Herritarron bizi-kalitatea, egungo Sopelako herri-antolamenduari kritika, Sopela bizigarriagoa... Natura babesteko hona hemen gure 11 erronka!

| 2021-09-09 14:18:00

Herritarron bizi-kalitatea helburu

Krisi klimatiko eta ekologikoak eta azken urte eta erdian pandemiak berak erakutsi egin digute zeinen garrantzitsua den naturaren zaintza, herritarron zaintza ere ahalbideratzeko. EH Bilduk zuzenean lotzen du Naturaren babesa herritarron bizi-kalitatearekin.

 

Kritika gogorra egungo Sopelako herri-antolamenduari

Sopelak duen herri-antolamendua, hirigintza eta ingurumenaren alorrean, jasangaitza da. 1999ko arau subisidarioek (egungo hirigintza-araudiak) sortu duten herri-antolamendua erabat anti-sozial
eta anti-ekologikoa izan da: txaletak kostaldean eta naturaguneen zaintza eza. Hauxe izan da EAJ-ak Sopelarentzat izan duen garapen eredua. Eta eredu hori aldatzeko herriaren estrategia integrala izatea beharrezkoa da, naturguneen babesa eta herritarron bizi-kalitatea erdigunean jarriko dituena.

 

Sopela herri bizigarriagoa bihurtzeko erronka

2019-2023 legegintzaldirako herri-programan gure filosofia zehazten genuen: “Sopela bizia dugu amets. Etorkizuneko Sopela irudikatu nahi dugu. Herri atsegin, eroso eta erakargarriagoa. Zainduagoa eta garbiagoa. Kohesionatuagoa. Modernoagoa. Sozialagoa. Ingurune natural eta historiko babestuekin”. Zehazki, hirigintza- eta ingurumen-alorretan finkatzen genuen erronka: “Gaur egungo hirigintza eredua aldatu, Herria Antolatzeko Plan Orokorra ezarriz (HAPO), etorkizuneko Sopela modu orekatu eta jasangarrian antolatzeko (herri kohesioa, naturaguneak)”.

 

11 erronka zehatzak legegintzaldi honetan

Herri-programa iparrorratz hartuta, hainbat gaietan kokatu gara legegintzaldi honetan zehar. Esan beharra dago gai horietako asko (edo gehienak), EAJ eta PSEko udal gobernuarekin sinatutako 2020 eta 2021ko aurrekontu-akordioan sartuta zeudela. EH Bilduk akordio hori apurtu zuen uztailean, udal gobernuarekin izandako desadostasunengatik. Gauzak horrela, honako hauek dira EH Bilduk naturaguneen inguruan proposatzen duena:

1. San Andres-eko landak. Joan den legegintzaldiak EAJ-ak naturagune horretan institutu berri bat eraikitzea proposatzen zuen, Iberreko espazio arazoak konpontze aldera. EH Bildu erabat kontra agertu zen hasieratik. San Andreseko naturagunea zaindu eta berreskuratu behar da, herritarron gozamenerako eta Naturaren zaintzarako. Eremu horretan ez da bestelako ekintzarik egin behar.

2. Loroño, Zabalbide eta Lemotzako ingurunea. Bertan Zipiriñeko espazio arazoak konpontzeko hezkuntza-zentro berri bat eraikitzea proposatu genuen egungo Loroñoko aparkalekuan, inguruko artadia eta Lemotzako ingurunea ekologikoki berreskuratzeko proiektua aurkeztuz.

3. Urkoko hezegunea. EAJ-ak bertan kirol-hiria eraikitzeko asmoa zuen legegintzaldi hasieran. Hori zen beraien proiektu-izarra. Gure ikuspegia bestelakoa da: Urkoko hezegunea babestu eta handitu beharra dago, Iberrota plazaraino. Horretarako, proiektu zehatza aurkeztu dugu, naturagunea babestea proposatuz, auzokideen gozamenerako.

4. Abaroko Plan Partziala. Larrabasterrako zonalde hori hirigintza mailan garatuz, Urko- Iberrota ingurune osoa lur publiko bihurtuko da. Horrez gain, Gobela ibaia eta Gatzarriñe errepidearen arteko lur sailak ere publiko bihurtuko dira. Urkoko hezegunean proposatu dugun bezala, lur sail horietan proiektu zehatza garatu berri dugu, natura babestuz eta auzokideentzako aisialdirako aukerak sortuz. Esteka honetan duzue. Emaiozue begiratu bat!

