“Publikoa, funtsezkoa zaindu, aberastasuna banatuz” lemapean Hego Euskal Herriko 45 herrietan mobilizazioak izanen dira E19an. Sopelan 19.00etan antolatu da elkarretaratzea.

Karta Soziala,Elkarretaratzea | 2020-06-18 17:05:00

Kaleak hartzeko deia egin du Euskal Herriko Eskubide Sozialen Kartak ekainaren 19an. Gipuzkoako, Arabako, Bizkaiko eta Nafarroako 45 herrietan mobilizazioak antolatu dira “Publikoa, funtsezkoa zaindu, aberastasuna banatuz” bizitza lehenesteko eskariarekin.

Krisiaren lehen lerroan bizitzaren aldeko borrokan aritu diren langileek eta arlo ezberdinetako pertsona ezagunek sinatutako manifestuaren inguruan, ahotsak eta gorputzak elkartu ditu Euskal Herriko Eskubide Sozialen Kartak, ekainaren 19rako mobilizazioak deituz. Urtarrilaren 30eko grebatik ia bost hilabete pasatu direnean, konfinamenduaren ondoren kalera eta borrokara ateratzeko deia egin du eragile sindikal eta sozialak biltzen dituen Kartak.

Zazpi dira aldarrikapen nagusiak:
1. Zerga erreforma, krisia kapitalak ordain dezan
2. Zerbitzu publikoak garatu eta azpikontratak publifikatu
3. Zaintza sistema publiko, unibertsal eta doakoa.
4. Diru Sarrerak Bermatzeko Errentaren zenbatekoa Lanbidearteko Gutxieneko Soldatarekin parekatu eta etxebizitza eskubidea
5. 1.080 eurotako gutxieneko pentsioak.
6. 1.200 eurotako gutxieneko soldata eta gehienez 35 ordutako lan-astea.
7. Pertsona guztien erregularizazioa

Goizez, mobilizazioak egingo dira Hegoaldeko lau hiriburuetan 11:30ean hasita. Bilbon, Udaletxetik hasita, Donostian Alderdi Ederretik, Gasteizen, Foru Plazatik eta Iruñean, Bus geltokitik. Arratsaldez, hainbat herritan, tartean Sopelan, 19.00etan, Udaletxe plazan.

PRESOEN KONTRAKO ERASO GEHIAGORIK EZ!

“Zuri eta zure alabari tiro bat emateko gogoa jartzen ari zait” esan dio Guardia Zibileko agente batek Beatriz Etxeberria presoari. Gaur, arratsaldeko 19.00etan elkarretaratze bat deituta dago Sopelan, 19.00etan Frontoi aurrean, egoera salatzeko.

Presoak,Erasoa | 2020-06-18 16:40:00

ETXERAT (2020-VI-17). "Zuri eta zure alabari tiro bat emateko gogoa jartzen ari zait". Hitz hauek erabiliz eta eskua pistolara eramanaz zuzendu zitzaien atzo Guardia Zibileko agente bat Beatriz Etxeberria Caballero euskal preso politikoari eta bi urteko alabari.

Biak Aranjuezeko espetxean daude, etxetik 500 km-ra, eta atzo, asteartea, hilaren 16an, Niño Jesús haurren ospitalera eraman zituzten neskatoari bi kontsulta mediko egiteko. Senitartekoek Etxerat Elkarteari azaldu diotenez, lehenengo kontsulta egin ondoren, bigarrenaren zain zegoela, oldartu zitzaion polizia-zaintza egitearen ardura zuen efektiboetako bat, Guardia Zibileko kidea, Beatriz Etxeberriari. Une horretan, zuen kontsulta bertan behera uztea erabaki zuen euskal preso politikoak, eta baita datorren asteetan egitekoak zituen beste guztiak ere. Horrela adierazi zion medikuari.

Alabaren segurtasunerako berme falta, eta haurrra jasandako mehatxu eta jarreratik aldentzeko beharrak bultzatu zuten erabaki hori hartzera.

Etxerat Elkartearen ustez, horrelako gertakariek seriotasun gutxiko jarrera uzten dute agerian, are gehiago, bi urte eskaseko haur baten aurka zuzendutakoak izan direnean. Halaber, onartezina deritzo euskal presoa politikoak haien segurtasuna arriskuan jartzen duten hirugarren pertsona baten zaintzapean uzteko erabakia.

Elkartetik behin eta berriro salatu dugu haurrak eta adingabeak, euskal presoen seme-alabak edo senideak, egoera ahulean daudela hainbat motatako eraso eta mehatxuen aurrean, eta irmoki salatzen ditugu haien eskubideen aurka egiten diren etengabeko erasoak.

(iturria: etxerat.eus).

• «
• 1
• 2
• ...
• 4
• 5
• 6
• 7
• 8
• 9
• 10
• ...
• 64
• 65
• »