Albisteak

Urriaren 28an hasiko dira Getxoko EH Bilduk antolatutako (Parentesiak) jardunaldiak


Urriaren 28an izango da lehenengo ekitaldia, Areetako elkartegian, krisi ekosozialak sortutako erronkei buruz berba egiteko. EH Bilduko legebiltzarkide Mikel Oterok, Eako alkate Iratxe Arriolak eta Sukar Horia taldeko Hodei Rodriguezek parte hartuko dute.

| 2021-10-19 10:11:00

Hausnarketa bultzatzeko "Parentesiak" jardunaldiak antolatu ditu Getxoko EH Bilduk udazken honetan. Urriaren 28an hasi eta azaroaren 11ra arte luzatuko dira, eta mahainguru hauetan lau gai nagusi landuko dira: krisi ekosoziala, etxebizitza eskubidea, zaintzak eta tokiko ekonomia. Bertan, herri-mugimendu, erakundeetako ordezkari eta hainbat adituk parte hartuko dute.

Lehenengo parentesia krisi ekosozialaren erronkekin lotuta egongo da. Urriaren 28an izango da, 18:30ean, Areetako elkartegian (Ogoño kalea, 1). Osasun-krisia izan dugu denon ahotan azken hilabeteotan, baina ezin dugu ahaztu ate joka dugun beste krisi larri bat: larrialdi klimatikoa. Beharrezkoa da lehenbailehen urratsak ematea trantsizio ekologikorantz, sistema neoliberal eta basati hau iraultzea beranduegi izan baino lehen. Eremu lokaletik ere gure ekarpena egin dezakegu norabide horretan.

Urriaren 28an honetaz guztiaz hausnartuko dugu: Mikel Otero EH Bilduko legebiltzarkideak testuingurua kokatuko digu; Eako alkate Iratxe Arriolak uraren kudeaketa publikoaz berba egin du (Busturialdeko Ur Patzuergoko presidente ohia izan baita) eta Hodei Rodriguezek Sukar Horia taldearen izenean irakurketa egingo digu herri-mugimenduaren ikuspegitik.

Bigarren parentesia azaroaren 6an helduko da, 18:30ean Romo Kultur Etxean, eta zaintzekin lotuta egongo da. Zaintzak gure bizitzen sustengu nagusia dira, ekonomia eta pertsonen bizitzak eusten eta euren garapena bermatzen dute. Hala ere, askotan, gehien gutxiesten diren lan eta enpleguak dira. Getxon sektore honetan lan egiten duten emakume* asko daude eta askotan euren lan baldintzak urratuak izaten dituzte. Arazoa da Euskal Herrian, eta gure kasu zehatzean EAEn, ez daukagula zaintzak arautuko dituen sistema publikorik. Gai horretan arakatzera goaz!

Azaroaren 6an EH Bilduk irudikatzen duen zaintza sistema publiko-komunitarioa hurbilagotik ezagutu ahal izango dugu, eta baita etxeko langileen konbenio propioaren alde lanean ari diren LAB eta Trabajadoras no domesticadasen esperientziak. Azkenik, Malen Etxea emakume migratuen elkartetik etxe barneko lanari buruzko gogoeta eta ahalduntze pertsonal eta kolektiborako hainbat modu, emakumeen* aurkako indarkeriarik gabeko bizitzaren helburuak lortzeko.

Hirugarren parentesian etxebizitza izango dugu berbagai. Azaroaren 11n izango da, 18:30ean, Fadurako areto nagusian. Askotan esan dugu: etxebizitza da Getxok duen arazo larrienetako bat. Asko eraiki da gure herrian, landak txikitu dira, urbanizazioak sortu dira... dena espekulazioaren mesedetan. Getxon Euskal Herriko etxebizitzarik garestienak ditugu, 900 etxebizitza huts baino gehiago, pisu turistikoak ugaritzen ari dira... Badago beste modu batera kudeatzerik?

Azaroaren 11n mahainguru interesgarria izango dugu honetaz hausnartzeko. Karlos Renedo arkitektoak irakurketa orokorra egin ostean, esperientzia bi ezagutzeko aukera izango dugu: Usurbileko etxebizitza kolaboratiboak Agurtzane Solabarrietaren eskutik eta Bartzelonako La Morada LGTBI+ etxebizitzen errealitatea (online bidez).

Osasun-krisia aipatu dugu, baita krisi klimatikoa ere... eta ezin utzi aipatzeari krisi ekonomikoa. Horrekin lotuta antolatuko dugu laugarren parentesia, azaroaren 17an, 18:30ean, Villamonte Kultur Etxean. Gogor kolpatu ditu gure herriko hainbat sektore, tartean, dendari txikiena. Herri bizia nahi dugu, bertan bizi eta baita lan egiteko ere. Getxo "lo egiteko" herri izatea nahi duten horretan, nola bultza dezakegu tokiko ekonomia ikuspegi sozialetik gure herrian?

Azaroaren 17an honetaz hausnartuko dugu Iker Casanova EH Bilduko legebiltzarkidearekin eta Joseba Garmendia EHUko irakaslearekin. Horrez gain, Hernaniko zinegotzi Patxi Ibargurenek euren herriko esperientzia kontatuko digu, tokiko txanponaren filosofia jarraituz.

Jardunaldien hizkuntza nagusia euskara izango da, baina itzulpengintza zerbitzua egongo da eskuragarri behar duenarentzat. Ez da beharrezkoa aldez aurretik izena ematea.