5. Herrian bertan natura txertatu. Ez gaude ados EAJ-ak erdigunean abian jarri duen oinezkoentzako gunearekin. 2011-2015 legegintzaldiaren amaieran, EH Bilduk proposamen zehatza zuen, erakargarriagoa, porlana gutxiagorekin eta zuhaixka gehiagorekin. EAJ-ak proposamen hori blokeatu zuen joan den legegintzaldian. Orain abian jarritako esperimentua eskasa da erabat. Badaude beste proposamen batzuk mahai gainean, kontutan har ditzatela. Gauza bera Iberre auzoarekin. Kalearen eraberritzea abian jarri behar, ingurune biziagoa sortuz.

6. Urkoko saihesbidea. Trafiko arazoak konpontzeko 2011-2015 legegintzaldian trafikosaihesbideen inguruko azterketa gauzatu zen, hainbat alternatiba zehaztuz. Horien
inguruko prozesu partehartzailea egitea proposatu dugu. EH Bildu Erripako saihesbidearen alde egiten du (Udalaren menpe dagoena), eta zalantzak ditu Urko saihesbidearen inguruan. Saihesbide horrek Larrabasterrako trafiko arazoak konponduko lituzke baina kalte ekologiko garrantzitsua eragingo luke. Saihesbide hori Bizkaiko Foru Aldundiaren
menpe dago baina uste dugu erabakia Sopelan hartu behar dela. Herritarrok dugu azken hitza.

7. Barinatxeko aparkalekua aisialdirako espazio librea bihurtu. Arrietarako auzokideek bultzatutako ekimena babestu dugu, hau da, aparkalekua eta kotxeak kendu aisialdirako gunea bihurtuz zonalde hori. Naturak berreskuratutako ingurunea da.

8. Sopela, ingurune arkeologiko babestua. Auzokide batzuen ekimena babestu dugu azken hirigintza-batzordeetan. Egin dezala Sopelako Udalak ikerkuntza arkeologiko bat, herriko eremu arkeologiko garrantzitsuenak zehaztuz eta eska diezaiola Eusko Jaurlaritzari ingurune horiek babes arkeologikoko eremu izendatzea. Gure kultur ondarea babestu behar dugu, hirigintza eredu bortitzen kontra.

9. HAPO berria abian jarri, irizpide ekologiko eta feministaren ikuspegitik. 2011-2015 legegintzaldian, EH Bildu udal gobernuan zegoelarik, HAPO berri baten lizitazioa martxan jarri zen. EAJ-ak blokeatu zuen joan den legegintzaldi osoan zehar. Guk HAPO berri bat abian jartzearen garrantzia ikusten dugu, 1999ko arau subsidiario zaharkitu eta atzerakoiak gaindituko dituena ekologikoaren eta feminismoaren ikuspegitik (zaintza eta natura erdigunean). EAJ-ak legegintzaldi honetan HAPO berria abian jartzeko borondatea du baina ez du kontutan hartu gure ekarpenik handiena: Sopelako hirigintza-antolamendua irudikatuko duen enpresa aukeratzeko irizpide ekonomikoez gain bestelako irizpide kualitatiboak ere kontuan hartzeko. Ez dugu hirigintza-enpresa erraldoirik nahi gure HAPOa definitzeko, Sopela eraldatuko duten eragileak nahi ditugu, ordea.

10. Sopelako industrialdea. Begi bistakoa da Sopelako industrialdeak azken urteetan izan duen desmantelatze-prozesua, deslokalizazioak barne. Industria ez bada Sopelako egitura ekonomikoaren etorkizuna, kontu handia izan behar dugu industrialde horri emango zaion erabilerari. Sopelak etxebizitza gehiago beharko ditu?, edo naturagune eta aisialdirako gune gehiago?, zeintzuk interes daude horren atzean?

11. Uribe Kostako naturguneen babesa. Uribe Kosta EH Bildu gure eskualdeko naturaguneak identifikatzen ari da, biodibertsitatea bermatze aldera. Behin ingurune horiek
zehaztuta, gehienak jabetza pribatukoak, lur horiek publifikatzeko estrategiak abian jartzea da gure helburua. Esate baterako, Barrikan eta Urdulizen zenbait lursailen erosketa proposatu berri da, ildo honi jarraituz.

