Legebiltzarra

EH Bilduk Ustelkeriaren Aurkako Bulegoa sortzeko proposamena tramitera onartzeko eskatu die EAJ eta PSEri

Gobernuko alderdiek aukera ona izango dute etzi ustelkeria amaitzeko borondatea duten ala praktika irregularren konplizeak diren erakusteko. Zaila da ulertzen Jaurlaritza EH Bilduren lege proposamena tramitatzearen kontra agertu izana, pasa den legealdian aldeko irizpena eman baitzuen.

| 2021-06-15 13:57:00

EH Bilduk proposatuta, Legebiltzarrak jardunbide egokien aldeko eta ustelkeriaren aurkako bulegoa sortzeko lege proposamena tramitera onartzen den ala ez erabakiko du etzi. Koalizioak organo hori sortzea proposatu zuen pasa den legealdian, legez kontrako jarduera ustelak eta praktika desegokiak ikertu, jazarri eta zigortzeko egun existitzen diren mekanismoak nahikoak ez direlakoan, baina, Parlamentuak proposamena aintzat hartu bazuen ere, azkenean legea ezin izan zen onartu legealdia lehenago amaitu zelako. Hori dela eta, koalizioak berriz aurkeztu behar izan du lege ekimena.

Josu Estarronak adierazi duenez, “EAJk eta PSEk beste aukera bat izango dute jardunbide desegokiei, korrupzioari, jokamolde ez etikoei edo sare klientelarrei ezetz esateko, gure proposamenari baiezkoa emanez; euren gehiengo osoa erabil dezakete praktika irregularrak amaitzeko pausu bat emateko edo rodilloa aplikatu dezakete korrupzioa amaitzeko interes eta borondate falta beste behin erakutsiz”.

EH Bilduko legebiltzarkideak Ustelkeriaren Aurkako Bulego baten beharra aldarrikatu du, “astetik astera ikusten ari garelako Araba, Gipuzkoa eta Bizkaiko fiskalizazio erakundeak, auditoria organoak edota batzorde etikoak inhabilitaturik daudela”. Azaldu duenez, independentziak izan behar du edozein kontrol organoren ezaugarri nagusia, baina hemen existitzen direnak, hala nola Herri Kontuen Auzitegia, Kontrol Ekonomikoko Bulegoa eta Lehiaren Agintaritza, ez dira independenteak, ahalmen oso mugatua dute eta, praktikan, EAJk baldintzatu eta kontrolatzen du euren jarduna. Argitara atera den azken kasuak, kontsultoria-enpresen kartelak, argi baino argiago utzi du kontrol mekanismo guztiek huts egin dutela eta Ustelkeriaren Aurkako Bulegoa behar-beharrezkoa dela. Izan ere, “batzuek normaltzat jotzen dute alderdi politiko zehatz batetik gertu egoteagatik abantaila izatea diru-laguntza, kontratu, lizitazio edo lanpostu publikoak lortzerako orduan, baina hori, ohikoa izanda ere, ez da normala eta ezin da normalizatu”.

Pasa den legealdian Jaurlaritza EH Bilduren proposamena tramitera onartzearen alde agertu zela gogora ekarri ostean, Estarronak harrigarritzat hartu du Gobernuaren iritzi aldaketa, oraingoan Ustelkeriaren Aurkako Bulegoa sortzeari ezezkoa eman baitio. “Zer aldatu da iragan legealditik hona? Gehiengo osoa? Une hartan De Miguel auzia eta Karrantzako purinen kasua pil-pilean zeudela? Hau ezin daiteke izan testuinguruaren edo interes alderdikoien araberakoa; edo ustelkeria, trama, entxufismo, kartel, klientelismo, korruptelak eta faborezko tratuen aurka zaude edo konnibentea zara”.

