Kongresua-Senatua

Osasun mentalak eragindako arazoen gorakadaz ohartarazi eta hitzemandakoa betetzeko eskatu dio EH Bilduk Madrili

EH Bilduren diputatu Iñaki Ruiz de Pinedok osasun mentala zaintzeko eskatu, eta politika publikoen erdigunean jartzearen alde egin du Osasun ministroaren aurrean: "Lehentasuna izan behar du: prebentzioa, arakatzeak, baliabideak eta arreta integrala".

| 2021-09-15 11:36:00

Pandemiaren ondorioek buruko osasun arazoak areagotu dituztela eta, ezkerreko subiranismoaren kezka eraman du gaur Kongresuko kontrol saiora Iñaki Ruiz de Pinedo EH Bilduren Arabako diputatuak. Azaldu duenez, gaur-gaurkoz, suizidioa da Hego Euskal Herriko heriotza-kausa nagusietako bat, urtean 200 heriotza baino gehiago eragiten baititu: Hego Euskal Herrian lau herritarrek egiten dute beren buruaz beste astero, eta Espainiako Estatuan 10 kasu gertatzen dira egunero.

"Zer egingo du Espainiako Gobernuak osasun mentaleko arazoen gorakada handiari aurre egiteko?". Ruiz de Pinedok Carolina Darias Osasun ministroari ohartarazi dio osasun mentalari aurre egiteko osasun sistemak gabezia larriak dituela giza baliabideetan eta baliabide ekonomikoetan; haren hitzetan, kasuen gorakada handia ez da behar bezala artatzen ari. "Osasun sistema ez dago osasun mentaleko arazoen hazkundeari erantzuteko prest", ziurtatu du. Horretarako, osasun mentala zaintzearen eta politika publikoen erdigunean jartzearen alde egin du EH Bilduko diputatuak: "Lehentasuna izan behar du: prebentzioa, arakatzeak, baliabide gehiago eta arreta integrala".
 

Errealitate kezkagarria


Ruiz de Pinedok "oso kezkagarritzat" jo du egoera, urte eta erdiko pandemiak eta etengabeko estresak eraginda. "Antsietate, depresio, suizidio saiakera eta, azken finean, sufrimendu patologiak areagotzen ari dira gurean". Diputatuak salatu duenez, COVID-19ren harira osasun mentalera bideratutako estrategia bereziak "oso mugatuak" izan dira, eta gaiari "alor publikotik" heltzeko apustua egin du. Ruiz de Pinedok Daria ministroari "promesak betetzeko eta lehenbailehen jarduteko" exijitu dio.

PSOEk eta Union Podemosek adostutako gobernu programan Osasun Mentalaren Estrategia eguneratzeko konpromisoa hartu zutela gogoratu du Ruiz de Pinedok, eta Pedro Sanchezek berak joan den martxoaren 17an jokabide suiziden prebentziorako estrategia bat garatzeko asmoa adierazi zuen. Gaur egun, ordea, ez da urrats sendorik egin arlo horretan. "Herritarrek ezin dute gehiago itxaron, ministra andrea", adierazi du Ruiz de Pinedok.

Behin behinekotasunari buruzko dekretuaren aurka bozkatu du EH Bilduk, sektore publikoan prekaritatea betikotu eta kaleratzeei ateak irekiko dizkiela ohartarazita

Espainiako Gobernuak ez ditu onartu ezkerreko indar subiranistak dekretuaren gabeziak zuzentzeko egindako proposamenak, eta EH Bilduk ezezkora jo du. Gobernuko ordezkarien negoziatzeko borondate falta salatu du Mertxe Aizpurua bozeramaileak, eta ziurtatu du onartutako dekretuak ez duela konpontzen behin-behinekotasunaren arazoa. Uste du, gainera, ziurgabetasuna areagotzen duela eta sektore publikoan "kaleratzeak eta azpikontratazioak egiteko ate" irekitzen duela.

