Kongresua-Senatua

Ekoizpena atzerrira eraman duten enpresek jasotako diru publikoa itzultzeko eskatu du Bel Pozuetak

Lanpostuak babesteko presazko neurriak eskatu dizkio EH Bilduren Nafarroako diputatuak Espainiako Industria ministroari Kongresuko kontrol saioan.

| 2020-11-18 12:48:00

Ekoizpena beste herrialde batzuetara eraman duten enpresek jasotako diru publikoa itzultzeko eskatu du gaur EH Bilduren Nafarroako diputatu Bel Pozuetak. Horrela zuzendu zaio Kongresuko ontrol saioan Reyes Maroto Industria ministroari: "Ekoizpena deslokalizatzea erabakitzen duten eta lurraldean dauden bitartean laguntza publikoak jasotzen dituzten enpresei diru publikoa itzultzera exijitzetik has zaitezkete".

Siemens Gamesa, Loxin, Apoyos Metálicos, Incoesa, General Electric, Siban, Tubacex... Euskal Herriko lantokiak ixtea erabaki dute horiek guztiek, ekoizpena beste herrialde batzuetara eramateko asmoz. Pozueta diputatuak ohartarazi duenez, Euskal Herria utzi duten enpresek "kaleratzeak eta langabezia" ekarri dituzte berekin, eta miseriaren atarian utzi dituzte milaka familia: "Borondate politiko eta langileen aldeko konpromiso irmoa ezinbestekoak dira. Espainiako Gobernuak halakorik badu, horren inguruko proposamenak eta neurriak martxan jartzea espero dugu".

"Enpresa handiei ez zaie batere axola zenbat langile uzten dituzten kalean, ezta itxierak zenbat kalte egiten dion eskualdeari". Pozuetak uste du ekoizpen kostuak merkatzea eta langileen kontura merkeago ekoiztea besterik ez dutela nahi produkzioa atzerrira eramaten duten enpresek. "Neoliberalismoaren panazea, finean: eskulan merkeagoa eta laneko babes gutxiago", salatu du. Pozuetaren iritziz, deslokalizazioen helburu bakarra enpresen etekinak handitzea da, ekonomikoki bideragarriak izanda ere Euskal Herriko plantak ixteko hautua egiten dutelako: "Kasu askotan, deslokalizatzera iristen ez badira ere, lan baldintzetan atzerapausoak ematea, soldatak murriztea eta prekarietatea handitzea eragiten dute, mehatxu eginez. Itxi eta banoa. Xantaia bat da, argi eta garbi. Onartezina da".

Nafarroa, aitzindaria

EH Bilduren Nafarroako diputatuak premiazko neurriak eskatu dizkio Espainiako Gobernuari, enpresen deslokalizazioa eteteko eta lanpostuak mantentzeko. Pozuetak, horretarako, eredu gisa jarri du EH Bilduk Nafarroako Parlamentuan bultzatutako Lege Proposamena; gaur egun tramitazio prozesuan dago. "Deslokalizazioak eragozteko eta lanpostuak babesteko neurriak jasotzen dituen legea da. Proposamen hori ezagutzera eta aztertzera gonbidatzen zaitut, adibide gisa hartzeko eta egoera hau amaitzeko benetako ekintza eraginkorrak abiarazteko", esan dio Industria ministroari. Marotok "industriaren aldeko itunarekin" bat egiteko eskatu dio EH Bilduri.

Nagorno Karabajera laguntza humanitarioa bidaltzeko eta armen salmenta eteteko eskatu du Kongresuak, EH Bilduren ekimenez

Jon Iñarritu diputatuak aurkeztutako Legez besteko Proposamena onartu du Kongresuak, gehiengoz. Nazioarteko erakundeei modu aktiboan inplika daitezela eskatu die EH Bilduk, gatazkari "irtenbide baketsu eta negoziatua" emateko asmoz.