EH Bilduren bultzadari esker, Legebiltzarrak auto elektrikoen salmenta sustatzeko eskatu dio Lakuari

Iker Casanovak energia berriztagarrietan oinarritutako mugikortasun eredu berri bat ezarri beharra azpimarratu du. Ibilgailu elektrikoak erosteko eta karga puntuak instalatzeko laguntzak handitzea jaso da EAJ eta PSErekin lotutako akordioan.

| 2021-06-10 14:36:00

EH Bilduk mugikortasun eredu berri bat ezartzeko akordio bat sustatu du gaur Legebiltzarrean “alternatiba publiko, arin eta partekatuan oinarritutako garraio eredu bat bultzatuko duten politikak” garatze aldera, betiere energia berriztagarrietan oinarritutako mugikortasun elektrikoaren aldeko apustu eginez.

Iker Casanovak ekarri du debatea Parlamentura eta erdibideko zuzenketa bat sinatu du EAJ eta PSErekin Jaurlaritzari eskatzeko Mugikortasun Iraunkorraren Legean eta PIME plan berrian xedetzat har dezala turismo eta furgoneta elektrikoen salmentak igotzea, 2030. urterako Europar Batasunak arlo horretan markatutako helburuak betetzeko.

Koalizioak sustatutako akordioaren arabera, Legebiltzarrak Jaurlaritzari eskatu dio auto elektrikoen salmenta bultzatzeko eta karga publikoko sarea hedatzeko ibilbide-orri bat landu dezala eta, horretarako, ibilgailu mota horiek erosteko eta karga-puntuak instalatzeko laguntzak handitu ditzala. Halaber, udalerri mailako car-sharing enpresen estrategia partekatua abian jartzeko, beste ibilgailu elektriko batzuen erabilera (bizikletak, motozikletak, patinak…) bultzatzeko eta hiri eta azpiegituretan dagoen eredu automobil-zentrikoa gainditzeko”.

EAJk eta PSEk ariketa kolektibo bat egitea baztertu dute berriz herri honen erronka estrategikoei heltzeko

Maddalen Iriartek ezinbestekotzat jo du “eraldaketa handien garai honetan alderdikeriak alde batera uztea eta eztabaida estrategikoetan modu komunitarioan aritzea, guztion etorkizuna dagoelako jokoan”.

| 2021-06-10 13:21:00

Mundu mailako eraldaketa sakonen garai honetan herri gisa aurrez aurre ditugun erronka estrategikoei modu kolektiboan, elkarlanean eta alderdikeriak bazter utzita heldu beharra aldarrikatu du EH Bilduk gaur berriz ere, guztion etorkizuna dagoelako jokoan, eta berriz ere EAJk eta PSEk gehiengo osoaren bandera atera eta ariketa kolektibo-estrategiko bat egitea baztertu dute, koalizio independentistaren deiari muzin eginez.

Maddalen Iriartek adierazi duenez, pandemiak eragindako krisiak unean uneko gabeziak eta ezinak utzi ditu agerian, eta datozen urte eta hamarkadetan egin beharreko trantsizio eta eraldaketen atarian kokatu gaitu, hala nola zaintza arloan, hezkuntzan, osasunean, enpleguan eta trantsizio energetikoari dagokionean. Bada, ardura politikoak erronka estrategiko horiei aurre egiteko ariketa kolektibo bat egitea eskatzen du, unean uneko gobernu eta gehiengo politikoetatik harago. “Erronka horiek legealdi hau gainditzen dute eta itxaron ezin duten trantsizio handi horiei eraginkortasunez eta bermez erantzuteko herri honetako inteligentzia kolektiboa, gaitasun kolektiboa eta denon parte-hartzea beharrezkoak dira, datozen belaunaldiengan aparteko eragina izango baitute eta hori guztia kontutan hartu behar dugulako orain hartzen diren erabakietan ere”.

Horren ildotik, EH Bilduko bozeramaileak premiazkotzat jo du autogobernurako tresnak gaurkotzetik harago joatea eta estatus politiko berri bat adostea, pandemiak zerbait argi utzi baldin badu Madrilekiko menpekotasuna delako, herri gisa ditugun gaitasunak garatzeko ezintasuna. “Edozer gauzatarako Gobernu espainolari baimen eske ibili beharra, nekagarria izateaz gain, galga ikaragarri bat da. Geure erabakiak hartzeko gaitasuna dugu eta erabaki horiek injerentziarik gabe hartzeko eskubidea eta hartutako erabakiak  egikaritzeko bermea behar dugu. Ezin gara gobernu baten edo bestearen borondatearen menpe egon”.

