Felix Gonzalez: «Gautxori gaueko zerbitzuaren ibilbidea pandemiaren aurreko baldintza berberetan jarri behar da martxan, eta ordutegia ostalaritza ixteko ordutegira egokitu behar da»

| 2021-06-21 09:09:00

TUVISAren Administrazio Kontseiluaren hurrengo bileran, EH Bilduk Gautxori gaueko zerbitzua asteburuetan eta jaiegun bezperetan pandemiaren aurreko baldintzetan berehala martxan jartzea eskatuko du, ibilbideari dagokionez. Ordutegiei dagokienez, Felix Gonzalez EH Bilduko bozeramaile eta TUVISAko kontseilariak esan du horiek osasun agintariek ostalaritzako itxieren inguruan ezartzen dituzten irizpideetara egokitzen joan beharko direla. «Zerbitzuaren kalitatea bermatzeko, ordutegiak dekretu berrietara egokitu behar dira, zerbitzua ostalaritzako itxiera ordutegia baino zertxobait gehiago luzatu behar dela ulertuta», adierazi du Gonzalezek.

EH Bilduk, beraz, proposamena Administrazio Kontseiluaren hurrengo bilerarako gehitzea eskatuko du. EH Bilduko bozeramaileak nabarmendu duenez, «TUVISA zerbitzua herritarren eskarira egokitu behar da, betiere osasun agintariek ezarritako irizpideak errespetatuz. Horrela, uste dugu Gautxori gaueko zerbitzuaren ibilbidea pandemiaren aurreko baldintza berberetan jarri behar dela martxan, eta ordutegia ostalaritza ixteko ordutegira egokitu behar dela».

EH Bilduk salatu du EAJk, SHESAren bitartez, aurrera jarraitzen duela Armentia 2ko gas putzuaren helegitearekin

Amancay Villalba: «Gauza bat esan eta kontrakoa egiten dute. Esaten zuten ez zutela aurrera jarraituko gasaren esplorazioarekin eta, hala ere, aurrera jarraitzen dute helegitearekin. EAJren enegarren engainua da, eta beste behin ere bere obsesio gasistikoak inposatu nahi dizkio arabarren borondateari».

| 2021-06-17 09:49:00

EH Bilduk salatu duenez, EAJk, SHESAren bitartez, aurrera jarraitzen du Armentia-2 gas-putzuaren jarduera lizentzia ukatzeagatik Gasteizko Udalaren aurka jarritako administrazioarekiko auzi-errekurtsoarekin, EH Bilduko kideei udal aholkularitza juridikoko arduradunak ziurtatu bezala.

 

Klima Aldaketaren eta Trantsizio Energetikoaren Legea onartu ostean, Arantxa Tapia Ekonomiaren Garapen eta Ingurumen sailburuak esan du «zentzurik ez» duela lurpean gasa esploratzen jarraitzeak, baina, egia esan, EAJk, SHESAren bidez, ez du amore eman. «Gauza bat esan eta kontrakoa egiten dute. Esaten zuten ez zutela aurrera jarraituko gasaren esplorazioarekin eta, hala ere, aurrera jarraitzen dute helegitearekin. EAJren enegarren engainua da, eta beste behin ere bere obsesio gasistikoak inposatu nahi dizkio arabarren borondateari. Nahiz eta Tapiak promesak egin, egun Gasteizko Udalak beste lehentasun batzuetara bideratu beharko lituzkeen denbora eta baliabide propioak gai honetarako kontsumitzen jarraitzen du», adierazi du Amancay Villalba EH Bilduko zinegotziak.

 

Ekainaren 9an, EH Bilduk SHESAk aurkeztutako errekurtsoa aztertzeko eskatu zien alkateari eta udal aholkularitza juridikoari. Baina, bai Urtaranek bai aholkularitza juridikoak ukatu diote udal talde honi aipatutako dokumentua ikustea. Horretarako, aholkularitzak "bere dokumentuen [SHESAren abokatuen] eta egiletza intelektualaren konfidentzialtasuna gordetzeko eskubidea" alegatu du. Hala ere, ezkutatzen duena erabateko gardentasun falta da, eta oposizioari bere lana egitea eragozteko beste ahalegin bat, SHESAren abokatuen defentsarako helegite horretarako sarbidea ukatuz. EH Bilduk hurrengo Klimaren aldeko Ekintza Batzordera eramango du gaia.

