Bizkaia

EH Bildu Bizkaiak larritzat jo du sozietate zergan egindako %60ko murriztapena

Ogasun diputatuari galdetuko dio ea zenbat diru geratuko den bildu barik erabaki horren ondorioz

| 2020-05-12 12:33:00

Enpresei sozietate zerga %60 murrizteko erabakia oso larritzat jo du EH Bildu Bizkaiak. Bizkaiko Foru Aldundiak ezarritako ez-ohiko kenkariaren ondorioz enpresei aukera ematen zaie euro bat ere ez ordaintzeko Ogasunari, horrek dituen ondorioekin.

 

Arantza Urkaregi EH Bilduko batzarkideak gogoratu du Aldundiak erabaki hori, inolako txosten ekonomiko aurkeztu gabe, hartu duela eta erabaki horrek eragin ekonomiko negatiboa izango duela, justu Aldundiak krisi soziosanitario bati aurre egin behar zaion unean.

 

Neurri hauek Bizkaiko ekonomia suspertzeko balioko dute? Enplegua sortzeko balioko dute? Ez dago inolako bermerik hartutako erabakiak Bizkaiko ekonomia suspertzeko balioko duenik. Ez dago bermerik erabakiak enplegua sortzen lagunduko duenik. Argi dagoen gauza bakarra da krisi soziosanitario honetan instituzioek diru sarrera gutxiago izango dutela eta, horrela. Ezinezkoa da Bizkaiak aurrera egitea”, azpimarratu du Arantza Urkaregi batzarkideak.

 

EH Bilduren ustez, enpresek hainbat kenkari aplikatzeko aukera daukate egungo araudian eta, hortaz, berriro aplikatzeak zerga-elusiorako aukera gehiago zabaldu besterik ez du egiten.

 

Galdera Ogasun diputatuari

 

Hori dela eta, gaurko Mahaiak bideratu du EH Bilduk Ogasun diputatuari zuzendutako galdera. EH Bilduk jakin nahi du zenbat diru gutxiago bilduko duen Ogasunak hartutako erabakiaren ondorioz.

Bizkaia Aurrera planarekin Aldundia krisi soziosanitarioaren arlo ekonomikora bakarrik mugatzen dela salatu du EH Bilduk

Aldundiak gaur aurkeztu duen planak ez dio inolako aipamenik egiten gizarte arloari

| 2020-04-29 16:21:00

Aldundiak gaur aurkeztu duen Bizkaia Aurrera plana COVID-19-ak eragindako krisiaren arlo ekonomikora bakarrik mugatzen dela salatu du EH Bildu Bizkaiak.

“Ahaldun nagusiak gaur aurkeztu duen plana neurri ekonomikoetan soilik ditu ardatz, beste eremu guztiak baztertuz”, adierazi du Bea Ilardia EH Bildu Bizkaiko bozeramaileak. “Ez dago inolako aipamenik garraioari edo lehen sektoreari eta hori oso kezkagarria da. Krisi honen aurrean plan integral baten beharra azpimarratu diogu behin eta berriz eta arlo ekonomikora mugatzen den plan batekin egin dugu topo”, gaineratu du Ilardiak.

COVID-19ak eragindako krisiaren aurrean EH Bilduk hainbat proposamen egin zizkion Aldundiari arlo guztiei eragiten zieten ekimenekin, ekonomikoak barne. “Hala ere, gaur aurkeztu duen planak ez dio bizi dugun krisiari bere osotasunean erantzuten”.

Hortaz, EH Bildu Bizkaiak bere kezka agertu du krisi berri bati errezeta zaharrekin erantzuten diolako Aldundiak. “Argi daukagu jasaten ari garen eta etorkizunean jasango dugun krisia ez dela soilik ekonomikoa izango. Hori dela eta, plan integral bat eskatu genion eta horren alde lanean jarraituko dugu”, azpimarratu du Ilardiak.