| 2020-11-16 16:33:00

EH Bilduk bultzatutako Legez besteko Proposamen bat onartu du, gaur, Diputatuen Kongresuak, Nagorno Karabajera laguntza humanitarioa bidaltzeko, Azerbaijani armarik ez saltzeko eta nazioarteko erakundeei "gatazkari irtenbide baketsu eta negoziatua" lortzeko aktiboki inplika daitezela eskatzeko. EH Bilduren egitasmoa gaur arratsaldean eztabaidatu da Kongresuko Nazioarteko Lankidetza Batzordean, eta PSOE, Unidas Podemos eta Junts per Catalunya alderdien babesa jaso du, erdibideko zuzenketa bati esker: 19 diputatuk alde bozkatu dute; 10 diputatuk, kontra; eta 5ek abstentziora jo dute.

Egitasmoaren egile Jon Iñarritu diputatuak nabarmendu du oraindik ere "premiazkoa" dela Nagorno Karabajeko errefuxiatuei laguntza humanitarioa bidaltzea eta nazioarteko erakundeek jarrera proaktiboa mantentzea, Artsakheko Errepublikako gatazka nazioarteko agenda humanitariotik desager ez dadin. "Joan den astean su-etena adostu arren, gatazkak aurrera jarraitzen du, ez da amaitu, eta konponbide iraunkorra bilatzea inoiz baino beharrezkoagoa dela uste dugu", azaldu du.

Duela astebete, Europako Batasuneko parlamentari eta kazetariek osatutako behatzaileen ordezkaritza batean parte hartu du Iñarrituk. Diputatuak bertatik bertara ezagutu du Armeniako eta Artsakheko Errepublikako egoera, eta bertatik bertara ikusi ahal izan ditu Azerbaijango eta Turkiako erasoek eragindako kalteak. Iñarrituk gatazkari irtenbide baketsu eta negoziatua bilatzeko exijitu dio nazioarteko komunitateari, krisi humanitarioa areagotu ez dadin: "Nagorno Karabajeko herritarren aurka egin nahi duten genozidio arriskuaren eta garbiketa etnikoaren aurrean, munduak ezin du beste aldera begiratzen jarraitu".

Krisi humanitarioa

Nagorno-Karabajen aurkako erasoa iragan irailaren 27an hasi zuen Azerbaijanek, Turkiaren eta Nagorno Karabaj​era joandako mertzenario islamisten sostenguarekin. Sei hilabetez, herritarrei eta azpiegitura zibilei eraso egin diete, lurraldeko biztanle gehienen desplazamendua eraginda, bai Nagorno Karabaj barruan, eta baita Armenian ere. Iñarrituk ez du zalantzarik krisi humanitario baten aurrean gaudela: "Nagorno-Karabajeko 150.000 biztanleetatik gehienak Armeniara joan dira. Dagoeneko 100.000 errefuxiatu edo desplazatu baino gehiago daude. Azpiegitura zibilen (errepideak, zentral elektrikoak, komunikazio-sareak, ospitaleak, elizak eta ikastetxeak) aurkako erasoen eta neguaren etorreraren ondorioz, egoera jasanezina bihurtu da".

Armen esportazioa, etenda

Era berean, gaur onartutako egitasmoaren bidez, Azerbaijani armen esportazioa eta erabilera bikoitzeko material militarraren salmenta aldi baterako eteteko eskatu dio Kongresuak Espainiako Gobernuari; gutxienez, gatazkak irauten duen bitartean. Iñarrituren iritziz, Nagorno-Karabajeko gatazkak irauten duen bitartean armarik ez saltzeko eskatzea Espainiako Estatuari "eska dakiokeen gutxienekoa da". "Debekatuta dauden arma ez konbentzionalak erabili dituzte Azerbaijanek eta Turkiak; besteak beste, luku-bonbak eta fosforo zuria. Arma horiekin mota guztietako gerra krimenak egin dituzte azken asteetan, informazio agentzia ugarik jakinarazi dutenez: exekuzio sumarioak, gorpuen mutilazioak eta dekapitazioak, besteak beste", salatu du diputatuak.