EH Bilduk adierazi du EAJk eta PSEk HAPOri buruz egindako proposamenak hirigintza hedakorraren eta lurzorua irenstearen aldeko apustuari eusten diola

Felix Gonzalez bozeramaileak Lurralde Departamentuak egindako «negoziazio simulakroa» kritikatu du, eta EH Bilduk hirigintza politikan norabide aldaketa batekin duen konpromisoa berretsi du: «Aurreko plan orokorraren eredu hedatzaile eta kaltegarria atzean uzteko aldaketa adosteko prest jarraitzen du EH Bilduk. Zoritxarrez, gobernuaren proposamenak indarrean dagoen planak baino eraikuntza gehiago egitea ahalbidetzen du, eta etxebizitza babestuaren eta alokairuaren sustapena erabat saihesten du. Hausnartzea bere esku dago».

| 2021-06-16 09:34:00

EH Bildu harrituta eta haserre agertu da Urtaranen gobernuak ekainaren 21eko Hirigintza Batzordean Hiri Antolamenduko Plan Orokor berriaren irizpideen eta helburuen proposamena bozkatzeko hartutako erabakiarekin. EH Bilduren ustez, Lurralde Departamentuak «negoziazio simulazio» bat egin du, eta udal taldeen fede onaz baliatu da. Gobernuak ostiralean erregistratu zuen dokumentua proposamen berriarekin, inori horren berri eman gabe, eta EH Bilduri egindako ekarpenak alderatzeko aukera ukatuz.

Baina okerrena ez dira formak, funtsa baizik. «EAJ eta PSEren gobernuak hazten, lurzorua kontsumitzen eta higiezinen eskaintza handitzen jarraitzearen akatsean jarraitzen du. Paradoxa da HAPO berriak oraingoa baino etxebizitza eskaintza handiagoarekin amaitzea, arlo horretan onartutako eta partekatutako diagnostikoa Gasteizek duen gehiegizko gaitasuna denean», dio Felix Gonzalez bozeramaileak.

Ildo horretan, desklasifikazio orokor bat iragarri arren, gobernuaren proposamenak eutsi egiten dio egungo HAPOan garatu gabeko sektoreetan aurreikusita zeuden 10 etxebizitzatik 9 eraikitzeari. Horrez gain, asmoa da hirigintza-operazioa bultzatzea Campo de los Palaciosen, lurperatzean aurreikusitako eremuan, Lakuan, Salburuan edo Zabalganan ekipamendu-partzelak edo beste aukera gune batzuk berrikusiz.

EH Bilduren ustez, bereziki kezkagarriak dira Urtaranek etxebizitza librearen sustapenaren alde eginiko azken adierazpenak. Agerian uzten dute eragile batzuek egindako presioei erantzuten diela, justuki euren negozio-eredua lurzorua kontsumitzen jarraitzean oinarritzen dutenak eta udalerriko hirigintza zehaztu nahi dutenak egungo egoerara eraman gaituen eraikuntza-ereduari eutsiz, zein ustezko espazio esklusiboak edo modak sortzean oinarritzen den.

Hala, berriz ere lehen eta bigarren mailako hiritarrak dituen Gasteiz batera goaz: hegoaldean gero eta etxebizitza libre esklusibo gehiago, eta hiritik urrutien dauden eremuetan alokatzeko eskaintza egiten da, Eusko Jaurlaritzaren menpe, 9.000 eskatzaile zain daudenean. Era berean, hirigintza-operazio berriak egitea ahalbidetzeak berriro atzeratuko du Salburua eta Zabalgana sendotzeko helburua.

«EH Bilduk proposamen zehatzak egin ditu higiezinen zurrunbiloari aurre egiteko eta etxebizitza babestuari lehentasuna emateko, bereziki, gazte eta adinekoentzako alokairuan eta dotazionaletan, eta Etxebizitzaren Euskal Legeak ezartzen duenaren ildotik. EAJk eta PSEk ez dute legea betetzeko konpromisorik, eta enpresa eraikitzaileen interesei alfonbra gorria jartzearen alde egiten dute», azpimarratu du bozeramaileak.

Planaren nukleo gogorra alde batera utzita, gobernuaren proiektuak beste proiektu kezkagarri batzuk mantentzen ditu. Nahiz eta zenbait puntutan ingurumen mailan garapen iraunkorrago batean aurrera egiteko asmoa ziurtatzen den, nahiz eta zehaztasun gutxirekin, gobernuak berriz ere Forondako Aireportuaren inguruan ingurumenarentzat kaltegarriena den alternatibaren alde egiten du, Zaiako dikea eraikiz.

