Gipuzkoa

Gipuzkoako egungo garraio publikoa optimizatzeko inbertsioak eskatu ditu EH Bilduk

Izagirrek adierazi du pandemia garai honetan ez dela inbertsio handietarako garaia eta baliabideak pertsonak atzean ez uztera eta zerbitzu publikoak indartzera bideratu behar direla.

| 2020-11-11 10:36:00

EH Bilduk Gipuzkoarako garraioaren inguruan duen proposamena aurkezteko agerraldia egin du gaur. Juan Karlos Izagirre bozeramaileak hartu du hitza eta berarekin izan dira Oskar Bordes batzarkide eta Euskotreneko langilea eta Reyes Carrere eta Garbiñe Alkiza Donostiako zinegotziak.

 

Izagirrek gogorarazi du bizi ditugun garai zail hauetako zailtasun guztiak ez dituela pandemiak sortu, “Covid19-aren krisiak lehendik zetozten arazoak begi bistan jarri eta areagotu baino ez ditu egin. Eta garraioan ikusten ari garena da horietako beste adibide bat”.

 

Beti esan dugu Gipuzkoak garraio publiko sare integral bat behar duela, herrialdeko ezberdintasunak orekatzen lagunduko duena, herritar guztiek aukera berdintasunean gozatuko dutena... Eta horregatik, EH Bildutik berretsi nahi dugu orain egin beharreko inbertsioak egungo azpiegiturak optimizatzeko inbertsioak behar dutela izan”.

 

Zentzu horretan, Izagirrek esan du ez dela garaia beharrezkoak ez diren obrak, zentzuzkoak ez direnak, justifikatu gabeko obra garestiak egiteko, are gutxiago gauden egoeran egonda. Soberan daude Metrorako edo AHTrako gastuak. Gipuzkoarrek beste lehentasun batzuk dituzte, bai lehen eta are gehiago orain. Azpiegituretan eta garraioan egiten diren inbertsioek ditugunak hobetzea izan behar dute helburu.

 

Azken urteetan behin eta berriro EH Bilduk mahaigaineratu dituen hobekuntzak ekarri ditu gogora Izagirrek. Adierazi du Gipuzkoa osoko trenbide sareak hobetzea ezinbestekoa dela: “Tolosaldean edo Goierrin Renfek guztiz abandonatuta dituen geltokiak eta azpiegiturak hobetzea; Euskotrenen, sarean trenbide bikoizketak bultzatzea maiztasunak ugaritu ahal izateko eta, segurtasuna hobetzeko, zenbait herritan, Pasai Antxon esaterako, trenbidea lurperatzea; Altza-Galtzaraborda tartea lehenestea...”.

 

Trenen eta autobusen arteko loturak indartzea beharrezko jo du Izagirrek. “Ez dakigu zenbat aldiz entzun ote dugun Loiolako Erriberako interkanbiadorearen iragarpena. Guretzat funtsezko azpiegitura bat da, bi sare lotzen dituelako, Renfe eta Euskotren; egungo azpiegiturak optimizatzen dituen azpiegitura bat, beraz, iraunkorra; eta Donostiako mugikortasuna osorik hobetzen lagunduko lukeen azpiegitura bat. Lehentasunezko proiektu bat. Lehen ere askotan esan dugu eta zain gaude oraindik, lehentasunak beste leku batzuetan jarri dituztelako PNV eta PSOEk”.

 

Garraio publikoaren aldeko apustua “apustu estrategikoa” dela adierazi du, bai gipuzkoarren bizitza hobetzeko eta errazteko, eta baita autoen gehiegizko erabilera murrizteko ere. Zentzu horretan autobus zerbitzua indartzea ere ezinbestekoa da, eta “erabiltzaileei erraztasunak eman behar dizkiegu, esate baterako, datorren urterako tarifak izoztuz eta doako transbordoak eskainiz”, esan du.

