EH Bilduk gardentasun eta azkartasun handiagoa eskatu dio Foru Gobernuari
| 2021-08-11 10:09:00
EH Bildu Nafarroa talde parlamentarioak gutun bat bidali dio Ekonomia eta Enpresa Garapeneko kontseilari Mikel Irujori, Parlamentuan erregistratutako informazio-eskaerei edota galderei Departamentuaren “erantzunik eza” dela eta, talde parlamentarioak etengabe egin behar izaten dituen errepikapenengatik “kezka eta haserrea” azaltzeko.
EH Bilduk ohar batean azaldu duenez, “Departamentu horri aurkeztutako galdera eta informazio-eskaeren azterketa egin ondoren, erantzun-epea 57,32 eguneko batez bestekoa izan da; izan ere, behin eta berriz errepikatu ondoren (hiru aldiz ere), 100 egunetik gorako epean erantzun dute eta, kasuren batean, 200 egunekoan ere bai”. Nafarroako Parlamentuaren araudiak ezarritako legezko epea 20 egunekoa delarik, “erabilitako epeak legeak ezarritakoak baino askoz luzeagoak dira”, kritikatu du EH Bilduk.
Halaber, EH Bilduren ustez, “informazio asko, berandu ez ezik, modu murriztuan ere bidaltzen da”. “Horixe da SODENAk sinatutako akordioei buruzko informazio-eskaeraren kasua; izan ere, Departamentuaren erantzun ezaren aurrean informazioa hiru aldiz eskatu ondoren, jaso dugun informazioa ez da ez gardena, ez egokia, ez erabilgarria talde parlamentario gisa gure funtzioak betetzeko, are gehiago enpresa publiko bati buruzko informazioa izanik”, gaitzetsi du.
Ildo horretan, alderdi politikoak gogorarazi du Nafarroako Parlamentuko zerbitzu juridikoek “beste batzuetan ere eman izan dutela euren iritzia parlamentariek informazioa eskuratzeko duten eskubideari buruz”, eta aipatu du “gure talde parlamentarioak arrazoi horrengatik beragatik eskatutako txostena”, 2014ko ekainaren 10ean egindakoa.
Horregatik, Irujo kontseilariari bidalitako gutunean, EH Bilduk “informazio osoa eta murrizketarik gabea” eskatu du. Era berean, talde parlamentarioaren etorkizuneko ekimenen erantzunak “ezarritako legezko epeetara egokitzeko” eskatu du.
Hizkuntza planak behingoz abiarazteko eskatu dio EH Bilduk Nafarroako Gobernuari
| 2021-08-09 11:54:00
EH Bildu Nafarroa talde parlamentarioak foru Gobernuko departamentuei zuzendutako galdera bana erregistratu du “hizkuntza planen garapenaren egoeraz” jakiteko.
EH Bilduk ohar batean gogora ekarri duenez, “aurreko legegintzaldian, Euskararen Plan Estrategikoa abian jartzearekin batera, Nafarroako Gobernuaren departamentuek hizkuntza planak egiteko prozedurari ekin zioten. Gobernu berria osatzearen ondorioz, Nafarroako Foru Komunitateko Administrazioaren departamentuen egitura berria ezarri zen Nafarroako Foru Komunitateko lehendakariak abuztuaren 6an emandako 22/2019 Foru Dekretuaren bidez”. “Hori dela eta, berriro ekin zitzaion hizkuntza planak egiteari eta dagoeneko departamentu guztietako planak ikusgai daude Gobernu Irekiaren atalean”, adierazi du.
Ildo horretan, EH Bilduk gogoratu duen moduan, “jada pasa den urte bukaeran galdetu egin genion Gobernuari departamentuek egindako hizkuntza planen garapenaren aurreikuspenaz, baina ez genuen erantzun zehatzik jaso”.
EH Bilduk salatu duenez, “legegintzaldiaren erdian gaude eta hizkuntza planak oraindik ezarri gabe eta, hortaz, abian jarri gabe daude”. “Nafarroako herritar guztien eskubidea da Administrazioan euskaraz artatuak izatea bai eta euren hizkuntza propioan kalitatezko arreta jasotzea ere, eta hain justu Nafarroako Gobernuaren betebeharra da eskubide horiek bermatzea”, adierazi du. “Gobernuak behin baino gehiagotan adierazi duen konpromisoa behingoz gauzatu behar du, hizkuntza planen ezarpena gehiago luzatu gabe, hau da, hitzetatik ekintzetara pasatuz”, defendatu du irmoki EH Bilduk.
