Zarautz

LEHENTASUNA HERRITARRAK DIRA

Oraindik askotan eskatu dugun Zarauzko aurrekontuen egokitzapenaren argazki zirriborro bat ere ez dugu ikusi.

| 2020-05-15 19:08:00

Ostegun honetan, maiatzaren 13an, ez-ohiko batzarra ospatu zen Zarauzko Udalean. Covid-19aren ondorioz deitutako alarma egoera hau hasi zenetik lehenengoa. 

Ez-ohiko pleno honetan Euskal Trenbide Sarearen eta Zarauzko Udalaren arteko lankidetza-hitzarmena eta tren-geltoki berriaren eta trenbide azpiko pasabidearen eraikuntza finantzatzeko akordioak proposatu ziren, eta ohar honen bitartez gure balorazio eta izandako jarrera azaldu nahi dugu.

Lehenik, gauden alarma egoera honetan, covid-19aren krisiaren erdian, orain arte plenorik izan ez dugunean, oraindik Udal Gobernuari askotan eskatu diogun aurrekontuen argazki berriaren zirriborro bat ere ikusi ez dugunean, merkatari, ostalari eta negozio ezberdinak dituzten herritarrentzat zein laguntza emango ditugun erabakitzeko dagoenean, oraindik honetatik ahalik eta gutxien kaltetuta ateratzeko nola egingo dugun ez dakigunean... horrelako proiektu bat onartzeko ez-ohiko pleno bat deitzea sinestezina egiten zaigu.

Badakigu, krisi honek ez duela beste guztia geratu behar, eta ahal den neurrian aurrera egin behar dela, baina lehentasuna herritarrak dira orain, eta beste proiektuetaz hitz egiten hasi aurretik larri dagoen herritar asko eta askori nola lagundu pentsatu eta erabaki behar da. Horregatik, oraindik ez da une egokia gai honen inguruko erabakiak hartzeko.

Proiektuan beran zentratuta, kezka batzuk teknikari batzurekin komentatzeko aukera izan dugu. Eta argi geratu ez zaizkigun kontu batzuk badira:

1.- 2009an Zarauzko herria bi zatitan banatzen duen trenbidea lurperatzeko trazatuaren azterlana egiteko hitzarmena sinatu zen ETSrekin (Euskal Trenbide Sarea). Hasiera horretan EAJ-PNVrentzat ere lehentasun estrategikoa izan zen, baina azken 5 urte hauetan Udal Gobernuak guztiz bazter utzi du. Orain onartutako proiektu honek, gaur egungo trenbide trazatuari egonkortasuna emango diola iruditzen zaigu.

Guk azterlana bukatu egin behar dela, ez dela etsi behar uste dugu. Etorkizuneko Zarautz amesterakoan zatitzen duen  trenbiderik gabekoa imaginatu nahi dugu. Eta orain trenbidea lurperatzeko garai egokia ez dela ulertzen badugu ere, proiektua ez dela baztertu behar, eta etorkizunean proiektua gauzatzeko aukera egokiagoa dagoenerako, Zarauzko herria prest egon behar dela uste dugu. Horregatik, Udal Gobernu honek ETS-rekin sinatutako trenbidearen trazatuaren azterlanaren hitzarmenarekin aurrera jarraituko duen jakin nahi izan dugu bozkatu aurretik.

2.- Teknikoki gabezia batzuk ikusten ditugu: Alde batetik, udalak ETSri, proiektua aztertu ondoren,  egindako eskaeren erantzunik ez du jaso oraindik, beraz, behin betiko proiektua ez daukagu mahai gainean. Bestetik, dudarik gabe, pasabide honek herriko mugikortasunean aldaketak eragingo ditu, eta ez da egin mugikortasun planik. Eta gainera Lapurdi eta Zigordia kaleen arteko joan-etorriak oztopatu egiten dituela iruditzen zaigu. Hauek guztiak argitu arte gai honen inguruko erabakiak hartzea ez zaigu ondo iruditzen.

3.- Jakin badakigu tren geltokiaren gaur egungo eraikina, 1995ean eraikia dela, eta ez originala,  ondare arkitektonikoaren ikuspuntutik ez duela interesik. Hala ere, gure zalantzak sortzen dizkigu bota eta berria egin behar horrek.

Gainera, horrelako proiektu bat onartu aurretik herritarren parte-hartze prozesu bat ireki beharko litzatekela uste dugu; eta kasu honetan, proiektuari buruz duten iritzia emateko aukerarik ez izateaz gain, proiektuari buruzko informaziorik ere ez dute jaso.

Hauek guztiak esanda, gaur egun eta epe laburrean begiratuta, Zarauzko Iparra eta Hegoa lotuko dituen pasabideari alde positiboak ikustea erraza da, eta guk ere ikusten dizkiogu; baina pauso hori ematerako aurrez aipatutako puntu horietan gehiago sakondu behar dela uste dugu. Horregatik, hitzarmenaren sinadura atzeratu eta bozketa bertan behera lagatzeko eskaera egin genuen batzarrean, eta eskaera hori aurrera atera ez zenean, gure botoa abstentzioa izan zen, faltan botatzen ditugun puntuak aztertu arte.

