Gasteiz

Mugikortasuna eta klima aldaketa izango dira EH Bilduk udal legealdi berrian sustatuko dituen lehen ekinaldiak

Miren Larrionek udal gobernu berriaren borondate falta gaitzetsi du batzordeetako lehen saioak uztailean egin ahal izateko

| 2019-07-05 11:13:00

EH Bilduk ezagutzera eman ditu gaur udal taldeak Gasteizko Udaleko legealdi berrian defendatuko dituen lehen ekinaldi politikoak. Hain zuzen ere, koalizioak iragarri du hiru mozio aurkeztuko dituela lehenbiziko ohiko udalbatzan, heldu den uztailaren 19an, mugikortasuna eta klima aldaketa hizpide hartuta. EH Bilduko udal bozeramaileak, Miren Larrionek, gogoratu du hauteskunde kanpainan defendatu zituen ardatzetako bi izan zirela: «Udal gobernuak bere lan ildoak irail arte jakinaraziko ez dituen arren, uste dugu beharrezkoa dela lehen momentutik ekinaldi adierazgarriak jartzea martxan herritarrei begira, eta hori izango da EH Bilduren lehentasuna».

Larrionek agerraldia egin du Amancay Villalba eta Felix Gonzalez zinegotziekin batera. Villalbak proposamena aurkeztu du Gasteizko Udalak larrialdi klimatikoaren egoera deitzen aintzindaria izan dadin, honezkero koalizioak Eusko Legebiltzarrean aurkeztu duen mozioari jarraituz. EH Bilduren ustez, beharrezkoa da urtebete baino lehenago Klima Aldaketaren Aurkako Borroka Plana berrikustea, eta dokumentu berrian helburu gisa finkatzea karbono isurketetan neutroa izango den hiria lortzea. Era berean, hiru hilabeteko epean udalean lan talde bat eratzea nahi du, larrialdi klimatikoaren arazoari heltzeko.

«Karbonoan neutroa den Gasteiz baterako bidea ahalik eta azkarren egin behar dugu, eta helburua lortzeko tresna ahalik eta eraginkorrenak izan behar ditugu eskura. Ez da nahikoa Ingurumen departamentuari izena aldatzea eta horren ordez Klimaren aldeko Ekintza deitzea. Politika handinahitsuekin arazoari heltzeko unea da, klima aldaketaren aurkako borrokan benetako Green Capital aitzindaria izan gaitezen», zehaztu du Villalbak.

Mugikortasunari dagokionez, EH Bilduren udal taldeak bi mozio aurkeztuko ditu, trenaren lurperatzeari eta hiriko ekialdea eta mendebaldea garraio publiko bidez lotzeko moduari buruz. Espainiako Sustapen Ministerioak lurperatzeari buruzko azterlan informatiboa bukatu duela iragarri ondotik, koalizioak proposatuko du lurperatzea aztertzeko udal lantaldea berreskuratzea, legealdi amaierarekin batera bertan behera geratu ondoren. «Lantalde honek, EH Bilduk eskatuta osatu zenak, izan behar du proiektuari buruzko berritasun guztiak azaltzeko eta partekatzeko udal espazioa. Talde guztiek informazio ofizialerako sarbidea izan dezaten organo egokia da», argudiatu du Gonzalezek.

Hirugarren eta azken mozioaren bidez, proposatuko da hiriaren ekialdea eta mendebaldea, Salburua eta Zabalgana, lotuko duen garraiobidea aukeratzeko galdeketa herritarra antolatzea: tranbia edo autobus elektriko adimenduna. «Biak dira hirian martxan egongo diren garraioak. Biek dituzte abantailak eta eragozpenak. Erabaki estrategikoa da, eta aukera ezin hobea da hiritarrei ahotsa emateko zein nahiago duten erabaki dezaten, informatutako eztabaida baten ondoren. Hirian inoiz egin den lehen galdeketa litzateke, gainera, eta aurrerapausu oso nabarmena litzateke parte-hartzean», azpimarratu du Gonzalezek.