| 2021-07-21 17:48:00

"Onartutako dekretuak ez du konponduko administrazio publikoan milaka langilek hainbeste urtetan jasan duten behin behinekotasunaren arazo larria. Bere horretan dirau, egoera aldatuko ez duen adabaki bat egiten saiatu diren arren. Dekretuak ez ditu aintzat hartu Europak gaiaren inguruan eginiko jarraibideak". EH Bilduren Kongresuko bozeramaile Mertxe Aizpurua irmo mintzatu da gaur, Kongresuan, langile publikoen behin behinekotasuna murriztu asmo zuen dekretuaren eztabaidan. Ezkerreko indar subiranista osatzen duten bost diputatuek dekretuaren aurka bozkatu dute, sektore publikoan "kaleratzeak eta azpikontratazioak egiteko atea irekitzen" duela iritzita.

Hala ere, jakinda dekretu txarra zela eta ez ziela erantzuten kaltetutako kolektiboaren behar eta eskaerei, EH Bilduk erantzukizunez jokatzea hobetsi du, eta dekretua nabarmen hobetuko lukeen "oinarrizko proposamen logiko" bat helarazi dio Espainiako Gobernuari, euskal sindikatuen eta langile publikoko taldeen eskaera nagusiekin. "Gure esku dagoen guztia egin dugu dekretua zuzendu eta hobetzeko, administrazioaren egiturazko behin behinekotasunaren arazoari erantzuteko eta konponbide integral baterako egiturazko neurriak planteatzeko", zehaztu du Aizpuruak.
 

Gobernuari proposatutako konpromisoak


Espainiako Gobernuak, ordea, akordio batera iristeko borondate faltak bultzatuta, uko egin dio dekretuaren gabeziak zuzentzeari, eta EH Bilduko diputatuek tramitazioaren aurka egitea erabaki dute. Hauexek dira EH Bilduk gobernuari helarazi dizkion lau konpromisoak; guztiak euskal gehiengo sindikalak, sozialak eta politikoak partekatzen dituen eskaerak:

  1. Egonkortze-prozesuen lehen fasea ez da kanporatzailea izango, merezimenduen fasera zuzenean sartu ahal izateko bidea zabalduz.
     
  2. Merezimenduen fasera zuzenean sartzea aldi baterako egoeran hiru urte baino gehiago daramatenak eta aldez aurretik aurretik hautaketa-prozesu bat gainditu dutenak.
     
  3. 2022ko Estatuko Aurrekontu Orokorren bidez berritze-tasa etetea, gutxienez %8ko behin-behinekotasunera iritsi arte; gaur egun %40tik gorakoa da.
     
  4. Nafarroak funtzio publikoaren arloan dituen eskumen guztiak gauzatu ahal izateko eskumen propioak errespetatzea. Erakundeen eskumenak ez urratzea, autonomia-erkidegoek eta haien administrazio publikoek aldi baterakotasun-egoeraren arabera beren finkatze-prozesuak definitzeko gaitasuna izan dezaten Madrilen esku hartzerik gabe.
     

"Horrela ez dira adostasunak lantzen"

Dekretua euskal erakundeen errealitate eta premiak kontuan hartu gabe onartu izana leporatu dio Aizpuruak gobernuari, euskal gehiengo sindikalarekin adostu gabe, langileen aldarrikapena aintzat hartu gabe eta Kongresuko indar aurrerakoiekin hitz egin gabe bidea egitea erabaki baitu oraingoan. "Zuek dekretu bat taxutu zenuten inolako elkarrizketarik abiatu gabe, inoren iritzia entzun gabe onartu zenuten, eta hona ekarri duzue, indar aurrerakoiek irentsi eta baiezko botoa emango genuelakoan. Bada, ez. Horrela ez dira gauzak egiten, horrela ez dira adostasunak lantzen, hau ez da politika egiteko modua. Gaur, berriro ere, kaltetuenak sektore publikoko langileak dira", salatu du.

