Bizkaia

Aldundiak adinekoen egoitzetan hildakoen kopurua ezkutatzen duela salatu du EH Bilduk

Beste lurralde batzuetan informazio hori ematen den bitartean, Bizkaian ez dago datu ofizialik

| 2020-04-02 12:41:00

EH Bildu Bizkaiak salatu du Aldundiak adineko egoitzetan izandako hildakoen kopuruaren datua ezkutatzen dabilela eta ez duela informaziorik eskaintzen. “Bizkaiko egoitza batzuetako egoera komunikabideen bitartez ezagutu dugu, Balmaseda adibidez, eta baita ere herrietatik heltzen zaigun informazioari esker. Oso larria da iturri ofizialetatik inolako informaziorik ez egotea eta Aldundiaren estrategia konziente bat dela uste dugu egoitzen egoeraren aurrean. Aldundiak neurri eraginkorragoak hartu behar ditu”, salatu du Bea Ilardia EH Bildu Bizkaiako bozeramaileak.

 

EH Bilduren iritziz, adinekoen egoitzen egoera erreala ezagutzea ezinbestekoa da Covid-19ak kolektibo zaurgarrienetako batean daukan eragina kontuan izanda. “Aldunditik ez dago informazio argirik beste lurralde batzuetan informazio hori ematen den bitartean”, azpimarratu du Ilardiak.

 

Premiazko neurri eraginkorragoak

 

Horretaz gain, EH Bilduren ustez, egoitzetako egoera oso zaila da neurri eraginkorrik ez delako hartu eta ez daudelako baliabide nahikorik kutsatutako pertsonak artatzeko eta zaintza lanetan ari direnak babesteko.

 

EH Bilduk azpimarratu du protokoloak berandu aplikatu direla eta egondako positibo kopuru altuak erakusten duela ez direla eraginkorrak izan.

 

Egoitzen egoera oso zaila izaten ari da. Hori dela eta, berriz ere dei bat egiten dugu elkarlanerako. Baina horretarako ezinbestekoa da gardentasunetik aritzea eta informazioa elkarbanatzea”, adierazi du Ilardiak.

Bizkaiko hotel eta ostatuekin hitzarmena sinatzea proposatu du EH Bilduk egoitzetan eta Gizarte Ekintzako beste zerbitzuetan ari diren langileei ostatu zerbitzua emateko

Adineko eta aniztasun funtzionala daukaten pertsonentzako egoitzetan lanean ari direnek haien senideak kutsatzeko kezka adierazi dute

| 2020-04-01 12:00:00

Bizkaian hainbat dira adinekoen eta aniztasun funtzionala daukaten pertsonentzako egoitzetan lanean ari diren pertsonak. Langile horiek Covid-19 birusarekin kutsatzeko arriskuan daude eta, hori dela eta, EH Bildu Bizkaiak Aldundiari eskatu dio Gizarte Zerbitzuetako langile horiei behar bezalako ostatuak eskaintzea.

“Zaintza lan horietan ari diren pertsona asko kezkatuta daude. Lanetik etxera itzultzean senideak kutsatzeko arriskuarekin kezkatuta daude. Hori dela eta, pertsona horiei, hala eskatuz gero, beste ostatu bat eskaintzea garrantzitsua da haien eta ingurukoen segurtasuna bermatzeko”, adierazi du Bea Ilardia EH Bilduko bozeramaileak.

EH Bildu Bizkaiak egindako proposamenaren arabera lurraldeko hotel eta ostatu ezberdinekin hitzarmen bat sinatu beharko luke Aldundiak.

“Aldundiak hitzarmen hori sinatzeko gaitasuna dauka eta, era horretara, lan karga handia pairatzen ari diren langile horiei lagunduko diegu daukaten kezka bati aurre eginez. Hau da, haiekin bizi diren pertsonen segurtasuna bermatuko dugu”.

Pertsona zaurgarrenei uraren doako hornidura bermatzea eskatu dio EH Bilduk Aldundiari

EH Bilduren ustez, aukera hori Ur Partzuergoen bitartez bideratzea bideragarria da

| 2020-03-31 12:34:00

Koronabirusak eragindako krisi soziosanitarioaren aurrean EH Bilduk hainbat proposamen egiten ari da. Horietako batek pertsonen ur hornidurarekin zerikusia dauka.

 

EH Bilduk Aldundiari helarazi dio beharrezkoa dela herritar guztiei ur hornidura bermatzea, batez ere egoera zaurgarrienean dauden pertsonei.

 

Uraren hornidura eskubidea dela ez dugu ahaztu behar eta krisi honetan ezin dugu inor atzean utzi. Hori dela eta uraren hornidura bermatzea beharrezkoa ikusten dugu eta pertsona zaurgarrienen kasuan hornidura hori doakoa izan dadila”, adierazi du Iratxe Arriola batzarkideak.

 

Koronabirusak eragindako egoeraren aurrean EH Bilduk argi dauka honelako neurriak hartzea ezinbestekoa dela. “Ezin dugu inor atzean utzi. Are gutxiago gaur egun bizitzen ari garen krisi honetan”, azpimarratu du Arriolak.

