Kongresua-Senatua

Amiantoaren biktimentzako konpentsazio funts bat sortzeko premia defendatu du EH Bilduk Kongresuan

Eba Blanco legebiltzarkideak eta Oskar Matute diputatuak EH Bilduren izenean hitz egin dute Gasteizko Legebiltzarrean aho batez onartutako proposamena defendatzeko: "Amiantoaren biktima guztiei egindako kaltea konpontzeko garaia da".

| 2021-04-13 10:19:00

Amiantoaren biktimentzako konpentsazio funts bat sortzeko Gasteizko Legebiltzarrak aho batez onartutako Lege Proposamena Diputatuen Kongresura iritsi da astearte honetan, egitasmoa legebiltzarrean babestu zuten talde parlamentarioen eskutik. Eba Blanco legebiltzarkideak hitz egin du EH Bilduren izenean, eta biktimentzako konpentsazio funts bat sortzeko premia nabarmendu du: "Ez da konpentsazio funts hau eskatzen dugun lehen aldia, talde parlamentario guztien agindu bateratu argiarekin gatoz. Eta biktimekiko elkartasunagatik egiten dugu. Milaka kaltetuei justizia eskaintzeko behingoz".

Kongresuan egindako hitzartzean, Blancok hitzeman du ezkerreko indar subiranistak lanean jarraituko duela "zeharkako hiltzaile isil horren biktima izan diren pertsona guztiei dagozkien eskubideak gauzatu arte". "Dagoeneko ia hamar urte daramatzagu istorio triste honekin". Etenak jasan ditu 10 urteko lan horrek, bai hauteskunde-hitzorduengatik eta baita beto politikoengatik ere, konpentsazio-funts hori sortzeko atzerapena besterik eragin ez dutenak. Oskar Matute diputatuak, berriz, Asviamie elkarteak idatzitako gutun bat irakurtzeko baliatu du bere hitzartzea.
 

Eskertza mezua Asviamie elkarteari

Blancoren arabera, biktimentzat ulertezina da atzerapen hori. "Ez da ulergarria gehiengoaren borondateari oztopo burokratikoak eta administratiboak jartzea beste behin; eztabaidak, osoko bilkurak eta egitasmoen tramitazioa etengabe atzeratuz. Biktimen eskaera da guk hona ekartzen duguna. Erakundeak ez dira aintzat hartzen ari haien eskubidetzat jotzen duguna".

EH Bilduko legebiltzarkideak eskerrak eman nahi izan dizkie elkarteei, batez ere Asviamieri, azken 10 urteotan egindako bultzadagatik eta Gasteizko Legebiltzarrean ordezkaritza duten talde parlamentario guztiei urteotan egindako lanagatik. "Gaur berriro hemen bagaude, beraien insistentzia eta esfortzuari esker da", nabarmendu du.

Gaurkoa bigarren aldia da legebiltzarkideek Kongresuan Lege Proposamen hau aurkeztu dutena; 2017ko urriaren 10ean egin zen aurrekoa. Blancok ohartarazi duenez, amiantoak presentzia izaten jarraitzen du enpresa askotan; izan ere, amiantoaren erabilera eta merkaturatzea duela urte batzuetatik debekatuta egon arren, material hori modu masiboan erabili da hiru hamarkadatan. "Eta gaur egun ere, amiantoak osasuna kaltetzen jarraitzen du, material asko baitago bertan. Enpresa batzuek ez dakite amiantoarekin lan egiten dutenik ere".
 

Amiantoaren eraginez hildako langileak

1999tik 2018ra bitartean, Araban, Bizkaian, Gipuzkoan eta Nafarroan 825 pertsona hil ziren amiantoaren ondorioz. Espainiako Estatuan, berriz, amiantoak 6.961 lagun hil ditu 19 urte horietan.