 

Bestalde, pandemia garaiotan ikusten ari garen erabiltzaileen pilaketak saihesteko, batetik, “ezinbestekoa da ordu kritikoetan maiztasunak handitzea, alegia, trena edo autobusaren okupazio maximoaren %70a gainditzen denean”. Bestetik, bizikletaren erabilera sustatzeko beharra areagotu du egoerak. “Azken 5 urtetan ezer gutxi egin da. Bidegorri sarea handitu eta hobetzeko eta bizikletaren erabilera sustatzeko aurreikusitako inbertsioaren zati txiki bat besterik ez da egin. Ezinbestekoa da ikastetxetara, lantokietara bizikletaz joateko aukera bultzatzea. Eta Covid garai hauetan, behin-behineko bide gorriak ere sortu beharko lirateke, alternatiba gisa, garraio publikoan pilaketak saihesteko, besteak beste”.

Elkarlana hitzez eskaintzea ez da nahikoa, udalek babesa eta baliabideak behar dituzte krisiaren lehen lerroan lanean jarraitu ahal izateko

Birusaren hedapenaren aurrean neurri zorrotzak hartu ahal izateko, sektore ekonomiko ezberdinei baliabideak eskaini beharra dago ezinbestean.

| 2020-10-21 13:32:00

Aste honetan Gipuzkoako udaletako ordezkariek bi bilera izan dituzte Aldundiarekin: batetik, astelehenean finantzen kontseilua; eta, atzo Ahaldun Nagusiarekin urgentziazko bilera. Zoritxarrez, kezkaz ikusten dugu bi bilerak beste ezer baino gehiago propagandarako baliatu dituela Diputazioak. Lehen bileran udalei aldebakarrez kendutako diruaren zati bat bueltatzea jakinarazteaz gain, zorpetzeko aukera zabaltzeko asmoa azaldu zen baino zehaztasunik eman gabe. Atzo, berriz, egoeraren diagnostiko bat besterik ez zen egin eta ez zitzaien udalei inongo baliabide edo tresna eraginkorrik eskaini egoera kritiko honi irtenbidea emateko.

 

Badirudi ez dugula ezer ikasi pandemiaren lehen olatutik. Udalak izan ziren lehenak pandemiari erantzuten beste erakundeen ezinbesteko babesik gabe eta orain ere bakarrik eta babesik gabe aurkitzen dira.

 

Birusaren hedapenaren aurrean neurri zorrotzak hartu ahal izateko, sektore ekonomiko ezberdinei baliabideak eskaini beharra dago ezinbestean. Diagnostikoetatik harago, erakundeen arteko elkarlana beharrezkoa da eraginkorragoak izateko eta beharrezko baliabideak udalen eskura jartzeko eskatzen dugu.

Europako funtsetarako proiektuak erabakitzeko mahai bat sortzeko eskatu dio EH Bilduk Gipuzkoako Aldundiari

Aldebakarrez egin duen proposamena bertan behera utzi eta proiektuak adostasun gune batean elkarlanean erabakitzeko eskatu dio EH Bilduk Gipuzkoako EAJri.

| 2020-10-15 12:16:00

Juan Karlos Izagirre eta Estitxu Elduaienek agerraldia egin dute gaur eguerdian. Bertan Gipuzkoako Aldundiaren gidaritza duen EAJri eskatu diote “hemen eta denon artean” adosteko “gure etorkizuna baldintzatuko duten proiektuak”. “COVID19ak sortutako kalteei aurre egiteko, modu adostuan eta denok batera egin behar dugula aipatzen da behin eta berriz. EH Bilduk martxoaren hasieran Diputatu Nagusiari eskatu zion mahai politiko bat osatzea. Ez zen horrela egin eta hartu diren erabaki guztiak, hau bezala, aldebakartasunetik hartu dira”, adierazi du Izagirrek.

 

Hori dela-eta, Izagirrek eskatu die bertan behera uzteko pasa den astean egindako 31 proiekturen proposamena eta adostasunerako gune bat sortzea, “adosteko funts horiek nola eta zertara bideratu Gipuzkoan. Sindikatuekin, enpresekin, alderdi politikoekin, unibertsitateekin eta beste eragileekin elkarlanean, proiektuen inguruko hausnarketa estrategikoa eta prozesu gardena guztiz beharrezkoak dira, ahalik eta kontsentsu maila handiena lortzeko”.

 

Izagirrek gaineratu du Europako Funtsen zati bat udaletara bideratzea beharrezko jotzen duela EH Bilduk. “Batetik, trantsizio ekologikoan berebiziko garrantzia dutelako udalek, eta bestetik, esfortzu izugarria egin dutelako herritarren beharrei erantzuteko. Askotan beren eskumenekoak ez ziren lanak beren gain hartu dituzte, premiak eta beharrak aginduta. Horregatik, Europako funtsetatik jasotako %30 udalerrietara bideratzea proposatzen dugu”.

