Lezo

148.655€ GEHIAGOTAN HANDITUKO DU UDAL LANGILEEN SOLDATEN ZENBATEKOA EAJ-PSE GOBERNUAK

| 2021-09-29 21:47:00
  • EAJ-PSE udal gobernuak 148.655€tan igo nahi du udal soldaten zenbatekoa langile guztiei soldata maila igoz eta Musika Eskolako arduradunari %10eko dedikazio gehigarria emanez.

 

Soldata mailen igoeraren kasuan erabakia kontsolidatua geratzen da, gainera. Hau da, soldata maila igoerak ezingo dira berriro murriztu. Ondorengo legegiltzaldietan, beraz, ezingo dira soldata maila igoerak atzera bota eta Lezoko Udalaren aurrekontuaren zati handi bat hipotekatuko luke.

 

Ondorioz, 2022tik aurrera, soldaten gastua 143.500€ gehiagotan handituko zaigu (udal aurrekontu osoaren %1,54a). Zenbateko horri antzinatasunak, etorkizuneko soldata igoerak edota dedikazio gehigarriak gehitu beharko genizkiolarik.

 

Kontzeptua

Zenbatekoa urteko

Langile guztiei soldata maila igo

143.500 €

M.E. Arduradunari %10eko dedikazio gehigarria

5.155 €

Guztira

148.655 €

 

Hau guztia, inolako azterketa eta txosten teknikorik egin gabe onartu nahi dute EAJ eta PSEko zinegotziek irailaren 30ean,19:00etan, burutuko den Osoko Bilkuran. Legeak eskatzen duen beharrezko justifikazio edo memoriarik ere aurkeztu gabe, udal Idazkariak ohartu zien moduan.

 

Horren aurrean, EH Bildutik, udal-langileen lan-baldintza duinen aldeko jarrera argia dugun arren, uste dugu tamaina horretako erabakiak ongi aztertuta eta ongi justifikatuta hartu behar direla. Lezoko herritarron diru-baliabideak herritar guztion ongizatea hobetzera bideratu behar baitira eta udalak horretarako dituen baliabide mugatuak zuhurtziaz, zorroztasunez eta modu arduratsuan kudeatu behar ditu.

 

Horregatik, EH Bildutik, beharrezko azterketak egin eta udal langileren baten edo batzuen soldatak egokitzeko benetako justifikaziorik egon ezean, proposamena bertan behera uzteko eskatzen diogu EAJ-PSE gobernuari, eta 148.655€ horiek herriko eta herritarren beharrei erantzuteko bideratu daitezela.

Lezo eta Donibane lotzen dituen bidegorriaren azken atala lehenbailehen egin dadin eskatzen diogu Aldundiari

Herritarrok ezin dugu gehiago itxaron, eta bidegorriaren azken atalari dagokion obra gehiegi atzeratzen ari da, honek oinezkooi eta txirrindularioi suposatzen digun arriskuarekin.

| 2021-09-23 13:12:00
 

Pasaiako eta Lezoko EH Bilduk kezka adierazi nahi dugu Diputazioak Lezo eta Pasai Donibane lotzen dituen bidegorriaren azken atalaren obra oraindik lizitatu ez duelako. Hori dela eta, “Europako Mugikortasun Astea” den honetan EH Bilduk Batzar Nagusitan dituen ordezkarien bitartez Romero lurralde antolaketa eta mugikortasun diputatuari (PSE-EE) obra lehenbailehen hasteko eskaera egin diogula jakinarazi nahi dugu. Herritarrok ezin dugu gehiago itxaron, eta bidegorriaren azken atalari dagokion obra gehiegi atzeratzen ari da, honek oinezkooi eta txirrindularioi suposatzen digun arriskuarekin.

Urteak igaro dira Gipuzoako Foru Aldundiak Lezo eta Donibane lotuko zituen bidegorriaren obrak egin zituela. Jakina denez, obra horien lehen bi atalak eginak daude, baina azken atala (Donibanetik gertuen dagoena) oraindik hasi gabe dago. Proiektuaren egikaritzea etengabe atzeratzen joan da eta 2021eko aurrekontuan obra hori egiteko finantziazio nahikoa jasotzen den arren, urtea amaitzen ari da eta ez dugu obra hori egingo den zantzurik ikusten. Are gehiago, Lezoko EH Bilduk gai honen inguruan udalbatzarrean galdetuta, ez genuen inolako informaziorik jaso Alkatearen partetik.