Azkenik, Larrionek gaitzetsi du udal gobernuaren asmoa dela batzordeen saioak irail arte ez abiatzea, atzoz geroztik ofizialki martxan badaude ere. «Bistan da hiria ez dela gelditu, hauteskunde sasoia izanagatik, eta udal arduradun berriei galdetu eta azapenak eskatu nahi dizkiegun hainbat gai baditugu honezkero esku artean».

EH Bilduk bost batzordeko lehendakaritza izango du 2019-2023 udal legegealdi berrian

Lurralde, klimaren aldeko ekintza, euskara eta kultura, ekonomiaren sustapena, eta iradokizun batzordea gidatuko dituzte zinegotziek

| 2019-07-04 11:12:00

Gasteizko Udalbatzak 2019-2023 legealdian izango duen antolakuntza onartu du gaur. Hain zuzen ere, udal jarduera zuzenduko duten 11 batzordeen egitura onartu da. Hauteskundeen emaitzei jarraituz, oposizioko lehen indarra da EH Bildu, eta udal taldeko sei zinegotziek bost batzorde gidatuko dituzte.

Amancay Villalba bi batzordetan lehendakaria izango da: Lurraldea (Hirigintza batzorde ohia) eta Ekonomiaren sustapen, enplegu, merkataritza, turismo, eta sozietate publikoak. Bietan lehendakariorde ariko da Rocio Vitero. Klimaren aldeko ekintza (Ingurumena) eta nekazaritza eremuko batzordeko burua Iratxe Lopez de Aberasturi izango da. Felix Gonzalez izango da lehendakariordea. Euskara, kultura, hezkuntza, kirola eta osasun batzordeari dagokionez, Alberto Porras ‘Titos’ zinegotziaren ardurapean geratuko da, Iradokizun eta erreklamazio batzordea bezala. Bi batzorde horietako lehendakariordeak Iratxe Lopez de Aberasturi eta Rocio Vitero izango dira, hurrenez hurren.

Koalizioak, halaber, udaleko sozietate publikoetan izango dituen kontseilariak izendatu ditu. Ensanche XXI Zabalgunean Felix Gonzalez eta Unai Fernandez de Betoño ariko dira. Tuvisa garraio enpresa publikoan Felix Gonzalez eta Javi Nuñez izango dira kontseilariak. Gonzalez, gainera, koalizioaren ordezkaria izango da Gilsan. Azkenik, Amvisa uraren enpresa publikoan kontseilari izango dira Amancay Villalba eta Josu Encina.

 

 

EH Bilduk salatu du gizarte zerbitzuetan egindako poliziaren identifikazio bat kanporatze agindu batekin amaitu dela

Rocio Vitero zinegotziak azpimarratu du gizarte zerbitzuen babesa eta laguntza eskatzera doan pertsona batek ezin duela atxilotuta amaitu

| 2019-06-21 12:15:00

EH Bilduk jakin ahal izan duenez, joan den ekainaren 15ean, udalbatza berria eratu zen egunean bertan, Larrialdi Sozialeko Udal Zerbitzuen (SMUS) erabiltzaile bat identifikatu zuen Udaltzaingoak. Ondoren, Espainiako Poliziaren komisariara eraman zuten, eta han atxilotu, ziega batean sartu, eta kanporatua izateko dosierra jakinarazi zitzaion.

Gertatutakoa oso kezkagarria da, kontuan hartuta SMUSen erabiltzaileak ahuldade egoera berezietan daudela. «Gasteizen gizarte zerbitzuen babesa eskatzen duzunean, atxilotua izan zaitezke. Zerbitzu horien erabiltzaileak kriminalizatzen ari gara? Larrialdiko arreta zerbitzu horiek ezin dira sarbide bihurtu atxiloketak egiteko edo arrazan nahiz jaiolekuan oinarritutako eskubideen urraketarako», azaldu du Rocio Vitero zinegotziak.