Hori dela eta, EH Bilduk Gobernuko departamentu bakoitzari hizkuntza planaren garapenaz galdetzearekin batera, “ezarritako sei helburuen baitan zehaztu diren jarduketa ildoetako bakoitza betetzeko epeaz” ere galdegin dio. Horrekin batera, talde parlamentarioak jakin nahi du “departamentu bakoitzaren plantilla organikoan beharko liratekeen hizkuntza perfilen zehaztapena egin al den, zenbat lanpostutan ezarriko den perfil elebiduna eta zein izanen den guztira departamentu bakoitzeko lanpostu elebidunen portzentaia”.
Leitzan eta gainerako landa-eremuetan garraio publiko duina bermatzeko eskatu dio EH Bilduk Foru Gobernuari
| 2021-08-04 12:55:00
EH Bildu Nafarroa talde parlamentarioak mozio bat erregistratu du eta, horren bidez, Nafarroako Gobernuari eskatzen dio “behin betiko eta egiturazko konponbidea” eman diezaiola Leitza eta bere inguruko garraio publikoari “egungo legegintzaldia amaitu baino lehen zerbitzua emateko lizitazioa eginez”.
Leitzari eragiten dion hiriarteko garraio publikoaren zerbitzua hobetzeko uda honetatik aurrera ezarri den “behin-behineko konponbidearen aurrerapena” baloratu du EH Bilduk. EH Bilduren ustez, “herritarren zerbitzua eta eskubideak hobetzeko urrats bat da, zalantzarik gabe”.
Hala ere, defendatu duenez, “beharrezkoa da arazo horri irtenbide egonkor eta behin betikoa ematea, zerbitzuaren emakida behingoz lizitatuz”. “Urte asko dira aurreko emakida iraungi zenetik eta, azken sei urteetan, Nafarroako Gobernuak askotan adierazi dio Udalari pleguak argitaratzear daudela, esleipen-prozesua martxan dagoela, etab. Baina urteak igaro dira eta ez da zerbitzu berria esleitu”, kritikatu dute EH Bildutik.
Pasa den ekainaren 29an, Leitzako Udalaren ordezkaritza bat izan zen Nafarroako Parlamentuan, “Leitzako eta bere eskualdeko garraio publikoaren zerbitzuaren gabeziak eta bertako herritarrei bere egunerokoan eragiten ari zitzaizkien zailtasunak” azaltzeko. Ildo horretan, EH Bilduren esanetan, “zerbitzu txar batek zuzenean eragiten die landa-eremuaren despopulazioari, iraunkortasunari, genero-arrakalari edo adineko pertsonen autonomia-ezari”.
Hori dela eta, “despopulazioari aurre egiteko estrategiarekin bat etorriz”, EH Bilduren ustez, “mugikortasun eta irisgarritasunerako eskubidea bermatzeko, erabateko lanketa egiteko, eskaerak aztertzeko eta emakidak berritzeko unea da”.
Horrela, Leitzan garraio publikoaren emakida berri bat eskaintzeko eskatzeaz gain, EH Bilduk erregistratutako mozioan, Foru Gobernuari hurrengoa ere eskatzen dio: “tokiko erakundeekin batera, herritarren beharrak ezagutu eta erantzuteko Nafarroako landa-eremuetan eta eskualdeetan hiriarteko garraio publikoari dagokionez, eta zerbitzuaren emakidak ahalik eta lasterren berritzeko”.
Xabier Alkuazek dimisioa aurkeztu du Tafallan zinegotzi gisa
| 2021-08-02 12:57:00
Tafallako Udaleko EH Bilduko zinegotzi Xabier Alkuazek dimisioa aurkeztu zuen atzokoan bere udal taldean eta gaur goizean bertan erregistratu egin du Tafallako Udalean, joan den larunbateko gauean etxeratze agindua ez betetzeagatik isuna jaso ondoren.
Alkuazek berak erabaki du dimisioa aurkeztea, “erantzukizuna eta koherentziagatik”. Halaber, “bere akatsa” aitortu du eta “hautetsi gisa zuen erantzukizuna” onartu du.
EH Bilduk eskerrak eman dizkio Xabier Alkuazi Tafallako herrian egin duen lanagatik.