 

Izan ere, Elduaienek azaldu du Aldundiaren asmoak ez dituztela betetzen Europak ezarritako irizpideak, lehenengotik hasita: proposamena adostua izatea. “Beharrezkoa da erakundeen arteko elkarlana, eta ezinbestekoa udalen zeresana eta eskuhartzea. Gainera, aipatutako 31 proiektuetan ez dago proiektu berririk, denak dira lehendik zeudenak. Aldundiak ez du ulertu Europak eta jendarteak gauzak beste modu batera egin nahi dituela, beste norabide batean. Funts horien bidez, inbertsio publiko zuzena, kalitatezko enpleguaren sorrera eta eragin sozial positiboa gailendu behar dira. Lehentasuna izan behar du ekonomia aurrean ditugun erronka handietara egokitzeak, eta gure administrazioak eta enpresak XXI. mendeko erronka teknologikoetara egokitzeak”.

 

Gaineratu du bestalde, Espainiako Gobernuak funtsak berak kudeatzeko azaldu duen asmoak kezkatzen dituela, “ez dakigu erkidegoek eta udalek Europako funtsen zein portzentai kudeatu ahal izango duten zuzenean eta horrek kezkatzen gaitu”.

Adinekoen egoitzetako gatazka konpontzeko baliabideak jar ditzala eskatu dio EH Bilduk Gipuzkoako Foru Aldundiari

ELA eta LAB sindikatuek Gipuzkoako adinekoen egoitzetan deitutako lanuzteen harira, langileei babesa adierazteko manifestazioan parte hartu dute Estitxu Elduaien Gipuzkoako Batzar Nagusietako batzarkideak eta Reyes Carrere Donostiako Udaleko EH Bilduren bozeramaileak.

| 2020-10-06 13:30:00

Elduaienek aldundiari eskatu dio adinekoen egoitzetan ematen den zerbitzua hobetzeko baliabide gehiago jar ditzala: “Aldundiaren esku dago egoitzetako lan gatazka konpontzea, langileak azpikontratatutako enpresetakoak izan arren, aldundia da arduradun zuzena. Baliabideak jarriz gero, egoitzetako lan gatazka konponduko da, langileen baldintzak duinak izango dira eta adinekoek zaintza duina jasoko dute”.

Krisiaren aurrean, babes soziala eta babes ekonomikoa eskatuko dizkio EH Bilduk Gipuzkoako Foru Aldundiari

Gipuzkoako Batzar Nagusietan gaurko Politika Orokorreko Osoko Bilkuraren bigarren zatirako, EH Bilduk 57 mozio aurkeztu ditu.

| 2020-10-06 09:51:00

EH Bilduk aurkeztutako mozio gehienak gipuzkoarren babes sozial eta ekonomikora bideratu dira. Izan ere, Gizarte politiketan badirudi Aldundia aurrekontua mantentzearekin konformatuko dela. “Mantendu ez,indartu egin behar diraalor horretara bideratutako baliabideak, Covid 19ak eta berak eragindako krisiak are egoera zaurgarriagoan utzi dituelako gipuzkoarrak”. Hori dela-eta:

  • Egoera zailenean dauden gipuzkoar horientzat diru-laguntza berezi bat sortzeko eskatu diogu Diputazioari, Diru Sarrerak Bermatzeko Errenta jaso ezin, baina egoera larrian daudenentzat.
  • Adinekoen egoitzetanematen den zerbitzua hobetzeko baliabide gehiago jar ditzala eta egoitza horietako langileen lan baldintzak hobetu ditzala.
  • Adinekoak eta mendekoak etxean zaintzea erabakitzen duten familiei, berriz, diru-laguntza handiagoa eman diezaietela, zaintza eta zaintzaileak hobetzeko aukera izateko. Eta beste horrenbeste etxez etxeko zerbitzuarekin: udalei baliabideak indartu, zerbitzu duina bermatzeko.