EH Bilduk abstentziora jo du Hezkuntza Lege berriaren tramitazioan: «Ez da Euskal Herriko hezkuntza komunitateak behar duen tresna»

Bel Pozueta diputatuak salatu duenez, «hezkuntza komunitatearen helburuetatik eta gehiengoaren sentimendutik oso urrun dago LOMLOE»

| 2020-11-13 12:29:00

«Ez da Euskal Herriko hezkuntza komunitateak behar duen tresna». Argi eta garbi mintzatu da gaur Bel Pozueta Nafarroako diputatu eta EH Bilduren Hezkuntza Batzordeko bozeramailea, Hezkuntza Lege berriaren erreformari buruzko azken eztabaidaren bozketan. EH Bilduk testuaren tramitazioa ez oztopatzeko hautua egin du; behin betiko bozketa datorren ostegunean, azaroaren 19an, egingo da Kongresuko osoko bilkuran.

Gaurko hitzartzean, pedagogia feminista, laikoa, ekitatiboa, doakoa eta unibertsala erdigunean jarriko dituen hezkuntza eredu hezkidetzailearen alde egin du Pozuetak, ikasle kritikoak hezi eta ahalduntzeko asmoz. «Ikasleak lurralde bakoitzeko hizkuntza ofizialetan heziko dituen murgiltze ereduan oinarritutako eredu baten alde gaude», adierazi du Pozuetak, batzordean adostutako erdibideko zuzenketen harira.

Ikasturtea errepikatzea, salbuespen

Besteak beste, PSOErekin eta Unidas Podemosekin erdibideko zuzenketa bati esker lortutako akordioa azpimarratu du Pozuetak, ikasturtea errepikatzea "salbuespena" izan dadin. Hiru ikasgaitan ebaluazio negatiboa izanda ere ikasturtea igarotzea ahalbidetuko du itunak. «Ikasturtea errepikatzea salbuespena izatea adostu dugu PSOE eta Unidas Podemosekin, emaitza ezberdinak lortzeko bide bakarra neurri ezberdinak hartzea delako. Maizegi jotzen da egun errepikapenera, ikasleengan sor ditzakeen ondorio negatibo eta eragozpenak aintzat hartu gabe», nabarmendu du, Euskal Herriko hezkuntza komunitatearen gehiengoaren iritzia jasoz eta hezkuntza gizartearen oinarrizko elementu egituratzaile eta kohesionatzaile gisa defendatuz.

Hala ere, EH Bilduren Nafarroako diputatuak ohartarazi du ezkerreko indar subiranista ez datorrela bat «helburu, konpetentzia, metodo pedagogiko eta ebaluazio irizpide guztiak Espainiako Gobernuaren esku uztearekin eta Madrilek modu esanguratsuan zehaztearekin». Hala azaldu du EH Bilduren Hezkuntza Batzordeko bozeramaileak: «LOMLOE hezkuntza komunitatearen helburuetatik eta gehiengoaren sentimendutik oso urrun dago. LOMCE lege baztertzaile eta segregatzailea ordezkatzen du, bai, eta berri ona da, baina ez gaude ados lege aldaketa gure lurraldeetako hezkuntza sistemen kontura egitearekin».

EH Bilduk Senatura eramango du Bilboko Portuko estibako langileen egoera

EH Bilduko ordezkaritza bat Bilboko portuko estibako langile batzordearekin bildu da gaur

| 2020-11-10 14:30:00

Gaur goizean Idurre Bideguren, Oskar Matute eta Iker Casanova, EH Bilduko senataria, diputatua eta legebiltzarkidea hurrenez hurren, Bilboko portuko estibako langile batzordearekin bildu dira gaur goizean.

Bilera hasi baino lehen EH Bilduko diputatuak bileraren arrazoi nagusiak azaldu ditu. “Lan gatazka honi konponbide justua bultzatzea da gure asmoa eta horren alde lan egingo dugu. Ez dugu ahaztu behar haien eskubideen eta enplegu duina defendatzen ari direla greba mugagabe baten bitartez”, adierazi du Matutek.

