| 2020-08-06 22:18:00

• Jesus Mari Martiarena alkateak eta EAJ-PSE gobernu taldeak duten jarrera eta gobernantza moduaren azken adibidea izan genuen.

• Legegintzaldi haseratik darabilten gobernantza modua eta jarrera dira. Plenoetan egiten ditugun galderen eta erregistratzen ditugun proposamenen aurrean ez dugu inolako erantzunik jasotzen, ez alkatearengandik ez eta EAJ-PSE gobernu taldearengandik.

 

Uztaileko plenoan jarrera horren beste adibide bat bizitu genuen: Orain ardura taldeak plenoan tratatatzeko mozioa aurkeztu zuen. Mozioa azaltzeko eta defendatzeko, taldearen izenean ordezkari bati aretoan sartzeko baimena eskatu zioten alkateari, osasun neurri guztiak betez, jakina: musukoak, distantzia (108 pertsonarentzako eserlekuak dituen aretoan 11 zinegotzi geunden).

 

Hala eta guztiz, Jesus Mari Martiarena alkateak sarrera, eta ondorioz, beraien mozioa azaltzeko eta defendatzeko aukera ukatu zien.

 

Lehen aipatu dugun bezala, jarrera eta gobernantza modu hauek ez dira berriak. Gustoko ez dituzten galderak, beraien lana fiskalizatzeko informazio eskaerak edota beraien lan modutik desberdintzen diren proposamenak aurkezten diren bakoitzean izaten duten jarrera da: erantzunik eza, informazioa ez erraztea eta gai horiek plenoan ez lantzea.

 

Orain dela egun gutxi irakurri genuen, Badian Bizi taldeak behin baino gehiagotan (3 bider) erregistratutako informazio eskaera bat ukatu ziela EAJ-PSE gobernu taldeak. Azkenean, Arartekora jo behar izan dute egoera salatzera.

 

Oso larria da gustoko ez dituzten proposamenen eztabaida ukatzea. Oso larria da gobernu taldearen lana fiskalizatzeko beharrezkoa den informazio publikoa eman nahi ez izatea. Oso larria da azkura sortzen dieten gaiak isildu nahi izatea.

 

Elkarlanean sinisten dugu. Guztion arteko lankidetzan: herritarrak, herriko elkarteak eta eragileak, eta udal taldeak elkarrekin lanean aritzea. Ideia, asmo, ikuskera diferenteen arteko eztabaida benetan aberasgarria da proposamen aberatsak eta eraginkorrak lortzeko.

 

Inteligentzia koletiboaz baliatu behar dugu bizi dugun arlo askotariko krisi honi ahalik eta hobekien aurre egiteko.

 

Baina horretarako, ezinbestekoak dira beharrezko informazioa eskura jartzea, gardentasun osoa izatea, guztiok aukera eta maila berean aritzea, eztabaidatzea eta kritikak onartzea.

 

Azken batean, apaltasunez eta guztion arteko errespetuz aritzea.

Lezoko azken egunetako COVID-19 kasuen harira oharra

Lezon kutsatu den tabernariaren kasua dela eta, lasaitasun mezua zabaldu nahi dugu.

| 2020-07-16 19:59:00

 

EH Bildutik gaia arduraz eta soseguz ari gara jarraitzen, ahalik eta informazio gehien eskuratuz, segurtasun protokoloari buruz galdetuz eta beste herrietan jarraitutako urratsak eta hartu diren neurriak ezagutuz. Horretarako, Lezoko anbulategiarekin, Donostialdeko osasun koordinazio gunearekin eta Ordiziako alkatearekin harremanetan jarri gara.

Jaso dugun informazioaren arabera, tabernako hornitzaile batek Ordiziako agerraldian positibo eman eta berehala jarri ziren harremanetan tabernako jabeekin protokoloa aktibatuz.

Tabernako langileei PCR probak egin zizkieten eta batek positibo eman zuen. Jarraian, positibo eman zuen pertsonaren gertukoenei eta egunerokoan harreman zuzena duten pertsonei egin zizkieten probak.

Proba hauen guztien emaitzak negatiboak izan dira.