"Oso zaila da zehaztea zenbat pertsonak jasan dituzten amiantoaren eraginak, ezta zenbat denboraz. Oro har, amiantoak eragindakoak zehazki kuantifikatu ezin ditugun arren, kontuan hartu beharreko zenbait datu ditugu. Zifra beldurgarriak dira, eta horien atzean gizon, familia eta emakume askoren sufrimendua ezkutatzen da", azaldu du Blancok, eta ohartarazi gaixotasun isil, hilgarri eta sendaezin horrek biktima berriak eragiten jarraituko duela, gutxienez 2023ra arte, orduan amaitzen baita latentzia-aldia.

Amiantoaren biktimen heren bat beren lantokian gaixotu diren emakumeak dira, baina baita lanetik kanpoko arrazoiengatik gaixotu direnak ere, bai ingurumena kutsatu dutelako, bai beren etxeetan amianto-zuntzak zituen laneko arropa garbitu dutelako. Blancok eskatu du joan den legegintzaldian osatutako lantaldearen lanei berriro heltzeko. Orduan adostutakoari erreparatzeko eta ezberdintasunak alde batera uztea galdegin die talde parlamentarioei, amiantoaren biktimentzako konpentsazio funts bat ahalik eta lasterren sortzeko.

"Ezin da hutsetik hasi, ezin baitugu atzerapen berri bat onartu, eta atzerapen hori ez genuke ulertuko, eta ez litzateke bidezkoa izango gizartearentzat. Baina, batez ere, amiantoaren biktima guztientzat. Egin dezagun daudenengatik, etorriko direnengatik eta bidean geratu diren guztiengatik", amaitu du EH Bilduko legebiltzarkideak Kongresuan.

EH Bilduk onartezintzat eta mingarritzat jo ditu Marlaskak Mikel Zabalzaren heriotzaren harira esandakoak

Ezkerreko indar subiranistaren Kongresuko bozeramailearen arabera, Marlaskaren hitzek beste behin erakusten dute Estatuko botereek tortura isilpean eta inpunitate osoan mantendu nahi dutela

| 2021-03-17 11:06:00

Espainiako Barne ministro Fernando Grande-Marlaskak Mikel Zabalzaren heriotzari buruz egindako adierazpenak «onartezinak eta mingarriak» direla adierazi du Euskal Herria Bildu talde parlamentarioak. Mertxe Aizpurua bozeramaileak salatu duenez, Barne ministroak bertsio ofiziala goraipatu du, bere garaian «ikerketa judizial ezinhobea eta konplexua» egin zela defendatuz eta alde batera utziz Zabalzaren heriotzagatik oraindik inork ez duela ordaindu. «Marlaskak, gainera, auzitegien esku utzi du auzia berriro irekitzea, eta torturaren praktika sistematikoa onartzea saihestu du, salbuespen kasu apur batzuetara mugatuz», ohartarazi du Aizpuruak.

Ezkerreko indar subiranistaren ordezkariaren arabera, Marlaskaren hitzek beste behin erakusten dute Estatuko botereek tortura isilpean eta inpunitate osoan mantendu nahi dutela hamarkada batzuk geroago. «Guztiz onartezina da, are gehiago legearen betebeharraz horrenbeste hitz egiten diguten horiengandik etorrita. Ulertezina da Gobernuak iraganeko kasu itxitzat jotzea indar armatuetako kideen parte hartzea eta zigorgabetasuna ikertzea», salatu du Aizpuruak.
 

Berriki argitaratutako audioak

Nahiz eta Marlaskak garrantzia kendu oraintsu argitaratutako grabaketei eta botere judizialak 2004an froga gisa baztertu zituela ziurtatu arren, EH Bilduren hitzetan Guardia Zibileko goi-agintariei Mikel Zabalzari buruz egindako grabazioek Euskal Herrian bagenekiena berresten dute, eta agerian uzten dute tortura sistematikoa izan dela. «Beldurgarria da audio horiek entzutea, haien lasaitasunagatik eta zigorgabetasunagatik».

