AKTUALITATEA

Ekonomia | 2024-09-04

Pello Otxandiano Eusko Legebiltzarreko oposizioko burua elkarrizketatu dute Radio Euskadin. Kurtso politikoaren hasieras eta EAJren kritikez galdetuta, ikasturte politikoaren hasiera honetan «erabiltzen ari den semantikarekin harrituta» dagoela adierazi du. «Lasaitasuna eta zentzutasuna berreskuratu behar ditugu. Oposizio arduratsua egiten ari gara. Gauza larriak gertatzen direnean, hala nola herritar baten heriotza, beharrezko azalpenak eman behar dira berriro gerta ez daitezen. Normaltasunaren barruan sartzen da sailburua agertzea. Oposizioaren ekimen parlamentarioak eraso gisa katalogatzea hiperbolea da».

Itun etikoari dagokionez, EH Bilduk dokumentuari lehen ekarpenak egin dizkiola baieztatu du. «Gaur bertan helarazi dizkiot gure ekarpenak Pradalesi. Zorionez, herrialde honetan ez dago polarizazioaren aldetik arazorik. Baina politika nola egin eta nola jokatu planteatuko badugu, ko-gobernantzarako tresnak egon behar dira».

Osasun mahaiaren lehen bileraren bezperan, Legebiltzarreko bozeramaileak egungo exekutiboaren jarrera aldaketa azpimarratu du. «Gobernuak arazoak ukatzen zituen legegintzaldi batetik gatoz. Aurreko gobernuari zuzenketa bat egin zaio. Orain aldaketa bat egon behar da honaino ekarri gaituzten politika publikoetan. Mahai horrek Osakidetza berroneratzeko oinarriak jarri behar ditu, baina, aldi berean, legebiltzarraren kontrola egon behar da».

AHTri buruz galdetuta, Otxandianok erantzun du ikusten ari garena «esperpento politikoa» iruditzen zaiola. «20 urte daramatzan azpiegitura bat da. Eta benetan herri honen garapena eta artikulazioa 8 minutu aurreztean datza? Beldur naiz atzean beste interes politiko edo lurralde-interes batzuk daudela. Herrialde serioetan horrelako kontuek azalpenak ematea eta dimisioak ere ekarriko lituzkete», ondorioztatu du.