Ez da halako gertaera bat jazo den lehenbiziko aldia. Joan den martxoaren 4an orduko Politika Sozialen zinegotzi arduradunak, Peio Lopez de Munainek, agerraldia egin zuen batzorde batean, antzeko salaketa bati erantzuteko. Zinegotziak ukatu egin zuen egoera irregularrean dauden pertsona atzerritarrak identifikatzeko protoloak indarrean daudela, esan zuen identifikazioek ez dutela «inolaz ere» pertsona horien legezko egoera kontrolatzeko helburua, eta ziurtatu zuen «kasu bakana» izan zitekeela. Ekainaren 15eko gertaerek agerian utzi dute ez zela izan kasu isolatu bat.

EH Bilduren ustez, gizarte zerbitzuetarako sarbidea ezin da mugatu pertsonen erresidentzia egoeraren arabera, eta Udaltzaingoak gizarte zerbitzuen egoitzetan egiten duen segurtasun jarduna ezin da inolaz ere erresidentzia egoera hori egiaztatzeraino zabaldu. Koalizioak politika sozialen eta segurtasunaren arduradun berriei azalpenak eskatuko dizkie, ahal bezain pronto.

Kargua hartu dute EH Bilduren sei zinegotziek, era horretan udal taldea oposizioko buru bihurtuta Gasteizen

Larrionek ziurtatu du koalizioak lanean jarraituko duela gobernu alternatiba aurrerakoi bat sortzeko eta hiriaren egoera hobetzeko

| 2019-06-15 12:22:00

EH Bilduk joan den maiatzaren 26ko hauteskundeetan lortu zituen sei zinegotziek hautetsi modura dagozkien karguak bereganatu dituzte gaur, udal berria osatzeko saioan. Kargua agintzeko honako formula erabili dute seirek: «Legeak hala behartuta eta Euskal Herriko Errepublika aldarrikatu arte, hitza ematen dut». Ordezkaritza honekin, EH Bildu udalerriko oposizioko lehen indarra izango da.

Zerrendaburu eta alkategai Miren Larrionek jarraituko du udal taldeko bozeramaile lanetan, eta Felix Gonzalez izango da eledun ordezkoa. Karguan jarraituko du Iratxe Lopez de Aberasturi zinegotziak, halaber. Taldeak hiru kide berri izango ditu: Rocio Vitero, Alberto Porras ‘Titos’, eta Amancay Villalba. Ordezkaritza politikoan kargu bat izango duten lehen aldia da.

EH Bilduk 24.500 boto baino gehiago lortu zituen maiatzaren 26ko hauteskundeetan, sekula baino gehiago, eta oinarri horrekin jarraituko du koalizioak eraikitzen hiriarentzako alternatiba aurrerakoi eta ireki bat. Alternatiba izateko borondate hori azpimarratzeko asmoz, koalizioak Larrionen hautagaitza aurkeztu du alkatea aukeratzeko gaur goizean egin den bozketan, eta hura babestu du. «Beste eredu bat posible da, eta lan egingo dugu egunez egun posible egiteko», adierazi du.

EH Bilduk bozka aurrerakoia kontzentratzera deitu du, Araban eta Gasteizen lehen indarra izatea lortzeko

Larrionek gogoratu du EH Bilduk «alderdi bozkatuena» izan behar duela, «Gasteizen gobernu aurrerakoia eta irekia egongo dela bermatzeko»

| 2019-05-24 12:24:00

EH Bilduko Arabako diputatu nagusigaiak, Kike Fdez. De Pinedok, eta Gasteizko alkategaiak, Miren Larrionek, agerraldia egin dute gaur, amaitzear dagoen hauteskunde kanpainari buruzko iritzia emateko, eta igandeko hauteskundeetan botoa eskuratzeko deia egiteko. Bi hautagaiek boto aurrerakoia aktibatzeko eta kontzentratzeko eskatu dute, Araban zein Gasteizen lehen indarra izatea lortzeko, eta gobernua eratzeko aukera izateko.