Aizpuruak azpimarratu duenez, EH Bilduk sufrimendu hori aitortzeko eta egiazko ikerketa bat martxan jartzeko eskatzen jarraituko du, Zabalzaren familiak Fiskaltzari eskatu duen bezala. EH Bilduko bozeramailearen aburuz, Gobernuak lehenbailehen hartu beharko luke esku gai honetan, Euskal Herrian torturak eragin dituen biktima guztiei egia, justizia eta ordaina bermatzeko. «Gobernuak ezin du beste alde batera begiratu froga argien eta milaka tortura kasuren aurrean».

Zabalzaren arrebak berak ikerketa berrireki dadila eskatu du, eta justizia beti «harresi gaindiezina» izan dela salatu du. Aizpuruak ohartarazi du Espainiako Gobernuak urrezko aukera duela Intxaurrondon hainbeste hamarkadatan gertaturikoa ikertzeko. «Eta ez du balio iraganeko legealdietako kontuak direla esatea eta berriro ere entzungor egitea. Gobernuak giza eskubideen urraketa guztiak argitzeko ardura du, eta justizia eskaini behar die urte hauetan guztietan tortura jasan duten biktima guztiei». EH Bilduren iritziz, bakean eta bizikidetzan aurrera egiteko pauso sendoak emateko garaia da, eta horretarako ezinbestekoa da torturak eragindako mina aitortzea.

Carmen Calvoren agerraldia eskatu du EH Bilduk, Errege Etxearekin izandako negoziazioen berri eman dezan

"Juan Carlos Borboikoa badoa, baina Felipe eta monarkia geratu egingo dira. Espainiako monarkiaren benetako izaera ustela eta antidemokratikoa ezkutatzea helburu duen operazioa da", salatu du Mertxe Aizpuruak.

| 2020-08-04 12:27:00

"Juan Carlos Borboikoa badoa, baina Felipe eta monarkia geratu egingo dira. Espainiako monarkiaren benetako izaera ustela eta antidemokratikoa ezkutatzea helburu duen operazioa da. Juan Carlos Borboikoaren ihesaren helburua Felipe VI-a, Espainiako monarkia, 78ko erregimena eta Juan Carlos Borboikoa 'ikur' den trantsizio okerraren benetako funtsa babestea da". Modu horretan salatu du EH Bilduren Kongresuko bozeramaile Mertxe Aizpuruak justiziaren aurrean kontu eman gabe Juan Carlos Borboikoak ihes egin izana.

EH Bilduren ustez, Espainiako monarkiari bere pribilegioei eusteko eta justiziari konturik eman gabe eta azalpenik eman gabe ihes egiteko aukera ematen ari zaio. Honela azaldu du Aizpuruak: "Ustelkeria delitu oso larriez ari gara, hala nola ihes fiskala, kapitalak zuritzea eta paradisu fiskaletan dirua mugitzea. Delitu oso larriez ari gara, eta beste edozein herritarrek egin izan balitu, kartzelan legoke".

HERRITARREI HITZA EMATEA

Aizpuruaren aburuz, horrelako erabakiek Espainiako monarkiarekiko arbuioa areagotzen dute. "Eta ez bakarrik Euskal Herrian. Herritarrei zuzenean zein Estatu eredu nahi duten galdetzeko unea da. Gaur egun, inoiz baino gehiago, berdinen Euskal Errepublika askearen aldeko apustua egiten dugu, demokrazian eta herriaren borondatean oinarrituta", nabarmendu du EH Bilduren Kongresuko bozeramaileak.

Aizpurua harrituta mintzatu da Espainiako Gobernuaren gehiengoak egungo erregearen ustezko eredugarritasunari eta gardentasunari heldu diolako berriz ere, "ezer gertatu ez balitz bezala egiteko". EH Bilduko ordezkariak argi dauka "Juan Carlos Borboikoaren irudia sakrifikatzeko eta monarkia salbatzeko" Estatu operazio bat dagoela atzoko erabakiaren atzean: "Felipismoaren mitoa 'eredugarritasunetik' eraikitzen saiatzen dira, juankarlismoaren aurrean".

