AKTUALITATEA

| 2022-10-04 10:58:00

EH Bilduk zuzenketa sorta bat proposatu du Udaleko fiskalitateari buruzko eztabaidan. Proposamenaren helburua da pertsonen babesa handitzea ziurgabetasun-une hauetan, eta, aldi berean, zerga ekitatean, larrialdi klimatikoan eta etxebizitza- eta birgaitze-politikan sakontzea. «Helburu horiek betetzeko neurri fiskalak har daitezke eta hartu behar dira», adierazi du Rocio Vitero EH Bilduko zinegotziak. Era berean, esan du EH Bilduk eztabaida fiskalean duen jarrera bi printzipiotan oinarritzen dela: «Alde batetik, uste dugu ez dela unea herritar guztiei zergak eta tasak igotzeko, eta, bestetik, gure tokiko zergetan badagoela tartea ekitatearen, progresibitatearen eta justizia sozialaren bidean sakontzeko».

Babes sozialari dagokionez, EH Bilduk uste du beharrezkoa dela OHZko hobariak eguneratzea eta berrikustea. Joan den ikasturtean indarrean sartu zen OHZko hobari taula berri baten EH Bilduren proposamena, LGSri erreferentziala. Orain, pertsonen arazoak arintzeko, Viterok proposatu du dauden hobariak %5 handitzea, eta taula tasa eta prezio publiko nagusietara zabaltzea ere proposatu du, hala nola zaborren tasara, kirol-jardueretara edo udal-eskoletara.

Ekitatean eta justizia sozialean aurrera egiteko asmoarekin, EH Bilduk proposatu du EJZen igoera progresiboa udalerrian gehien fakturatzen duten enpresentzat; izan ere, hemen koefizientea Bilbok edo Donostiak dutena baino askoz txikiagoa da. OHZn ere, hainbat neurri planteatu dituzte, hala nola elizak dagokiona ordaintzea eta hutsik dauden etxebizitzei errekargua ezartzea. Azken kasu horretan, Viterok argi utzi du: «helburua ez da inor zigortzea, baizik eta hutsik dagoen etxebizitza-parkea mobilizatzea eskaintza hobetzeko, batez ere alokairuarena. Horrela, OHZren %25erainoko kenkaria planteatzen dugu Eusko Jaurlaritzaren programen bidez etxebizitza alokairuan jartzen dutenentzat».

Egungo larrialdi klimatikoaren testuinguruan, EH Bilduk etxebizitzak birgaitzen lagundu nahi du, eraginkortasun energetikoa hobetzeko helburuarekin. Horrela, eraginkortasun energetikoa duten eraikinetan OHZren %50eko eta %25eko kenkariak 3 urtetik 5ra handitzea planteatzen du, eta EIOZn egungo %80tik %90era kenkaria handitzea A kategoria lortzen dutenentzat. Era berean, eta gure auzoetan birgaitze integraleko proiektu berriak egin daitezkeenez, EH Bilduk proiektu horien obrei lotutako kenkaria %60ra handitzea proposatzen du (orain %50ekoa da).

Larrialdi klimatikoaren esparruan, ibilgailuen gaineko zerga berrikusi behar da. Izan ere, Viterok honako hau adierazi du: «Foru araua ez da Bizkaian eta Gipuzkoan bezain progresiboa, potentzia gehien duten ibilgailuei zerga gehiago ezartzea ahalbidetzen duena. Horregatik, ordenantzan gehien kutsatzen duten autoentzako kuota igotzea planteatzen dugu, eta Batzar Nagusietan aldatzea eskatzen dugu». Hala, EH Bilduk ibilgailu elektrikoak erosteko hobaria %95era eta errenta baxuenetarako hibridoena %75era handitzea proposatu du, eta hobaria errenta-mailara egokitzea. Bestalde, eta energia berriztagarrien hedapenari begira, EH Bilduk %25era igo nahi du EJZen hobaria beren ekoizpen-prozesuetan energia garbiak edo kogenerazioa erabiltzen duten enpresentzat.

Azkenik, deigarria da ordenantzak ez direla egokitu udalerriko arau aldaketetara. Horrela, mahaitxoen ordenantza berriak udalerrian itxitura finkoa duten terrazak instalatzeko aukera ematen du, baina tasak ez du instalazio horiek zergapetzea aurreikusten. EH Bilduk uste du espazio publikoaren erabilera eta aprobetxamendu intentsibo horrek beharrezko egiten duela ordenantzan sartzea, ordainketa berezituarekin, aldi baterako estaldurena baino altuagoa.