Ratioak 15 ikaslera jaistea eta 10.000 irakasle gehiago kontratatzea, EH Bilduren proposamena ikasturte berrirako
EH Bilduren iritziz, salbuespen neurriak behar dira ikastetxeetan osasun eta segurtasun baldintzak bermatzeko. Proposamen irekia da, Hezkuntza Sailak eta sektoreko eragileek negoziatu beharrekoa. Arduragabekeria da ikasturtea ohi legez hastea, Uriarte sailburuak planteatu bezala.
| 2020-07-29 15:21:00
EH Bilduk 2020-2021 ikasturterako egiten duen proposamena aurkeztu du gaur Gasteizen, irailetik aurrera ikastetxe guztietan osasun eta segurtasun baldintzak bermatze aldera. Maria Garde eta Ikoitz Arrese legebiltzarkideek adierazi dutenez, “hezkuntza komunitatean adostasun zabala dago: datorren ikasturtea ezin da modu normalizatuan hasi, salbuespen neurriak behar dira. Pandemiaren datuak ikusita, une honetan ez da errealista irailean egoera normalizaturik egongo dela pentsatzea, planifikazioaren abiapuntua ezin da hori izan. Cristina Uriarte Hezkuntza sailburuaren planteamendua guztiz arduragabea da, beraz. Eszenatokirik txarrena prestatu behar du eta larria iruditzen zaigu berak esatea bere lehenengo hipotesia ikasturtearen hasiera normalizatua dela eta ez duela irakasle gehiago kontratatzea aurreikusten”.
Gardek eta Arresek azpimarratu dute EH Bilduren proposamena bat datorrela sektoreko eragileen iritziarekin eta Estatuko beste hainbat erkidegotan jada hartzen ari diren neurriekin. “Ratioak jaitsi behar dira, gehienez 15 ikasle gelako; horrek, jakina, azpiegiturak egokitzea eskatzen du, udalekin elkarlanean, baita irakasle gehiago kontratatzea ere. Zehazki, sistema osoaren behar guzti-guztiak betetzeko irakasleen plantilla %20an handitu beharko litzateke; hau da, 10.000 irakasle gehiago kontratatu beharko lirateke haur hezkuntzatik unibertsitateraino”. Edonola ere, erantsi dute, neurri horien inpaktu ekonomikoa kontuan hartuta, “proposamen irekia da, Jaurlaritzak eta hezkuntza komunitateak negoziatu eta adostu beharrekoa; guk malgutasunez jokatuko dugu eta ontzat emango dugu hezkuntza komunitatearekin adosten dena, norabide horretan baldin badoa”.
EH Bilduko legebiltzarkideek planifikazioaren garrantzia nabarmendu dute eta horretan duen ardura ez betetzea egotzi diote Hezkuntza Sailari. “Ikastetxeen autonomiaren izenean, Hezkuntza Saila berari dagozkion ardurak ikastetxeen bizkar gainean uzten ari da. Uztailaren 29an gaude eta ez ikastetxeek ez familiek ez dakite oraindik nola ekin beharko dioten irailean ikasturte berriari. Ziurgabetasuna erabatekoa da. Ulertezina da ikastetxeek aplikatu beharko dituzten irizpideak oraindik argi ez egotea. Denok dakigu irailean hasiko den ikasturtea berezia eta ezberdina izango dela pandemiaren ondorioz. Argi dago egoerak osasun eta prebentzio neurri zorrotzak eskatuko dituela, baina neurri horiek zehaztu, planifikatu eta hezkuntza komunitatearekin adostu beharrean, Uriarte sailburuak hasiera normalizatua eman nahi dio ikasturteari, betiko moduan, ia ezer gertatuko ez balitz bezala. Badaezpada, baliabide guztiak eszenatokirik okerrenerako prestatzen egon beharko luke, baina berak aurreikusten duen eszenatokian ikasturtea normal hasiko da. Benetan? Sinesgarria da eszenatoki ideal hori birusaren agerraldiak etengabeak direnean? Beste leku batzuetan gertatu dena ikustea aski da konturatzeko ikasturte hasierak kutsatzeko arriskua izugarri areagotuko duela eta salbuespen neurriak jada planifikatzea ezinbestekoa dela”.
