AKTUALITATEA

| 2023-12-13 08:44:00

EH Bilduk Getxoko osoko bilkuran aurkeztuko du itsasadar azpiko tunela geldiarazteko mozioa, aste honetan bertan proiektuaren ingurumen-txostena ezagutu ondoren. Bizkaiko Foru Aldundiaren dokumentu honek jasotzen duen bezala, azpiegitura faraoniko berri horrek trafikoa % 33 handitzea eragin lezake, ibilgailu pribatua erabiltzea lehenesten du (eta larrialdi klimatikoari aurre egiteko estrategiaren aurka doa), Artatzako parkearen zati handi bat suntsituko luke (gaur egun birika berdea da Getxo eta Leioa artean) eta inguruko bizilagunei kalte ugari eragingo lizkieke: zarata nabarmen areagotzea, oinezkoentzako loturak desagertzea, espaloietan 3 metrotik gorako pantailak ezartzea, bost urtez luza daitezkeen obrak, Artaza-Romo institutuko patioaren zati bat suntsitzea, etab.

Egoera horren aurrean, EH Bilduk mozio bat aurkeztuko du Getxoko Udalaren abenduko osoko bilkuran, proiektua geldiarazteko eskatuz. Artazako biribilgunearen inguruan (Antiguo Golf, Neguri...) eta Artaza-Romo Institutuan ezinegona eta kezka sortu du azpiegitura honek. Proiektuaren aurkako alegazioak aurkeztu dituzte eta oso kezkatuta daude proiektuak inguruan sor ditzakeen arazoengatik: oinezkoentzako loturak nolakoak izango diren, obrek nola eragingo duten, Artazako parkea zein egoeratan geratuko den, etxebizitzen inguruko horma eta pantailen inpaktua, etab. Izan ere, proiektu hau guztia herritarren inolako parte-hartzerik gabe gauzatu da. Artaza inguruan bizi diren bizilagunek ez dakite nola geratuko den euren etxebizitzen ingurua, nola eragingo dien tunelak eta aurretiko obrak...

EH Bildutik ere bat gatoz kezka horrekin, eta uste dugu beste lehentasun batzuk izan beharko genituzkeela mugikortasunean, are gehiago kostua (edo xahutzea) 400 milioi euro baino gehiagokoa izanik, gainkostuak gehitu gabe. Aurrekontu horrekin, garraio publikoaren zerbitzua hobetu liteke, metroaren maiztasuna handitu Uribe Kostan, aireporturako edo Zamudioko parke teknologikorako lotura berriak, metroaren ibilbidea lurperatu, bidegorrien sarea handitzen jarraitu... Bizi dugun larrialdi klimatikoaren testuinguruan, are zentzu gutxiago du makro-azpiegitura hau eraikitzeak; izan ere, ibilgailu pribatuaren erabilera lehenesten jarraitzen du, eta hori guztia teorian autoz 10 minutuko ibilbidea "aurrezteko". Europako hainbat hiritan emisio gutxiko eremuak definitzen eta ibilgailu pribatua erabiltzeko oztopoak jartzen ari diren bitartean... hemen Bizkaian alfonbra gorria jartzen ari zaio.