AKTUALITATEA

EH Bilduk Cubo kaleko 10. zenbakian dauden udal etxebizitzak alokairu sozialera bideratzea eskatu du

| 2025-07-07 08:53:00

EH Bilduk gaur goizean Gasteizko Udaleko hirigintza batzordean salatu duenez, PSEk eta EAJk osatzen duten udal gobernuak Cubo kaleko 10. zenbakiko 8 etxebizitzetatik 5 saldu nahi ditu. Horren aurrean, Gasteizen alokairu erregimeneko etxebizitza babestuen eskaera handia dela eta, higiezin horiek birgaitu eta alokairu sozialera bideratzea eskatu du EH Bilduk.

Xabier Ruiz de Larramendi EH Bilduko zinegotziak adierazi duenez, «etxebizitza eskuratzeko arazo larriaren eta udal-etxebizitzaren parke txikiaren aurrean, gobernuak etxebizitza propioak saltzea eraberritu eta alokairu sozialera bideratu beharrean akats larria da». Gainera, azpimarratu duenez, «azken finean, PSE-EAJ gobernuaren erabakia 5 etxebizitzak lote berean saltzea izan da, hau da, jabe berari. Hortaz, helburua ez da bizitzera sartuko diren pertsonei saltzea, edukitzaile handiek bakarrik lor ditzaketelako». Horrela, EH Bilduk PSE-EAJren gobernuak bere jabetzako etxebizitzak «traba eta zama» gisa ikustea deitoratu du, baliabide baliotsu baten ordez.

Gainera, Cubo kaleko 10. zenbakian, egitura, estalkia, ur-instalazioa eta fatxada konpontzeko hainbat obra egin berri dira. Larramendik azaldu duenez, «obra horiek 98.000€ baino gehiagoko kostua izan dute guztira, eta Udalak ordaindu ditu ia osotasunean». Hala ere, eraikina gaur egun segurua izatea lortu den arren, udal jabetzako 5 etxebizitzek eraberritze bat behar dute erabili aurretik.