EH Bilduk ohartarazi zuen HAPO fase erabakigarrian dagoela, eta EAJri eta PSEri eskatu die hausnartzeko eta denbora emateko ahalik eta adostasun zabalena lortzen. «EH Bilduk aldaketa adosteko prest jarraitzen du, egungo plan orokorraren eredu hedatzaile eta kaltegarria atzean uzteko. Zoritxarrez, gobernuaren proposamenak indarrean dagoen planak baino etxebizitza gehiago ahalbidetzen ditu, eta etxebizitza babestuaren eta alokairuaren sustapena erabat saihesten du. Bere eskuan hausnartzea dago».

EH Bilduk bere burua aurkeztu du Gasteizen norabide aldaketa bat nahi dutenekin aliantzak eta akordioak lortzeko

Felix Gonzalez EH Bilduko bozeramaileak deitoratu egin du EAJk eta PSEk ez dietela erantzun Gasteizko herritarren beharrei pandemiak iraun bitartean, «nahiago izan dute esku-frenoa bota, krisiak azeleragailua zapaltzea eskatzen zuenean».

| 2021-06-15 11:29:00

Felix Gonzalez EH Bilduk Gasteizko Udalean duen bozeramaileak legealdi erdiko balantzea egin du gaur ekitaldi batean udal taldeko zinegotziekin batera. EH Bilduk bere burua aurkeztu du Gasteizen norabide aldaketa bat nahi dutenekin aliantzak eta akordioak lortzeko eta “aldaketa eta eraldaketa prozesu horren eragile eta bidelagun” izaten jarraitzeko, Gonzalezek esan bezala. EH Bilduk Udalean duen bozeramaileak azpimarratu duenez, “aurrez aurre ditugun erronka handien aurrean, akordio eta aliantza zabalak partekatzeko prestutasun osoa dugu, geure hiria bestelako norabide batean jartzeko prest dauden eragile politiko eta sozial guztiekin. Ez dugu inor baztertzen. Baldintza bakarra hauxe da: akordio horiek edukia izan behar dute”.

 

EH Bildu prest agertu da etxebizitza eta hirigintza politika aurrerakoiak martxan jartzeko eta trantsizio energetikoa bultzatzeko, berriztagarriak modu ordenatu eta eraginkorrean hedatuz, egungo larrialdi klimatikoari erantzuteko. Bozeramaileak adierazi du EH Bilduk konpromisoa hartu duela zaintza eta zerbitzu sozialak indartzeko eta duintzeko, mugikortasun jasangarria, osasuntsu eta segurua bermatuko duten inbertsioak lortzeko eta udalerriko ekonomia eraldatu nahi duten proiektu estrategikoak garatzen laguntzeko, hala nola, bateriak ekoizteko Gigafaktoriaren proiektua.

 

Bestalde, legealdiaren lehen erdian EAJk eta PSEk osatutako gobernuak hartu duen jarrera deitoratu du Felix Gonzalezek. "Gehiengo absolutua balute bezala jokatu nahi izan dute, oposizioa eta parte-hartzea traba gisa hautemanez. Urtaranek aldebakarreko kudeaketa lehenetsi du eta, argi dago, erabaki txarra izan da", adierazi du bozeramaileak.

 

EH Bilduk kritikatu egin du bi alderdien lehentasun bakarra aurreko legealdian ezarri zutenari jarraipena ematea izan dela. "Gasteizek erantzun sendoa eta eraginkorra behar izan duenean, udal gobernua motz geratu da. Neurriak berandu iritsi dira, eta pandemiaren ondorioak jasan dituzten sektoreei emandako babesa oso eskasa izan da", adierazi du Gonzalezek, eta gaineratu du hala adierazi duela kontu-hartzailearen txostenak ere; izan ere, pandemiari aurre egiteko diru eta erdi gehiago inbertitzeko aukera zutenean, EAJk eta PSEk ez dute hori egin nahi izan. "Nahiago izan dute esku-frenoa botata izan, krisiak azeleragailua zapaltzea eskatzen zuenean. EAJ-PSE formula hasieratik egon da eta dago pentsatuta kudeaketa soilerako. Politika eraldatzaileak bultzatzeko aukera alde batera utzi dute lehen minututik", adierazi du bozeramaileak.

