AKTUALITATEA

Olaraneko S14-a eta Zabalganako 5b-a kanpoan uzten dituen lizentzien etendura ez dela nahikoa uste du EH Bilduk

| 2022-01-14 12:41:00

EH Bilduk uste du Urtaranen gobernuak Gasteizko sektore urbanistiko garatu gabeen lizentziak bertan behera uzteko hartutako erabakia ez dela nahikoa. EH Bilduk salatu duenez, plan orokor berriaren proposamenak egungo HAPOko garatu gabeko 10 etxebizitzatik 9 eraikitzeko asmoa mantentzen du. «Onartutako etendura mugatuak posizio hori berresten du, eta, beraz, motz geratzen da, oso motz. Urtaranek ez dio uko egiten ia 4.500 etxebizitza horiek eraikitzeari, eta sektore horietan ere ez du bertan behera uzten lizentziak emateko prozedura: Olaranen 14. sektorea eta Zabalganan 5b sektorea. Hau da, posible litzateke sektore horietan eraikitzeko urratsak hastea plan orokor berria onartu arte itxaron gabe», adierazi du Felix Gonzalez EH Bilduren Gasteizko bozeramaileak.


EH Bilduk, HAPO berriaren proposamenari dagokionez, bere jarrera kritikoari eutsi dio, bizitegi-lurzoruari dagokionez hain zuzen ere. Ez da ulergarria diagnostikoan Gasteizek gehiegizko etxebizitza kantitatea aurreikusita duela ziurtatzea, 30.000 baino gehiago, eta era berean atea irekitzea plan orokor berria are etxebizitza gehiagorekin aurreikusita ateratzea. Ez dauka zentzurik.