Tabernak momentuz itxirik jarraituko du, badaezpadako neurri moduan.

Orain arte egindako proben emaitza ikusirik, Donostialdeko osasun koordinazio gunetik, Lezon agerraldirik ez dagoela eta kasu bakanak direla adierazi digute. Hortaz, ez dute beharrezkotzat jo jende gehiagok probak egitea.

Jaso dugun informazio guztia alkatearekin partekatu dugu eta Udalak herritarrak informatu beharko lituzkeela adierazi diogu. Herritarrek informazio zuzena, argia eta osoa jasotzeko duten eskubideaz gain, gardentasun osoz aritzea funtsezkoa baita jendartean lasaitasun mezua zabaltzeko.

Gure aldetik, Udalak hori egin bitartean, erantzukizunez jokatzea eta eskura dugun informazio guztia lehenbailehen herritarrei zabaltzea erabaki dugu.

Arduraz eta zuhurtziaz aritu behar dugu, uneoro osasun segurtasun neurriak zorrotz betez: musukoak uneoro erabili eta eskuak maiz garbitu.

TOKIKO JARDUERA EKONOMIKOARI LAGUNTZEKO 265.000 EUROKO DIRU-LAGUNTZAK: MIKROENPRESAK ETA NORBERAREN KONTURAKO LANGILEAK

| 2020-05-21 17:09:00

• 265.000€ diru-laguntza zuzenetan herriko ekonomi-sarea osatzen duten sektoreentzat, larrialdi egoera honek eragin dien ondorioei erantzun ahal izateko.

• Jarduera geldiarazi behar izan duen bakoitzari 1.000€ko diru kopuru finkoa bideratzea proposatzen dugu. Jarduera murriztu behar izan duen bakoitzari, 500€ko kopuru finkoa.

 

Lezoko EH Bildun argi dugu herritarren zaintza, osasuna eta bizi baldintzak erdigunean jartzeko, eta herriko ekonomi-sarea zaintzeko, udaletik ere, esku-hartu beharra dagoela.

Hemen adierazten ditugun proposamenak, herriko ekonomi-sarea osatzen duten sektore ekonomikoei begira egindakoak ditugu.

Proposamen hau argitaratu eta udaletxean erregistratu aurretik, herriko hainbat sektore ekonomikoekin elkarbanatu dugu beraien iritzia jaso eta kontrastea egiteko. Beraien egoera eta iritzia kontuan izatea ezinbestekoa dela pentsatzen dugu.

 

Diru-laguntzak: zenbat eta zertarako

 

A) Jarduera geldiarazi behar izan dutenak:

•  1.000 euroko kopuru finkoa.

 Horretaz gain:

• Jarduera egiten den establezimenduaren alokairu-gastuengatik, 300 euro arte.

 

• Jarduerari lotutako maileguen amortizazio-gastuengatik eta interesengatik, 250 euro arte.

 

• 2020ko udaberri-uda denboraldiko arropa, oinetakoak eta osagarriak erosteko edo hornitzeko gastuengatik, 200 euro gehienez.

 

• Ostalaritza eta jatetxe jardueretarako, 200 euroko zenbateko finkoa.

 

B) Beren jarduera murriztu dutenak ( fakturazioa %40a edo gehiago murriztu bada) :

•  500 euroko zenbateko finkoa.

 

Diru-laguntza horien helburua da Lezoko mikroenpresen eta norberaren konturako langileen artean, nekazaritza-sektorekoak barne, COVID-19 birusaren pandemiari aurre egiteko deklaratutako osasun-alarmak eragindako ondorio ekonomikoak arintzea.

 

Eskaeren kopurua eta zenbatekoa bideratutako kopurua baino handiagoa bada, Lezoko Udalak zenbateko hori handitu beharko luke, beti ere, bere posibilitateen arabera.

 

Nolanahi ere, bizi dugun egoera aldakor eta ziurgabe honetan, denborak, behar eta lehentasun berriak ekarriko dituela pentsa dezakegu eta horiei erantzuteko erabaki eta neurri berriak hartu beharko direla.