Hego Euskal Herrian, orotara, sektore publikoko 70.000 langile baino gehiago daude aldi baterako kontratazioaren prekarietatea pairatzen dutenak, batez ere osasun eta hezkuntza sektoreetan. Behin-behinekotasuna %40tik gorakoa da gaur-gaurkoz. EH Bilduren aburuz, gaur onartutako dekretuak ez du lortuko zifra onartezin horiei aurre egitea. Kontrakoa: "Kaleratze eta azpikontratazioei ateak irekitzen dizkie, birjarpen-tasen bidez administrazioaren eta bere zerbitzuen funtzionamendu egokirako behar diren langileak izatea eragozten du eta prekarizazioa betikotzen du, besteak beste". Izan ere, behin-behinekotasuna eteteko aukera alde batera utzita, EH Bilduk argi dauka Espainiako Gobernuaren dekretuak "ziurgabetasuna" areagotuko diela egoera horretan dauden milaka pertsonei.

 

Elkarrizketarako borondate falta

EH Bilduko bozeramailea bereziki haserre eta kritiko agertu da Madrilek euskal sindikatuekin eta ezkerreko indar politikoekin erakutsi duen elkarrizketa faltagatik, eta honakoa ohartarazi dio Funtzio Publikoko ministroari: "Gogorra izan naiz, bai, gutxiengoan gobernatzea zer den ulertzea eta horren arabera jokatzea gustatuko litzaigukeelako. Zuek zarete taldeen babesa lortu behar duzuenak, ez alderantziz. Ez espero doako babesik ematea. Horrela ez da gobernatzen, ez da aurrera egiten, ezta gehiengo aurrerakoia finkatzen ere".

"Zuentzat elkarrizketa soziala deiturikoak ez du euskal gehiengo sozial eta sindikala ordezkatzen, eta, horren ondorioz, ez dio gure errealitate berezituari erantzuten. Inola ere. Euskal gehiengo sindikalak hasiera-hasieratik azalerazi zituen gaur onartutako dekretuaren gabeziak, eta zuzentzeko proposamenak ere egin zituen. Zuek ez zenituzten aintzat hartu, eta ez zineten negoziatzeko eseri ere egin", gogorarazi du Aizpuruak. EH Bilduko ordezkariak bihartik aurrera lanean hasteko eskatu dio Maria Jesus Montero ministroari, langileen eskaerei erantzungo dien dekretu on bat osatzeko Kongresuko tramitazioan. "Ez dezagun galdu beste aukera bat", esanez amaitu du hitzartzea.

EH Bilduk azalpenak eskatu dizkio Espainiako Gobernuari Muga meatze proiektuaren inguruan, Esako urtegian izan dezakeen eraginaz kezkatuta

Kongresuan galdera sorta bat aurkeztu eta Ebroko Konfederazio Hidrografikoaren presidentearen presazko agerraldia eskatu du, besteak beste, Bel Pozueta diputatuak.

| 2021-07-16 16:34:00

Euskal Herria Bildu talde parlamentarioak galdera sorta bat aurkeztu du ostiral honetan Kongresuan Mina Muga ustiapen proiektuari buruz, enpresak Nafarroako agintarien aurrean aurkeztu duen egun berean; 2024tik aurrera potasa ateratzeko baimena lortu du enpresak.

Bel Pozueta diputatuak azalpenak eskatu ditu Esako urtegiaren segurtasunari buruzko txostenaren amaiera hainbeste luzatzeko dauden arrazoien inguruan, eta Espainiako Gobernuari eskatu dio neurriak har ditzala txosten horren harrera aurreratzeko. "Ezagutzen al da amaiera data?", galdetu dio gobernuari idatzizko hainbat galderen bidez.

Halaber, Maria Dolores Pascual Ebroko Konfederazio Hidrografikoaren (CHE) presidentearen eta Francisco Gonzalez Lodeiro Espainiako Geologia eta Meatzaritza Institutuko (IGME) presidentearen premiazko agerraldia eskatu du Pozuetak. Bi kasuetan, Muga meatze proiektuak Esako urtegiaren ezegonkortasunean duen eragina azaltzea nahi du EH Bilduk, baita ustiapena baimentzeko egindako txostenen berri emateko ere. Eskaerak onartuz gero, agerraldi horiek Kongresuko Trantsizio Ekologikoaren Batzordean egingo lirateke.