Ez dugu bukatu nahi alkateak udalbatzarrean izan zuen jarrera salatu gabe. Egia esan,  ohikoak dira bere jarrera eta hitz egiteko modu harroak udalbatzarretan, baina oraingoan guztik tonoz kanpokoa izan zen bere hitz egiteko modua. EH Bilduko bozeramaileak bere iritzia eman ondoren, alkateak eman zion erantzuna ez da onargarria alkate baten aldetik eta publikoki adierazi nahi dugu jarrera horrek gugan sortutako haserrea.

Plenoa osorik ikusteko klikatu hemen.

Zarauzko EH Bilduko udal taldeak bideo bat zabaldu du

Covid-19aren ondorioz herritarrak animatu eta eskertu nahi izan ditu bideo honen bitartez.

| 2020-04-07 12:05:00

Itziar Murua Ahuntzaren gauerdiko eztula irratsaioan izan zen

Covid-19aren ondorioz Zarauzko egoeraz eta EH Bildutik egindako proposamenez mintzatu da bertan.

| 2020-03-29 13:30:00

2020ko martxoaren 29ko Arraio irratiko Ahuntzaren gauerdiko eztula irratsaioan elkarrizketa egin zioten.

Bi zati azpimarratu dituzte sare sozialetan, bi testu hauek gehituz:

1.- "Elkarlana bultzatu nahi dugu. Udaletxean erabakiak ahrtzen ari diren krisi kabinetean egon beharko genukela uste dutgu eta hori ari gara eskatzen".

2.- "Hainbat eskaera egin dizkiogu udal gobernuari. Horietako bat 70 urtetik gorako zarauztar guztiei telefono deiak egiteko herrian sortu den zaintza sarearekin kontatzea eta talde honekin elkarlanean aritzea."

Elkarrizketa osoa entzuteko klikatu hemen.

Zarauzko EH Bilduko udal taldeak proposamen berriak aurkeztu ditu aste honetako bozeramaile bileran

Osatu berri den krisi mahaien parte hartu beharko lukela uste du EH Bilduko udal taldeak

| 2020-03-24 13:59:00

Hauek dira martxoaren 24eko bozeramaile bileran egin dituzten proposamenak:

Bizitzen ari garen egoera larri honi aurre egiteko elkarlanean  eta elkar zaintzan oinarrituta lan egin behar dugula esaten jarraitzen dugu. Bizitza duinak erdigunean jarri eta gure ardurari helduz Zarauzko EH Bilduko udal taldeak honako neurri proposamenak egiten ditu eta neurri hauek  har ditzala eskatzen dio Zarauzko alkate den Xabier Txurrukari:

 

  • Guztion iritziak eta ekarpenak lagun dezakete eta herritarren parte handi batek bere konfiantza jarri duen taldearen (herriko bigarren taldea, 8 zinegotzirekin) iritzia krisi kabinete horretan egotea logikoa eta garrantzitsua ikusten dugu. Horregatik kabinete horretan alderdi guztietako partaideak egotea eskatzen dugu berriz ere, beste herrietan egiten den bezalaxe (Adibidez, Zumaian, Orion, Andoainen edo Tolosan)
  • Hainbat herrietan eta baita ere Zarautzen sortzen ari diren boluntarioek osatutako zaintza sareek balio handia dutela uste dugu. Egoera honetan hartu beharreko neurriak oso zorrotz bete behar direla ere badakigu, eta horregatik oraingoz telefono bidezko lanak egiteko sare honekin kontaktuan jarri eta boluntarioekin elkarlanean udalak zera antolatu dezala eskatzen dugu:
  • 70 urtetik gorako Zarauztar guztiei telefono deiak egitea, beraien egoeraz galdetu eta beharren bat izanez gero udaleko gizarte zerbitzuekin kontaktuan jartzeko. Osasun krisi larri honen aurrean zaurgarrienak adinekoak dira eta  zaintza berezia merezi eta behar dute.
  • Boluntario sarearekin harremana mantendu dezala, behar izanez gero, neurriak hartuz eta modu antolatu batean, etorkizunean beste lan batzuetara bideratu ahal izateko.
  • Krisiak herritarrengan sortu dezakeen egoera ekonomikoa kontuan hartuta:
    • Herriko hainbat zerbitzuren erabiltzaileei, eta erabiltzaileak zerbitzuan baja eman beharrik gabe, bertako kuotak etetea zerbitzuak ematen ez diren bitartean eta horren berri herritarrei ematea.  Hala nola kiroldegikoak, eguneko zentrokoak, Artezaleak-ekoak, Musika eskolakoak eta udalari kuotak ordaintzen zaizkion beste zerbitzuren bat balego.
    • Udal zergen etetea, krisi egoera arindu bitartean.