EH Bilduk salatu du Udalak 300.000€ baino gehiago oparitu dizkiola FCCri, eman gabeko zerbitzuetan oinarrituta

Amancay Villalba: «Ia 300.000 ordaindu dizkiogu berandutze-interes gisa FCCri. Multinazional horren etekinak diru publikoz gizentzen ari da Udala, enpresak eman ez dituen zerbitzuengatik eta Urtaranen gobernuak aurre egiten jakin ez duelako».

| 2021-06-10 10:33:00

EH Bilduk salatu du Udalak gaizki jokatu duela eta horrek 300.000€ baino gehiagoko etekina ekarri diola FCC multinazionalari. Aatzerapen-interesei loturiko kontua da azken finean, eta horiengatik eta Udalaren ez-jarduteagatik FCC onura lortzen ari da. Amancay Villalba EH Bilduko zinegotziak adierazi duenez, «Prozedura irregular horiek multinazionalari mesede baino ez diote egiten, diru publikotik diru-sarrerak jasotzen baititu eman gabeko zerbitzuengatik. Aurtengo ekainera arte ia 300.000 ordaindu dizkiogu berandutze-interes gisa FCCri. Multinazional horren etekinak diru publikoz gizentzen ari da Udala, enpresak eman ez dituen zerbitzuengatik eta Urtaranen gobernuak aurre egiten jakin ez duelako».

FCCri esleitu zitzaion kale-garbiketa zerbitzuaren kontratua gatazkan murgilduta egon da hasieratik. 2018an, FCCrekin zuen kontratua bertan behera geratu zen, eta, orduan, Urtaranek esan zuen horrekin batera zerbitzu horri lotutako gatazkekin amaitu nahi zela. Baina, bi urte eta erdi geroago, gatazka hori ez dela desagertu ikusten dugu. «Gatazkarekin jarraitzen dugu eta, gainera, ordaindu egin behar dugu. FCCk errekurtsoa jarri du Udalari igorri dizkion hileroko fakturen aurka. Askotan esan dugu multinazional horiek auzitan jartzeko makinak direla, eta, hain zuzen ere, eskatzen zituzten irabaziak ateratzen ari dira, berandutze-interesen bidez eta eman gabeko zerbitzuengatik».

EH Bilduk jakin izan duenez, hilero, Udaleko zerbitzu teknikoek berrikusten duten faktura bat aurkezten du, emandako zerbitzuak egiaztatzeko eta aurreikusitakoarekin bat datozen ala ez zehazteko. Eman ez diren zerbitzuak fakturatik kentzen dira, eta une horretan jartzen du FCCk faktura bakoitzaren aurkako errekurtsoa eta, gainera, berandutze-interesak eskatzen ditu.

2016tik faktura guztiak errekurrituta daude eta gaur egun ia 300.000 euro dira Udalak ordaindu dituen berandutze-interesak. Gainera, badakigu ez direla ordainduko ditugun berandutze-interes bakarrak, oraindik ere epaiak baitaude irteteko. 2020an jada 201.041,97 €ordaindu dira 20 fakturen berandutze-interesen kontzeptuan, eta 2021ean 63.292,78 €11 fakturaren truke.

Egoera horrek arazo bikoitza dakar. Alde batetik, FCC dirua irabazten ari da Udalaren kontura, zerbitzu bat eskaini gabe eta auzietan oinarrituta. Bestalde, agerian geratzen da gatazka guztiek jatorri bera dutela: eman gabeko zerbitzuak. «Kontratuaren arabera, FCC zerbitzu batzuk betetzen egon behar zuen, eta ez da egiten ari. Eta hori kalean nabaritzen da. Badakigu herritarren postontzia garbitasun faltagatik edo hondakinak ez biltzeagatik kexaz beteta dagoela. FCCk ez du betetzen eta udalak, gainera, ordaindu egiten dio. Hori onartezina da, eta gobernuak horretarako aukera ematen dio», salatu du Villalbak, eta udal zerbitzuentzat eragiten ari den higadura azpimarratu du; izan ere, hilero administrazioarekiko auzietara joaten ari dira, horrek suposatzen dituen giza- eta denbora-baliabideekin.

EH Bilduk berriro defendatu du hori ez dela hiri honek merezi duen kudeaketa-eredua, eta beharrezkoa dela zerbitzu horren kudeaketa zuzenaren alde egitea. Ildo horretan, EH Bilduk kaleak garbitzeko eta hondakinak biltzeko zerbitzuaren bermunizipalizazioari buruzko argudioa indartu besterik ez du egiten.

• «
• 1
• 2
• 3
• 4
• 5
• 6
• 7
• 8
• ...
• 27
• 28
• »