AKTUALITATEA

| 2025-05-22 09:34:00

EH Bilduk TAO arautzen duen ordenantza berrikusteko proposamena aurkeztu du gaur. Proposamen honen helburua neurri honen erabilera sinplifikatzea eta erraztea da, baita egoiliarrei lehentasuna emateko egokitzea ere. Horrela, Ekaitz Diaz de Garayo EH Bilduko zinegotziak bere alderdiaren 3 helburu nagusiak azaldu ditu: «Euskal Herrian Bildu bat dator TAOa arautzen duen ordenantza berrikusteko eta behar berrietara egokitzeko beharrarekin, eta horregatik 17 zuzenketa partzial aurkeztu ditugu, 3 helburu dituztenak: ordenantza sinplifikatzea eta horren erabilera erraztea, inplikatutako eremuan bizi eta lan egiten dutenei lehentasuna ematea, eta TAOren handitzeak ez izatea diru-bilketa helburu».

EH Bildu ados agertu da TAO arautzen duen ordenantza eguneratzeko beharrarekin, «horren berrikuspen sakona eginez eta egungo egoerara egokituz». Izan ere, zinegotziak adierazi duenez, TAOren lehenengo gunea ezarri zenetik, erregulazio hori hiriko hainbat auzotara hedatu da, eta auzo horietan eta mugakideetan aparkatzea baldintzatu du. Hori dela eta, EH Bilduk ordenantzaren 17 zuzenketa partzial erregistratu ditu, hiru bloke handitan bilduta: auzoetan bizi diren eta lan egiten duten pertsonak, autonomoak eta profesionalak, eta TAO sistema hobetzeko neurriak.

Lehenengo blokean, EH Bilduk proposatzen du ezartzen diren TAO gune berrietan, eremu gehienak auzoan bizi diren eta lan egiten duten pertsonentzat gordetzea, plaza berdeei eta berde-laranjari lehentasuna emanez, egoiliarren eta tokiko jarduera komertzialaren artean erabilera orekatuagoa ahalbidetzen baitute. Aitziber Salazar EH Bilduko zinegotziak nabarmendu duenez, ordutegi bereziak dituzten errotazio altuko plazetan, behin ordutegia amaituta, egoiliarren erabilerarako soilik izatea proposatzen dute. «Neurri honek gure zuzenketen ikuspegi berari erantzuten dio: bizilagunak araudiaren erdigunean jartzea eta benetako konponbideak eskaintzea, aparkalekuaren gainean gero eta presio handiagoa dagoen testuinguru batean». Azkenik, "egoiliarrentzako soilik" gisa sailkatutako plazetan, EH Bilduk proposatu du izen horrek benetako balioa izatea: benetan egoiliarrentzat erreserbatuta egotea, salbuespenik gabe, eta beste erabilera batzuetara irekitzen zuen gobernuaren proposamena baliogabetzea.

Pertsona autonomo eta profesionalen multzoan, Salazarrek nabarmendu du «bi berrikuntza handi» dituztela, «kolektibo horrentzako TAO zerbitzuaren erabilera hobetzeko pentsatuta, bere jarduera erraztuz». Horrela, lehenik eta behin, Eguneko Tiketa sortzea planteatzen du, ordenantzak berak jasotzen duen profesional eta autonomoentzako bereizgarri eredu berriari lotuta. «Tiket horrek TAO gunean aparkatzeko aukera emango luke —egoiliarrentzat bakarrik diren plazetan izan ezik—, eta egunero erosi beharko da, Udalak gaitutako sistemen bidez», ziurtatu du. Bestalde, "TAO karga eta deskarga" figura kentzea proposatzen du, hiri osorako karga- eta deskarga-eredu bateratu baten aldeko apustua eginez, Trafikoko Ordenantzak bakarrik araututa, arau-bikoiztasunak saihesteko eta horien aplikatzea errazteko, bai erabiltzaileentzat, bai ikuskatzaileentzat.

Azkenik, EH Bilduk TAO sistemaren hobekuntza orokorrerako neurrien alde egin du, hala nola, etxeko edo premiazko osasun arretarako ibilgailuak TAO ordaintzetik salbuetsita dauden ibilgailuen zerrendan sartzea, zerbitzu publiko gisa egiten duten lana aitortuz. Bloke horretan, halaber, TAO ordenantzan Bizitegi Lehentasuneko Arearen kontzeptua sartzea proposatzen dute, Emisio Gutxiko Eremuaren ordenantzan aurreikusita dagoen lez. Baina neurri horiez gain, zerbitzuan hobekuntzak planteatzen dituen hirugarren blokeak honako gai hauek jasotzen ditu: pertsona batek tiketaren denbora pixka bat gainditzen badu, ordaintzeke duena berehala ordaindu beharko luke app baten bidez, eta, horrela, zehapen gehigarriak saihestuko lirateke.

Azken batean, EH Bilduk azaldu du neurri horiek guztiak TAOren erabilera erraztera eta inplikatutako zonaldeetako egoiliarren eta langileen baldintzak hobetzera bideratuta daudela. Hori bai, Ekaitz Diaz de Garayo EH Bilduko zinegotziak adierazi duenez, TAOren ordenantzaren eztabaida hau gaur egun ezagutzen ez diren beste bi gairekin batera egin beharko litzateke, hala nola, TAOren handitze honetan egingo diren aparkaleku moten banaketa eta tarifen inguruko informazioa. Izan ere, EH Bilduren iritziz, eztabaida hori modu bateratuan egin beharko litzateke, izan ere, gai horiek koalizioaren botoa baldintzatu lezakete.