Fdez. De Pinedo-k ziurtatu du igande honetan Arabak «berriro ere historia» egin dezakeela bere emaitzekin. «Ordu gutxi batzuk falta dira, azken bultzada geratzen da. Boto aurrerakoia aktibatu, mobizatu eta kontzentratu behar dugu. Ezkerreko botoa aktibatu, mobiizatu eta kontzentratu behar dugu. Hiru premisa horiek betetzen baditugu, Arabak berriro ere historia egingo du igandean. Igandean hiru premisa horiek betetzen baditugu, bete egingo da hamarkadaz hamarkada egin den lan eraldatzailearen ametsa. Herrialdean aro berri bat zabalduko dugu azkenik», azpimarratu du hautagaiak.

Bestalde, Larrion-ek gogoratu du EH Bilduren konpromisoa dela Gasteizen gobernu aurrerakoi eta ireki bat osatzea, eta azpimarratu du hori lortzeko berme bakarra dela igandean hiriko indar bozkatuena izatea: «Igande honetan aukera handia dugu udala hiritarren zerbitzura jartzeko. Jendearentzako aukera berrien itsaso zabala nahi dugu. Eta itsaso hori tantaz tanta beteko dugu, bozkaz bozka. Gobernu aurrerakoia eta irekia bermatzeko, EH Bilduk alderdi bozkatuena izan behar du. Nahikoa da bigarrenak baino boto bat gehiago lortzea. Horregatik esaten diogu jendeari: zure bozka erabakigarria da. Zure bozka da gehiengoa emango duena. Zure botoa da aukera berrien itsaso zabala irekiko duena».

Kanpainari dagokionez, Fdez de Pinedo-k adierazi du «asteak» damaratzatela herrialdean mugitzen, ez bakarrik kanpainan, eta ilusioa ikusten ari direla nonnahi: «Herrialdea zeharkatu dugu herriz herri, eta ilusioa ikusten dugu, jendea pozik dago, eta indartu egin nahi du 2011n abiatu zen olatu eraldatzailea. Geure eskuetan dago. Sinesten genuen ametsa oso hurbil dago».

Larrion pozik agertu da bere kanpainak hirian izan duen harrerarekin, eta baita ere hiritarrengandik jaso dituen babesekin eta ekarpenekin: «Proiektu berriei buruz hitz egiten kanpaina egin dugu, proiektuz beteriko Gasteiz bat nahi dugulako, norabide berri batekin. Besteekin adeitsua izan den kanpaina egin dugu, sinesten dugulako ezberdinen artean egindako Gasteiz batean. Etengabeko irribarre batekin egin dugu kanpaina, etorkizunean denok irribarretsu izango garen Gasteiz bat delako geure helburua».

ALBISTEAK

Udal gobernuaren arduragabekeriak eta utzikeriak bizikleta-lonjen proiektu bat aurrera eramatea eragotzi duela salatu du EH Bilduk

2021-02-15 11:20:00

Proiektua, jada esleituta zegoena, Florida kaleko 28. eraikinerako pentsatuta zegoen, baina EIT negatiboa du, gobernuak, jabe nagusia izan arren, konpondu ez duena.

Martxoaren 3ko eliza: hor eta orain

2021-02-10 11:51:00

Miren Larrion, EH Bilduko bozeramailea Gasteizko Udalean

EH Bilduk ostalarientzako 600.000 euroko laguntza zuzenen funts bat sortzea proposatu du

2021-02-09 10:33:00

Rocio Vitero: "Terrazen tasaren salbuespen proposamena ez da nahikoa, alde batera uzten duelako terrazarik ez duen ostalaritzaren zatia, hain zuzen ere, kaltetuena. Sektore osora iritsiko diren laguntzak behar dira".

Miren Larrion: "Aldaialdek konponbide bat behar du lehenbailehen, eta EAJk ezin die familiei iruzur egiten jarraitu"

2021-02-08 12:23:00

Aldaialde HLHI eraikitzeko premiazko irtenbidea eskatu du EH Bilduk alkatearen agerraldian, ikastetxeko familiek gehiago itxaron behar ez izateko.