Zarautz

Pandemia garaian zarauztar guztiei higiezinen zerga %0,9 igotzea ez dela bidezkoa salatu du EH Bilduk

EH Bilduk zerga eta tasa guztiak izoztu eta etxebizitza hutsei errekargua igotzea proposatu du eta horregatik ez du udal gobernuaren OHZren igoera orokorra babestu. Bestalde, alokairua bultzatzeko maizterrentzat EAJ-PSEk eta EH Bilduk iaz adostutako hobariak aplikatzeko konpromisoa ez du bete udal gobernuak.

| 2020-10-09 11:08:00

Osteguneko ez-ohiko batzarrean herritarrei zuzenean eragiten dieten ordenantza fiskalak izan ziren hizpide. EAJ-PSEk tasa eta zerga ia guztiak izoztea onartu dute, bat izan ezik. OHZ (Ondasun Higiezinen Zerga) %0,9 igotzea erabaki da plenoan eta EH Bilduren ustez gaur egungo egoera ez da horretarako egokia. “Bizitzen ari garenarekin, bakoitzaren egoera kontuan izan gabe herritar orori eragiten dion zerga bat da hau. Ez dugu uste bere egoera eta errenta nolakoa den kontutan ere hartu gabe zerga guztiei modu berean aplikatzeko garaia denik”, esan zuen Ion Arozena zinegotziak. Horren ordez, EH Bilduk etxebizitza hutsen errekargoa igotzea proposatu zuen. “Modu honetan guretzat garrantzitsuak diren bi helburu lortuko genituzke: alokairuaren merkatua mugiaraztea eta herriak beharrezkoa duen diru-bilketa”. EAJ eta PSE-EE aurka azaldu zirenez, ez zuen aurrera egin.

 

Iazko konpromisoei dagokionez, Etxebizitza Programa batek barne-bilduko dituen alokairurako hiru diru-laguntza lerro eta programa horretan parte hartzen duten maizterrentzat zerga hobariak adostu zituen, besteak beste, Udal Gobernuak EH Bildurekin. Konpromiso hori izan zen iazko Ordenantza Fiskaletan EH Bilduk etxebizitza hutsen errekargoa ez eskatzeko arrazoia, baina, bete ez dela ikusita, berriz ere lehen egindako proposamenari heldu behar zaiola uste du.

 

“Elkarrizketan oinarritutako eta adostasunak bilatzeko politika egiteko asmoa azaldu genuen legealdi hasieran eta iaz ikusi genuen lan horren lehen alea, EAJ, PSE-EE eta EH Bilduren akordioarekin ez-ohiko batzarrean 2020rako Ordenantza Fiskalak onartu zirenean. Baina adostutakoak betetzea eta elkarrizketa urtean zehar mantentzea ezinbestekoa da, eta ez dugu hori ikusten Udal Gobernuaren aldetik.  Dena den, gure elkarrizketarako prestutasuna mantenduko dugu aurrerantzean ere”, gaineratu du Arozenak.

Zarauzko EH Bilduk bat egin du Euskaraldiarekin

Talde bezala eman du izena eta Udaleko adierazpen instituzionalarekin bat egin du.

| 2020-09-30 12:35:00

Zarauzko EH Bilduk Euskaraldiarekin bat egin du, euskara bultzatu eta indartzeko helburuarekin.

Euskaraldiaren bigarren edizioaren atarian gaude,  azaroaren 20tik abenduaren 4ra izango baita. Jakina denez, euskal hiztunak aktibatzea du helburu Euskaraldiak, beraz, euskara ulertzen duten hiztunen arteko hizkuntza ohiturak aldatzeko ariketa soziala da, gizartearen gune guztietara zabaldua eta denborari dagokionez mugatua.

Euskaraldiaren helburu nagusia euskararen erabilera haztea da, herritarren hizkuntza ohituretan eraginez. Gainera, aurten norbanako bezala (ahobizi edo belarriprest izanez) parte hartzeko aukeraz gain, taldean parte hartzeko aukera ere izango da arigune-en bidez.

Zarauzko EH Bilduk talde bezala parte hartzea erabaki du eta udalaren  parte hartzea babestu du, adierazpen instituzionala sinatuz.

 

GEHIAGO, GEHIAGOREKIN, GEHIAGOTAN.

ALBISTEAK

Zarauzko EH Bilduk bat egin du Euskaraldiarekin

2020-09-30 12:35:00

Talde bezala eman du izena eta Udaleko adierazpen instituzionalarekin bat egin du.

Zarauzko EH BILDUren 3. buletina

2020-07-29 14:13:00

2020ko uztaila

Xabier Txurruka alkatearen manipulazioak eta jauntxokeriak salatu ditu EH Bilduk

2020-07-08 13:10:00

Alkatearen jarrerarekin kezkatuta agertu da EH Bildu, bai formen aldetik baina baita udaleko arauak ere ez dituelako errespetatzen.

LEHENTASUNA HERRITARRAK DIRA

2020-05-15 19:08:00

Oraindik askotan eskatu dugun Zarauzko aurrekontuen egokitzapenaren argazki zirriborro bat ere ez dugu ikusi.