AKTUALITATEA

| 2024-09-13 08:28:00

Algortako San Nikolas kalean dagoen "Irurak bat" eraikin historikoa eraisteagatik hirigintzaren legezkotasuna berrezartzeko espedientean pertsonatzea erabaki du EH Bilduk. Horrela, koalizio soberanistak "hirigintza araudian aitortutako ekintza publikoa gauzatzeko" espedientean parte hartuko du, eraistearekin zerikusia duten irregulartasunei buruzko informazioa lehen eskutik lortzeko eta, horren arabera, "dagozkion neurriak hartzeko". Era berean, Udalari eskatu dio dokumentazio guztia fiskaltzaren esku uzteko, "gertakariak legez kontrakoak edo penalak izan daitezkeelakoan" iker dezan.

Horrez gain, EH Bilduk Getxoko Udalari eskatu dio espedientea ireki diezaiola enpresa sustatzaileari, "gure ondare historikoaren eraispena zigorrik gabe gera ez dadin", eta kontrol eta ikuskapen neurriak hartzeko ere eskatuko dio, "etorkizunean horrelako egoerak berriro gerta ez daitezen".

"Irurak bat" eraisteko lanak otsailean hasi ziren, 2022an Udaleko Gobernu Batzordeak bertan luxuzko hainbat etxebizitza eraikitzeko baimena eman ondoren. Proiektuak eraikin historikoaren zati bat berritzea eta jauregitxoaren aurrean itxura modernoagoko eraikin berri bat eraikitzea aurreikusten zuen. Hala ere, astez aste eraikina apurka-apurka eraisten joan ziren, abuztuaren hasieran "Irurak bat" erabat eraisten amaitu zen arte. Enpresak argudiatu zuen eraikina bota behar izan zutela segurtasun arrazoiengatik eta erortzeko arriskuagatik, eta Udalak obrak geldiarazi zituen.

Une horretan, EH Bilduk espedientearen kontsulta eskatu zuen, eta hasierako proiektua betetzen ari ez zela eta irregulartasunak egon zitezkeela ikusita, galdera erregistratu zuen Lurralde Batzordean, irailaren 19an antolatuko dena. Bertan, EH Bilduk eskatuko du Udalak orain arte egindako urrats guztien berri ematea, enpresari zigor espedientea hastea eta gainerako irregulartasunak argitzea. Era berean, EH Bilduk EAJko bi zinegotzik luxuzko etxebizitzen kooperatiba sustatzailean duten parte-hartzea ere argitu nahi du, horren arabera erabakiak hartu ahal izateko.

Zoritxarrez, "Irurak bat" eraistea ez da gertaera isolatua Getxon. Azken urteotan dozenaka eraikin historiko eta berezi eraitsi dira gure udalerrian, hala nola Algortako haurtegi ohia, Arrigunagako jaitsierako eraikinak, Ollarretxeko baserria edota Erromoko Nagusien Etxea hartzen zuten Lope de Vegako eraikinak. EAJk, PPk eta PSEk behin-behinean onartutako Hiri Antolamenduko Plan Orokor (HAPO) berriak ildo beretik jarraitzea aurreikusten du, Getxoko hainbat zonaldetan hainbat baserri eta eraikin historiko eraitsiz, San Nikolas kalea bera barne. EH Bilduk presio egiten jarraituko du ondare historikoa espekulaziotik eta eraikuntza masibotik babesteko.