Koronabirusaren krisiari aurre egiteko plan integral bat adosteko mahaia eskatu dio EH Bilduk Aldundiari

EH Bildu Bizkaiak alor guztiei eragiten dieten ia berrogeita hamar neurri aurkeztu dizkio Aldundiari eta ez soilik arlo ekonomikoari, gobernuak planteatu bezala

| 2020-04-24 12:38:00

EH Bildu Bizkaiak ia berrogeita hamar proposamen egin dizkio Aldundiari koronabirusak eragindako krisiari aurre egiteko. Proposamen horiekin, eta kontuan izanda gizartearen arlo guztietan eragina izango duen krisia dela, EH Bilduk ahaldun nagusiari eskatu dio plan integral bat beharrezkoa dela eta, ez soilik, arlo ekonomikora mugatutakoa.

“Aldundiak egin digun eskaera alor ekonomikora mugatzen da. Guk arlo horretan proposamenak egin dizkiogu baina haratago joateko beharra argi daukagu. Krisi hau ez da soilik krisi ekonomikoa. Gizarteari arlo askotan eragingo dien krisia da eta, horrenbestez, behar duguna plan integral bat da”, adierazi du Bea Ilardia EH Bildu Bizkaiko bozeramaileak.

Plana adosteko mahaia

EH Bilduk argi dauka Aldundiak abian jarri nahi duen planaren helburua ezin dela arlo ekonomikora mugatu. “Instituzioetatik abian jarritako planak balio behar dute krisi honetan inor atzean ez uzteko, orain arte egin ditugun akatsak ez errepikatzeko eta kudeaketa eredua aldatzeko”, azpimarratu du Ilardiak.

Hori dela eta, EH Bildu Bizkaiak arlo guztiei eragiten dieten ia berrogeitamar proposamen egin ditu eta plan hori adosteko alderdi eta eragile ezberdinek osatutako mahai bat eratzea da.

Lan eremu horiei begira hainbat dira EH Bilduk egindako proposamenak. Horien artean azpimarragarriak dira adinekoen egoitzetan pertsonala eta inspekzioak handitzeko edota udalen finantziaziorekin lotutako proposamenak.

Beste alde batetik, lehen sektoreari zein kultur eragileei laguntzak indartzea proposatu du EH Bilduk.

Ilardia: “Deigarria da Rementeriak koronabirusaren ondorioei aurre egiteko planerako ekarpenak egitea orain eskatzea, azken hilabetean egin dizkiogun 40 proposamenei ez dienean erantzun ere egin”

Ilardia: “Deigarria da Rementeriak koronabirusaren ondorioei aurre egiteko planerako ekarpenak egitea orain eskatzea, azken hilabetean egin dizkiogun 40 proposamenei ez dienean erantzun ere egin”

| 2020-04-22 14:34:00

Unai Rementeria Bizkaiko ahaldun nagusiak oposizioko taldeei ekarpenak eskatu dizkie koronabirusak arlo ekonomikoan izango dituen ondorioei erantzuteko. Horretarako bi eguneko epea eman die talde ezberdinei.

Bea Ilardia EH Bildu Bizkaiako bozeramaileak adierazi duen bezala, “deigarria da orain horrelako presa erakustea. EH Bildutik 40 proposamen baino gehiago egin dizkiogu krisia hasi zenetik; krisiak eragina izan duen arlo guztiekin lotutako proposamenak izan dira, ez soilik ekonomikoak, eta oraindik ez dugu inolako erantzunik jaso. Badirudi ahaldun nagusia berandu dabilela eta arlo ekonomikoa bakarrik aipatzea kezkagarria da”.

Hala ere, EH Bilduk, orain arte bezala, ekarpenak egiten jarraituko du krisi soziosanitario honi aurre egiteko.

Koordinazio mahaia eratzea

EH Bildu Bizkaiak koordinazio mahaia eratzea eskatuko dio Aldundiari koronabirusak eragindako krisiari aurre egiteko.

“Eragile ezberdinek osatutako mahaia izan behar da, krisiak eragin duen esparru ezberdinetan zer nolako neurriak hartzea erabakitzeko. Ekonomian izango duen eragina oso garrantzitsua izango da, baina ezin gara beste arlo batzuez ahaztu eta horietarako ere plan bat izatea beharrezkoa da”, azpimarratu du Ilardiak.