Estatuaren indarkeriaren biktimak diskriminatu ditu berriro ere Jaurlaritzak
AVT, Covite eta Vitepaz elkarteetan bildutako ETAren biktimek laguntzak jasoko dituzte pandemiak eragindako arazoak arintzeko; ez, ordea, Estatu terrorismoaren biktimek. “Koronabirusak gehiago eragin die ETAren biktimei GALen biktimei baino, ala?”, galdetu du Julen Arzuagak.
| 2020-07-28 21:20:00
Jaurlaritzak biktimen arteko ohiko mailaketan sakondu du gaur berriz ere, biktima guztiak ez dituela berdin neurtzen argi utzita. Hala salatu du Julen Arzuagak, Lakuako Gobernuak iragarri baitu 57.000 euroko laguntza emango diela AVT, Covite eta Vitepaz elkarteetako ETAren biktimei, pandemiak eragindako kalte ekonomikoak edota arazo psikologikoak arintzeko. Jaurlaritzak berak emandako informazioaren arabera, ez aipatutako elkarte horietako kide ez diren ETAren gainerako biktimek, ez Estatu terrorismoaren biktimek ez dute, ordea, laguntzarik jasoko.
Arzuagaren iritziz, erabaki honekin EAJ-PSE Gobernuak Estatuaren indarkeriaren biktimen diskriminazioan sakondu baino ez du egiten. “ETAren biktima batzuek Jaurlaritzaren babesa jasotzen duten bitartean, Estatu terrorismoaren biktimak bazter uzten ditu, irizpide politikoak erabilita. Nola ulertu bestela pandemiaren ondorioak arintzeko laguntzak banatzerakoan ere biktima jakin batzuk bakarrik lehenestea? Akaso ETAren biktima horiei gehiago eta bortitzago eragin die koronabirusak GAL edo elkarte horietan lerrokatuta ez dauden ETAren biktimei baino?”.
ALBISTEAK
Hauteskundeak direla eta bertan behera geratu ziren lau lege berreskuratu ditu EH Bilduk, tramitazioa amaitzeko
2020-09-15 10:07:00
EH Bilduk indarkeria matxista kasuetan zaintza partekatua ukatzeko, ustelkeriaren aurkako bulegoa sortzeko, euskara doan ikasteko eta Herri Kontuen Epaitegiaren Legea aldatzeko lege proposamenak aurkeztu ditu berriz, aurreko legealdian hasitako tramitazioa burutzeko. Jaurlaritzak koherentziaz jokatzea eta prozedura ez oztopatzea espero du koalizioak.
Aldi baterako lan erregulazioan dauden langileentzako laguntzak handitu eta hobetzea proposatu du EH Bilduk
2020-09-11 15:56:00
Ander Rodriguezek proposamena aurkeztu du Legebiltzarrean, Jaurlaritzak egoera horretan dauden langileei emandako erantzunak ez duelako egoerak eskatzen duen maila ematen.
EH Bilduk atzera egiteko eta Emakunde berriz ere Lehendakaritzari atxikitzeko eskatu dio Urkulluri
2020-09-09 14:08:00
Oihana Etxebarrietaren iritziz, “akats larria da” Emakumearen Euskal Erakundea Lehendakaritzatik ateratzea, gai sektoriala balitz bezala, politika feministek ezinbesteko duten zeharkakotasuna galtzen delako horrela. Interpelazioa egingo dio lehendakariari Legebiltzarrean.
Iriarteren gobernu programak enplegua, osasuna, hezkuntza, gizarte politikak eta trantsizio energetikoa ditu lehentasun
2020-09-03 13:53:00
EH Bilduren lehendakarigaiak gobernantza eredu alternatiboa ipini du mahai gainean, eta erabakitzeko eskubideak Legebiltzarrean duen babes teoriko handia praktikara eraman beharra azpimarratu du, Estatu espainolarekin berdinen arteko harreman konfederala izateko.