 

Kiribile elkartea
Sopelako naturaguneak babesteko elkarte bat sortu berri da. Elkarte anitza, naturarekin konprometitutako hainbat herritar biltzen dituena. Sopelako EH Bilduk oso positibotzat jotzen du
naturaren babesarekin sortutako herri-mugimenduak eta kolektibo berri honekin lankidetzan aritzeko borondatea berresten du, Kiribile elkarteak proposatzen dituen neurriak aztertuz eta egokitzat joz gero, neurri horiek babestuz. Zorionak egiten ari zareten lanagatik eta aurrera, zuen ondoan izango gaituzue!

 

Argazkia: sopela.net ("Gure Larrabasterra maitea", Jose Mari Unanueren artikulua).

Fernando, betiko gorde dugu eman diguzuna

| 2021-08-23 08:44:00

Ezustean eta tristuraz harrapatu gaitu berriak. Fernando Orozko sopeloztarrak utzi egin gaitu, hilaren 21ean. Fernando, Sopelako Udalaren zinegotzia izan zen, 2004tik 2008ra bitartean, “Sopela Aurrera” udal-taldean. Ezker Abertzaleko militante gisa, Sopelan egindako elkarretaratze, asanblada zein bileretan ohikoa zen Fernando bertan ikustea. Honenbestez, Sopelaren alde egindako lan guztiagatik eskerrak eman nahi dizkiogu Fernandori, Sopelako EH Bildu osatzen dugun ezkerreko subiranista guztion partez. Besarkada estu bana ere bere senide eta lagun guztiei. Lurrak goxo har zaitzala, Fernado. Egun handira arte!

Ai nora joan zara?
Fernando laguna
euskalzale zintzoa
eta euskalduna
Sopelak entzuten du
zure oihartzuna
Hartu agur honekin
gure maitasuna
betiko gorde dugu
eman diguzuna

| 2021-08-06 01:41:00

Udal Gobernuak 23.500 euro inguru gastatuko ditu enpresa bat kontratatzen, egun Enrike Urrutikoetxea kalean dauden mural politikoak ezabatuz eta haien ordez “urrezko bi kurrilo” margotuz. Horretarako, “hiru pertsonen iritziak” jaso omen dituzte eta enpresak emandako aukeretatik bat aukeratu dute. Kale horretako puntu-beltza ezabatzea omen da helburu, Udal Gobernuaren esanetan. EH Bilduk margoketa hori mural politikoak ezabatzeko ekintza bat dela salatu du eta mural berriak herriko talde eta eragileekin adosteko eskaria luzatu dio EAJ-ri.

Erabakia behin hartuta jakinarazi digute

Kultura zein Berdintasun Batzordeetan ez da gaia landu, beraz alor horietako EH Bilduko zinegotziek ez zuten ekintza horren berri. Kreditu transferentzia baten (23.532,08€) berri ematearen bitartez ezagutu izan du EH Bilduk Udal Gobernuaren erabakia, Ogasun Batzordean. Hori dela eta, Ogasun Batzordean jasotako informazioa berresteko eskatu zion Sopelako Udalaren Alkateari: kokagune zehatza, muralaren irudia eta irudi hori aukeratzearen arrazoiak, gaia zergatik ez den landu erabakia hartu aurretik beste batzorderen baten (adibidez, kulturan, berdintasunean edo hirigintzan).

Urrezko bi kurrilo mural politikoen ordez

Udal Gobernuak enpresa bat kontratatu du, gaur egun Enrike Urrutikoetxea kalean (metroko zubiaren azpian) dauden mural politikoak ezabatuz eta haien ordez “urrezko bi kurrilo” margotuz. Horretarako, “hiru pertsonen iritziak” jaso omen dituzte eta enpresak emandako aukeretatik bat aukeratu dute. Kale horretako puntu-beltza ezabatzea omen da helburu, Udal Gobernuaren esanetan.