Hori horrela izanik, Pasaiako eta Lezoko EH Bildu osatzen dugun kideok Romero diputatuari lehenbailehen lanean jar dadila eskatu nahi diogu, herritarroi agindu zigun bezala, 2021. urtea amaitu baino lehen obra hau martxan egon dadin. Donibandarrok eta lezoarrok ezin dugu gehiago itxaron eta uste dugu ez dela zilegia bertako udalok eta Foru Aldundiak berak “Europako Mugikortasun Astea” den honetan gaiarekiko konprometituak daudela esatea gero gure herriak lotzen dituzten bideak eta bidegorriak urte luzez amaitu gabe eta abandonaturik dituztenean.

Herritar talde bati hitza ukatu zioten Jesus Mari Martiarena alkateak eta EAJ-PSE gobernu taldeak uztaileko plenoan.

| 2020-08-06 22:18:00
  • Jesus Mari Martiarena alkateak eta EAJ-PSE gobernu taldeak duten jarrera eta gobernantza moduaren azken adibidea izan genuen.

  • Legegintzaldi haseratik darabilten gobernantza modua eta jarrera dira. Plenoetan egiten ditugun galderen eta erregistratzen ditugun proposamenen aurrean ez dugu inolako erantzunik jasotzen, ez alkatearengandik ez eta EAJ-PSE gobernu taldearengandik.

 

Uztaileko plenoan jarrera horren beste adibide bat bizitu genuen: Orain ardura taldeak plenoan tratatatzeko mozioa aurkeztu zuen. Mozioa azaltzeko eta defendatzeko, taldearen izenean ordezkari bati aretoan sartzeko baimena eskatu zioten alkateari, osasun neurri guztiak betez, jakina: musukoak, distantzia (108 pertsonarentzako eserlekuak dituen aretoan 11 zinegotzi geunden).

 

Hala eta guztiz, Jesus Mari Martiarena alkateak sarrera, eta ondorioz, beraien mozioa azaltzeko eta defendatzeko aukera ukatu zien.

 

Lehen aipatu dugun bezala, jarrera eta gobernantza modu hauek ez dira berriak. Gustoko ez dituzten galderak, beraien lana fiskalizatzeko informazio eskaerak edota beraien lan modutik desberdintzen diren proposamenak aurkezten diren bakoitzean izaten duten jarrera da: erantzunik eza, informazioa ez erraztea eta gai horiek plenoan ez lantzea.

 

Orain dela egun gutxi irakurri genuen, Badian Bizi taldeak behin baino gehiagotan (3 bider) erregistratutako informazio eskaera bat ukatu ziela EAJ-PSE gobernu taldeak. Azkenean, Arartekora jo behar izan dute egoera salatzera.

 

Oso larria da gustoko ez dituzten proposamenen eztabaida ukatzea. Oso larria da gobernu taldearen lana fiskalizatzeko beharrezkoa den informazio publikoa eman nahi ez izatea. Oso larria da azkura sortzen dieten gaiak isildu nahi izatea.

 

Elkarlanean sinisten dugu. Guztion arteko lankidetzan: herritarrak, herriko elkarteak eta eragileak, eta udal taldeak elkarrekin lanean aritzea. Ideia, asmo, ikuskera diferenteen arteko eztabaida benetan aberasgarria da proposamen aberatsak eta eraginkorrak lortzeko.

 

Inteligentzia koletiboaz baliatu behar dugu bizi dugun arlo askotariko krisi honi ahalik eta hobekien aurre egiteko.

 

Baina horretarako, ezinbestekoak dira beharrezko informazioa eskura jartzea, gardentasun osoa izatea, guztiok aukera eta maila berean aritzea, eztabaidatzea eta kritikak onartzea.

 

Azken batean, apaltasunez eta guztion arteko errespetuz aritzea.

Lezoko azken egunetako COVID-19 kasuen harira oharra

Lezon kutsatu den tabernariaren kasua dela eta, lasaitasun mezua zabaldu nahi dugu.

| 2020-07-16 19:59:00

 

EH Bildutik gaia arduraz eta soseguz ari gara jarraitzen, ahalik eta informazio gehien eskuratuz, segurtasun protokoloari buruz galdetuz eta beste herrietan jarraitutako urratsak eta hartu diren neurriak ezagutuz. Horretarako, Lezoko anbulategiarekin, Donostialdeko osasun koordinazio gunearekin eta Ordiziako alkatearekin harremanetan jarri gara.