Koronabirusaren ondorioz adinekoen egoitzetan babes neurriak indartzeko eta lehenbailehen heltzeko beharra azpimarratu du EH Bilduk

Aldundiari dagozkion egoitza publikoetan eta plaza kontzertatuak dituztenetan EPIak eta test frogak banatu diren galdetu du EH Bilduk

| 2020-03-25 11:21:00

Koronabirusak eragindako krisi soziosanitarioak adinekoen egoitzetan izan dezakeen eragina kontuan izanda, zentro horietan hartuko diren neurriak lehenbailehen indartzea eta zehaztea beharrezkoa dela uste du EH Bilduk.

 

Hori dela eta, Aldundiari dagozkion egoitza publikoetan eta plaza kontzertatuak dituzten zentroetara zein babes neurri bideratuko diren galdetu du. Hain zuzen ere, EH Bilduk jakin nahi du EPIak banatu diren eta, horrela izanez gero, zenbat eta zein zerbitzuetan.

 

Hartuko diren babes neurrietaz gain, orain arte emandako urratsen inguruan ere galdetu du EH Bilduk.

 

Sail ezberdinetako langileei koronabirusaren inguruko kontrolak egin zaizkien jakitea beharrezkoa da.; zein froga mota eta zein langile motari, hain zuzen ere”, azpimarratu du Bea Ilardia EH Bilduko bozeramaileak.

 

Babes neurriak garraio publikoan

 

Beste alde batetik, EH Bilduk garraio publikoan ari diren langileen segurtasuna bermatzeko zer nolako neurriak hartu diren zehaztu nahi du. Sektore publiko horretan lanean ari diren langileentzako maskarak eskatu diren eta zein garraiobidetan banatuko diren argitu nahi du EH Bilduk.

Jokoaren sektoreari zergen ordainketa urrira arte atzeratuz Aldundiak negozio horiei emandako mesede tratua salatu du EH Bilduk

Neurri hori hartzen duten bitartean ez da gauza bera gertatzen beste sektore batzuekin lotutako negozioekin ezta familiek ordaindu beharreko zergekin

| 2020-03-23 08:28:00

EH Bilduk gogor salatu du Aldundiak joko-enpresariei emandako mesede tratua haien zergen ordaintzea urrira arte atzeratzean.

Aldundiak koronabirusak eragindako salbuespeneko neurri horren arabera, “makina edo aparatu automatikoen ustiapen bidezko jokoaren gaineko zergaren autolikidazioen, eta dagokion errekarguaren, zenbatekoaren kontuko zordunketa, 2020ko lehen hiruhilekoari dagokionez, 2020ko urriaren 25 arte” atzeratzen da.

Arantza Urkaregi batzarkideak azpimarratu duen bezala “joku-enpresariei emandako mesede tratu argi baten aurrean gaude. Beste hainbat enpresa ertain eta txiki eta autonomoei ematen ez zaien mesede tratua da Aldundiak onartutako neurria. Kezkagarria da horrelako negozioei emandako pribilejioak”.

Gogoratu behar da enpresa txiki eta autonomoak, asko jota, ekainaren 1era arte atzeratu dezaketela zergen ordainketa, joku-enpresekin gertatzen ez dena.

“Mesederik handiena nori egiten dio Aldundiak? Makina edo aparatu automatikoen ustiapen bidezko jokoak bultzatzen dituztenei. Ulertezina eta onartezina da”, adierazi du Urkaregik.

EH Bilduren proposamena, enpresari txiki eta ertainei eta herritarrei zuzendutako neurriak

EH Bilduk onartzen du salbuespenezko egoera batean gaudela eta neurri bereziak hartzea beharrezkoa dela.

Hori dela eta, beste hainbat neurrirekin batera, herritarren eta enpresari txiki, ertain eta autonomoen aldekoak proposatu ditu EH Bilduk. Horien artean aipagarrienak errenta kanpaina luzatzea edo atzeratzea eta enpresari txiki eta autonomoei zerga atzeratzeko aukera bermatzea.

ALBISTEAK

Asier Vega: «EH Bilduren egiteko moduak gero eta jende gehiago biltzen du, baita Bizkaian ere»

2021-06-13 19:29:00

EH Bildu Bizkaiak bere zuzendaritza berria aurkeztu du gaur goizean, Bilbon.

EH Bilduko Bizkaiko zuzendaritza berriak %90,62ko babesa jaso du

2021-06-05 12:29:00

Asier Vega Isasik aurkeztutako lan taldeak zuzenduko du hurrengo lau urteetan EH Bildu Bizkaia

Lurralde politika eta plangintza estrategikoa eskatu ditu EH Bilduk Ezkerraldera inbertsio industriala erakartzeko

2021-06-05 12:12:00

EAJk eta PSEk Ezkerraldearekiko ahanztura instituzionala eta tertziarizazioaren aldeko urteetan nahita egindako apustua gaitzetsi ditu. Horren aurrean, lurzoruaren kudeaketa bere katalogazio industrialaren araberakoa izan dadila aldarrikatu du EH Bilduk, inbertsioak erakartzeko eta eskualdeari etorkizun duina bermatzeko.

EH Bilduk Bizkaiko Foru Aldundiari eskatu dio hobari-sistema bat ezar dezala AP-68ko ordainlekuan, Bizkaiko zatian

2021-06-01 14:32:00

Neurri horri esker, Hego Uribek jasaten duen diskriminazioarekin amaitu eta BI-625 errepidetik kamioien trafikoa murriztuko litzateke