EH Bilduk Nafarroako Gobernua kritikatu du COVID-19aren bosgarren olatuaren kudeaketan "berandu eta gaizki" erantzuteagatik
Alderdi politikoa “bereziki kezkatuta” dago arakatze-sistema “eskasagatik” eta Lehen Mailako Arretako baliabide faltagatik
| 2021-07-30 10:51:00
EH Bilduk “bere kezka” berretsi egin du, pandemiaren egoeraren eta azken asteotan Nafarroako Gobernuak egindako “kudeaketa txarra” dela eta. “Behin eta berriz esan dugu beharrezkoa zela herritarrei mezu argiak ematea, udako hilabeteetan gerta zitekeena aurreikustea eta beharrezko baliabideak planifikatzea”.
EH Bilduk kritikatu duenez, “uda hasi zenetik, Nafarroako Gobernuak gehiegizko baikortasuna erakutsi zuen, deseskalada azkarregia planteatuz eta ekitaldi jendetsuetarako neurriak malgutuz, hala nola bigantxetarako edo herri-bazkarietarako. Inplizituki helarazi zuen pandemia igarota zegoela eta festa jakin batzuk "normaltasun" erlatiboko egoera batean ospatzea posible zela”. “Agerikoa da Gobernuak, txertaketaren martxa egokia ikusita, osasun-egoeraren bilakaera hobea espero zuela, eta udalen bizkar utzi zuela uda hasieran suerta zitezkeen arazoen kudeaketa. Baina udalek ez dute ez eskumenik ez tresna eraginkorrik egoera jakin batzuei aurre egiteko”, gaitzetsi du.
Hala, alderdi politikoaren ustetan, “behin egoera kontrolik gabe dagoela, Nafarroako Gobernuak berandu, gaizki eta egoerari aurre egiteko baliabide nahikorik gabe erantzun duela ikusi dugu. Gobernuak neurri batzuen arintzea zuzendu behar izan du, aldez aurretik Nafarroako Auzitegiaren oniritzia lortuta. Eta aurreikusiak ez zituen kutsatze eta ospitaleratze kopuruei aurre egin behar izan die”.
Ildo horretan, EH Bilduren ustez, “egoera honetan, bosgarren olatuaren kudeaketa desegokia izaten ari da. Arakatze-sistemak eta zeregin horretan diharduten langileek asteak daramatzate erabat gainezka. Eta herritarrek hori sumatu egiten dute, atzerapen handiak gertatzen ari baitira baieztatutako positiboekin harremanetan jartzeko orduan. Gainera, kasu askotan, kontaktu estuen datuak ere ez dira eskatzen sintomarik gabekoak badira, ezta txertorik hartu ez duten edo txertatze-pauta osoa ez daukaten pertsonen kasuan ere. Argi eta garbi adierazten da ez zaiela deituko”.
Azken batean, “jarduketa-protokoloak aldatzen ari dira, herritarrei jarraibide argirik eman gabe, eta erabateko ziurgabetasuna sortzen ari da positiboekin harreman estua izan duten kasuen kudeaketan eta jarduteko moduan: argibide argirik eman ezean, kutsatuta egon daitezkeen pertsona askoren irizpide eta borondatearen baitan uzten ari da beren borondatez isolatzea, osasun arlotik inolako jarraipenik egin gabe”. EH Bilduren ustez, “jokaera hau larria eta erabat ulergaitza da. Eta horrela, herritarrei ematen zaien mezua erabat zalantzazkoa eta kontraesankorra da”.
Horrekin batera, “egoera hau eragin zuzena izaten ari da ospitale-presioan eta Lehen Mailako Arretaren jardueran; gure osasun sistemak eta Lehen Arretak, bereziki, pandemiaren kudeaketari erabat baldintzatuta egoten jarraitzen du eta herritarrei kalitatezko arreta emateko modurik gabe. Horiek dira herritarrei mezu argiak ez helaraztearen, aurreikuspen eta plangintza faltaren ondorioak”, adierazi du EH Bilduk.
Horrexegatik, “orain Nafarroako Gobernuari dagokio gabezia horiek zuzentzen saiatzea, eta, horretarako, miaketa-sistema indartu behar du langile gehiagorekin eta protokolo bermatzaileagoekin, Lehen Mailako Arretari baliabide gehiago eman behar dizkio eta herritarrei jarraibide eta mezu argiak eman”. Era berean, “herritarroi ere badagokigu gogoan izatea norberaren erantzukizun indibidual eta kolektiboa eta, kudeaketa-erabakien gainetik, kontzientzia sozial eta solidarioz jokatzearen garrantziaz jabetzea”.