bitartean, Juan Karlos Izagirre bozeramaileak adierazi duenez, dagoeneko zerbitzu batzuk zentralizatu direla ohartarazi dute bertako langileek: Larrialdiei Aurre Egiteko eta Babes Zibileko Zuzendaritzari Laguntzeko Zerbitzua (LAZLZ) Txurdinagan, esaterako. “Horrek dagoeneko arazoak sortu ditu: lokalizazioz nahastutako kasuek gora egin dute; eta honek inplikatzen du anbulantziak beranduago iristea...”. Izagirrek gaineratu du zentralezatzeak ez duela onura bakar bat ere eta ez dagoela planteatuta, inolaz ere, osasun ikuspuntu batetik; “agian barne-saileko irizpideak jarraituz planteatzen da, baina ez osasun-ikuspegi batetik”.


EH Bilduk kezkaz ikusten du egoera, ondo dagoen zerbait aldatu nahi delako, langileekin hitz egin gabe. “Ez dira ari beraiekin hitz egiten inolako planik egiteko, langileek zerbitzu onena eskaini nahi dute, baina SADAEren zentralizazioarekin zerbitzuaren kalitatea okertzen hasi da dagoeneko.


Ezinbestekoa jotzen dute lurralde bakoitzeko zentroak mantentzea. Zergatik? Gertutasuna eta ezagutza geografikoak zerbitzu hobe bat bermatzen duelako, ezbeharra gertatu den lekura iristeko denborak gutxituz”. Izagirrek gaineratu du “arazo informatiko larriren bat gertatuz gero, zentral bakarra egonez gero, zerbitzurik gabe gelditzeko arriskua izugarria” dela, gaur egun, horrelakoren bat gertatu denean, beste bi zentroek egiten dute hirugarrenaren lana, azaldu du.

Izagirrek gaineratu du arratsaldeko 20:00etan egunero txaloak jotzea oso ondo dagoela, “baina langile horiei kasu egin eta lurralde bakoitzean, eta gure kasuan Gipuzkoan, larrialdi zerbitzu egoki eta kalitateazkoa eskaintzea, askoz hobeto”.


 

Espainiar gobernuaren injerentziak


Bestalde, bilkurako beste puntu batean, EH Bilduk salatu du Espainiako gobernuak Gipuzkoak, gure Udalek eta Hego Euskal Herriak dituzten eskumenak ezabatu nahi izan dituela. “Espainiako Gobernuak gure eskumenetan inposatutako injerentziak izan dira. Estalitako 155 artikuluaren aplikazioa izan da. Ezin dugu hemen erabaki, bertako ezagutza eta informazioaren arabera. Madrilek erabakitzen du. Berzentralizazio operazioa izan da”, esan du Izagirrek.

ALBISTEAK

Iriarte: “Urkulluk Ibarretxe Plana alfonbra azpian ezkutatu du, erabakitzeko eskubidearen etsaiek belarriekin txalo egiten duten bitartean”

2020-06-30 13:32:00

Erabakitzeko eskubidea gauzatzeko oztopo izatea eta hitza ez betetzea egotzi dio Iriartek EAJko hautagaiari, eta burujabetzaren aldeko botoa eskatu du. “Norbaitek uste al du Urkullu eta Mendiaren gobernu batek gure etorkizuna erabakitzeko eskubidea defendatuko duela?”.

Nerea Kortajarena: “EH Bilduk 1.080 euroko gutxieneko pentsioak bermatzeko konpromisoa du”

2020-06-29 19:23:00

Gipuzkoako zerrendakideak euskal instituzioek eskura dituzten tresna guztiak erabiltzeko borondatea erakutsi du miseriazko pentsioak amaitzeko.

Iriarte: “Urkulluk zintzoa izan behar du eta jendeari esan behar dio guraizea noraino sartuko duen”

2020-06-29 19:20:00

EAJk irabaziz gero, murrizketak seguruak direla ohartarazi du Iriartek, eta alternatiba egon badagoela azpimarratu du, zerga erreforma baten bidez krisiaren faktura langileriak berriz ordaindu behar izan ez dezan.

Prekarietatea amaitzea, gazte eta emakumeei begira bereziki, lehentasuntzat izango duen gobernu bat osatzeko konpromisoa hartu du Iriartek

2020-06-29 19:13:00

Maddalen Iriarteren ustez, uztailaren 12an hautatu behar da: edo EAJren eredua, prekarietatera kondenatzen gaituena, edo EH Bildurena, segurtasuna ematen duena. 33.000 lanpostu sortu, 1.200 euroko gutxieneko soldata ezarri eta alokairu publikoko 11.000 etxebizitza eskaintzeko plana azaldu du.