HERRITARREN BEHARREI ERANTZUTEKO HAMAIKA PROPOSAMEN EZBERDIN LUZATU DITUGU

| 2020-05-11 15:49:00

Egoera honi modurik egokienean erantzuteko, guztiok batera, lankidetzan aritu behar dugula esan dugu hasera-haseratik.

Bizi dugun larrialdi egoeran ezinbestekoa dugu, herritarren osasuna, zaintza eta bizi baldintzak erdigunean jartzea.

COVID-19 birusaren eraginez bizi dugun larrialdi egoera honi modurik egokienean erantzuteko, guztiok batera, lankidetzan aritu behar dugula esan dugu hasera-haseratik.

Larrialdi egoera honek ez digu herritar guztioi berdin eragiten, lehendik ere egoera zaurgarrian zeuden herritarrak modu bortitzagoan ari dira sufritzen egoera hau guztia. Horregatik, ezinbestekoa dugu, herritarren osasuna, zaintza eta bizi baldintzak erdigunean jartzea.

Oinarri hauek kontuan izanik, herritarren beharrei erantzuteko hamaika proposamen ezberdin luzatu dizkiogu gobernu taldeari.

Gobernu taldearen partetik ordea, eginiko proposamenen inguruan ia ez dugu erantzunik jaso, tamalez.

Lezoko EH Bildun argi dugu, aurrerantzean ere, bide honetatik jarraitu behar dugula: herritarren zaintza, osasuna eta bizi baldintzak erdigunean jarriz. Horrek du, eta izan behar du, lehentasun osoa.

| 2020-04-29 22:20:00

• Udalak FFP2 motako musukoak, maskarak bana ditzala osasun-arrisku taldean dauden eta egoera ekonomiko zaurgarrian dauden herritar guztien artean.

 

Azken egun hauetan konfinamenduaren arintzeari buruz hitz egiten ari direla entzuten dugu. Lehengo igandean, haurrek eta gaztetxoek ordubetez kalera irteteko aukera izan zuten, azkenean.

 

Konfinamenduaren arintzea nola izango den osoki ez dakigun arren, musukoak, maskarak erabiltzea onuragarria eta gomendagarria dela diote adituek. Baliteke, epe motzean, eremu batzuetan musukoak erabiltzea beharrezkoa izatea, gainera.

 

Datorren egoera berriaren aurrean, Lezoko EH Bilduk proposamen hau egin dio gobernu taldeari:

 

• FFP2 motako musukoak bana ditzala berehalakoan, ondoko herritar hauen artean:

 

1. Osasun-arrisku taldean dauden herritar guztiei:

 

• • 65 urtetik gorako herritar guztiei.

  • Osasun arazoren batengatik arrisku taldean dauden herritarrei.

 

2. Egoera ekonomiko zaurgarrian dauden herritar guztiei.

 

FFP2 motako musukoek ingurukoak babesteaz gain, norbera babesteko ere balio dute. Musuko hauek behin baino gehiagotan berrerabili daitezke.

 

Herritar guztion egoera eta bizi baldintzak ez dira berdinak. Lehentasuna osasun egoera zaurgarrian eta egoera ekonomiko zaurgarrian dauden herritarrengan jarri behar dela uste dugu. Horrek ez du esan nahi, gainerako herritarren artean banatzeko aukera baztertu behar denik. Egoeraren arabera, aztertu beharreko pausoa izan daiteke.

 

Larrialdi egoera honen hasieran musukoak lortzea ia ezinezkoa zen. Guztiok ikusi, irakurri eta jakin dugu ospitaletako, adineko egoitzetako, nahiz, langile soziosanitarioek izan dituzten gabezien berri.

 

Dirudienez, gaur egun, musukoen, maskaren stockak gora egin du hasierako gabezia arazoak konponduz. Hau guztia kontuan izanik egiten dugu gure proposamena.

 

Banatzaile batekin harremanetan jarri gara eta gobernu taldeak gure proposamena ontzat hartuko balu, musukoak denbora gutxian izan genitzake eskura.

 

• «
• 1
• 2
• 3
• 4
• »