Nafarroako diputatuak gogorarazi duenez, 2015ean Muga meatze-ustiapenerako proiektua aurkeztu zenetik gai "errepikakorra" izan da alegazioetan, erakunde ofizialek (IGME edo CHE) eta gainerako alegazio-egileek behar duten garrantzia dela eta.

"Proiektuaren ibilbide osoa eta haren alegazioak ikusita, eta erakundeek beraiek Esako urtegiaren hegalaren ezegonkortasuna aitortzen dutela jakinda, harrigarria da zuzentzeko eta txosten berriak eskatzeko asmoa izatea, onargarria den zerbait lortu arte", ohartarazi du diputatuak, eta honakoa gaineratu: "Muga meategiari ustiapen baimena emateak are beharrezkoagoa egiten du eskuduntza duen ministerioak eskatutako txostenak eta azterlanak lehenbailehen argitaratzea eta ezagutaraztea".

Pozuetak ohartarazi du, gainera, Mina Murga proiektuak ondorioak izan ditzakeela eta zuzenean eragin dezakeela Esa urtegiaren ezegonkortasunean: "Egoera horrek iradokitzen du aurkeztutako azterlanak onartu direla, proiektuaren kokapenari eta urtegiari buruzko azterketa geologiko, sismiko eta hidrologikoan oinarrituta, baina ez du kontuan hartzen zer ezegonkortasun-egoera daukan; izan ere, proiektuak aurreikusten du galeriak zulatzea Esako urtegitik kilometro batera", amaitu du.

COVID pasaportea lortzeko proben doakotasuna bermatzeko eskatu dio EH Bilduk Espainiako Gobernuari

Oraindik txertorik jaso ez duten herritarrengan sor dezakeen diskriminazioaz kezkatuta, EH Bilduk galdera egin dio Espainiako Osasun ministroari, bidaiatzeko ziurtagiri digitalaren harira. Jon Iñarritu diputatuak eskatu dio baliabide propioak jar ditzala COVID pasaportea lortzeko testen doakotasuna bermatzeko.

| 2021-06-23 11:59:00

Espainiako Estatuan COVID pasaportea indarrean sartu berritan, ziurtagiri digitala erabili ahal izateko proben doakotasuna eskatu du gaur Kongresuan Euskal Herria Bildu Talde Parlamentarioak. Oraindik txertorik jaso ez duten herritarrengan sor dezakeen diskriminazioaz kezkatuta, Jon Iñarritu diputatuak galdera egin dio gaur Kongresuko kontrol saioan Carolina Darias Osasun ministroari. Iñarrituk Espainiako Gobernuari eskatu dio baliabide propioak jar ditzala COVID pasaportea lortzeko testen doakotasuna bermatzeko.

"Gazteena da uda honetan gehien bidaiatuko duen sektorea, txertaketa prozesuak azkenetarikoak izango direlako. Hori bai, bidaiatu nahi badute, dirutza ordaindu beharko dute, baliabide eta erosahalmen txikiena dutenak izan arren", azaldu du. Bere erantzunean, Dariasek uko egin dio COVID pasaportea lortzeko proben doakotasuna bermatzeari, nahiz egungo protokoloa gazteentzat bereziki kaltegarria izan. "COVID probak egiteko protokoloa ziurtagiri digitala indarrean sartu aurreko berdina izango da; oraingoz, behintzat", adierazi du Osasun ministroak, EH Bilduk eginiko proposamenari atea itxiz.

Iñarrituk gobernuari galdegin dio bere gain har ditzala COVID proben kostuak, oraindik txertoa jaso ez dutenak ez diskriminatzeko. Horretarako, EH Bilduk Espainiako Gobernuari eskatu dio baliabide eta funts propioak jar ditzala, Espainiako Estatuan bizi diren eta COVID ziurtagiri digitala erabili nahi duten herritar guztiei proben doakotasuna ziurtatzeko. "Ministra anderea, txertaketa prozesuak iraun bitartean, kostu horiek erakundeen gain uzteko eskatzen dizugu. Zentzuzkoa da eta, gainera, hilabete batzuetarako soilik izango da. Europako beste herrialde batzuek egin dute jada", azaldu du Iñarrituk.

