AKTUALITATEA

| 2022-03-08 22:02:00

Abaroko Plan Partzialaren bozketa uztailera arte atzeratuko da (gutxienez). Izan ere, jabeek oraindik ez dute ingurumen-txostena izapidetu Eusko Jaurlaritzan, eta izapide horrek 3 hilabete inguruko iraupena du. Hori kontraesanean dago Josu Landaluze alkateak osoko bilkuretan, hezkuntza mahaiko bileretan eta udal taldeen arteko beste foro batzuetan etengabe eman dituen mezuekin, Abarori buruzko bozketa berehalakoa zela ziurtatuz. Jabeen teknikariei, udal-teknikariei eta arduradun politikoei egotz dakiekeen atzerapen garrantzitsu honen inguruan EH Bilduk bere kezka agertu nahi du.

Abaro sektorearen garapena ezinbesteko proiektua da Sopelarentzat: BOEak eta Iberreko institutua handitzea. Hala ere, proiektua etengabe ari da atzeratzen: EAJk hamarkada batez izoztuta (higiezinen boomean ez zuen interesik, antza), Abaroko plan partziala EH Bilduk aktibatu zuen 2011-2015 legegintzaldian. Hala ere, EAJk berriro blokeatu zuen 2015-2019 legegintzaldian. Plan partzialaren izapidetzean gaur egun dauden atzerapenek areagotu baino ez dute egiten eskola-komunitatearen eta, oro har, Sopelako herritarren ezinegona.

Bestalde, EH Bilduk aurkeztutako eta Sopelako Udaleko teknikariek onartutako alegazioak Plan Partzialaren azken idazketan sartu ahal izango dira. Idazketa-taldeak eta EAJ-PSE gobernu-taldeak zenbait konpromiso hartzea baino ez da behar. Genero-ikuspegiari buruzko proposamenak (oinezkoentzako pasabide zabalak eta seguruak), bidegorria eta merkataritza-lokaletarako 150 m2-ko gehieneko muga dagoeneko Plan Partzialean behar bezala sartuta daude. “Sopelana” izenaren ordez, “Sopela” jartzea ere onartu dute, noski. Oraindik ez dago jasota Abaro eta Larrabasterrako Iberrota kalea lotuko lukeen bidea (sektorerako sarrerak eta irteerak errazteko): hala ere, udal teknikariek eta jabeen ordezkariek egokitzat jo zuten bide hori planean sartzea. Are gehiago, bileran bide hori hobetzea proposatu zen, oinezkoentzako gune ere bihurtuz. Datozen asteetan, EH Bildu azken alegazio hori gobernu taldearekin eta udal teknikariekin lotzen saiatuko da.

EH Bildu baikor agertu da, azkenean Abaroko Plan Partzialean udal taldeak proposatutako hobekuntzak sartzen ari direlako. Hala balitz, EH Bilduk babes ofizialeko etxebizitzak eraikitzeko eta Institutua handitzeko beharrezkoa den proiektu hori aurrera egitea erraztuko luke, Sopelarentzat eta EH Bildurentzat estrategikoak diren bi gai, alegia.

 

Informazio gehigarria:

1. EH Bildu kezkatuta dago Abaroko plan partzialarekin.
2. EH Bilduk Abaroko plan partzialaren alde egingo luke Sopelako interes orokorraren alde.