Matutek estibako langileen egoera zein den eta mobilizatzeko zein arazo izan dituzten azpimarratu du. “Ikusi dugu nola aplikatu dizkieten %100-era heldu diren gutxieneko zerbitzuak edota nola ekarri dituzten langileak beste portu batzuetatik. Guzti hori Jaurlaritzak patronalaren mesedetan aritu den lobby bat bezala lan egin duen bitartean”.

Egoera horren aurrean Idurre Bideguren EH Bilduko senatariak aurreratu du espainiar gobernua interpelatu dutela ahozko galdera baten bitartez Senatuan Bilboko portuko estibako langileen egoeraz hitz egiteko.

Eskubide Sozialen Europako Gutuna berresteko eskatu dio EH Bilduk Espainiako Gobernuari

"24 urte daramatza Espainiako Estatuak egoera hau konpondu gabe". Ez da batere eredugarria". 1996ko Eskubide Sozialen Europako Karta berresteko asmoz, Legez besteko Proposamena aurkeztu du Kongresuan Mertxe Aizpurua bozeramaileak, Europako gainontzeko Estatuekiko eskubide sozialak "desabantaila eta desberdintasun agerikoan" daudela iritzita.

| 2020-11-03 13:01:00

Euskal Herria Bildu Talde Parlamentarioak Legez besteko Proposamena aurkeztu du Kongresuan, Espainiako Gobernuari Europako Gutun Soziala berretsi dezala eskatzeko, herritarren eskubide sozialak babestu eta blindatzeko helburuarekin. Mertxe Aizpurua bozeramaileak gogorarazi duenez, nazioarteko itun horrek alor sozialeko giza eskubideak barnebiltzen ditu: "1961ean onartu zuten eta, besteak beste, lanerako, etxebizitzarako, osasunerako eta hezkuntzarako eskubide sozial eta ekonomikoak bermatzea zuen xede. Herritarrak babesteko funtsezko tresna da, finean".

Espainiako Estatuan 1980. urtean berretsi zuen Europako Gutun Sozialaren lehen bertsioa, baina oraindik ez du bere egin 1996an adostutako eguneratzea. Horren ondorioz, 24 urteren ondoren, Europako Gutun Sozialak jasotzen dituen giza eskubideak gaur-gaurkoz ez daude indarrean Espainiako Estatuan. "Konpondu gabeko gaia da". Berrikusitako bertsioa berrestearen garrantziaz mintzatu da Aizpurua, hitzarmena hobetu eta beste zortzi eskubide gehitu baitzituen: "Lanerako duintasuna bermatzea; kaleratzeetan babesa izateko eskubidea; enplegatzailearen kaudimengabezia kasuetan, langileen kredituak bermatzea; familia erantzukizunak dituzten langileen aukera berdintasuna bermatzea; enpresetako langileen ordezkariak babestea; kaleratze kolektiboko prozeduretan informazioa eta kontsulta jasotzeko eskubidea kontuan hartzea; etxebizitzarako eskubidea eta pobreziaren eta bazterkeria sozialaren aurkako babesa ziurtatzea".

"Ez da ulergarria ezta eredugarria ere"

EH Bilduren Kongresuko bozeramailearen hitzetan, Europako Gutun Sozial eguneratua ez berrestea "ulertezina da eta ez da batere eredugarria" — Espainiako Estatua da oraindik berretsi ez duten 11 herrialdeetako bat—. Aizpuruak salatu du 1995eko Erreklamazio Kolektiboen Protokoloak ere onartu gabe jarraitzen duela gaur-gaurkoz, Espainiako Estatuak ez baitu sinatu ezta berretsi ere. "Eredugarria ez den talde baten parte da Estatua. Protokoloa Europako 15 herrialdetan dago indarrean: Frantzian, Portugalen, Belgikan, Kroazian, Zipren, Eslovenian, Finlandian, Grezian, Irlandan, Italian, Herbehereetan, Norvegian, Txekiar Errepublikan eta Suediaz", zehaztu du.