Ekonomia suspertze planean, enpresa txiki eta autonomoentzat laguntza berezia sortzeko eskatu dugu eta, lehen sektoreari arreta berezia jartzea, bertako produktuen eta ekoizleen alde eginda. Horrez gain, bertako saltokiak lehenetsi ditzala ere eskatu diogu, azalera handiko merkatal zentroen aurretik.

Une zailetan, kultura eta euskalgintza babestubehar dira, eta horregatik eskatu diogu euskal sortzaileei eta euskalgintzaren sektorearentzat baliabide eta babes neurri ekonomiko bereziak sortzea.

Ingurumen eta jasangarritasun arloan, Diputazioari eskatu diogu: Energiaren erabilera jasangarriagoaren alde egin dezala, baso politika iraunkorragok egin ditzala, bizikleta planak jasotzen duena bete dezala, garraio publikoaren aldeko benetako apustua egin dezala, eta, bide azpiegitura berriak egin aurretik, bestelako alternatiba jasangarriagoak landu ditzala.

Diru sarrerei dagokionean, zerga politika justuago bat eskatu diogu, Covid garai hauetan, bereziki beharrezkoa:

  • Gipuzkoako aberatsenei zergak barkatzeari utzi eta aberastasun handienak dituzten horiei ere zergak ordainaraztea (ezkutu fiskala kendu).
  • Kapitalarengatik ordaintzen diren zergak igotzea, lanaren etekinengatik ordaintzen direnen parera.
  • Iruzurrari aurre egiteko baliabide gehiago jarri eta ordaintzen ez diren zerga horiek berreskuratuta.

Hori guztia aurrera eramateko, eragile ezberdinekin elkarlanean aritzeko eskatu diogu, udalei eta euren beharrei erantzun azkarrak eta eraginkorrak emateko, Diputazioak egiten dituen azpi kontratazioetan lan baldintza duinak bermatzeko klausula sozialak ezartzea eta betearaztea, eta gutxieneko 1.200 euroko soldata ezartzea, emakumeen eta gizonezkoen berdintasun plana berrituta.

Azkenik, bizikidetzaren aldeko pauso zehatzakere proposatu dizkiogu, besteak beste: Frankismoaren biktimen aitortzarako legea sustatu eta euskal presoak etxera ekartzeko esku-hartu dezala.

ALBISTEAK

Arduradun publikoek azalpenak eman ditzaten, erraustegiaren jardunaren inguruko galderak egin ditu EH Bilduk ordezkaritza duen erakundeetan

2021-01-12 11:00:00

Zubietako erraustegiaren jardunaz dagoen gardentasun faltaz kezkatuta, idatzizko informazio eskaerak egin ditu EH Bilduk Gipuzkoako Batzar Nagusietan, Eusko Legebiltzarrean eta Espainiako Kongresuan.

Eskola Kirola berrabiaraztea eta zaintza zerbitzuen publikotasuna eskatuko dizkio EH Bilduk Aldundiari

2021-01-11 11:54:00

Eskoletan, burbuiletan eta aire librean egingo den Eskola Kirola martxan jartzea beharrezko jotzen du EH Bilduk. Era berean, kalitatezko zaintza bat bermatzeko arreta-sare publiko antolatu eta erantzukizun publikokoa eskatuko dio Aldundiari.

Herritarren bizitza hobetzeko EH Bilduren prestutasuna erakusten du Eibarko aurrekontu akordioak

2021-01-07 16:48:00

Neurri sozialak indartzen dituen aurrekontu akordioa lortu du EH Bilduk PSErekin Eibarren. Akordioak, batetik, elkarrizketarako eta akordioetara iritsi ahal izateko EH Bilduk duen gaitasuna berresten du. Eta, bestetik, EH Bilduk akordio bat sinatzen duenean, herritarren bizi kalitatea hobetzen duela.

Juankar Izagirre: “Osasun eta zaintza sistema publiko sendoa da Aiton-Etxekoa bezalako gertaerak saihesteko bermea”

2021-01-02 16:24:00

Oiartzungo Aiton-Etxe eguneko zentroko zuzendaritzak COVID19-aren aurkako txertoa ez jartzeko agertutako asmoaren aurrean, harridura azaldu du Juankar Izagirre EH Bilduren Gipuzkoako bozeramaileak. Eta EAJri eta PSEri eskatu die publifikazioaren aldeko urratsak egin ditzatela.