AKTUALITATEA

| 2025-02-17

Pello Otxandiano EH Bilduren Eusko Legebiltzarreko burua elkarrizketatu dute Radio Euskadin. Ezberdinen arteko aliantzei eta akordioei buruz galdetuta, Otxandianok esan du EH Bilduren proposamena batuketa proposamena dela. «Badira zatiketan daudenak. Herri honetan gutxieneko komunak lor ditzakegu nazio bat garela eta eskubide nazionalak ditugula uste dugunon artean. Hori guztia batuta, gure eragin-gaitasuna handiagoa izango litzateke».

Bozeramailearen iritziz, «Madrilen ez bezala, hemen eztabaida lasaia dago. Beraz, ez dago eragozpenik gure eskubide nazionalak elkarrekin defendatzeko. Lankidetza-espazioak blindatzeko gai izan behar dugu».

Estatus berriari buruzko eztabaidari dagokionez, Otxandianok uste du «alderdi sozialista funtsezko eragilea dela estatus berri baten idazketan». «Gure nazio-izaera aitortzeko aukera-leiho baten aurrean gaude. PSEk Sanchezen inbestidurarako hartu zen konpromisoaz jabetu behar du eta, aldi berean, Eusko Legebiltzarra subiranista dela ", nabarmendu du.

Boulevard programan, legebiltzarkideak eztabaida fiskalaren gaia ere jorratu du. «EAJk esan digu daukagun fiskalitatea ona dela, ez dutela sakoneko erreformarik egiten, eta PPrekin akordio bat lortu nahi du. PSEk esan du aldaketak egin daitezkeela eta nahiago duela EH Bildurekin akordioa lortzeko bide bat aztertu. Ez dute gehiengorik eta negoziatu egin beharko dute. Zerga-erreforma atzerakoia egin nahi bada, hori PPrekin egiten da. Europako herrialdeetara hurbilduko gaituen erreforma fiskala egin nahi badute, hori EH Bildurekin egiten da. Gai nagusia etorkizunerako zer fiskalitate nahi dugun da: nola eutsiko diegu zerbitzu publikoei?», galdetu du.

Azkenik, Talgori dagokionez, eragiketa positibotzat jo du Otxandianok. «Hasieratik esan genuen gaitasun guztiak aktibatu behar zirela industria lehiakor bat herrialdean errotzeko. Horixe da orain arte egin ez den industria-politika. Bide horretan sakondu behar da, izaera estrategikoarekin», esan du.