AKTUALITATEA

AHTren lanek Lezetxikiri kalterik egin ez diotela baieztatzeko zer azterlan zehatz egin dituen galdetu dio EH Bilduk Foru Gobernuari

| 2023-02-03 14:29:00

2023ko urtarrilaren amaieran, Debagoiena eskualdeko espeleologo batzuek salatu zuten AHTaren obrek kalte handiak eragin dituztela Arrasateko Lezetxiki kobazuloan. Argazkiak eta bideoak ere egin dituzte salaketa horren froga gisa.

Gogoratu behar da Lezetxiki kobazuloan Euskal Herriko giza-aztarna zaharrenak aurkitu zirela, gutxienez 164.000 urteko antzinatasuna dutenak.

Salaketa horiek publiko egin bezain pronto, ordea, Gipuzkoako Foru Aldundiak ohar bat atera zuen esanez lan horiek ez dutela kalterik eragin kobazuloan. Gaiaren garrantzia kontuan izanda, komunikatu batez harago, Kultura diputatuak azalpen zehatzak eta fidagarriak eman behar dituela uste du EH Bilduren batzarkide taldeak, eta horregatik Gipuzkoako Batzar Nagusietan azalpenak ematera interpelatzen dugu.

Zehazki, Gipuzkoako Kultur diputatu Mari Jose Telleria interpelatzen dugu azaldu dezan AHTaren obrek Lezetxiki kobazuloari kalterik eragin ez diotela baieztatzeko ze ikerketa eta azterketa zehatz egin dituen, eta ikerketa eta azterketa horiek emaitzen zehaztasunak eman ditzan.