ZAHARREN ETXEA: EAJ BERE ONETIK ATERA DA


| 2022-12-01 10:53:00

Aurreko osoko bilkuran EAJk jasandako kolpe gogorrak (eta, dirudienez, ustekabekoak) bere senetik atera du: azaroko osoko bilkura horretan oposizioko talde guztiek (zinegotzi transfuga barne) EZ bozkatu zieten EAJren aurrekontuei.

 

 

EH Bilduk ez ditu Sopelako adinekoak maite”. Benetan?

 

EAJ beldur da, haserretu egiten da eta bere onetatik atera da. Politikari bat eta alderdi bat beren harrotasunean zaurituta sentitzen badira ere, ezin da justifikatu gezurretan aritzea aurkari politikoak erasotzeko. Instagram kontuan beste mezu tamalgarri bat argitaratu du: “EH Bilduk ez ditu Sopelako adinekoak maite”, 80.000 €-ko partida bat baztertzen duelako “eraikina erabat birgaitzeko”. Benetan, gure udalaren ardura duen alderdiak modu manipulatzaile, ez oso serio eta elektoralista honetan jokatuko du? Badirudi baietz.

 

Eta, gainera, dioena errealitatetik urrun dago: abenduko osoko bilkuran bertan onar daiteke partida hori! Aurkez diezagula EAJk hirigintza-batzordean eraikina erabat birgaitzeko proiektua, 80.000 €-koa, eta proposa dezala 2022ko aurrekontuen aldaketa bat. Proposamenetan seriotasuna ikusten badugu, ez dugu inolako arazorik (guztiz kontrakoa!) pertsonen, eta kasu honetan gure adinekoen, bizitza hobetzeko neurriak babesteko.

 

EH Bilduk pentsatzen duena esaten duelako eta esaten duena egiten duelako. EAJri, aldiz, boterea galtzeko beldur delarik, kasketa eman dio.

 

 

Alkatearen gezurrak

 

EH Bilduk publikoki azaldu zituen EAJ politikoki ez babesteko arrazoiak. Aitzitik, EAJk, Josu Landaluze alkatearen bitartez, bere gezurrak azaldu zituen. Azaroaren 26an, Deia egunkarian artikulu bat agertu zen, jakinaren gainean eta maltzurkeriaz honela titulatuta: “Sopelako oposizioak erretiratuen etxea eraberritzeko aurrekontua zapuztu du” (2022/11/26). Artikulu horretan esandakoari ez dago nondik heldu.

 

Alkateak dio joan den irailean aurrekontuen proiektuaren kronograma eskaini ondoren, eta urriaren 20an Udalkutxaren azken txostena jaso ondoren, aurrekontua doitu zela, “biharamunean EH Bildurekin bilera bat izateko eta azaltzeko, baina ez dela interesik egon haren aldetik, ezta hitz egiten hasteko ere” azaldu duenez. Era berean, oposizioko gainerako taldeen ekarpenen bat espero zuela adierazi zuen, baina ez zen horrelakorik gertatu.

 

Alabaina, egia OSOA kontatu behar da: urriaren 21ean, Udalkutxaren txostenaren ondoren, EAJ/PSEren aurrekontu proiektua bidali ziguten. Hurrengo egunean ez genuen bilerarik egiteko hitzordurik jaso; aitzitik, azaroaren 2rako ekarpenak egiteko proposatu ziguten, azaroaren 4an horiei buruz eztabaidatzeko. Urriaren 21ean bertan erantzun genion EZINEZKOA zela dokumentazioa xehetasunez aztertzea, eta EAJri proposatu genion kronograma estu hori aldatzea eta azaroaren 4an aurrekontuaren azalpen zehatza egitea (normala den bezala). Gure aldetik, aurrekontuak aztertzen hasi ginen, nahiz eta hilabete amaieran egon eta urriko osoko bilkura hurbil zegoen eta arretaz prestatu behar genuen. Azaroaren 3an, EAJko bozeramaile eta Ogasun Batzordeko presidenteak telefonoz jakinarazi zigun azaroaren 4ko bilera ez zela deituko proposamenik aurkeztu ez zelako. Aurrekontu-proiektuaren azalpena egin beharko liguketela erantzun genion, eta guztia memorian azaltzen zela esan zigun. Azaroaren 16ko Ogasun Batzordera joan ginen, galdera sorta zabal batekin, eta kulturari eta gizarte-ekintzari dagozkion galdera gehienei ez zieten erantzun. Hala eta guztiz ere, EAJk bere horretan jarraitu zuen eta aurrekontua osoko bilkurara eraman ere... ¡gainerako korporazioari proiektua behar bezala azaldu gabe!.