Gazteen artean orokorturik dagoen prekarietateari errotik helduko dion Gazteriaren Lege bat aldarrikatu du EH Bilduk

Eraitz Saez de Egilazek Jaurlaritzaren lege proiektua atzera botatzea eskatu du oso motz geratzen delako eta ez dituelako neurriak, tresnak eta konpromisoak zehazten gazteen emantzipazio eskubidea bermatzeko.

| 2021-06-10 13:17:00

EH Bilduk Jaurlaritzaren Gazteriaren Lege Proiektua atzera botatzea eskatu du gaur Legebiltzarrean ez duelako balio izango Araba, Gipuzkoa eta Bizkaiko gazteek pairatzen duten prekarietate orokorra bukatzeko eta euren bizi baldintzak hobetzeko. Eraitz Saez de Egilazek gazteen egoera zaurgarri eta prekarioa urteetako politika publikoen ondorio zuzena dela ohartarazi du –“gazteen bizitza prekarioa izatea normalizatu da, prekarietatea bizitzaren beste etapa bat bailitzan”– eta errealitate horrek eskatzen duen tamainako erantzunik ez ematea egotzi dio EAJ-PSE Gobernuari. Salatu duenez, gazteen artean guztiz hedaturik eta orokorturik dagoen prekarietateari errotik heldu beharrean, gazteak benetan erdigunean ipini beharrean, Urkulluren Gobernuak “oso motz geratzen den lege bat ekarri du” eta “gazterik gabeko Gazteriaren Legea onartzeko prest dago”.

Gazteriaren Legeari buruz eztabaidatzeak duen garrantzia bistakoa den arren, EAJk eta PSEk uko egin diote EH Bilduk planteatutako eztabaida horretan sartzeari eta boto azalpenera jo dute zuzenean, debatea ekiditeko. Modu horretan euren argudioen ahulezia agerian uzteaz gain, axolagabekeria ere erakutsi dute gazteen prekarietatearekiko. Euren arazo eta beharrei buruz eztabaidatzeko gai ez denak nekez eskainiko die bizitza duin bat. Non eta Legebiltzarrean eztabaida bera ere ukatzen duenak argi baino argiago erakusten du gehiengo absolutua gehiengo absolutista dela sinesten duela eta ez dituela akordioak nahi, bere tesiak inposatzea baizik.

EAJk eta PSEk EH Bildurekin eztabaidatzeari uko egiteak ez ditu gazteen arazo larriak konponduko. Are gehiago, eztabaida ukatzea konponbidea ere ukatzea den heinean, EAJ eta PSEren jarrera arazo horiek handitzea baino ez du ekarriko. Izan ere, Saez de Egilazek ohartarazi bezala, gazteen arazoak benetan larriak dira: etxebizitza eskubidea ez da bermatzen, emantzipazio adina 30 urtekoa da, enplegu arloan langabezia eta prekarietatea egiturazkoak dira, gazteak lan esku merkeak dira enpresarientzat Jaurlaritzaren onespenarekin eta, finean, gazteek ezinezko dute bizitza proiektuak aurrera eramatea eta etorkizuna irudikatzea. Hori dela eta, “norabidea aldatzeko eta planto egiteko ordua” den arren, Jaurlaritzak proposatzen duen legea ez da eraginkorra izango, ez ditu ez neurriak, ez tresnak, ez konpromisoak zehazten gazteek pairatzen duten prekarietatea iraultzeko. “Bere lege proiektuan ez dago proposamenik lan baldintza duinak bermatzeko eta anbizioa falta zaio emantzipazio adina jaisteko; uko egiten zaio, adibidez, alokairuen prezio super altuei muga jartzeari, hori emantzipazioa ia ezinezko egiten duten faktore nagusietariko bat bada ere”.