Aizpurua uste du bi hitzarmen horiek berresteak "gizarte-eskubideen babesean beharrezko aurrerapena" ekarriko lukeela, "enpleguaren, etxebizitzaren, osasunaren, hezkuntzaren, gizarte-babesaren eta ongizatearen arloko eskubideak modu zorrotzagoan babestuz"EH Bilduren diputatuak bere egin ditu sindikatuek eta gizarte-ekintzako hirugarren sektoreko erakundeek behin eta berriz eginiko aldarrikapenak, eta gogorarazi du bi hitzarmen horiek jarraipen zehatzak egiteko eta helegiteak jartzeko mekanismo berriak martxan jarriko lituzketela, "hitzartutako neurriak betetzen ez dituzten Estatuen aurrean esku hartzeko".

Giza eskubideekiko konpromiso irmoa

"Nazioarteko betebeharrak onartzea, itun aurreratuenak berretsiz, Estatuek giza eskubideekiko eta berme demokratikoekiko duten konpromisoaren adierazle ona da. 1996ko Europako Karta Soziala berretsi ez izanak agerian uzten du Estatuak demokraziarekiko eta giza eskubideen errespetuarekiko duen konpromiso eskasa", ohartarazi du EH Bilduko bozeramaileak. Hori dela eta, desoreka horri amaiera eman diezaiola galdegin dio ezkerreko indar subiranistak Espainiako Gobernuari, Europako beste herrialde batzuekin alderatuta sektore sozial ugariren eskubide sozialak "desabantaila eta desberdintasun agerikoan" daudela iritzita.

ALBISTEAK

Calvoren agerraldia eskatu dute EH Bilduk eta ERCk, Estatuak Juan Carlos Borboikoaren zerbitzura dauden pertsonen soldatak ordaintzen dituela baieztatu ostean

2021-01-14 17:11:00

Juan Carlos Borboikoaren ihesaldiaren harira, Espainiako Gobernuko presidenteordeak Ondare Nazionalaren "inplikazioa, gastuak eta jarduerak" Kongresuan azaltzea nahi dute ezkerreko indar subiranistek. "Zenbat diru publiko bideratzen da Abu Dhabira ihes egindako monarka espainiarra laguntzera? Zenbat langile ditu bere kargura soldatapean?", galdetu dute.

Argindarraren eta gasaren igoera "onartezinaren" aurrean esku hartzeko eskatu dio EH Bilduk Espainiako Gobernuari

2021-01-08 16:45:00

​Argindarraren prezioa %27 garestitu ostean, Euskal Herria Bildu Talde Parlamentarioak bi eskaera aurkeztu ditu gaur Kongresuan, Kontsumo ministroak eta Trantsizio Ekologikorako ministroak berehalako azalpenak eman ditzaten.

Militar ultrei pribilegio guztiak kentzeko eta pertsona 'non grata' izendatzeko eskatu du EH Bilduk, egoitza militarretara sarbidea debekatuz

2020-12-17 11:30:00

Legez besteko Proposamena aurkeztu du EH Bilduren Defentsako bozeramaile Jon Iñarrituk, Espainiako Gobernuari Espainiako indar armatuetan dagoen infiltrazio ultra sakoneraino ikertzeko eta memoria historikoa betetzen dela bermatzeko.

Aeronautika sektorea laguntzeko, eskubide sozialak zabaltzeko eta tren azpiegiturak berritzeko inbertsioak lortu ditu EH Bilduk

2020-11-26 11:44:00

Espainiako Gobernuak EH Bilduri onartu dizkion emendakinak krisi ekonomikoak kolpatutako sektoreak laguntzera eta tren azpiegiturak eraberritzera bideratuta doaz, besteak beste. Hego Euskal Herriko lau lurraldeetarako inbertsioak lortu ditu, orotara. EH Bilduk positibotzat jo du gobernuak azkenean etxegabetze guztiak bertan behera uzteko erabakia hartu izana EH Bildu, ERC eta Unidas Podemosen bultzadari esker.