CARMEN CALVOREN AGERRALDIA

Aizpuruak gogorarazi du EH Bilduk lanean jarraituko duela irregulartasun guztiak ikertzeko, egia ezagutzeko, zigorgabetasunari amaiera emateko eta herritarrei hitza emateko.

Ildo horretan, gaur goizean bertan, Carmen Calvo presidenteordearen presazko agerraldia eskatu du indar subiranistak Kongresuan ERCrekin batera, Espainiako Gobernuak Juan Carlos Borboikoaren ihesean izan duen erantzukizuna argitu dezan eta gertakari horren inguruan Espainiako Gobernuaren eta Errege Etxearen artean izandako negoziazioen berri eman dezan, ustelkeria-delituen, zerga-ihesaren eta kapital-zuriketaren akusazioak daudela kontuan hartuta.

EH Bilduren proposamen eta ondorioak Berreraikuntza Sozial eta Ekonomikorako

| 2020-06-25 09:32:00

 

Bankuen eta fortuna handien gaineko zerga sortzea proposatu du EH Bilduk:

- ERTEak 2021eko urtarrilaren 1era arte luzatzea.

- Sektore estrategikoak berreskuratzeko plangintza publikoa martxan jartzea.

- Gutxieneko soldataren pareko emergentziazko errenta sortzea 6 hilabeterako.

- AHTa bezalako azpiegitura handien lanak atzeratzea.

- Kaleratze ekonomikoak debekatzea sektore publikoan.

- 2012ko lan erreforma indargabetzea eta langileen eskubideak bermatuko dituen lege batekin ordezkatzea.

EH Bilduk Felipe Gonzalezen agerraldia galdegin du Kongresuan, CIAk GALi buruz desklasifikatutako dokumentuak argitaratu ostean

Ezker subiranistak Ikerketa Batzorde bana sortzea bultzatuko du bai Kongresuan eta baita Senatuan ere, Estatu Terrorismoaren inguruko erantzukizun politikoak argitzeko eta CIAko dokumentuek berriki baieztatutako egitateen inguruan xehetasun gehiago jasotzeko

| 2020-06-15 15:13:00

Felipe Gonzalezek eta haren gobernuek (1982tik 1996ra) GALekin eta gerra zikinarekin izan zuten harreman zuzenari buruz CIAk 1984an eginiko dokumentuak desklasifikatu ostean, Euskal Herria Bildu Talde Parlamentarioa Felipe Gonzalezen agerraldi eskaera aurkeztu du gaur Kongresuko Barne Batzordean. Indar subiranistaren asmoa da Espainiako Gobernuko presidente ohiak azalpen publikoak ematea Estatu Terrorismoaren eta GALen sorreraren erantzulea dela baieztatu ostean. Fernando Grande-Marlaska Barne ministroaren agerraldia ere eskatu du EH Bilduk Kongresuko plenoan, CIAk desklasifikatutako dokumentuen harira Felipe Gonzalezen gobernuek gerra zikinarekin izandako harreman eta ekintzen inguruan argibideak eman ditzan.

36 urtez ezkutuan gordetako txostenak agerian utzi du Felipe Gonzalez sozialista buru zuten gobernuek GALen izandako «lotura», nahiz eta Estatu Terrorismoari lotutako pasarte batzuk sekretupean mantendu dituzten oraindik. 1984. urtean Espainia: Euskal Herriko terrorismoa eta Espainiako Gobernuaren erantzuna izenburupean eginiko dokumentuan, CIAk baieztatu egin du GALen sorreraren atzean Felipe Gonzalez presidentea zegoela.