EH Bilduk oso larritzat jo du Batzar Nagusiek diputatu bakoitzaren agerraldia ez baimentzea eta COVID19-arekin zerikusia daukan informazio guztia batzorde bakarrera mugatzea

Eskatutako sail ezberdinetako agerraldiak egin beharrean ahaldun nagusiak bakarra egingo du, gardentasuna kaltetuz

| 2020-04-14 11:51:00

EH Bilduk Bizkaiko Aldundiak koronabirusaren krisian erakusten ari den gardentasun eza salatu nahi du. Gaur, foru gobernuaren eskariz, EH Bilduk eskatutako diputatu guztien agerraldia egin beharrean batzorde bakarra egingo dute Batzar Nagusiek instituzioaren gardentasuna kaltetuz.

Koronabirusa eragindako krisi soziosanitarioaren aurrean EH Bilduk sail ezberdinetako arduradunen urgentziazko agerraldia eskatu zuen arlo bakoitzean zer nolako erabakiak hartu ziren aztertzeko eta informazioa jasotzeko.

Informazio eskari horren aurrean Unai Rementeria ahaldun nagusiaren kabineteak sail ezberdinen agerraldiak ez egitea proposatu du eta EAJk et PSEk erabaki hori babestu dute.

“Gobernua osatzen duten alderdiek informazioa jasotzeko eskubidea urratu dute. Eman behar den informazio guztia ezin da ahaldun nagusiaren agerraldi batera mugatu; are gutxiago, arloka aztertzea eskatu denean. Beste behin ere, Aldundiak gardentasunari oztopoak jarri dizkio”, salatu du Bea Ilardia EH Bildu Bizkaiko bozeramaileak.

Informazioa jasotzeko oztopo berri bat

EH Bilduk gogoratu du ez dela lehen aldia krisi honetan gobernuak gardentasunari oztopoak jartzen dizkiola.

“Gipuzkoan eta Araban egoitzen inguruko informazioa maiztasun gehiagorekin ematen den bitartean, Bizkaian komunikabideen bitartez ari gara informazio hori jasotzen. Horretaz gain, ikusi dugu nola bizkaitar guztiak ordezkatuta dauden Batzar Nagusietan azalpenak eman baino lehen prentsaurreko telematiko baten bitartez eman zituela zenbait azalpen. Krisi honetan ematen ari den gardentasun eza guztiz salagarria da”, adierazi du Ilardiak.

EH Bilduren ustez, gardentasunari eta informazioari jarritako oztopo horiek guztiek asko zailtzen dute krisi soziosanitario honek behar duen elkarlana.

ALBISTEAK

Murriztutako lineatako frekuentziak berreskuratzea eskatu dio EH Bilduk Renferi

2020-10-16 13:56:00

Ezkerraldea, Hego Uribe eta Meatzaldeako udaletan mozioa aurkeztuko du C1, C2, C3 eta C4 lineak bere osotasunean berreskuratzeko eta zerbitzu duin bat eskatzeko

Udalek finantzazio egokia izan dezaten neurriak adostu ditu EH Bilduk Batzar Nagusietan

2020-10-05 12:39:00

Bidegorrien arloan eta epe luzeko zaintzan ere akordioak lortuta, Arantza Urkaregi EH Bilduko batzarkideak elkarlanaren beharra azpimarratu du

Udalentzako finantzazio lerro berezia sortzea eta Bizkaiko Susperraldi Ekonomikorako mahaia abian jartzea proposatuko du EH Bildu Bizkaiak asteleheneko osoko bilkuran

2020-10-01 12:54:00

Horretaz gain, zaintzarekin, berdintasunarekin eta garraioarekin lotutako proposamenak egingo ditu

Inertzia alde batera uzteko eta aldaketa sakonak eskatu dizkio EH Bilduk Rementeriari

2020-09-28 16:41:00

Elkarlanerako asmoa erakutsi du EH Bilduk, betiere azken urteetako politiketan ageriko norabide aldaketa ematen bada