Jaso dugun informazioaren arabera, tabernako hornitzaile batek Ordiziako agerraldian positibo eman eta berehala jarri ziren harremanetan tabernako jabeekin protokoloa aktibatuz.

Tabernako langileei PCR probak egin zizkieten eta batek positibo eman zuen. Jarraian, positibo eman zuen pertsonaren gertukoenei eta egunerokoan harreman zuzena duten pertsonei egin zizkieten probak.

Proba hauen guztien emaitzak negatiboak izan dira.

Tabernak momentuz itxirik jarraituko du, badaezpadako neurri moduan.

Orain arte egindako proben emaitza ikusirik, Donostialdeko osasun koordinazio gunetik, Lezon agerraldirik ez dagoela eta kasu bakanak direla adierazi digute. Hortaz, ez dute beharrezkotzat jo jende gehiagok probak egitea.

Jaso dugun informazio guztia alkatearekin partekatu dugu eta Udalak herritarrak informatu beharko lituzkeela adierazi diogu. Herritarrek informazio zuzena, argia eta osoa jasotzeko duten eskubideaz gain, gardentasun osoz aritzea funtsezkoa baita jendartean lasaitasun mezua zabaltzeko.

Gure aldetik, Udalak hori egin bitartean, erantzukizunez jokatzea eta eskura dugun informazio guztia lehenbailehen herritarrei zabaltzea erabaki dugu.

Arduraz eta zuhurtziaz aritu behar dugu, uneoro osasun segurtasun neurriak zorrotz betez: musukoak uneoro erabili eta eskuak maiz garbitu.

TOKIKO JARDUERA EKONOMIKOARI LAGUNTZEKO 265.000 EUROKO DIRU-LAGUNTZAK: MIKROENPRESAK ETA NORBERAREN KONTURAKO LANGILEAK

| 2020-05-21 17:09:00
  • 265.000€ diru-laguntza zuzenetan herriko ekonomi-sarea osatzen duten sektoreentzat, larrialdi egoera honek eragin dien ondorioei erantzun ahal izateko.

  • Jarduera geldiarazi behar izan duen bakoitzari 1.000€ko diru kopuru finkoa bideratzea proposatzen dugu. Jarduera murriztu behar izan duen bakoitzari, 500€ko kopuru finkoa.

 

Lezoko EH Bildun argi dugu herritarren zaintza, osasuna eta bizi baldintzak erdigunean jartzeko, eta herriko ekonomi-sarea zaintzeko, udaletik ere, esku-hartu beharra dagoela.


Hemen adierazten ditugun proposamenak, herriko ekonomi-sarea osatzen duten sektore ekonomikoei begira egindakoak ditugu.


Proposamen hau argitaratu eta udaletxean erregistratu aurretik, herriko hainbat sektore ekonomikoekin elkarbanatu dugu beraien iritzia jaso eta kontrastea egiteko. Beraien egoera eta iritzia kontuan izatea ezinbestekoa dela pentsatzen dugu.

 

Diru-laguntzak: zenbat eta zertarako

 

A) Jarduera geldiarazi behar izan dutenak:

  •  1.000 euroko kopuru finkoa.

 Horretaz gain:

  • Jarduera egiten den establezimenduaren alokairu-gastuengatik, 300 euro arte.

 

  • Jarduerari lotutako maileguen amortizazio-gastuengatik eta interesengatik, 250 euro arte.

 

  • 2020ko udaberri-uda denboraldiko arropa, oinetakoak eta osagarriak erosteko edo hornitzeko gastuengatik, 200 euro gehienez.

 

  • Ostalaritza eta jatetxe jardueretarako, 200 euroko zenbateko finkoa.

 

B) Beren jarduera murriztu dutenak ( fakturazioa %40a edo gehiago murriztu bada) :

  •  500 euroko zenbateko finkoa.

 

Diru-laguntza horien helburua da Lezoko mikroenpresen eta norberaren konturako langileen artean, nekazaritza-sektorekoak barne, COVID-19 birusaren pandemiari aurre egiteko deklaratutako osasun-alarmak eragindako ondorio ekonomikoak arintzea.

 

Eskaeren kopurua eta zenbatekoa bideratutako kopurua baino handiagoa bada, Lezoko Udalak zenbateko hori handitu beharko luke, beti ere, bere posibilitateen arabera.

 

Nolanahi ere, bizi dugun egoera aldakor eta ziurgabe honetan, denborak, behar eta lehentasun berriak ekarriko dituela pentsa dezakegu eta horiei erantzuteko erabaki eta neurri berriak hartu beharko direla.