EAJ-PSEren lege proiektuaren gabezien aurrean, EH Bilduko legebiltzarkideak gazteen prekarietateari errotik helduko dion Gazteriaren Lege bat aldarrikatu du, emantzipazioa eskubide bat izan dadin, politika publikoek bermatua; kalitatezko enplegua bermatzeko eta, alokairu publikoaren parke publikoa handituz, etxebizitza eskubidea egikaritzea ahalbidetzeko.

Etika Batzordea bere deslegitimaziora doa VIP txertoei buruz eman duen ebazpenarekin

Osasun sailburuaren jokaerari buruzko ebazpenak ez du baliorik, Maddalen Iriarteren iritziz, “horrelako batzordeek independenteak izan behar dutelako sinesgarritasuna edukitzeko, eta kasu honetan sailburu batek, sailburuorde batek eta Gobernuko goi karguek osatzen dute”.

| 2021-06-09 14:01:00

EH Bilduren ustez, Osasun sailburu Gotzone Sagarduik Basurtu eta Santa Marina ospitaleetako VIP txertoen auzian izan duen jokabideari buruz Etika Batzordeak argitara atera duen ebazpenak deslegitimaziora darama Jaurlaritzaren organo hori, haren partzialtasuna eta Gobernuarekiko menpekotasuna agerian geratu delako; argi dago batzorde horren osaera eta funtzionamendua berraztertzea ezinbestekoa dela. Larria eta iraingarria da Etika Batzordea Sagardui zoriontzeraino iristea, polemikaren ostean publiko egin ziren Santa Marinako zuzendari ohiaren Whatsapp solasaldiek frogatu zutelako sailburuak ez zuela egia esan Legebiltzarrean agertu zenean.

Behin Etika Batzordearen erabakiaren berri izan ondoren, Maddalen Iriartek ukatu du ebazpen horrek balioa eta sinesgarritasuna duela, “horrelako batzordeek, sinesgarriak izan daitezen, independenteak izan behar dutelako, eta kasu honetan ez da hala gertatzen, sailburu batek, sailburuorde batek eta Gobernuko beste goi kargu batzuek osatutako batzordea delako. Jaurlaritzak berak ikertzen ditu bere ekintzak eta, beraz, bere erabakiari ezin zaio inolako garrantzirik eman. Nola dagoen antolatuta ikusirik, Etika Batzordea Gobernuaren marketing-aren parte bat da; txertaketa irregularrena bezalako kontu bat argitzeko garaian beste era batean egin behar da, ikuspegi independente batetik, eta horrek beste gobernantza modu bat indartuko luke”.

ALBISTEAK

Ekarpen Legeak ez du udal finantzazioa bermatzen eta konpontzeke uzten du baliabideen banaketaren arazoa

2021-10-07 11:52:00

EH Bildu Jaurlaritzak aldundiekin adostutako legearen kontra agertu da. “10 urteko atzerapenarekin iritsi arren, lege honek ez die konponbiderik ematen urteetan agerikoak izan diren arazo eta desorekei”.

2020ko aurrekontu orokorrak bete ez eta ikertzaileen soldatak igotzeari uko egin diote EAJk eta PSEk

2021-09-29 15:37:00

EH Bilduk iazko aurrekontuetan agindutako igoera gauzatzeko eskatu dio Jaurlaritzari, bai eta ikertzaileen gutxieneko ordainsariak bataz besteko soldataren %60ra igotzeko ere.

EH Bilduk axolagabekeria egotzi die EAJ eta PSEri irakaskuntzan telefono mugikorren erabilera aztertzeari uko egiteagatik

2021-09-29 15:35:00

Lore Martinez Axpek azterlan baten beharra aldarrikatu du Hezkuntza Sailak horren inguruko araudi proposamen bat helaraz diezaien ikastetxeei

EH Bilduk Natura-Ondarea Kontserbatzeko Legea adostu du Jaurlaritzarekin

2021-09-28 12:45:00

Mikel Otero pozik agertu da akordioarekin, “besteak beste, legearen xedeak betetzeko aurrekontu-partida zehatzak bideratzea lortu dugulako”.