Gasteiz

Albisteak

Felix Gonzalez: «Lanean jarraituko dugu gehiengoaren baloreek, esaterako, parekidetasunak, feminismoak, ekologismoak eta justizia sozialak, isla izan dezaten etorkizuneko Gasteizean»


Hamar kide baino gehiago eta Endika Saez de Adana Gasteizko arduradun politiko berri gisa izango dituen udalerriko Mahai Politiko berria berretsi du Gasteizko asanbladak.

| 2021-07-13 10:19:00

EH Bildu Gasteizek batzarra egin du gaur goizean Goiuri Jauregian, eta bertan, militanteek, arduradun politikoek eta udal taldeko kideek hartu dute parte. Batzar horretan, datozen urteetan alderdiak zuzenduko duen mahai politiko berria berretsi dute. Felix Gonzalez EH Bilduk Gasteizko Udalean duen bozeramaileak adierazi duenez, politikan oinarrituta udalerrian gehiengoa duten balio aurrerakoiak bultzatzen jarraitu nahi dute. «Parekidetasuna, feminismoa, ekologismoa eta justizia sozialerako borroka, besteak beste, nagusi dira gure hirian. Lanean jarraituko dugu gehiengoaren jarrera horiek benetako isla izan dezaten etorkizuneko Gasteiz marrazten duten erabaki eta proiektuetan. Posible da hori lortzea: gehiengo sozial eta politiko hori existitzen da».


Gonzalezek aurreratu duenez, EH Bilduk bere jarduera soziala biderkatzeko asmoa du, auzoz auzo, herritar guztiei norabide aldaketa bat lortzeko proiektu eta proposamenetan parte hartuz eta bertatik era guztietako ekarpenak jasoz. «EH Bilduk herritarrengandik hurbil egon nahi du, haiekin planak, proiektuak eta ideiak partekatu nahi ditu eta haiekin batera parte hartu. Auzoz auzo, etorkizuneko Gasteiz eraiki nahi dugu», azaldu du. Iraganeko inertzia kontserbadoreei eusteko tentazioen aurrean, EH Bilduk aldaketa- eta eraldaketa-prozesu horren eragile eta laguntzaile izaten jarraitzearen aldeko apustua egin du, aurrean ditugun erronka handien aurrean.


Halaber, batzarrak Gasteizko Mahai Politikoa berretsi du gaur, eta udal bozeramailearekin batera Endika Saez de Adana udalerriko arduradun politiko berria eta datozen urteetan EH Bilduren jarduera politikoa koordinatzeko ardura hartuko duten hamar bat pertsona egongo dira.