AKTUALITATEA

| 2026-09-10

Donostiako EH Bilduren Idazkaritzak Nerea Kortajarena Ibañez proposatu du 2027ko maiatzaren 23an egingo diren udal hauteskundeetan EH Bilduk Donostiako Udalerako aurkeztuko duen hautagaitzaren buru izateko.

Kortajarena EH Bilduren Programa idazkaria da gaur egun, eta legebiltzarkidea Eusko Legebiltzarrean 2016tik. Azken hauteskunde autonomikoetan EH Bilduren Gipuzkoako zerrendaburua izan zen, eta emaitza historikoa lortu zuen, ezker subiranistak botoen % 40 gainditzea ahalbidetuz.

Jaiotzez donostiarra eta Loiola auzoko bizilaguna da Kortajarena, eta, Donostiako EH Bilduren Idazkaritzaren iritziz, Gipuzkoako hiriburuko lehen emakume alkatea izateko beharrezkoak diren gaitasun guztiak biltzen ditu.

Gizarte langilea eta hiria, auzoak eta bizilagunak sakon ezagutzen dituena, Kortajarenak Donostiak behar duen norabide aldaketa bideratzeko beharrezko bermeak eskaintzen dituela uste du EH Bilduko idazkaritzak. Haren gertutasuna, esperientzia profesionala eta ibilbide politiko sendoa gehitu behar zaizkio ezker independentistaren komunitatearen barruan oso baloratua dagoen profilari.

Azkenik, Donostiako EH Bilduren Idazkaritzak eskerrak eman nahi dizkio Juan Karlos Izagirreri hiriaren alde egindako lanagatik eta hartutako konpromisoagatik, eta, aldi berean, berriro azpimarratu du EH Bildu mugimendu bizia dela, bere burua berritzeko eta ekintzengatik zein hitzengatik nabarmentzen diren militanteak balioan jartzeko gai dena.