Zarauzko EH Bilduko udal taldeak hainbat proposamen aurkeztu ditu bozeramaile bileran

Besteak beste udal talde guztiak parte hartuko duten krisi mahaia osatzeko eskatu du.

| 2020-03-17 13:49:00

Atzo egin zuten Zarauzko udal talde guztietako bozeramaile lehen bilera telematikoa. Udal gobernuak hartutako erabakien berri eman zuen bertan, eta EH Bilduko taldeak bere proposamenak egiteko baliatu zuen bilera.

Hauek izan ziren egin zituzten eskaerak:

Covid-19k eragindako larrialdi egoeraren aurrean, Zarauzko EH Bilduko udal taldeak honako neurri proposamenak egiten ditu eta neurri hauek urgentziaz har ditzala eskatzen dio Zarauzko alkate den Xabier Txurrukari. 

 

  • Jarraipen mahai bat eratu dezala, larrialdi egoeraren ondorioz herritarren artean sortzen ari diren behar eta arazoei garaiz eta inplikatutako agenteekin koordinatuta erantzun ahal izateko. 

Herritarrei segurtasuna emateko momentua da, eta erabakiak taldean eta adostasunez hartzeak herritarrei segurtasun mezua emango diela sinesten dugu. Mahai honek gutxieneko osaketa hau izatea proposatzen dugu: alkatea, babes zibileko arduraduna, Udaltzainburua, Ongizate eta gizarte zerbitzuetako burua, Berdintasun saileko burua, boluntario sareko ordezkaria, Osasun zerbitzuetako ordezkaria eta alderdi politiko guztietako ordezkariak.

(mahai hau modu telematikoan elkartu daiteke).

 

  • Arrisku handiena duten edo premia bereziak dituzten herritarren zaintza beharrei erantzuteko sortu den boluntario sarearen ardura har dezala. 

Boluntario sare hau beharrezkoa dela sinesten dugu, baina berau koordinatzeko  eta jendearen ekimen nahia modu protokoarizatuan, seguruan eta udaleko gizarte zerbitzuarekin elkarlanean egin ahal izateko neurriak udalak hartu behar dituela uste dugu.

 

  • Telefono bat jar dezala herritarren eskura, zalantzak argitzeko zein bizi ditzaketen egoera larriei erantzun ahal izateko.Zerbitzu honek ondo funtzionatu dezan, behar den pertsonala horretara bideratuz.
  • Udal langileei ere etxean geratzeko eskatu diezaiela, posible den kasuan telelana edo telefono bidezko lana ahalbidetuz eta soilik zerbitzu minimoak mantenduz. Langile hauei udalak emergentzia egoera batean berea ez den beste lanen bat eskatu diezaiekela jakin araztea.​
  • Krisi honek familia, merkataritza establezimendu txiki eta ostalariei sor diezaiekeen galera ekonomikoei aurre egiteko diru-laguntzak abian jartzea.
  • Zergen suspensio edo atzeratzearen inguruko hausnarketa eta azterketa ekonomikoa, aurrerago behar diren erabakiak hartu ahal izateko.
  • Desgaitasun intelektuala daukan bat beren kargura dutenei kalera irtetzeko baimen berezia eman diezaietela, beti ere osasun-agintariek emandako gomendioak jarraituz eta denbora-epe mugatu batetarako. Debekuaren salbuespen hori justifikatzeko,arduradunari desgaitasuna frogatzen duen agiria aldean eraman dezala eskatuz.

 

Bizitzen ari garen egoera hain aldakorra izanik, eskaera hauek martxoaren 17ko egoerari begiratuz eginak dira. Aurrerantzean hartu beharreko pausuak aldatzen joan daitezkeela argi dugu eta horiek proposatzen dugun krisi mahaiean erabakitzea proposatzen dugu. 

 

ALBISTEAK

LEHENTASUNA HERRITARRAK DIRA

2020-05-15 19:08:00

Oraindik askotan eskatu dugun Zarauzko aurrekontuen egokitzapenaren argazki zirriborro bat ere ez dugu ikusi.

Zarauzko EH Bilduko udal taldeak bideo bat zabaldu du

2020-04-07 12:05:00

Covid-19aren ondorioz herritarrak animatu eta eskertu nahi izan ditu bideo honen bitartez.

Itziar Murua Ahuntzaren gauerdiko eztula irratsaioan izan zen

2020-03-29 13:30:00

Covid-19aren ondorioz Zarauzko egoeraz eta EH Bildutik egindako proposamenez mintzatu da bertan.

Zarauzko EH Bilduko udal taldeak proposamen berriak aurkeztu ditu aste honetako bozeramaile bileran

2020-03-24 13:59:00

Osatu berri den krisi mahaien parte hartu beharko lukela uste du EH Bilduko udal taldeak