Honela dio dokumentuak: «Badirudi Espainiako Gobernuak erabakita daukala ETAren aurkako borrokan estrategia ez-ortodoxo bat erabiltzea. Felipe Gonzalez ados dago armadak kontrolatutako mertzenario taldeak osatzearekin, terroristak legez kanpo borrokatzeko. Mertzenarioek ez lukete derrigorrez espainiarrak izan behar, eta haien misioa litzateke ETAren liderrak hiltzea Espainian eta Frantzian». Horrez gain, AEBetako Inteligentzia zerbitzuaren azterketek segurtzat jotzen dute Espainiako Gobernuaren asmoentzat eraginkorrak izan zirela GALen «ekintza ilegalak». CIAk onartzen du, halaber, ekintzok legez kanpokoak zirela eta zalantzan jarri zituztela Espainiako 'Trantsizio demokratikoa' deiturikoa.

Ikerketa Batzordeak Kongresuan eta Senatuan

Argitaratutako informazioen larritasunaz jabetuta, Euskal Herria Bilduk Ikerketa Batzorde bana sortzea bultzatuko du bai Kongresuan eta baita Senatuan ere, Estatu Terrorismoaren inguruko erantzukizun politikoak argitzeko eta CIAko dokumentuek berriki baieztatutako egitateen inguruan xehetasun gehiago jasotzeko. EH Bilduk lan egingo du egitasmoak ahalik eta indar politiko gehienen babesa jaso dezan bi erakundeotan.

ALBISTEAK

Indar subiranistek azalpenak eskatu dizkiote Darias ministroari, osasun neurrien aldebakarreko «inposizioa» salatzeko

2021-06-04 15:10:00

Osasun ministroaren agerraldi eskaera bateratua aurkeztu dute gaur Kongresuan EH Bilduk, ERCk, Juntsek, Pdecatek, CUPek eta BNGk, berriki onartutako osasun neurriak «gobernu eta parlamentuen burujabetzaren aurkako erasoa» direla iritzita. Eskumen inbasioa salatu dute alderdi subiranistek.

Txertoen patenteak aldi baterako altxatzea onartu du Senatuak, EH Bilduren ekimenez

2021-05-26 15:42:00

Europako Batasunean liberalizazioaren alde jarrera bateratua adosteko asmoz EH Bilduk bultzatutako egitasmoak senatarien gehiengoaren sostengua jaso du: «Helburu nagusia baliabide gehien dituzten herrialdeek ekarpen handiagoa egitea da». EH Bildu, PSOE, ERC, PNV, Junts eta Izquierda Confederal taldearen aldeko botoekin aurrera atera da egitasmoa.

Agenda aurrerakoia martxan jartzeko eta hitzemandako konpromisoak betetzeko eskatu dio Aizpuruak Sanchezi

2021-05-26 09:34:00

Hitzemandako agenda aurrerakoiaren ezarpena gehiago ez atzeratzea galdegin dio EH Bilduren Kongresuko bozeramaileak Espainiako Gobernuko presidenteari, eta orain arte hartu ez dituen erabakiak hartzearen premiaz ohartarazi dio: lan erreforma bertan behera uztea, Mozal Legea indargabetzea, alokairuen prezioak mugatzea, pentsioak duintzea, bidezko fiskalitatearen alde egitea eta nazioaniztasuna elkarrizketaren eta akordioaren bidez jorratzea. "Neurri horiek guztiak martxan jartzeko gehiengo sozial, sindikal eta politikoa dauka gobernuak", ziurtatu du Aizpuruak.

Txertoen patenteak altxatzeko EH Bilduren egitasmoa eztabaidatuko du aste honetan Senatuak

2021-05-24 09:47:00

Txertoen patenteak altxatzeko jarrera bateratua adostea du helburu Gorka Elejabarrieta senatariak aurkeztuko duen egitasmoak. Europako Batasunak eta Munduko Merkataritza Erakundeak (MME) liberalizazioaren aldeko neurriak bizkortu ditzatela eta txertaketa erritmoaren desorekarekin amai dezatela eskatuko du.