AKTUALITATEA

| 2024-11-26 14:29:00

Bihar bilduko da EH Bildu Gipuzkoako ahaldun nagusi Eider Mendozarekin aurrekontu prozesuaren baitan, EH Bilduk proposamena aurkeztu eta astebetera. Horrek iradokitzen digu EH Bilduk egindako proposamen eraldatzailek aintzat hartzeko ausardia falta dela haien jarrera negoziatzailean. Izan ere, EH Bilduk aurrekontuetarako 52,82 milioi eurotako zuzenketak aurkeztu eta astebetera eman dio hitzordua, emendakinak aurkezteko 48 ordu falta direnean.

Bihar bilduko da EH Bilduren ordezkaritza Foru Gobernuarekin, Gipuzkoako aurrekontuen inguruan hitz egiteko. Duela aste bete, talde subiranistak 52,82 milioi eurotako zuzenketak proposatu zizkion gobernuari, eta astebetera jaso du horri buruz hitz egiteko bilera deia, emendakinak aurkezteko bi egun bakarrik geldituko direnean. Horrek agerian uzten du gutxiengoan dagoen gobernuaren negoziatzeko jarrera ez dela behar bezain sendoa.

Jokaera horrek EH Bilduri iradokitzen baldin badio ere gobernuak negoziatzeko borondate handirik ez duela, guk dagokigun arduratik jokatuko dugu, eta gipuzkoarrentzat aurrekontu hobeak izan daitezen ekarpenak egiten jarraituko dugu, beti ere, aldaketak norabide egokian badoaz; alegia, gaur egungo erronka sozial eta politikoei egoki erantzungo badiete.

Gogoratzeko, zaintzaren arloari eman dio lehentasuna koalizio subiranistak, lehenago ere azaldu duen bideari jarraituz. Gainera, gazteen emantzipazioari, trantsizio ekosozialari, garraio publikoari edo euskarari lotutako neurriak eta diru-partidak jaso ditu proposamenean.

Garai honek ezberdinen arteko elkarlana eskatzen du, eta ez da onargarria gotortuta egotea, herritarren lehentasunei eta beharrei erantzutea delako erakunde publikoek zor dutena. EH Bilduren egiteko modua hori da, eta gobernatzen ari den hainbat herritan, adibidez, oposizioko alderdien ekarpenak aintzat hartu eta aurrekontuen bueltako akordioak erdiesteko gaitasuna erakusten du, gehiengoa bermatzen duten aritmetika adostasunez harago, herritarren interesak ahalik eta ongien defendatzeko borondatez.