Funts propioak doakotasunerako

EH Bilduren diputatuak uste du premiazkoa dela oraindik txertoa jasotzeko aukerarik izan ez duten herritarrengan sor dezakeen diskriminazioa iraultzea. Izan ere, gaur-gaurkoz, immunitatea lortu ez duten herritarrek test negatibo bat aurkeztu beharko dute nahitaez bidaiatu ahal izateko, proba horri dagozkion gastuak ordainduz. "Diskriminazio egoera baten aurrean gaude oraindik txertoa hartu ezin izan duten guztientzat, txertoa jaso duten pertsonek edo immunitatea dutenek ez dituzten karga ekonomikoak hartu beharko dituztelako beren gain", ohartarazi du EH Bilduren diputatuak. Testuinguru horretan, EH Bilduk Legez besteko Proposamena aurkeztu zuen hilabete hasieran, Kongresuko Osasun batzordean eztabaida dadin.

Iñarrituk gogorarazi du Europako Parlamentuak oniritzia eman diola berriki pasaportea erabiltzeko beharrezko probari doakotasunari eta Europako Batasunak ere neurriak hartu dituela. "Baina testen prezioa merkatzera bideratutako 100 milioi euroak ez dira aski, are gehiago txertaketa prozesuaren egungo bilakaera kontuan hartuta", salatu du EH Bilduko diputatuak.

Frankismoaren inpunitatearekin amaitzeko, Memoria Demokratikoaren Legea motz geratzen dela ohartarazi dio EH Bilduk Calvori

Memoria Legearen gabeziak salatu ditu EH Bilduren Nafarroako diputatu Bel Pozuetak, eta anbizio handiagoa eskatu dio Calvori, frankismoaren zigorgabetasunarekin amaitzeko. "Ez dezagun egun bat gehiago galdu. Frankismoaren zigorgabetasuna amaitzeko garaia da, biktima guztiei egia, justizia eta ordaina bermatuz", ziurtatu du Pozuetak. Calvok ez du babestu botere judizialaren txostena.

| 2021-06-16 11:32:00

"Bat dator Espainiako Gobernua Botere Judizialaren Kontseilu Nagusiak Memoria Demokratikoaren Legearen aurka eginiko txostenarekin?". Hala mintzatu da EH Bilduren Nafarroako diputatu Bel Pozueta, gaur, Espainiako Gobernuko presidente Carmen Calvori eginiko galderan. Bete beharrekoa ez bada ere, botere judizialaren txostenak lege aurreproiektuaren aurka jotzen du Franco Fundazioa bezalako elkarte frankisten debekua jasotzeagatik.

Calvok erantzun du ez datorrela bat Botere Judizialaren Kontseilu Nagusiaren idatziarekin, eta adierazi du ez duela atzera egingo; Espainiako presidenteordeak adierazpen askatasunetik kanpo kokatu du frankismoa goratzea eta Memoria Legean horrela jasoko du, txostenak txosten. Honela erantzun dio EH Bilduren galderari: "Espainiako Gobernuak ez du bat egiten eta ez du bat egingo txostenak dioenarekin. Totalitarismoa eta Francoren diktadurari gorazarre egitea ez da adierazpen askatasuna; irain zuzena da justizia eske dauden milaka eta milaka biktimei".

78ko erregimenaren zutabeak

Pozuetaren hitzetan, botere judizialak "frankismoaren apologia hutsa" egin du idatzi horretan. "Kosta egiten da sinestea Estatu demokratiko batean, objektibotasun judiziala zaindu beharko lukeen botereak, diktadurako krimen frankisten defentsa sutsua egitea. Imajinatzen duzu Adolf Hitlerren aldeko elkarte bat Alemanian? Pentsaezina litzateke, ezta?. Bada hemen, Estatu honetan, epaileen berme eta babesarekin geratzen da hori oraindik ere".

EH Bilduko diputatuaren iritziz, horrek agerian uzten du 78ko erregimenaren zutabeak, justizia kasu, "demokratizatu gabe" jarraitzen duela, Estatu honen bilakaera judizial eta politiko osoa baldintzatuz. "Bai, badirudi Espainiako justiziak adierazpen askatasuna errespetatzen duela, baina frankistena bakarrik", gaineratu du.