EAJ-ak mural politikoak ezabatu nahi dituela salatu du EH Bilduk

“Ados gaude herriko puntu beltzak ezeztatu behar direla eta hirigintza antolamendua genero ikuspegitik diseinatu behar dela (horren adibidea da EH Bilduk Abaro sektorearen plan partzialari egindako alegazioa). Ados gaude ere gure herriko kaleak kolorez alaitu behar direla. Baina susmoa daukagu mural horren benetako helburua herri mugimenduek egindako mural politikoak ezabatzea ote den. Horrela balitz, jarrera hori irmoki salatzen dugu. Alternatibak bilatu beharra dago. Adibidez, herriko kirol-, kultur-talde zein eragile sozialen esku uztea mural horien margoketa” (Arantza Bilbao EH Bilduko zinegotziaren interbentzioa, uztaileko osoko bilkuran).

EH BILDUK POLIZIA NAZIONALAK SOPELAN EGINDAKO ATXILOKETAK SALATU DITU

| 2021-08-06 01:32:00

Uztailaren 22an Polizia Nazionalak 3 gazte atxilotu zituen Sopelan, joko aretoen kontrako salaketa-ekintza batzuk leporatuz. Uztaileko osoko bilkuran, hilaren 29an, EH Bilduk urgentziazko mozio bat aurkeztu zuen, Polizia Nazionalak Sopelan egindako atxiloketak salatuz eta atxilotutako herritarrei elkartasuna eta babesa agertuz. EAJ, PSE, eta Podemos mozioaren kontra agertu ziren eta Elkarrekin Podemoseko beste zinegotzia eta DB/TU abstenitu ziren. Soilik EH Bilduk salatu zuen herri-mugimenduen kontra gertatzen ari den oldarraldi errepresiboa.

Polizia Nazionalaren atxiloketak

Uztailaren 22an Polizia Nazionalak 3 gazte atxilotu zituen Sopelan, joko aretoen kontrako salaketa ekintza batzuk leporatuz. Indautxuko komisaldegira eraman zituzten eta bertan hainbat orduz egin zieten galdeketa, ustez Arrigorri Joko Aretoen kontra egindako kalteengatik. Hiru gazte horietatik bat, emakume bakarra, eskuak lotuta atera zuten etxetik, modu erabat iraingarrian.

EH Bilduren Urgentziazko mozioa

Gauzak horrela, EH Bilduk Urgentziazko mozio bat aurkeztea erabaki zuen, atxiloketak salatzeko eta atxilotutako herritarrei elkartasuna adierazteko. Zehazki, hiru puntu aldarrikatzeko eskatzen zion EH Bilduk osoko bilkurari: “Polizia Nazionalak egindako atxiloketen izaera arbitrarioa eta lekuz kanpokoa aitortzea; Herri mugimenduaren kontrako polizia-ekintzak salatzea orohar eta, modu berean, elkartasuna helaraztea atxilotutako herri mugimenduko 3 kideei; Euskal Herrian eta baita gure udalerrian ere joko aretoek eragiten duten kaltea salatu eta gizartearen gaitz honen kontrako neurri errealak hartzeko konpromisoa hartzea Sopelako Udalak”.

Udal-taldeen ezetza

EAJ, PSE, eta Podemos mozioaren kontra agertu ziren eta Elkarrekin Podemoseko beste zinegotzia eta DB/TU abstenitu ziren. Izan ere, EAJ-ak indar polizialean zilegitasuna babestu zuen eta Arrigorri joko-aretoak bere jarduerarekin jarraitzeko eskubideaz aritu zen. Modu berean kokatu zen PSE, hori bai, Udalak irailean joko-aretoen eta ludopatiaren kontra kanpaina bat abiatuko duela aipatu zuen. Hain zuzen ere, horixe izan zen EH Bilduk 2021ko aurrekontuei egindako zuzenketa-partziala: 10.000 euro Ludopatiaren kontrako kanpaina komunikatiboa, behin Arrigorri joko aretoa bere jarduerarekin hasita zegoela ikustean.

Elkarrekin Podemoseko zinegotzia den Patricia Alfonso, berriz ere lerrokatu zen EAJ eta PSEren udal gobernuaren alde.

EH Bilduren erantzuna

Soilik EH Bilduk salatu zuen herri-mugimenduen kontra gertatzen ari den oldarraldi errepresiboa. Polizia Nazionalaren ekintza gaitzetsi zuen: ez proportzionala, lekuz kanpokoa, arbitrarioa. Modu berean, Sopelako herri-mugimenduari babesa agertu zion, atxilotuei elkartasuna adieraziz.

