AKTUALITATEA

| 2025-03-26 09:25:00

EH Bilduk Berango eta Getxo artean dagoen Mimenagako padura ekologikoki berreskuratzea proposatuko du bi udalerrietan, karbono hustuleku bihurtzeko asmoz. Gaur egun espazio hori ahaztuta eta degradatuta dago, porlanez beteta, inguru naturala den arren. Hainbat urtetan Marel-Renault tailerrak egon ziren bertan, baina tailerrak itxi zirenetik ingurua ahaztuta dago. EH Bilduk proposatzen du "naturari dagokiona" bueltatzea eta padura ekologikoki berreskuratzeko urratsak ematea: porlana ezabatu, bertako baso eta landareak landatu, putzuak sortu, ibilbide naturalak diseinatu... Horrela, getxoztar eta berangoztarrentzat berdegune berri bat sortuko litzateke, eta Mimenaga karbono hustuleku bihurtuko litzateke.

EH Bilduk mozioak aurkeztuko ditu bai Getxon bai Berangon; Getxon martxoaren 27an bertan bozkatuko da. Kontuan hartu behar dugu Mimenaga padura bat dela eta, beraz, uholdeak pairatzeko arriskua duela, urez betetzen baita euri asko egiten duenean. Gainera, inguru hori naturalizatuko balitz (Larrabasterrako Urko inguruan bere garaian egin zen bezala), lagunduko luke Getxoko beste leku batzuetan ere uholdeak ekiditen, ura bertan bilduko litzateelako.

2021ean proposatu zuen lehen aldiz EH Bilduk Mimenaga berreskuratzea, baina urte horretan Getxo eta Berangoko Udalek mozioaren kontra egin eta adierazi zuten beharrezkoa zela bien artean plangintza adostea. Zoritxarrez, geroztik ez da inolako urratsik eman, Mimenagaren egoera gero eta okerragoa da eta bertan espekulazioari ateak irekitzeko arriskua handitzen ari da, ikusita bi Udalek sustatzen duten eraikuntza masiboa. Hori dela eta, beranduegi izan baino lehen, EH Bilduk proposatu du kontrako norabidean joatea eta bi herrien artean dagoen inguru natural hau babestu eta balioan jartzea.