Anbizio handiagoa

Errealitate horren aurrean, Memoria Demokratikoaren Legea "anbizio handiagokoa" izateko eta ahalik eta lasterren tramitatzeko eskatu du EH Bilduk, ehunka elkarte memorialistak eta baita Amnesty Internationalek ere eginiko eskaerak aintzat hartuta. "Frankismoaren zigorgabetasuna amaitzeko garaia da, biktima guztiei egia, justizia eta ordaina bermatuz", nabarmendu du diputatuak.

Pozuetaren aburuz, Memoria Demokratikoaren Legea "motz" geratzen da, "partziala, interesatua, baztertzailea eta ez-inklusiboa" izaten jarraitzen duelako, frankismo garaiko Sekretu Ofizialen Legearen ondorioz. "Amnistiaren Legearen aplikazioa eta frankismoaren krimenen preskripzioa dela eta, biktima guztientzako justizia ukatzen jarraitzen du. Gainera, aurreproiektuak jasotzen duen erreparazioa sinboliko-administratiboa da, eta ez ditu Estatu terrorismoaren biktimak aintzat hartzen ezta asetzen ere", salatu du.

Espainiako Gobernuko presidenteordeari eskaera zuzena eginez amaitu du hitzartzea Pozuetak: "Ez dezagun egun bat gehiago galdu. Egin dezagun posible milaka biktimek beren eskubideak aitortuta ikustea. Urte gehiegi daramatzate zain". EH Bilduri erantzunez, Calvok iragarri du aurreproiektua "laster" iritsiko dela Kongresura, tramitazioa lehenbailehen has dadin.

ALBISTEAK

39 urteko atzerapenen ostean, ikerketa zientifiko eta teknikoari buruzko eskumena Nafarroara transferitzeko eskatu du EH Bilduk

2021-09-29 13:13:00

Bel Pozueta diputatuak eraman du gaia Kongresuko kontrol saiora, eskualdatzea lehenbailehen gauza dadila galdegiteko. "Eskumenak transferitzeko exijitzen diogun irmotasun berarekin exijitzen diogu gobernuari errespeta dezala Nafarroako herritarren nahia eta gure parlamentuaren burujabetza".

Desagertutako migratzaileen senideei arreta emateko bulego bat sortzea onartu du Kongresuak, EH Bilduk bultzatuta

2021-09-27 15:55:00

EH Bilduk aurkeztutako Legez besteko Proposamena onartu du Kongresuko Barne Batzordeak, desagertutako migratzaileen senideei arreta, bilaketa, erreskate, identifikazio eta prebentzio lanetan lagunduko dien bulego bat sortzeko. Jon Iñarritu diputatuak bere egin du eragile humanitarioen eskaera, eta adierazi du bulegoaren sorrera oso baliagarria izango litzatekeela familia askok pairatzen dituzten oztopo administratibo eta burokratikoak arintzeko.

Txertoen patenteak aldi baterako altxatzea onartu du Kongresuak, EH Bilduren ekimenez

2021-09-23 20:13:00

Kongresua txertoen patenteak aldi baterako altxatzearen alde ager dadila lortu du gaur EH Bilduk, ekoizpena hirukoiztu eta munduko txoko guztietara irits daitezen. "Munduko herritar gehienak ahalik eta azkarren immunizatzen ez baditugu, birusa mutatu egingo da eta txertoek eraginkortasuna galduko dute", azaldu du egitasmoaren egile Iñaki Ruiz de Pinedo diputatuak.

Txertoen patenteak aldi baterako altxatzea onartu du Kongresuak, EH Bilduren ekimenez

2021-09-23 18:27:00

Kongresua txertoen patenteak aldi baterako altxatzearen alde ager dadila lortu du gaur EH Bilduk, ekoizpena hirukoiztu eta munduko txoko guztietara irits daitezen. "Munduko herritar gehienak ahalik eta azkarren immunizatzen ez baditugu, birusa mutatu egingo da eta txertoek eraginkortasuna galduko dute", azaldu du egitasmoaren egile Iñaki Ruiz de Pinedo diputatuak.