---

 

KIROLDEGIAREN ADJUDIKAZIOA: SOPELA 20 URTERAKO HIPOTEKATU DA ELKARREKIN PODEMOS PATRICIA ALFONSO ZINEGOTZIAREN ALDEKO BOTOARI ESKER.

| 2021-08-04 18:15:00

Milioi askoko esleipena, informaziorik eta adostasunik Gabe

Informazio-batzordeetatik igaro gabe eta oposizioari osoko bilkura bera baino bi egun lehenago "on line" dokumentazioa aurkeztu gabe, Sopelako Udaleko alkate Josu Landaluzek, ezohiko moduan, uztailaren 29ko osoko bilkurako gai-zerrendatik kanpo sartu zuen Sopelako kirol-zerbitzuen esleipenerako bozketa. EAJk, PSEk eta Patricia Alfonso Podemoseko zinegotziak aldeko botoa eman zuten. Oposizioak aurka bozkatu zuen: eh BILDUk, Ezker Anitza Eder Garcíak eta Jon Gerediagak.


 

Sopela 20 urterako hipotekatu da

Eh Bilduren arabera, proposamen horrek Sopelari hurrengo 20 urteetarako hipoteka emango dio, 15 urterako lizitazioa baita, gehi 5 luzatzeko aukera. Gogora dezagun lizitazio hori polemika handiz onartu zela maiatzeko osoko bilkuran. Lehenik eta behin, ez dago adostasunik hurrengo 5 legegintzaldietan eragina izango duen eta oposizioarekin inolako adostasunik lortu gabe kirol-instalazioetan egin beharreko inbertsioak finkatzen dituen proposamen bati dagokionez, inbertsio horiek enpresa pribatu esleipendunaren esku utzita eta erabiltzaileen kontura finantzatuta (egungo kuota erreferentziatzat hartuta, hurrengo urtetik aurrera eta hurrengo 6 urteetan % 73ko igoera metatua gertatuko da bazkideen tarifan eta 7. urtetik aurrera urteko % 2ko igoera aurreikusten da "). Bigarrenik, Patricia Alonso Elkarrekin Podemoseko zinegotziak maiatzeko osoko bilkuran izandako "konexio arazoak" direla eta, lizitazio hori onartzea erraztu zuen.

.

Sopelako Podemoseko zinegotziak babesa agertu die EAJ eta PSEri

Uztaileko osoko bilkura honetan, Podemoseko zinegotziak ez zuen sinatu maiatzean oposizioko indarrek proposatutako osoko bilkuraren inpugnazioa, eta, ondoren, EAJ eta PSE liberatzeko eskatu zuen (ekaineko batzordean berariazko babesa jaso zuen), ekaineko osoko bilkuran bertan erretiratuz sare sozialetan egindako kritikengatik (kereila jartzeko mehatxua egin zuen), oraingoan ez zuen "konexio arazorik" izan eta EAJren eta PSEren proposamenaren alde bozkatu zuen. Eh Bilduk, Ezker Anitzako Eder García zinegotziak eta Jon Gerediaga DBTUko zinegotziak ezetz esan zioten esleipenari, eta ekaineko osoko bilkura baliogabetzeko eskatu zuten, zinegotzien parte-hartze politikorako eskubidea urratzeagatik. Inpugnazio hori ezin izan zen osoko bilkuran bozkatu, udal idazkaria gobernu taldearen alde agertu baitzen, ekaineko osoko bilkura inpugnatzea "prebarikazioa" izango zela argudiatuta.

Indar korrelazioaren aldaketa Sopelan

Eh Bilduk iragarritako zerbait zen Patricia Alfonso Podemoseko zinegotziak hemendik aurrera EAJ eta PSEren gobernu taldeari emango dion babesa, eta halaxe berretsi zen uztaileko osoko bilkuran kiroldegiari egindako esleipenarekin. Gogora dezagun EH Bilduk ekaineko osoko bilkuran izan zuen jarrera; izan ere, alderdi subiranistak Podemoseko zinegotziaren dimisioa eskatu zuen, zinegotzi horrek gobernu-taldearekin egindako maniobra nahasiak zirela eta. Eh Bilduk EAJrekin eta PSErekin lortutako 2021eko aurrekontuen akordioa hautsi duela azpimarratu du, besteak beste, alderdi horiekiko konfiantza faltagatik.

 

• «
• 1
• 2
• 3
• 4
• 5
• 6
• 7
• 8
• ...
• 32
• 33
• »