AKTUALITATEA

Ekonomia | 2026-09-25

EH Bilduk erantzun bat eskatu dio Eusko Jaurlaritzari, Euskal Herriko hainbat familiak bizi duten larrialdi egoeraren aurrean eta, bereziki, Erandioko Los Ochos auzoko 135 familia inguru etxegabetzeko arriskuaren aurrean.

Legebiltzarreko gaurko kontrol plenoan, Xabi Astigarraga EH Bilduko Etxebizitza idazkari eta legebiltzarkideak zalantzan jarri du Denis Itxaso Etxebizitza sailburuak Erandioko etxebizitzen operazioaren aurrean Sailak izan duen jokabidea, eta galdetu du ea zergatik ez zuen erabili lehentasunez erosteko eskubidea, erosteko aukera izan zuenean.

"Erandion, beste 130 familia daude etxegabetze arriskuan. Hemen ere ardura zaitezen eskatzen dizugu, sailburu jauna. Etxebizitza horiek erosteko aukera izan du Etxebizitza Sailak, tanteo bidez, zergatik ez du egin? ", adierazi du Astigarragak.

EH Bilduko legebiltzarkideak Eusko Jaurlaritzari esku hartzeko eskatu dio, inbertsio funtsek alokairura bideratutako etxebizitzak eros ez ditzaten, eta espekulazioaren aurrean esku-hartze publiko handiagoa defendatu du. "Espekulazioari atea itxi behar zaio. Baina horretarako, funts putreek gure bizitzak ez dituzte baldintzatu behar eta gure etxebizitzak bereganatzea saihestu behar da", esan du.

Astigarragak azaldu duenez, Eusko Jaurlaritzak etxebizitzak erosteko aukera izan zuen funtsak erosi baino lehen, eta ez zuen ezer egin. "Ahal dela etxebizitza horiek erosteko aukera izan du, fondo putreak baino lehen. Zergatik ez zuen jokatu Jaurlaritzak ahal izan zuenean? Agian, funtsak familia maizterrak errespetatuko zituela uste zenuten? ", galdetu du.

Era berean, etxebizitza galtzeko arriskuan dauden familien beste kasu batzuen aurrean premiazko erantzuna eskatu du EH Bilduk. Astigarragak Gasteizko Alde Zaharrean etxegabetze bati aurre egiten dion bi adingabe dituen familiaren kasua aipatu du. "Gaur bertan, etxegabetze bat Gasteizko Alde Zaharrean. Bi haur dituen familia bat kalean geratu da. Sailburu jauna, eskatzen dugu etxebizitza-alternatiba bat berehala eskaini diezagutela", eskatu du.

EH Bilduren ustez, egoera horiek agerian uzten dute gaitasun publikoa indartu behar dela etxebizitzaren merkatuan esku hartzeko eta kaltetutako familiei bizileku-alternatibak bermatzeko. "Merkatuan esku hartzeak jardutea esan nahi du, espekulazioaren aurka gure ahalmen guztiekin jardutea", esan du Astigarragak.

EH Bilduk etxebizitza eskuragarrien tresna berriak negoziatzea eskatu du

Agerraldian, Astigarragak Denis Itxaso sailburuari ere eskatu dio EH Bildurekin negoziatzeko espazio bat ireki dezala etxebizitzaren arloan. "EH Bilduk joan den maiatzean aurkeztu zuen ‘Posible 30K’ proposamena eta planteatu genuen erakunde publiko bat sortzea etxebizitza eskuragarriak sustatzeko. Aste honetan, Jaurlaritzak Etxebizitzaren Gizarte Funtsa aurkeztu du", azaldu du.

Bere ustez, bi ekimenak ezberdinak diren arren, esparru batzuetan adostasun puntuak egon daitezke. Hori dela eta, zuzenean negoziatzeko deia egin dio sailburuari. "Bi proposamenak ezberdinak dira, baina elkarguneak ere badituzte. Horregatik egin nahi dizut galdera zuzena: prest al zaude EH Bildurekin etxebizitza eskuragarria sustatzeko tresna berriei buruz negoziatzeko? EH Bildurekin negoziazio espazio bat irekiko duzu? Bai ala ez? ", planteatu du.

Era berean, Jaurlaritzak aurkeztutako Etxebizitzaren Gizarte Funtsaren diseinua zalantzan jarri du legebiltzarkideak, eta inbertsio publiko handiagoa eskatu du. "Zuek aurkezten duzuen Etxebizitzaren Gizarte Funtsak ahulezia handiak ditu. Lehena agerikoa da: anbizioa falta zaio. Inbertsio publiko handiagoa behar da", adierazi du.

Astigarragak, halaber, etxebizitzen kudeaketan errentagarritasunera bideratutako operadore pribatuen parte-hartzearen aurka azaldu da. "Zuek alokairuen pribatizazioa planteatzen duzue. Eta badakigu zer gertatzen den errentagarritasunak gidatutako aktoreak etxebizitzen kudeaketan murgiltzen direnean: epe ertain eta luzera arazoak ekarriko dituela bizilagunekin", ohartarazi du.